Yawˇshuˆ 11 - Akha

Yaˬbiˬ hawˇ-eu aˬ yawꞈ-ahˇ nui ma gm-eu deuˬ-ahˇ Yawˇshuˆ deuˆ gʼaˬ-euˬ

¹ Iˇsaˬleˬlaˆ tsawˇ haˬ deuˬ guiˇ deuˆ gʼaˬ-euˬ gaˇ kawˆ Haˬzawˇ sahˬ paˬ Yaˬbiˬ-ahˇ gaˬ leˇ ngeh, Maˬdoˬ sahˬ paˬ Yawˇbehˆ-ahˇ maˬ ehˇ, Shiˇmyoˬ sahˬ paˬ hawˇ-eu Aˬkaˇshaˆ sahˬ paˬ-ahˇ maˬ ehˇ,

² laꞈ taˆ paw pyawˬ-ahˇ, gawˬ jawˬ gawˬ duˇ deuˬ-ahˇ jawˇ-eu sahˬ paˬ deuˬ-ahˇ maˬ ehˇ, Gaˬliˬlehˇ lah laꞈ oˆ paw Yawˇdaˬ deh kʼawꞈ-ahˇ jawˇ-eu sahˬ paˬ deuˬ-ahˇ maˬ ehˇ, gawˬ jawˬ dawˬ dahˬ-ahˇ jawˇ-eu sahˬ paˬ deuˬ-ahˇ maˬ ehˇ, iˬ ma laˆ shaˆ lawˇ deh paw Dawˇlaˆ meuˬ-euˬ dawˬ peh jawˇ-eu sahˬ paˬ deuˬ-ahˇ maˬ ehˇ, dawˬ tsaꞈ tsaꞈ ahˇ gʼeh-euˬ meh.

³ Yawˇdaˬ lawˇ baˬ kʼoeˇ baˬ heu baˬ-ahˇ jawˇ-eu Kaˬnaˬ tsawˇ haˬ deuˬ-ahˇ maˬ ehˇ, Aˬmawˇliˆ tsawˇ haˬ deuˬ-ahˇ maˬ ehˇ, Heˇtaˆ tsawˇ haˬ deuˬ-ahˇ maˬ ehˇ, Paˬyehˆ tsawˇ haˬ deuˬ-ahˇ maˬ ehˇ, gawˬ jawˬ gawˬ duˇ-ahˇ jawˇ-eu Yeˬbuˇ tsawˇ haˬ deuˬ-ahˇ maˬ ehˇ, Miˇzaˬpaˬ miˇ kʼahˬ Heˬlaˬmoˬ gawˬ jawˬ dawˬ dahˬ-ahˇ jawˇ-eu Hiˇbiˇ tsawˇ haˬ deuˬ-ahˇ maˬ ehˇ, aˬ yawꞈ dawˬ tsaꞈ tsaꞈ ahˇ gʼeh-euˬ meh.

⁴ Aˬ yawꞈ maꞈ-aˬ, aˬ yawꞈ maꞈ-euˬ yehˇ dawˬ tawˆ luꞈ kuˇ uiˬ-awˇ, iˬ ma laˆ shaˆ lawˇ deh-ahˇ jaˆ-eu kʼaˇ shuiꞈ loꞈ-ehˇ myaˬ-eu guiˇ guiˇ maꞈ sheuˬ-awˇ oe-euˬ meh. Mahˬ hawˇ-eu mahˬ laˆ lawˬ deuˬ kʼawꞈ myaˬ dui dui-eu meh.

⁵ Sahˬ paˬ heu deuˬ dawˬ tawˆ luꞈ-euˬ guiˇ guiˇ maꞈ deuˬ gm leˇ-awˇ, Iˇsaˬleˬlaˆ tsawˇ jeuˬ-ahˇ guiˇ deuˆ-eu gʼaˇ duˬ, Meˬloˬ lawˇ gawˆ-ahˇ oe-awˇ, taˆ tsoˆ-awˇ jawˇ-euˬ meh.

⁶ Yawˇshuˆ-ahˇ Sahˬpaˬ Miˬyehˇ ehˇ-eu, “Aˬ yawꞈ maꞈ-ahˇ taˬ guˆ. Ni shawˬ nah heu yamˬ-ahˇ, Iˇsaˬleˬlaˆ tsawˇ jeuˬ gʼaˇ duˬ, aˬ yawꞈ maꞈ dawˬ tawˆ luꞈ-ahˇ ngaˇ sehꞈ ma. Naw maꞈ aˬ yawꞈ maꞈ-euˬ mahˬ deuˬ-ahˇ kuiˇ guˬ yuˇ-awˇ, aˬ yawꞈ maꞈ-euˬ mahˬ laˆ lawˬ deuˬ-ahˇ miˬ dzaˬ ya keuˬ dzeh meh.”

⁷ Kʼoeˇ naˇ, Yawˇshuˆ hawˇ-eu aˬ yawꞈ-euˬ tsawˇ haˬ deuˬ, tsawˇ haˬ kʼoeˇ deuˬ maˬ noeˬ-euˬ gaˇ, Meˬloˬ lawˇ gawˆ-ahˇ le-awˇ guiˇ deuˆ-euˬ meh.

⁸ Sahˬpaˬ Miˬyehˇ neh Iˇsaˬleˬlaˆ tsawˇ haˬ deuˬ-ahˇ tsawˇ haˬ kʼoeˇ deuˬ kʼoeˇ taˆ bi gʼaˬ leˇ-euˬ meh. Iˇsaˬleˬlaˆ tsawˇ haˬ deuˬ aˬ yawꞈ maꞈ-ahˇ deuˆ deuˆ-ehˇ teh-awˇ, laꞈ taˆ paw Miˇsaˬleˬpawˇmeˬ meuˬ hawˇ-euˬ Siˇdoˬ meuˬ-ahˇ keuˆ ni maˬ ehˇ, nahˇ ma doˆ kʼehˬ paw Miˇzaˬpaˬ deh kʼawꞈ-ahˇ keuˆ ni maˬ ehˇ, teh keuˆ gʼeh-euˬ meh. Muiˇ-eu deuˬ tiˬ gʼaˬ-iˬ maˬ dehꞈ-ehˇ pyeuꞈ-iˇ ngeh keuˆ ni, maˬ naˬ leˇ ni guiˇ deuˆ-euˬ meh.

⁹ Sahˬpaˬ Miˬyehˇ neh dawˬ biꞈ taˬ-euˬ loꞈ-ehˇ, tsawˇ haˬ kʼoeˇ deuˬ-ahˇ Yawˇshuˆ jahˇ nehˬ-euˬ meh. Aˬ yawꞈ maꞈ-euˬ mahˬ deuˬ-ahˇ kuiˇ guˬ yuˇ-awˇ, aˬ yawꞈ maꞈ-euˬ mahˬ laˆ lawˬ deuˬ-ahˇ miˬ dzaˬ keuˬ puiˆ dzeh-euˬ meh.

¹⁰ Kʼoeˇ naˇ, Yawˇshuˆ paˇ gʼoꞈ ka le-awˇ, Haˬzawˇ meuˬ-ahˇ deuˆ geuꞈ-awˇ, Haˬzawˇ sahˬ paˬ-ahˇ sehꞈ-euˬ meh. Aˇ yamˬ kʼoeˇ yamˬ laꞈ kʼoeˇ, Haˬzawˇ meuˬ-aˬ, miˇ kʼahˬ kʼoeˇ deuˬ laꞈ kʼoeˇ aˬ cawˬ naˆ maˬ tseˇ kʼaˆ dzehˬ-eu meuˬ pyeuꞈ-eu meh.

¹¹ Tsawˇ haˬ tiˬ gʼaˬ-iˬ maˬ bi dzeuˇ-iˇ ni sehꞈ-awˇ, meuˬ-ahˇ miˬ dzaˬ keuˬ dzeh-euˬ meh.

¹² Sahˬpaˬ Miˬyehˇ-euˬ zaˬ kʼaˆ Moˇseˬ neh dawˬ biꞈ taˬ-euˬ loꞈ-ehˇ, meuˬ kʼoeˇ deuˬ hawˇ-eu sahˬ paˬ kʼoeˇ deuˬ dawˬ tawˆ luꞈ-ahˇ Yawˇshuˆ deuˆ gʼaˬ-awˇ, tsawˇ haˬ yawˬ gʼaˬ na luꞈ-ahˇ sehꞈ jiˇ nehˬ-euˬ meh.

¹³ Yawˇshuˆ neh miˬ dzaˬ keuˬ dzeh-euˬ Haˬzawˇ meuˬ maˬ ngeuˇ naˇ, yaw goˇ-ahˇ kʼaˇ tsoˆ taˬ-euˬ meuˬ deuˬ-ahˇ Iˇsaˬleˬlaˆ tsawˇ haˬ deuˬ miˬ dzaˬ maˬ keuˬ ni bi jaˆ-euˬ meh.

¹⁴ Meuˬ heu deuˬ laꞈ kʼoeˇ jaˆ-eu myawˬ deuˬ hawˇ-eu jeˬ zaˬ deuˬ-ahˇ, Iˇsaˬleˬlaˆ tsawˇ haˬ deuˬ yawˬ ha gʼaˇ duˬ yuˇ geuꞈ-euˬ meh. Ehˇ kʼawꞈ, tsawˇ haˬ tiˬ gʼaˬ-iˬ maˬ bi dzeuˇ-iˇ ni aˬ yawꞈ maꞈ sehꞈ jiˇ-euˬ meh.

¹⁵ Sahˬpaˬ Miˬyehˇ neh Moˇseˬ-ahˇ dawˬ biꞈ taˬ-euˬ loꞈ-ehˇ, Yawˇshuˆ-ahˇ Moˇseˬ dawˬ biꞈ poˆ-awˇ, dawˬ kʼoeˇ deuˬ-ahˇ Yawˇshuˆ naˇ haˬ geuꞈ-euˬ meh. Moˇseˬ-ahˇ Sahˬpaˬ Miˬyehˇ neh dawˬ kʼaˇ biꞈ taˬ-euˬ loꞈ-ehˇ, yawˬ jeˬ na luꞈ aˬ yawꞈ mˇ-euˬ meh.

Yawˇshuˆ neh deuˆ za-euˬ miˇ kʼahˬ

¹⁶ Gawˬ jawˬ gʼaˬ lawˬ deuˬ maˬ ehˇ, laꞈ oˆ pyawˬ hawˇ-eu laꞈ taˆ pyawˬ-ahˇ jaˆ-eu miˇ kʼahˬ maˬ ehˇ, Goˬsheˬ gahˬ kaˬ hawˇ-eu kʼoeˇ-euˬ laꞈ oˆ paw jaˆ-eu gui coˇ ni gʼeh-eu miˇ kʼahˬ maˬ ehˇ, Yawˇdaˬ deh kʼawꞈ maˬ ehˇ, miˇ kʼahˬ kʼahˬ lah ni Yawˇshuˆ deuˆ za-euˬ meh.

^17-18 Miˇ kʼahˬ kʼoeˇ-aˬ, laꞈ oˆ paw pyawˬ-ahˇ Eˬdoˬ meuˬ dawˬ peh jaˆ-eu Haˬlaˆ gawˬ jawˬ-ahˇ neh, laꞈ taˆ paw pyawˬ-ahˇ Heˬlaˬmoˬ gawˬ jawˬ-euˬ laꞈ oˆ Leˬbaˬnoˬ deh kʼawꞈ-ahˇ jaˆ-eu Baˬlaˇgaˆ meuˬ-ahˇ keuˆ ni meh. Miˇ kʼahˬ heu kʼahˬ laꞈ kʼoeˇ jawˇ-eu sahˬ paˬ deuˬ nehˬ-ehˇ Yawˇshuˆ guiˇ gʼawˬ myahˇ ni deuˆ-euˬ meh. Ehˇ kʼawꞈ, aˬ yawꞈ maꞈ dawˬ tawˆ luꞈ-ahˇ aˬ yawꞈ nyehꞈ-awˇ sehꞈ jiˇ-euˬ meh.

¹⁹ Iˇsaˬleˬlaˆ tsawˇ jeuˬ nehˬ-ehˇ guiˇ maˬ deuˆ-euˬ meuˬ-aˬ, Hiˇbiˇ tsawˇ jeuˬ tiˬ paˆ na deuˬ jawˇ-eu Giˇbyoˬ meuˬ tiˬ meuˬ tehꞈ meh. Meuˬ nui deuˬ dawˬ tawˆ luꞈ Iˇsaˬleˬlaˆ tsawˇ haˬ deuˬ neh guiˇ bi deuˆ gʼaˬ jiˇ-euˬ meh.

²⁰ Moˇseˬ-ahˇ Sahˬpaˬ Miˬyehˇ dawˬ biꞈ taˬ-euˬ loꞈ-ehˇ, tsawˇ jeuˬ kʼoeˇ deuˬ-ahˇ geuꞈ-eu jeˬ maˬ ahˇ ni bi laˆ luˬ bi laˆ seˇ jiˇ-awˇ, gʼawˬ shaˬ maˬ gaˬ nehˬ ni bi sehꞈ jiˇ-eu gʼaˇ duˬ, Iˇsaˬleˬlaˆ tsawˇ haˬ deuˬ-ahˇ aˬ yawꞈ maꞈ maˬ guˆ-ehˇ guiˇ deuˆ peuˬ ni, aˬ yawꞈ maꞈ-euˬ nui ma gʼahˇ laˇ ni Sahˬpaˬ Miˬyehˇ jahˇ-euˬ meh.

²¹ Kʼoeˇ ngeh yamˬ-ahˇ, gawˬ jawˬ gawˬ duˇ doe ni jaˆ-eu meuˬ deuˬ pyeuꞈ-eu Heˬbyoˬ meuˬ, Deˬbeuˬ meuˬ hawˇ-eu Aˬnaˬbaˆ meuˬ-ahˇ maˬ ehˇ, Yuˇdaˆ miˇ kʼahˬ hawˇ-eu Iˇsaˬleˬlaˆ miˇ kʼahˬ gawˬ jawˬ gawˬ duˇ doe ni maˬ ehˇ, Yawˇshuˆ le-awˇ, kʼoeˇ gaˇ jawˇ-eu Aˬnaˬkaˆ lehˇ kuˇ-eu huiˬ dui goˇ dui dui-eu tsawˇ jeuˬ-ahˇ laˆ luˬ laˆ seˇ nehˬ-euˬ meh. Aˬ yawꞈ maꞈ hawˇ-eu aˬ yawꞈ maꞈ-euˬ meuˬ deuˬ-ahˇ, geuꞈ-eu jeˬ maˬ ahˇ-ehˇ pyeuꞈ-iˇ ngeh keuˆ ni, Yawˇshuˆ neh laˆ luˬ laˆ seˇ nehˬ-euˬ meh.

²² Iˇsaˬleˬlaˆ miˇ kʼahˬ laꞈ kʼoeˇ Aˬnaˬkaˆ tsawˇ jeuˬ tiˬ gʼaˬ-iˬ maˬ jawˇ ni pyeuꞈ-iˇ-euˬ meh. Ehˇ kʼawꞈ, Gaˬzaˬ meuˬ, Gaˬdaˇ meuˬ hawˇ-eu, Aˬshaˬdoˇ meuˬ-ahˇ ui cuiˆ na dzeˇ yaꞈ-euˬ meh.

²³ Moˇseˬ-ahˇ Sahˬpaˬ Miˬyehˇ dawˬ biꞈ taˬ-euˬ loꞈ-ehˇ, miˇ kʼahˬ kʼoeˇ kʼahˬ kʼahˬ lah ni-ahˇ Yawˇshuˆ deuˆ gʼaˬ-euˬ meh. Miˇ kʼahˬ kʼoeˇ kʼahˬ Iˇsaˬleˬlaˆ tsawˇ haˬ deuˬ-ahˇ Yawˇshuˆ biꞈ-awˇ, tsawˇ jeuˬ aˬ yawꞈ jeuˬ yawꞈ gʼaˇ duˬ, dehˬ biˇ nehˬ-euˬ meh.