Yawˇshuˆ 10 - Akha

Aˬmawˇliˆ tsawˇ haˬ deuˬ-ahˇ guiˇ deuˆ gʼaˬ-euˬ

¹ Yeˬliˇkoˇ meuˬ hawˇ-eu Yeˬliˇkoˇ sahˬ paˬ-ahˇ jahˇ nehˬ-euˬ loꞈ-ehˇ, Aˬiˇ meuˬ-ahˇ kʼawꞈ Yawˇshuˆ deuˆ gʼaˬ-awˇ, geuꞈ-eu jeˬ maˬ ahˇ gaˇ keuˆ ni laˆ luˬ laˆ seˇ nehˬ-euˬ uˬ taꞈ, Aˬiˇ sahˬ paˬ-ahˇ kʼawꞈ sehꞈ-euˬ gaˇ kawˆ Yeˬluˇsaˬlehˬ sahˬ paˬ Aˬdoˬniˇzeˬdehˇ ya gaˬ-euˬ meh. Giˇbyoˬ meuˬ-ahˇ jawˇ-eu tsawˇ haˬ deuˬ kʼawꞈ, Iˇsaˬleˬlaˆ tsawˇ haˬ deuˬ nehˬ-ehˇ saˇ jaˇ dzaˬ-awˇ, aˬ yawꞈ maꞈ nehˬ-ehˇ jawˇ luꞈ-eu gaˇ kawˆ aˬ yawꞈ ya gaˬ-euˬ meh.

² Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ gaˇ kawˆ kʼoeˇ ya gaˬ ngeh, guˆ dui dui-iˇ-euˬ meh. Aˬ jeˬ miˇ neh ehˇ naˇ, Giˇbyoˬ meuˬ-aˬ, sahˬ paˬ baw-eu meuˬ yawˬ meuˬ na luꞈ loꞈ-ehˇ huiˬ-eu meuˬ tiˬ meuˬ pyeuꞈ-eu uˬ taꞈ, Aˬiˇ meuˬ naˆ maˬ tseˇ huiˬ-awˇ, kʼoeˇ gaˇ jawˇ-eu tsawˇ haˬ deuˬ-aˬ, guiˇ deuˆ-eu yaw nya meh.

³ Kʼoeˇ miˇ neh, Heˬbyoˬ sahˬ paˬ Hoˬhamˬ, Jaˬmuˆ sahˬ paˬ Piˇlamˬ, Laˬkiˇshaˆ sahˬ paˬ Jaˬpiˇyaˬ hawˇ-eu, Eˇgaˬloˬ sahˬ paˬ Deˬbeuˬ heu deuˬ jawˇ gaˇ sahˬ paˬ Aˬdoˬniˇzeˬdehˇ tsawˇ haˬ pyehˬ gʼeh-awˇ, heu loꞈ-ehˇ bi tsaꞈ gaˬ-iˇ-euˬ meh.

⁴ “Ngaˇ jawˇ gaˇ oe-awˇ, Giˇbyoˬ meuˬ-ahˇ guiˇ deuˆ-iˇ gaˇ caw ba le-awˬ. Aˬ jeˬ miˇ neh ehˇ naˇ, kʼoeˇ gaˇ jawˇ-eu tsawˇ haˬ deuˬ, Yawˇshuˆ hawˇ-eu Iˇsaˬleˬlaˆ tsawˇ haˬ deuˬ nehˬ-ehˇ saˇ jaˇ dzaˬ-euˬ meh.”

⁵ Aˬmawˇliˆ sahˬ paˬ deuˬ pyeuꞈ-eu Yeˬluˇsaˬlehˬ sahˬ paˬ, Heˬbyoˬ sahˬ paˬ, Jaˬmuˆ sahˬ paˬ, Laˬkiˇshaˆ sahˬ paˬ hawˇ-eu, Eˇgaˬloˬ sahˬ paˬ heu ngaˬ gʼaˬ gm leˇ-awˇ, Giˇbyoˬ meuˬ-ahˇ jawˬ lahˇ-awˇ guiˇ deuˆ-euˬ meh.

⁶ Giˇbyoˬ meuˬ-ahˇ jawˇ-eu tsawˇ haˬ deuˬ, Giˇlaˇgaˬlaˇ-ahˇ sehˬ gʼawˆ gʼawˆ-awˇ loꞈ-eu Yawˇshuˆ jawˇ gaˇ tsawˇ haˬ pyehˬ gʼeh-awˇ, heu loꞈ-ehˇ bi tsaꞈ gaˬ-iˇ-euˬ meh. “Nga maꞈ-ahˇ taˬ byehˇ dzeh nehˬ laꞈ. Yaw kawˇ-ehˇ laˇ-awˇ nga maꞈ-ahˇ caw ba laˇ-awˬ. Nga maꞈ-ahˇ ka kʼoꞈ nehˬ laꞈ-awˬ. Gawˬ jawˬ gawˬ duˇ paw jawˇ-eu Aˬmawˇliˆ tsawˇ jeuˬ sahˬ paˬ dawˬ tawˆ luꞈ gm leˇ-awˇ, nga maꞈ-ahˇ guiˇ deuˆ luꞈ meh.”

⁷ Kʼoeˇ ngeh, nya dui dui-eu yehˇ deuˬ ahˇ leˇ-ehˇ, Yawˇ shuˆ hawˇ-eu aˬ yawꞈ-euˬ guiˇ maꞈ maꞈ lah ni Giˇlaˇgaˬlaˇ-ahˇ neh doˆ-iˇ-euˬ meh.

⁸ Yawˇshuˆ-ahˇ Sahˬpaˬ Miˬyehˇ ehˇ nehˬ-eu, “Aˬ yawꞈ maꞈ-ahˇ taˬ guˆ. Aˬ yawꞈ maꞈ-ahˇ nawˬ-euˬ aˬ laꞈ laꞈ kʼoeˇ ngaˇ a nehˬ taˬ-euˬ ma. Aˬ yawꞈ maꞈ tiˬ gʼaˬ-iˬ nawˬ-ahˇ guiˇ maˬ deuˆ gʼaˬ nya-a.”

⁹ Yawˇshuˆ hawˇ-eu aˬ yawꞈ-euˬ guiˇ maꞈ deuˬ Giˇlaˇgaˬlaˇ-ahˇ neh Giˇbyoˬ meuˬ-ahˇ uˬ ciꞈ miˇ lah-ehˇ le-awˇ, Aˬmawˇliˆ tsawˇ haˬ deuˬ maˬ noeˬ-euˬ gaˇ, ja pyuˬ ni guiˇ deuˆ-euˬ meh.

¹⁰ Iˇsaˬleˬlaˆ tsawˇ haˬ deuˬ-euˬ mehˬ shi, Aˬmawˇliˆ tsawˇ haˬ deuˬ-ahˇ Sahˬpaˬ Miˬyehˇ bi tsawˬ guˆ-iˇ-euˬ meh. Giˇbyoˬ meuˬ-ahˇ, Iˇsaˬleˬlaˆ tsawˇ haˬ deuˬ aˬ yawꞈ maꞈ-ahˇ deuˆ sehꞈ-awˇ, Behˬhawˇleuˬ meuˬ dawˬ peh gawˬ jawˬ gʼaˬ lahˇ paw teh ka gʼeh-awˇ, laꞈ oˆ paw pyawˬ-ahˇ jaˆ-eu Aˬzeˬkaˬ meuˬ hawˇ-eu Maˬgeˬdaˬ meuˬ-ahˇ keuˆ ni deuˆ deuˆ-ehˇ teh-euˬ meh.

¹¹ Iˇsaˬleˬlaˆ tsawˇ haˬ deuˬ-euˬ mehˬ shi Aˬmawˇliˆ tsawˇ haˬ deuˬ gʼaˬ lahˇ caw caw-ehˇ cehˆ ka gʼeh ngeh, Aˬzeˬkaˬ meuˬ-ahˇ keuˆ ni, huiˬ dui dui-eu uˬ yehˇ aˇ siˬ aˬ yawꞈ maꞈ kʼoeˇ taˆ bi ga deh-euˬ meh. Iˇsaˬleˬlaˆ tsawˇ haˬ deuˬ neh sehꞈ-euˬ naˆ maˬ tseˇ, uˬ yehˇ aˇ siˬ bi ga deh-awˇ shiˇ-euˬ myaˬ dzehˬ-eu meh.

¹² Aˬmawˇliˆ tsawˇ haˬ deuˬ kʼoeˇ taˆ Iˇsaˬleˬlaˆ tsawˇ haˬ deuˬ-ahˇ Sahˬpaˬ Miˬyehˇ bi gʼaˬ leˇ ngeh nah, Sahˬpaˬ Miˬyehˇ-ahˇ Yawˇshuˆ dawˬ ngehˬ cawˬ-euˬ meh. Iˇsaˬleˬlaˆ tsawˇ haˬ deuˬ mehˬ shi Yawˇshuˆ ehˇ-eu, “Nahˇ ma-oˇ, Giˇbyoˬ meuˬ kʼoeˇ taˆ naˬ-awˬ. Ba la-oˇ, Aiˬjaˬloˬ deh kʼawꞈ kʼoeˇ taˆ naˬ-awˬ.”

¹³ Muiˇ-eu deuˬ-ahˇ Iˇsaˬleˬlaˆ tsawˇ haˬ deuˬ maˬ deuˆ gʼaˬ kʼoeˇ keuˆ ni, nahˇ ma hawˇ-eu ba la maˬ jiˆ-iˇ ni naˬ-euˬ meh. Jaˬshaˬ sahˬ boꞈ laꞈ kʼoeˇ gaˇ kawˆ kʼoeˇ boꞈ taˬ-euˬ meh. Tiˬ nah nah ga-ehˇ nahˇ ma maˬ ga ahˇ ni, mˬ-euˬ gʼahˇ ceh naˬ leˇ taˬ-awˇ jaˆ-euˬ meh.

¹⁴ Dzeuˇ laˇ-euˬ mehˬ nah paw maˬ ehˇ, aˬ kaˇ dehꞈ daˆ leꞈ-eu mehˬ hu paw maˬ ehˇ, tsawˇ haˬ zaˬ tiˬ gʼaˬ-euˬ ehˇ dawˬ-ahˇ Sahˬpaˬ Miˬyehˇ naˇ haˬ geuꞈ nehˬ-euˬ aˇ nah kʼoeˇ nah loꞈ-ehˇ gʼeh-eu aˇ nah tiˬ nah-iˬ maˬ jaˆ haw-aˬ. Sahˬpaˬ Miˬyehˇ-aˬ, Iˇsaˬleˬlaˆ tsawˇ haˬ deuˬ jawˇ paw pyawˬ-awˇ guiˇ deuˆ-euˬ meh.

¹⁵ Kʼoeˇ naˇ, Yawˇshuˆ hawˇ-eu aˬ yawꞈ-euˬ guiˇ maꞈ deuˬ, Giˇlaˇgaˬlaˇ taˆ-ahˇ gʼoꞈ-iˇ-euˬ meh.

Aˬmawˇliˆ sahˬ paˬ ngaˬ gʼaˬ-ahˇ Yawˇshuˆ nyehꞈ-euˬ

¹⁶ Aˬmawˇliˆ tsawˇ jeuˬ sahˬ paˬ kʼoeˇ ngaˬ gʼaˬ cehˆ buˬ-awˇ, Maˬgeˬdaˬ lo kʼahˬ laꞈ kʼoeˇ dzuˇ zaꞈ luꞈ-eu meh.

¹⁷ Aˬ yawꞈ maꞈ dzuˇ zaꞈ luꞈ-eu aˬ cawˬ mawˇ-awˇ, Yawˇshuˆ-ahˇ ehˇ gaˬ laˇ-euˬ meh.

¹⁸ Yawˇshuˆ ehˇ-eu, “Lo kʼahˬ-euˬ gʼoˆ kʼehˬ-ahˇ kʼaˬ lo lo ma ngawˬ tsoeˬ uiˬ taˬ-awˇ, tiˬ deuˬ bi loꞈ yaꞈ-awˬ.

¹⁹ Ehˇ kʼawꞈ, naw maꞈ kʼoeˇ gaˇ loꞈ loꞈ-ehˇ taˬ jawˇ. Muiˇ-eu deuˬ-euˬ mehˬ nah teh-awˇ, naˇ kʼah paw neh deuˆ-awˬ. Aˬ yawꞈ maꞈ-euˬ meuˬ-ahˇ taˬ bi cehˆ keuˆ. Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ naw maꞈ-ahˇ aˬ yawꞈ maꞈ kʼoeˇ taˆ bi gʼaˬ leˇ nehˬ laꞈ-euˬ meh.”

²⁰ Yawˇshuˆ hawˇ-eu Iˇsaˬleˬlaˆ tsawˇ haˬ deuˬ neh aˬ yawꞈ maꞈ-ahˇ deuˆ sehꞈ-euˬ meh. Ehˇ kʼawꞈ tiˬ paˆ na deuˬ meuˬ meuˬ lahˇ laꞈ kʼoeˇ cehˆ zaꞈ-awˇ, maˬ bi sehꞈ ni cehˆ buˬ-euˬ meh.

²¹ Yawˇshuˆ-euˬ tsawˇ haˬ dawˬ tawˆ luꞈ tiˬ gʼaˬ-iˬ maˬ bi laˆ tahˬ laˆ naˇ ni, Maˬgeˬdaˬ taˆ-ahˇ aˬ yawꞈ jawˇ gaˇ gʼoꞈ keuˆ le-euˬ meh. Miˇ kʼahˬ kʼoeˇ kʼahˬ-ahˇ jawˇ-eu tsawˇ haˬ tiˬ gʼaˬ-iˬ Iˇsaˬleˬlaˆ tsawˇ haˬ deuˬ-ahˇ bahˬ leˇ-eu dawˬ tehꞈ-ehˇ kʼawꞈ maˬ ngehˬ peuˬ-a.

²² Kʼoeˇ naˇ, “Lo kʼahˬ mehˬ kʼehˬ ngawˬ pah-awˇ, sahˬ paˬ kʼoeˇ ngaˬ gʼaˬ-ahˇ ngaˇ jawˇ gaˇ sheuˬ doˆ laꞈ-awˬ” lehˇ Yawˇshuˆ ehˇ-eu meh.

²³ Kʼoeˇ ngeh, aˬ yawꞈ maꞈ lo kʼahˬ pah-awˇ, Yeˬluˇsaˬlehˬ sahˬ paˬ, Heˬbyoˬ sahˬ paˬ, Jaˬmuˆ sahˬ paˬ, Laˬkiˇshaˆ sahˬ paˬ Eˇgaˬloˬ sahˬ paˬ heu deuˬ-ahˇ aˬ yawꞈ jawˇ gaˇ sheuˬ doˆ laꞈ-euˬ meh.

²⁴ Sahˬ paˬ kʼoeˇ deuˬ-ahˇ Yawˇshuˆ jawˇ gaˇ sheuˬ keuˆ laꞈ ngeh, Iˇsaˬleˬlaˆ tsawˇ haˬ dawˬ tawˆ luꞈ-ahˇ aˬ yawꞈ kuˇ uiˬ-awˇ, aˬ yawꞈ nehˬ-ehˇ le-euˬ yaw huiˬ yaw mahˇ deuˬ-ahˇ, “Sahˬ paˬ teu deuˬ-euˬ kawˬ lahˇ-ahˇ aˬ kuiˇ neh nawˬ tehˬ-awˬ” lehˇ ehˇ nehˬ ngeh, aˬ yawꞈ maꞈ nawˬ tehˬ-euˬ meh.

²⁵ Kʼoeˇ naˇ, aˬ yawꞈ-euˬ yaw huiˬ yaw mahˇ deuˬ-ahˇ Yawˇshuˆ ehˇ nehˬ-eu, “Guˆ-eu nui ma maˬ-ehˇ, gʼaˬ baˬ-eu nui ma maˬ ehˇ, naw maꞈ laꞈ kʼoeˇ taˬ bi ahˇ. Yawˬ haˇ yawˬ ha nui jah ahˇ-eu laꞈ kʼoeˇ, kʼaˬ duˬ ni mˇ-awˬ. Aˬ jeˬ miˇ neh ehˇ naˇ, naw maꞈ-ahˇ muiˇ-eu deuˬ dawˬ tawˆ luꞈ-ahˇ, Sahˬpaˬ Miˬyehˇ heu loꞈ-ehˇ jahˇ nehˬ tehꞈ-a.”

²⁶ Kʼoeˇ naˇ, sahˬ paˬ kʼoeˇ deuˬ-ahˇ Yawˇshuˆ sehꞈ-awˇ, aˇ bawˇ ngaˬ bawˇ-ahˇ paꞈ gʼeu-awˇ, uˬ ciꞈ paw keuˆ ni bi ga gʼeu-euˬ meh.

²⁷ Nahˇ ma ga ahˇ ngeh, Yawˇshuˆ dawˬ biꞈ-awˇ, shiˇ taˬ-euˬ sahˬ paˬ kʼoeˇ deuˬ-euˬ gʼawˇ mawˇ bi baꞈ ka-awˇ, aˬ yawꞈ maꞈ neh dzuˇ zaꞈ-euˬ lo kʼahˬ-ahˇ bi biˬ ahˇ-iˇ-euˬ meh. Huiˬ-eu kʼaˬ lo deuˬ neh lo kʼahˬ-ahˇ ngawˬ tsoeˬ-awˇ, iˬ nah keuˆ ni kʼoeˇ loꞈ-ehˇ bi jaˆ-euˬ meh.

Aˬmawˇliˆ miˇ kʼahˬ-ahˇ Yawˇshuˆ deuˆ za-euˬ

²⁸ Kʼoeˇ ngeh nah, Maˬgeˬdaˬ meuˬ-ahˇ Yawˇshuˆ deuˆ-awˇ, meuˬ kʼoeˇ meuˬ-euˬ sahˬ paˬ-ahˇ nyehꞈ-euˬ meh. Meuˬ laꞈ kʼoeˇ kʼaˇ jawˇ-eu tsawˇ haˬ tiˬ gʼaˬ-iˬ maˬ bi dzeuˇ-iˇ ni, yawˬ gʼaˬ na luꞈ-ahˇ sehꞈ-euˬ meh. Yeˬliˇkoˇ sahˬ paˬ-ahˇ jahˇ nehˬ-euˬ loꞈ-ehˇ, Maˬgeˬdaˬ sahˬ paˬ-ahˇ aˬ yawꞈ jahˇ nehˬ-euˬ meh.

²⁹ Kʼoeˇ naˇ, Yawˇshuˆ hawˇ-eu aˬ yawꞈ-euˬ guiˇ maꞈ deuˬ Maˬgeˬdaˬ meuˬ-ahˇ neh luˆ-iˇ-awˇ, Liˇbaˬnahˬ meuˬ-ahˇ deuˆ-iˇ-euˬ meh.

³⁰ Iˇsaˬleˬlaˆ tsawˇ haˬ deuˬ-ahˇ, meuˬ kʼoeˇ meuˬ hawˇ-eu sahˬ paˬ kʼoeˇ gʼaˬ kʼoeˇ taˆ Sahˬpaˬ Miˬyehˇ bi gʼaˬ leˇ-euˬ meh. Kʼoeˇ gaˇ kʼaˇ jawˇ-eu tsawˇ haˬ tiˬ gʼaˬ-iˬ maˬ bi dzeuˇ-iˇ ni aˬ yawꞈ maꞈ sehꞈ-euˬ meh. Yeˬliˇkoˇ sahˬ paˬ-ahˇ jahˇ nehˬ-euˬ loꞈ-ehˇ, sahˬ paˬ kʼoeˇ gʼaˬ-ahˇ aˬ yawꞈ maꞈ jahˇ nehˬ-euˬ meh.

³¹ Kʼoeˇ naˇ, Yawˇshuˆ hawˇ-eu aˬ yawꞈ-euˬ guiˇ maꞈ Liˇbaˬnahˬ meuˬ-ahˇ neh luˆ-iˇ-awˇ, Laˬkiˇshaˆ meuˬ-ahˇ jawˬ lahˇ-awˇ deuˆ-euˬ meh.

³² Guiˇ deuˆ-eu nyiˬ nah tiˬ nah keuˆ laˇ ngeh, Iˇsaˬleˬlaˆ tsawˇ haˬ deuˬ-ahˇ, Laˬkiˇshaˆ meuˬ kʼoeˇ taˆ Sahˬpaˬ Miˬyehˇ bi gʼaˬ leˇ-euˬ meh. Liˇbaˬnahˬ meuˬ-ahˇ aˬ yawꞈ maꞈ jahˇ nehˬ-euˬ loꞈ-ehˇ, meuˬ kʼoeˇ meuˬ laꞈ kʼoeˇ jawˇ-eu tsawˇ haˬ tiˬ gʼaˬ-iˬ maˬ bi dzeuˇ-iˇ ni sehꞈ-euˬ meh.

³³ Laˬkiˇshaˆ meuˬ-ahˇ caw ba-eu lehˇ, Geˬzeuˬ sahˬ paˬ Hawˇlamˬ laˇ-euˬ meh. Ehˇ kʼawꞈ, aˬ yawꞈ hawˇ-eu aˬ yawꞈ-euˬ guiˇ maꞈ-ahˇ Yawˇshuˆ deuˆ gʼaˬ-awˇ, dawˬ tawˆ luꞈ-ahˇ sehꞈ jiˇ nehˬ-euˬ meh.

³⁴ Kʼoeˇ naˇ, Yawˇshuˆ hawˇ-eu aˬ yawꞈ-euˬ guiˇ maꞈ deuˬ Laˬkiˇshaˆ meuˬ-ahˇ neh luˆ-iˇ-awˇ, Eˇgaˬloˬ meuˬ-ahˇ le-awˇ, jawˬ lahˇ-awˇ deuˆ-euˬ meh.

³⁵ Aˬ yawꞈ ngeh nah neh meuˬ kʼoeˇ meuˬ-ahˇ aˬ yawꞈ maꞈ deuˆ gʼaˬ-awˇ, Laˬkiˇshaˆ meuˬ-ahˇ jahˇ nehˬ yaꞈ-euˬ loꞈ-ehˇ, tiˬ gʼaˬ-iˬ maˬ bi dzeuˇ-iˇ ni sehꞈ-euˬ meh.

³⁶ Kʼoeˇ naˇ, Yawˇshuˆ hawˇ-eu aˬ yawꞈ-euˬ guiˇ maꞈ deuˬ Eˇgaˬloˬ meuˬ-ahˇ neh luˆ-iˇ-awˇ, gawˬ jawˬ gawˬ duˇ paw le daˆ-awˇ, Heˬbyoˬ meuˬ-ahˇ deuˆ-euˬ meh.

³⁷ Meuˬ kʼoeˇ meuˬ-ahˇ aˬ yawꞈ maꞈ deuˆ gʼaˬ-awˇ, meuˬ kʼoeˇ meuˬ-euˬ sahˬ paˬ hawˇ-eu kʼoeˇ gaˇ jawˇ-eu tsawˇ haˬ yawˬ gʼaˬ na luꞈ maˬ ehˇ, meuˬ kʼoeˇ meuˬ-euˬ dawˬ peh jaˆ-eu meuˬ deuˬ-ahˇ kʼaˇ jawˇ-eu tsawˇ haˬ yawˬ gʼaˬ na luꞈ maˬ ehˇ, sehꞈ jiˇ-euˬ meh. Eˇgaˬloˬ meuˬ-ahˇ jahˇ nehˬ-euˬ loꞈ-ehˇ, meuˬ kʼoeˇ meuˬ-ahˇ kʼawꞈ, geuꞈ-eu jeˬ maˬ ahˇ gaˇ keuˆ ni YawˇShuˆ laˆ luˬ laˆ seˇ nehˬ-euˬ meh. Kʼoeˇ gaˇ jawˇ-eu tsawˇ haˬ tiˬ gʼaˬ-iˬ maˬ bi dzeuˇ-iˇ ni sehꞈ jiˇ nehˬ-euˬ meh.

³⁸ Kʼoeˇ naˇ, Yawˇshuˆ hawˇ-eu aˬ yawꞈ-euˬ guiˇ maꞈ deuˬ, Deˬbeuˬ meuˬ-ahˇ gʼoꞈ le-awˇ deuˆ le-euˬ meh.

³⁹ Meuˬ kʼoeˇ meuˬ hawˇ-eu, meuˬ kʼoeˇ meuˬ-euˬ sahˬ paˬ-ahˇ maˬ ehˇ, dawˬ peh jaˆ-eu meuˬ dawˬ tawˆ luꞈ-ahˇ maˬ ehˇ, aˬ yawꞈ deuˆ gʼaˬ-awˇ, kʼoeˇ gaˇ kʼaˇ jawˇ-eu tsawˇ haˬ yawˬ gʼaˬ na luꞈ-ahˇ sehꞈ-euˬ meh. Heˬbyoˬ meuˬ-ahˇ maˬ ehˇ, Liˇbaˬnahˬ meuˬ hawˇ-eu Liˇbaˬnahˬ sahˬ paˬ-ahˇ maˬ ehˇ, aˬ yawꞈ neh jahˇ nehˬ-euˬ loꞈ-ehˇ, Deˬbeuˬ meuˬ hawˇ-eu Deˬbeuˬ sahˬ paˬ-ahˇ jahˇ nehˬ-euˬ meh.

⁴⁰ Miˇ kʼahˬ kʼoeˇ kʼahˬ kʼahˬ lah ni-ahˇ Yawˇshuˆ deuˆ gʼaˬ-euˬ meh. Gawˬ jawˬ gawˬ duˇ-ahˇ jawˇ-eu sahˬ paˬ deuˬ-ahˇ maˬ ehˇ, nahˇ ma doˆ kʼehˬ paw jaˆ-eu gawˬ jawˬ baˬ gʼa deuˬ-ahˇ jawˇ-eu sahˬ paˬ deuˬ-ahˇ maˬ ehˇ, nahˇ ma doˆ kʼehˬ paw jaˆ-eu deh ga deuˬ-ahˇ jawˇ-eu sahˬ paˬ deuˬ-ahˇ maˬ ehˇ, laꞈ oˆ paw pyawˬ-ahˇ, gui coˇ ni gʼeh-eu miˇ kʼahˬ-ahˇ jawˇ-eu sahˬ paˬ deuˬ-ahˇ maˬ ehˇ, aˬ yawꞈ deuˆ gʼaˬ-euˬ meh. Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ neh dawˬ biꞈ taˬ-euˬ loꞈ-ehˇ, tsawˇ haˬ tiˬ gʼaˬ-iˬ maˬ bi dzeuˇ-iˇ ni aˬ yawꞈ sehꞈ-euˬ meh.

⁴¹ Laꞈ oˆ paw pyawˬ-ahˇ jaˆ-eu Kaˬdeˬshaˇbaˬneˬ meuˬ-ahˇ neh Goˬsheˬ gahˬ kaˬ dawˬ tawˆ luꞈ ahˇ leˇ-ehˇ, iˬ ma laˆ shaˆ lawˇ deh dawˬ peh Gaˬzaˬ meuˬ-ahˇ keuˆ ni maˬ ehˇ, laꞈ taˆ paw pyawˬ-ahˇ, Giˇbyoˬ meuˬ-ahˇ keuˆ ni maˬ ehˇ, Yawˇshuˆ guiˇ deuˆ keuˆ-euˬ meh.

⁴² Yawˇshuˆ tiˬ poˆ gʼoˆ doˆ leˇ-euˬ laꞈ kʼoeˇ, sahˬ paˬ heu deuˬ dawˬ tawˆ luꞈ hawˇ-eu aˬ yawꞈ maꞈ-euˬ miˇ kʼahˬ deuˬ-ahˇ deuˆ gʼaˬ-euˬ meh. Aˬ jeˬ miˇ neh ehˇ naˇ, Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ-aˬ, Iˇsaˬleˬlaˆ tsawˇ jeuˬ gʼaˇ duˬ guiˇ deuˆ luꞈ-eu meh.

⁴³ Kʼoeˇ naˇ, Yawˇshuˆ hawˇ-eu aˬ yawꞈ-euˬ guiˇ maꞈ deuˬ Giˇlaˇgaˬlaˇ taˆ-ahˇ gʼoꞈ-iˇ-euˬ meh.