Yawˇnaˆ 4 - Akha

Yawˇnaˆ-euˬ nui pehˇ hawˇ-eu Miˬyehˇ-euˬ nui gaˬ

¹ Miˬyehˇ nui ma paˇ laˇ-awˇ, Niˇnaˬbeˬ meuˬ-ahˇ jawˇ-eu tsawˇ haˬ deuˬ-ahˇ maˬ kʼehˬ nehˬ-euˬ miˇ neh, Yawˇnaˆ nui kʼahˇ maˬ shiˇ-ehˇ nui ma pehˇ-euˬ meh.

² Kʼoeˇ miˇ neh, aˬ yawꞈ heu loꞈ-ehˇ guiˬ lahˬ shaˇ-euˬ meh. “Sahˬpaˬ Miˬyehˇ -oˇ, ngaˇ iˇ kahˇ-ahˇ neh ma gʼoˆ doˆ le mi naˆ-ehˇ nawˇ heu loꞈ-ehˇ jahˇ tehꞈ-a lehˇ ngaˇ ehˇ-euˬ maˬ ngeuˇ-a loˇ. Kʼoeˇ miˇ neh Saˬbeˬ miˇ kʼahˬ paw cehˆ byoˆ-eu lehˇ ngaˇ leh jeh-euˬ ma. Nawˇ-aˬ, gʼoeˇ-eu gaˬ-eu jeˬ byah-eu gʼawˬ shaˬ gaˬ nya-eu Miˬyehˇ pyeuꞈ-awˇ, aˬ myah luꞈ nui ma gʼawˬ mahˇ ni taˬ-awˇ gʼawˬ shaˬ gaˬ nehˬ nya-eu uˬ taꞈ, aˬ myah luꞈ nui ma paˇ laˇ nya-awˇ, maˬ kʼehˬ maˬ kʼaˆ nehˬ ni byehˇ-eu meh.

³ Sahˬpaˬ Miˬyehˇ-oˇ, ngaˬ-ahˇ bi shiˇ laꞈ-awˬ. Dehꞈ-eu naˆ maˬ tseˇ shiˇ-eu-aˬ, ngaˬ-euˬ gʼaˇ duˬ zaˬ dzehˬ miˇ-a.”

⁴ Yawˇnaˆ-ahˇ Sahˬpaˬ Miˬyehˇ naˇ haˬ-eu,“Nawˇ aˬ jeˬ nui ma pehˇ kʼaˇ za te.”

⁵ Yawˇnaˆ-aˬ, meuˬ-euˬ nahˇ ma doˆ kʼehˬ paw iˇ doˆ gʼeh-awˇ nuiˇ-euˬ meh. Aˬ yawꞈ sehˬ gʼawˆ gʼawˆ zaˬ gʼawˆ-awˇ, kʼoeˇ-euˬ naˇ shmˇ laꞈ kʼoeˇ nuiˇ-awˇ, Niˇnaˬbeˬ meuˬ aˬ joˆ-ehˇ pyeuꞈ laˇ gaˇ haw-eu lehˇ loꞈ luꞈ-eu meh.

⁶ Kʼoeˇ ngeh, Sahˬpaˬ Miˬyehˇ pyeuꞈ-eu Miˬyehˇ-aˬ, Yawˇnaˆ yaw saˇ saˇ-ehˇ naˬ nya ni naˇ shmˇ bi shmˇ-eu gʼaˇ duˬ aˇ bawˬ tiˬ bawˬ aˬ yawꞈ kʼoeˇ taˆ bi dehꞈ laˇ-euˬ meh. Yawˇnaˆ-aˬ, aˇ bawˬ kʼoeˇ bawˬ-ahˇ nui kʼahˇ shiˇ dui dui-eu meh.

⁷ Ehˇ kʼawꞈ, yawˬ nah yawˬ mˬ bya laˇ ngeh, aˬ juˬ tiˬ mawˇ-ahˇ Miˬyehˇ kʼehˇ-awˇ, aˇ bawˬ kʼoeˇ bawˬ-ahˇ bi dzaˬ sehꞈ-euˬ meh.

⁸ Nahˇ ma goˇ laˇ ngeh, nahˇ ma doˆ kʼehˬ paw-euˬ lahˇ dui dui-eu jaˬ lehˇ-ahˇ Miˬyehˇ pyehˬ gʼeh laꞈ-euˬ miˇ neh, Yawˇnaˆ-euˬ uˬ duˬ-ahˇ nahˇ tsaˇ zaw dui dui leˇ-awˇ, myaꞈ leˇ paˬ-ehˇ pyeuꞈ-iˇ-euˬ meh. Kʼoeˇ ngeh, ya shiˇ law nmˇ-aˬ gʼaˬ miˇ-a lehˇ aˬ yawꞈ noeˬ-awˇ, “Dehꞈ-eu naˆ maˬ tseˇ shiˇ-eu-aˬ ngaˬ-euˬ gʼaˇ duˬ zaˬ miˇ-a” lehˇ ehˇ-eu meh.

⁹ Ehˇ kʼawꞈ, “Aˇ bawˬ teu bawˬ-ahˇ taꞈ leˇ-awˇ nawˇ aˬ jeˬ nui ma pehˇ kʼaˇ za te” lehˇ aˬ yawꞈ-ahˇ Miˬyehˇ ehˇ nehˬ-euˬ meh. Yawˇnaˆ ehˇ-eu, “Ngaˇ nui ma pehˇ kʼaˇ za tehꞈ-a. Shiˇ paˬ-ehˇ pehˇ dui dui laˇ nya.”

¹⁰ Sahˬpaˬ Miˬyehˇ ehˇ-eu, “Aˇ bawˬ heu bawˬ-aˬ, uˬ ciꞈ tiˬ miˇ laꞈ kʼoeˇ dehꞈ laˇ-awˇ, yawˬ miˇ yawˬ-ahˇ shiˇ-euˬ meh. Aˇ bawˬ kʼoeˇ bawˬ-ahˇ nawˇ tiˬ jeˬ-iˬ maˬ jahˇ nehˬ-ehˇ, aˇ bawˬ kʼoeˇ bawˬ dehꞈ laˇ ni nawˬ neh mˇ-euˬ maˬ ngeuˇ kʼawꞈ, kʼoeˇ-euˬ gʼaˇ duˬ nawˇ nui ma tiˬ pawꞈ-iˬ maˬ saˇ-a.

¹¹ Toˆ-ehˇ ngeuˇ naˇ, huiˬ dui dui-eu Niˇnaˬbeˬ meuˬ kʼoeˇ meuˬ-ahˇ ngaˇ aˇ naˆ ni gʼawˬ shaˬ gaˬ paˬ-ehˇ gʼeh-eu nga. Meuˬ kʼoeˇ meuˬ laꞈ kʼoeˇ iˬ baˇ maˬ ahˇ-eu zaˬ yaw nyiˇ tiˬ seh nyiˬ muiˇ gʼaˬ dzehˬ ni jawˇ-awˇ, jeˬ zaˬ kʼawꞈ myaˬ dui dui-eu meh.”