Yawˇnaˆ 2 - Akha

Yawˇnaˆ-euˬ guiˬ lahˬ shaˇ dawˬ

¹ Ngaˬ shaˬ-euˬ uˬ maˆ laꞈ kʼoeˇ uˇ-awˇ, aˬ yawꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ Yawˇnaˆ heu loꞈ-ehˇ guiˬ lahˬ shaˇ-euˬ meh.

² “Nui ma cawˆ dui dui-eu laꞈ kʼoeˇ, Sahˬpaˬ Miˬyehˇ-ahˇ ngaˇ kuˇ ngeh, kuˇ dawˬ naˇ haˬ nehˬ laꞈ-euˬ meh. Shiˇ-eu miˇ kʼahˬ dawˬ dah uˇ-awˇ, caw ba nehˬ laꞈ lehˇ ngaˇ shaˇ ngeh, shaˇ dawˬ naˇ haˬ nehˬ laꞈ-eu meh.

³ Naꞈ dui dui-eu laˆ shaˆ dawˬ dah, nawˇ ngaˬ-ahˇ biˬ puꞈ nehˬ laꞈ-awˇ, ngaˬ-euˬ tiˬ jawˬ iˇ cuꞈ tehꞈ meh. Nawˬ-euˬ iˇ tahˬ iˇ luˆ dawˬ tawˆ, ngaˬ-euˬ kʼoeˇ taˆ cehˆ tsehˆ luꞈ meh.

⁴ Nawˬ-euˬ myaˆ pyawˬ maˬ ya mawˇ gaˇ, nawˇ ngaˬ-ahˇ byehˇ dzeh nehˬ laꞈ-awˇ, nawˬ-euˬ Uˬ duˬ tahˬ nymˇ yaw shawˇ, maˬ paˇ ya mawˇ haw-eu miˇ-a.

⁵ Iˇ cuꞈ ngaˬ-ahˇ dahˬ suꞈ leꞈ-awˇ, laˆ shaˆ dahˬ pymˬ sehꞈ-iˬ miˇ-a. Laˆ shaˆ jaˆ guˬ jaˆ gaˆ deuˬ neh, uˬ duˬ-ahˇ lahˇ cuꞈ-euˬ miˇ-a.

⁶ Gawˬ jawˬ ciˇ tahˬ dawˬ dah jaˆ-awˇ, gʼoˆ kaꞈ tiˬ jawˇ-iˬ maˬ pah-eu, miˇ kʼahˬ-ahˇ ngaˇ ga keuˆ-euˬ kʼawꞈ, naꞈ-eu miˇ oˆ miˇ kʼahˬ-ahˇ neh, ngaˬ-euˬ Miˬyehˇ Sahˬpaˬ Miˬyehˇ, ngaˬ-ahˇ sheuˬ kʼoꞈ doˆ laꞈ-euˬ meh.

⁷ Ngaˇ shiˇ leˇ-eu myaꞈ leˇ luꞈ-awˇ, nawˬ-ahˇ ngaˇ guiˬ lahˬ shaˇ ngeh jawˇ, muiˬ-eu shawˇ-eu Uˬ duˬ tahˬ nymˇ, laꞈ kʼoeˇ jawˇ-awˇ nawˇ gaˬ-euˬ meh.

⁸ Poeˬ maˬ baw-eu mˇ myawˬ pyeuꞈ-eu, tahˬ pahˬ aˬ ma mawˇ kawˇ deuˬ-ahˇ, uˬ duˬ tahˬ-eu tsawˇ haˬ kʼoeˇ deuˬ, nawˬ-ahˇ saˇ jaˇ puiˬ jiˇ-euˬ meh.

⁹ Ehˇ kʼawꞈ, nawˬ-ahˇ ngaˇ ja ceuˬ-awˇ, nawˬ-ahˇ lawˇ-eu shehˇ-eu laꞈ kʼoeˇ, nawˬ-ahˇ saˇ jaˇ dzaˬ taˬ-euˬ jeˬ, maˬ byehˇ dzeh ni ngaˇ mˇ byah ma. Ka kʼoꞈ-eu guiˬ lahˬ yaw dzahˇ-aˬ, Sahˬpaˬ Miˬyehˇ neh biꞈ-euˬ meh.”

¹⁰ Kʼoeˇ naˇ, Yawˇnaˆ-ahˇ lawˇ deh-ahˇ meh dzeh doˆ-eu gʼaˇ duˬ ngaˬ shaˬ kʼoeˇ mawˇ-ahˇ Sahˬpaˬ Miˬyehˇ dawˬ biꞈ-awˇ, ngaˬ shaˬ kʼoeˇ mawˇ Yawˇnaˆ-ahˇ meh dzeh doˆ-euˬ meh.