Yawˇnaˆ 1 - Akha

Sahˬpaˬ Miˬyehˇ-euˬ ehˇ dawˬ-ahˇ Yawˇnaˆ maˬ naˇ haˬ-eu

¹ Aˬmiˇtehˇ-euˬ aˬ li Yawˇnaˆ jawˇ gaˇ, Sahˬpaˬ Miˬyehˇ-euˬ dawˬ heu loꞈ-ehˇ keuˆ le-euˬ meh.

² “Huiˬ dui dui-eu Niˇnaˬbeˬ meuˬ-ahˇ iˇ-awˇ, ‘Naw maꞈ iˬ baˇ naꞈ dui dui meh’ lehˇ ehˇ nehˬ-iˇ-awˬ. Kʼoeˇ gaˇ jawˇ-eu tsawˇ haˬ deuˬ aˇ naˆ ni maˬ tsaˬ maˬ dawˇ-eu gaˇ kawˆ ngaˇ siˬ duˬ luꞈ ma.”

³ Ehˇ kʼawꞈ, Yawˇnaˆ-aˬ, Sahˬpaˬ Miˬyehˇ maˬ mawˇ gaˇ cehˆ byoˆ-eu lehˇ, yawˬ paw yawˬ iˇ gʼeh-euˬ meh. Yuˇbeˬ meuˬ-ahˇ aˬ yawꞈ iˇ-awˇ, Saˬbeˬ miˇ kʼahˬ-ahˇ iˇ-eu lehˇ gʼeh luꞈ-eu saˇ baoˬ tiˬ laˇ iˇ puˬ-euˬ meh. Aˬ yawꞈ saˇ baoˬ dziˬ poeˬ biꞈ-awˇ, saˇ baoˬ kʼoeˇ taˆ gaˇ mˇ-eu tsawˇ haˬ deuˬ nehˬ-ehˇ dziˬ leˇ-awˇ, (Saˬbeˬ miˇ kʼahˬ-ahˇ) Sahˬpaˬ Miˬyehˇ maˬ mawˇ gaˇ cehˆ byoˆ-eu lehˇ iˇ gʼeh-euˬ meh.

⁴ Ehˇ kʼawꞈ, Sahˬpaˬ Miˬyehˇ neh jaˬ lehˇ lehˇ ma bi baw laˇ-awˇ, jaˬ lehˇ baw gʼaˬ kʼaˆ dui dui-eu miˇ neh, saˇ baoˬ kʼoeˇ laˇ bi baw pyaˆ bi baw shaˆ jiˇ paˬ-ehˇ pyeuꞈ laˇ taˬ-euˬ meh.

⁵ Saˇ baoˬ kʼoeˇ taˆ gaˇ mˇ luꞈ-eu tsawˇ haˬ kʼoeˇ deuˬ guˆ dui dui laˇ-awˇ, yawˬ gʼaˬ na luꞈ yawˬ ha-euˬ miˬyehˇ-ahˇ guˇ guˇ-ehˇ, caw ba le-awˬ lehˇ shaˇ-eu meh. Kʼoeˇ uˬ taꞈ, aˬ yawꞈ maꞈ shiˇ gaˇ maˬ ya keuˆ ni, saˇ baoˬ kʼoeˇ taˆ tawˬ luꞈ-eu myawˬ deuˬ-ahˇ kʼawꞈ, iˬ ma laˆ shaˆ laꞈ kʼoeˇ baꞈ puꞈ-euˬ meh. Kʼoeˇ loꞈ-ehˇ tehˬ gʼa luꞈ ngeh, Yawˇnaˆ gʼaˬ saˇ baoˬ-euˬ dawˬ dah iˇ ka-awˇ, yuˬ kʼaˆ byoˆ taˬ-euˬ meh.

⁶ Saˇ baoˬ kʼoeˇ laˇ kʼoeˇ taˆ aˬ yuiꞈ geuꞈ-eu gʼaˬ aˬ yawꞈ-ahˇ mawˇ-awˇ, “Nawˇ aˬ jeˬ gʼeh-eu lehˇ teu naˆ naˆ-ehˇ yuꞈ sehꞈ taˬ teˬ. Tuˇ-awˇ nawˬ-euˬ miˬ yehˇ-ahˇ guiˬ lahˬ shaˇ-awˬ tawˇ. Aˬ yawꞈ aˬ dui maꞈ-ahˇ gʼawˬ shaˬ haw gaˬ-awˇ shiˇ gaˇ maˬ bi keuˆ law hawˇ maˬ siˬ tawˇ” lehˇ ehˇ-eu meh.

⁷ Saˇ baoˬ kʼoeˇ taˆ gaˇ mˇ luꞈ-eu tsawˇ haˬ deuˬ tiˬ gʼaˬ tiˇ gʼaˬ ehˇ-eu, “Aˬ dui maꞈ kʼoeˇ taˆ heu loꞈ-ehˇ gʼeh-eu guˆ-eu gaˆ-eu jeˬ keuˆ le-euˬ heu aˬ geu gʼaˬ baˬ da neh nga lehˇ, pyehˆ tseˇ duˬ haw kaˇ-euˇ.” Aˬ yawꞈ maꞈ pyehˆ tseˇ duˬ haw ngeh, Yawˇnaˆ-ahˇ duˬ leˇ-euˬ meh.

⁸ Kʼoeˇ ngeh, Yawˇnaˆ-ahˇ aˬ yawꞈ maꞈ ehˇ nehˬ-eu, “Nymˬ-mˇ poˆ-aˬ, aˬ geu gʼaˬ baˬ da neh shaˬ zahˬ guˆ gaˆ heu aˬ dui kʼoeˇ taˆ keuˆ le-euˬ nga lehˇ nawˇ ehˇ haw sheˇ. Nawˇ saˇ baoˬ heu laˇ kʼoeˇ taˆ aˬ jeˬ gʼeh le teˬ. Miˇ kʼahˬ aˬ geu kʼahˬ-ahˇ jawˇ-eu tsawˇ haˬ te. Aˬ jeˬ tsawˇ jeuˬ te.”

⁹ Yawˇnaˆ ehˇ-eu, “Ngaˇ-aˬ, Heˬbyehˇ tsawˇ jeuˬ ma. Miˇ tsaˬ tahˬ kʼawˇ hawˇ-eu iˬ ma laˆ shaˆ-ahˇ beh-euˬ mˬ kʼoeˇ taˆ jawˇ-eu Miˬyehˇ pyeuꞈ-eu Sahˬpaˬ Miˬyehˇ-ahˇ uˬ duˬ tahˬ-eu tsawˇ haˬ ma.”

¹⁰ Kʼoeˇ naˇ, Sahˬpaˬ Miˬyehˇ maˬ mawˇ gaˇ cehˆ byoˆ-eu lehˇ aˬ yawꞈ cehˆ luꞈ-eu gaˇ kawˆ aˬ yawꞈ maꞈ-ahˇ dzawˇ nehˬ-euˬ meh. Saˇ baoˬ kʼoeˇ taˆ gaˇ mˇ-eu tsawˇ haˬ deuˬ guˆ dui dui-awˇ, “Aˬ jeˬ miˇ neh nawˇ toˆ-ehˇ cehˆ te” lehˇ, Yawˇnaˆ-ahˇ ehˇ nehˬ-euˬ meh.

¹¹ Jaˬ lehˇ lehˇ ma kʼoeˇ, ngehˬ baw ngehˬ kʼaˆ laˇ-eu miˇ neh, “Jaˬ lehˇ lehˇ ma heu naˬ leˇ ni nga maꞈ nawˬ-ahˇ aˬ joˆ-ehˇ ya jahˇ nehˬ nmˇ” lehˇ, Yawˇnaˆ-ahˇ aˬ yawꞈ maꞈ naˇ haˬ-euˬ meh.

¹² Yawˇnaˆ ehˇ-eu, “Ngaˬ-ahˇ iˬ ma laˆ shaˆ laꞈ kʼoeˇ biˬ puꞈ-awˬ. Jaˬ lehˇ lehˇ ma baw-eu naˬ leˇ tehꞈ-a. Ngaˇ baˬ da neh kʼaˆ dui dui-eu jaˬ lehˇ lehˇ ma heu bahˬ-ahˇ naw maꞈ ya daˬ-eu meh.”

¹³ Ehˇ kʼawꞈ, saˇ baoˬ kʼoeˇ taˆ gaˇ mˇ-eu tsawˇ haˬ kʼoeˇ deuˬ-aˬ, saˇ baoˬ kʼoeˇ laˇ-ahˇ laˆ shaˆ lawˇ deh-ahˇ heu keuˆ gʼeh-eu lehˇ leh jeh-awˇ heu dui dui-euˬ meh. Aˬ yawꞈ maꞈ kʼoeˇ loꞈ-ehˇ leh jeh-awˇ heu kʼawꞈ, jaˬ lehˇ lehˇ ma kʼoeˇ bahˬ ngehˬ baw ngehˬ kʼaˆ laˇ-eu miˇ neh, tiˬ gʼaˬ-iˬ maˬ heu luˆ nya-a.

¹⁴ Kʼoeˇ ngeh, aˬ yawꞈ maꞈ Sahˬpaˬ Miˬyehˇ-ahˇ guˇ-awˇ, “Sahˬpaˬ Miˬyehˇ-oˇ, tsawˇ haˬ heu gʼaˬ-ahˇ bi shiˇ-euˬ baˬ da neh nga maꞈ-ahˇ kʼehˬ-awˇ taˬ sehꞈ nehˬ laꞈ lehˇ nawˬ-ahˇ nga maꞈ shaˇ-eu ma. Sahˬpaˬ Miˬyehˇ-oˇ, heu loꞈ-ehˇ pyeuꞈ laˇ ni dawˬ tawˆ luꞈ nawˬ neh jahˇ-euˬ meh” lehˇ shaˇ-euˬ meh.

¹⁵ Kʼoeˇ naˇ, aˬ yawꞈ maꞈ Yawˇnaˆ-ahˇ baꞈ-awˇ iˬ ma laˆ shaˆ laꞈ kʼoeˇ biˬ puꞈ ngeh, jaˬ lehˇ lehˇ ma kʼoeˇ bahˬ ja pyuˬ ni naˬ leˇ-euˬ meh.

¹⁶ Kʼoeˇ loꞈ-ehˇ pyeuꞈ laˇ-euˬ baˬ da neh, saˇ baoˬ kʼoeˇ taˆ gaˇ mˇ-eu tsawˇ haˬ kʼoeˇ deuˬ Sahˬpaˬ Miˬyehˇ-ahˇ guˆ dui dui-awˇ, aˬ yawꞈ-ahˇ lawˇ nehˬ shehˇ nehˬ-awˇ, aˬ yawꞈ-ahˇ saˇ jaˇ dzaˬ-euˬ meh.

¹⁷ Yawˇnaˆ-ahˇ iˇ cuꞈ-ahˇ biˬ puꞈ-eu nehˬ-ehˇ ngaˬ shaˬ shaˬ ma tiˬ mawˇ-ahˇ Sahˬpaˬ Miˬyehˇ dawˬ biꞈ-awˇ Yawˇnaˆ-ahˇ bi myoꞈ ahˇ-euˬ meh. Yawˇnaˆ-aˬ, smˬ nah smˬ miˇ kʼeuˆ ni ngaˬ shaˬ shaˬ ma kʼoeˇ mawˇ-euˬ uˬ maˆ laꞈ kʼoeˇ jawˇ-euˬ meh.