Yawˇbaˆ 8 - Akha

¹ Kʼoeˇ naˇ, Shuˇaˬ meuˬ-ahˇ jawˇ-eu Biˇlaˬdaˇ ehˇ-eu,

² “Aˇ myah keuˆ ni nawˇ teu loꞈ-ehˇ toˇ-eu gʼeh te. Nawˬ-euˬ kʼaˬ meh-ahˇ doˆ le-euˬ dawˬ deuˬ jaˬ lehˇ baw gaˇ duˇ miˇ-a.

³ Miˬyehˇ-aˬ, yaw tsaˬ yaw dawˇ jeˬ-ahˇ maˬ yuˇ pyawˆ-ehˇ, tsaˬ-eu jeˬ-ahˇ maˬ byehˇ ni mˇ-eu meh.

⁴ Nawˬ-euˬ zaˬ deuˬ Miˬyehˇ-ahˇ mˇ bahˬ-euˬ paˬ. Kʼoeˇ miˇ neh aˬ yawꞈ maꞈ-ahˇ geuˇ-eu loꞈ-ehˇ kʼehˬ nehˬ-euˬ paˬ.

⁵ Ehˇ kʼawꞈ, nawˇ nymˬ-mˇ Baoˬ huiˬ-eu Miˬyehˇ-ahˇ poˆ-awˇ, aˬ yawꞈ-ahˇ tahˬ shaˇ leˇ-awˬ.

⁶ Nawˇ dawˇ coe ni dehꞈ-awˇ shawˇ jehˆ ni gʼeh-eu ngeuˇ naˇ, Miˬyehˇ nawˬ-ahˇ ngehˬ gʼeh le-awˇ, nawˬ-euˬ nymˇ jiˇ nawˬ-ahˇ paˇ biꞈ kʼoꞈ laꞈ tehꞈ-a.

⁷ Nawˬ neh smˬ jiˇ-euˬ pyuˇ shuiˇ myawˬ gahˬ deuˬ-aˬ, Miˬyehˇ nawˬ-ahˇ biꞈ-eu lehˇ gʼeh-eu jeˬ nehˬ-ehˇ shaˇ cehˆ haw ngeh, ehˇ nyaꞈ maˬ nyeuˆ-a.

⁸ Aˇ hu-euˬ zaˬ siˬ tsawˇ gahˇ-ahˇ tiˬ poˆ paˇ haw sheˇ. Aˬ dui-euˬ aˬ poeˬ aˬ bawˇ deuˬ neh ehˇ duˬ taˬ yaꞈ-euˬ jeˬ-ahˇ shaˇ noeˬ haw sheˇ.

⁹ Aˬ dui-euˬ ziˇ nymˇ dui dui-awˇ, aˬ dui tiˬ jeˬ-iˬ maˬ siˬ maˬ nya-a. Aˬ dui-euˬ aˇ nah aˇ yamˬ-aˬ, naˇ shmˇ shmˇ gaˇ duˇ-eu meh.

¹⁰ Ehˇ kʼawꞈ, aˇ hu tsawˇ gahˇ ahˇ-eu tsawˇ haˬ deuˬ neh nawˬ-ahˇ bi mehˬ-awˇ, aˬ yawꞈ maꞈ ehˇ gaˇ naˇ haˬ geuꞈ-awˬ.

¹¹ Iˇ cuꞈ maˬ jaˆ gaˇ aˇ toꞈ maˬ dehꞈ nya-a. Lah yaˬ-ahˇ maˬ ngeuˇ naˇ aˇ toꞈ yaˇ jaˆ-eu maˬ mawˇ haw-aˬ.

¹² Iˇ cuꞈ gui-iˇ ngeh aˬ yawꞈ maꞈ nyoeˬ-iˇ-awˇ, maˬ deuˆ geuꞈ deˇ laˇ-euˬ bawˇ byeꞈ deuˬ kʼawꞈ shiˇ-eu meh.

¹³ Miˬyehˇ maˬ baw-eu tsawˇ haˬ deuˬ aˇ toꞈ kʼoeˇ deuˬ-ahˇ duˇ-eu meh. Miˬyehˇ-ahˇ ngehˇ naˇ aˬ yawꞈ maꞈ gʼaˇ duˬ noeˬ tmˬ kʼaˇ maˬ paˇ za meh.

¹⁴ Aˬ yawꞈ maꞈ-euˬ gʼoe duˬ-aˬ, aˬ oˬ loˬ ma aˇ kahˇ-ahˇ duˇ-eu saˬ kahˇ kahˇ muˆ meh.

¹⁵ Aˬ oˬ loˬ ma aˇ kahˇ-ahˇ aˬ yawꞈ maꞈ kʼawˬ daˇ ziꞈ nya tehꞈ-a loˇ. Saˬ kahˇ muˆ-ahˇ aˬ yawꞈ maꞈ gʼaˬ shaˇ-awˇ tuˇ laˇ nya tehꞈ-a loˇ.

¹⁶ “Haiˬ-eu tsawˇ haˬ deuˬ-aˬ, nahˇ tsaˇ kʼaˆ gaˇ dehꞈ laˇ-eu yaˇ moꞈ loꞈ-ehˇ tuˇ laˇ-awˇ, yaˇ kmˇ kmˇ lah-ehˇ yaˇ moꞈ dehꞈ byah gaˇ duˇ tehꞈ-a.

¹⁷ Aˬ yawꞈ maꞈ-euˬ duˬ ciˇ kʼaˬ lo-ahˇ cah jawˬ-awˇ, kʼaˬ lo aˬ yawꞈ siˬ yawꞈ-ahˇ tsuˆ tehˬ ziꞈ taˬ-euˬ meh.

¹⁸ Kʼoeˇ naˇ, aˬ yawꞈ maꞈ-ahˇ gʼeu lehˆ doˆ ngeh, aˬ yawꞈ maꞈ kʼoeˇ gaˇ dehꞈ-euˬ meh lehˇ tiˬ gʼaˬ-iˬ maˬ paˇ siˬ nya meh.

¹⁹ Yaw haiˬ deuˬ-euˬ laˬ kʼaˬ cehˇ duˬ-aˬ kʼoeˇ naˆ ni tehꞈ meh. Aˬ cawˬ oe-awˇ aˬ yawꞈ maꞈ-euˬ jawˇ duˬ-ahˇ jawˇ le-eu meh.

²⁰ “Ehˇ kʼawꞈ, saˇ jaˇ ziꞈ-eu tsawˇ haˬ-ahˇ Miˬyehˇ tiˬ jawˇ-iˬ maˬ byehˇ dzeh-ehˇ, haiˬ-eu tsawˇ haˬ deuˬ-ahˇ tiˬ jawˇ-iˬ maˬ caw ba-a.

²¹ Laˬ kʼaˬ cehˇ-awˇ uiˇ-eu teˇ saˇ hawˇ-eu guˇ-eu teˇ saˇ, nawˬ-euˬ kʼaˬ meh-ahˇ aˬ yawꞈ bi byah laˇ tehꞈ-a.

²² Ehˇ kʼawꞈ, nawˬ-ahˇ bye-eu deuˬ kʼoeˇ taˆ aˬ yawꞈ shaˬ zahˬ bi keuˆ le-awˇ, haiˬ-eu tsawˇ haˬ deuˬ-euˬ nymˇ jiˇ luˬ-iˇ seˇ-iˇ tehꞈ-a.”