Yawˇbaˆ 7 - Akha

¹ Tsawˇ haˬ zaˬ yaw dehꞈ dehꞈ-eu jeˬ-aˬ kʼaˆ behˆ baꞈ gaˇ duˇ-awˇ, myawˬ kʼaˆ ya mˇ dui dui-eu meh.

² Zaˬ kʼaˆ tiˬ gʼaˬ naˇ shmˇ ya awˆ gaˇ noeˬ tmˬ luꞈ gaˇ duˇ-awˇ, gʼaˬ mahˇ mahˇ zaˬ tiˬ gʼaˬ nah poeˬ biꞈ laꞈ gaˇ dawˬ luꞈ gaˇ duˇ-eu meh.

³ Ba la tiˬ siˬ saˇ-iˬ tiˬ siˬ ngaˇ shaˬ shaˬ-ehˇ dehꞈ dzeuˇ laꞈ-awˇ, tiˬ miˇ saˇ-iˬ tiˬ miˇ noeˬ shaˬ-eu jeˬ keuˆ le-eu meh.

⁴ Ngaˇ coˬ yuꞈ ngeh, aˇ yamˬ jiˇ-eu maˬ kawˇ-a. Uˬ ciꞈ miˇ lah-ehˇ yuꞈ zaˇ poˆ laˆ paˇ paˇ-ehˇ, uˬ bya bya laˇ gaˇ dawˬ-euˬ ma.

⁵ Ngaˬ-euˬ gʼawˇ mawˇ maˇ naˇ naˇ byah jiˇ-awˇ, maˇ naˇ maˇ gʼaw tehꞈ-ehˇ jaˆ-awˇ, maˇ naˇ-ahˇ maˇ byahˇ doˆ le luꞈ meh.

⁶ Ngaˬ-euˬ aˇ nah aˇ yamˬ deuˬ noeˬ tmˬ kʼaˇ maˬ za ni dzeuˇ-iˇ luꞈ-awˇ, shaˬ nmˇ zaꞈ-eu sehˬ naˆ maˬ tseˇ kawˇ-eu meh.

⁷ “Miˬyehˇ-oˇ, ngaˇ yaw dehꞈ dehꞈ-eu jeˬ-aˬ, saꞈ gʼawˇ luꞈ-eu jaˬ lehˇ-ahˇ duˇ gaˇ noeˬ keuˆ nehˬ laꞈ yawˬ. Ngaˇ laˬ kʼaˬ cehˇ-eu jeˬ dzeuˇ jiˇ-euˬ meh.

⁸ Nymˬ-mˇ nawˇ ngaˬ-ahˇ mawˇ luꞈ kʼawꞈ, aˬ kaˇ tiˬ jawˇ-iˬ maˬ paˇ ya mawˇ-aˇ. Nawˇ ngaˬ-ahˇ poˆ le ngeh, ngaˇ maˬ paˇ jawˇ-aˇ.

⁹ Mˬ dmˇ zaw gʼeh-awˇ zaw byoˆ jiˇ-eu loꞈ-ehˇ, shiˇ dzeuˇ-euˬ tsawˇ haˬ maˬ paˇ gʼoꞈ doˆ laˇ nya meh.

¹⁰ Aˬ yawꞈ-euˬ nymˇ-ahˇ aˬ yawꞈ tiˬ jawˇ-iˬ maˬ paˇ gʼoꞈ laˇ-ehˇ, aˬ yawꞈ-euˬ jawˇ duˬ aˬ yawꞈ-ahˇ maˬ paˇ siˬ nya meh.

¹¹ Kʼoeˇ miˇ neh ciˬ cuˇ ni maˬ jawˇ tehˬ coeˇ nya. Ngaˇ nui ma pehˇ-awˇ, nui ma naˇ dui dui-eu miˇ neh, maˬ ngehˬ maˬ tmˇ-ehˇ maˬ jawˇ coeˇ nya.

¹² “Ngaˇ-aˬ, iˬ ma laˆ shaˆ byaˆ yahˬ yahˬ ma pyeuꞈ-eu miˇ neh, nawˇ ngaˬ-ahˇ bi ka lahˇ te loˇ.

¹³ Ngaˇ coˬ lah-awˇ gʼaˬ naˬ naˬ-eu lehˇ gʼeh-eu ma. Ngaˇ naˇ-eu gawˇ-eu ui cuiˆ ya naˬ ni leh jeh luꞈ-eu ma.

¹⁴ Ehˇ kʼawꞈ, yuꞈ maˆ laꞈ kʼoeˇ nawˇ ngaˬ-ahˇ laˆ guˆ-awˇ, gʼawˬ mya jeˬ bi mawˇ laꞈ-awˇ nehꞈ zuiˆ bi zuiˆ-euˬ meh.

¹⁵ Heu loꞈ-ehˇ gʼeh-eu gʼawˇ mawˇ daˬ-awˇ jawˇ-eu naˆ maˬ tseˇ, shiˇ-eu hmˬ zaˬ dzehˬ miˇ-a lehˇ noeˬ laˇ gaˇ keuˆ ni, nawˇ ngaˬ-ahˇ kʼoeˇ loꞈ-ehˇ jahˇ nehˬ laꞈ-euˬ meh.

¹⁶ Ngaˇ yaw dehꞈ maˬ paˇ dehꞈ ma. Maˬ dehꞈ coeˇ-ehˇ pyeuꞈ laˇ-euˬ miˇ-a. Ngaˬ-ahˇ byehˇ dzeh nehˬ laꞈ-awˬ. Ngaˇ yaw dehꞈ dehꞈ-eu gaˇ dahˇ maˬ paˇ tsoeˬ miˇ-a.

¹⁷ “Aˬ jeˬ miˇ neh tsawˇ haˬ zaˬ nawˬ-euˬ mehˬ shi poeˬ ta. Aˬ yawꞈ mˇ-eu gaˇ-ahˇ nawˇ aˬ jeˬ miˇ neh caw teh haw luꞈ te.

¹⁸ Aˬ yawꞈ shawˬ yawꞈ aˬ yawꞈ-ahˇ nawˇ pyehˆ tseˇ haw-awˇ, aˬ yawꞈ yamˬ yawꞈ aˬ jeˬ miˇ neh lawˬ haw luꞈ te.

¹⁹ Ngaˇ duˬ kʼaˬ myoꞈ ahˇ dah ni, nawˇ yawˬ gaˇ yawˬ maˬ paˇ haw baˇ ma loˇ.

²⁰ Aˬ cawˬ-ahˇ paꞈ kuˆ-ahˇ dawˆ-eu gʼaˬ-oˇ, ngaˬ-euˬ iˬ baˇ nawˬ-ahˇ coeˬ-eu nya loˇ. Aˬ jeˬ miˇ neh ngaˬ-ahˇ tsawˇ tsaˬ tsoˆ-awˇ kʼehˬ te. Ngaˇ nawˬ-ahˇ aˇ dzehˬ-ehˇ bahˬ-eu nya loˇ.

²¹ Ngaˬ-euˬ iˬ baˇ-ahˇ nawˇ maˬ pyehˬ nehˬ nya nya loˇ. Ngaˬ neh mˇ lehˬ-euˬ jeˬ-ahˇ maˬ taˬ nehˬ nya-a loˇ. Gʼawˬ myahˇ maˬ gʼeh-ehˇ ngaˇ lmˬ bymˇ-ahˇ ya yuꞈ-awˇ, nawˇ ngaˬ-ahˇ poˆ le ngeh-aˬ, ngaˇ maˬ paˇ dehꞈ-aˇ.”