Yawˇbaˆ 6 - Akha

¹ Yawˇbaˆ ehˇ-eu,

² “Ngaˇ ya daˬ luꞈ-eu jeˬ hawˇ-eu ngaˬ-euˬ shaˬ zahˬ ahˇ paˆ yawˬ neh saˆ haw naˇ,

³ iˬ ma laˆ shaˆ-ahˇ jaˆ-eu kʼaˇ shuiꞈ naˆ maˬ tseˇ kah tehꞈ-a. Kʼoeˇ miˇ neh ngaˇ dawˬ kʼaˆ ngehˬ gaˇ, nawˇ zahˬ leˇ duˬ maˬ jaˆ-a.

⁴ Baoˬ huiˬ-eu Miˬyehˇ ngaˬ-ahˇ kaˆ myaˬ neh beuˆ coˆ-awˇ, kaˆ myaˬ doꞈ kʼoeˇ ngaˬ-euˬ gʼawˇ mawˇ-ahˇ iˇ byah-euˬ meh. Guˆ laˇ paˬ-ehˇ gʼeh-eu tiˬ jeˬ saˇ-iˬ tiˬ jeˬ-ahˇ, ngaˬ-euˬ kʼoeˇ taˆ Miˬyehˇ bi keuˆ le-euˬ meh.

⁵ “Mahˬ tahˬ laˆ yaˇ moꞈ-ahˇ gʼoeˇ-awˇ, mawˇ neˇ gʼo yoeˬ-ahˇ gʼoeˇ-eu meh.

⁶ Ehˇ kʼawꞈ, saˬ deuꞈ maˬ kuiˇ-eu dzaˇ, aˬ suˇ gʼaˬ dzaˬ nahˇ-eu jawˇ nmˇ. Ya uˆ pyuˇ-ahˇ, dzaˇ kuiˇ maˬ sawˇ.

⁷ Dzaˇ kʼoeˇ deuˬ-ahˇ nui daˆ daˆ-awˇ, dzaꞈ mawꞈ-eu nui ma maˬ ahˇ nya.

⁸ Aˬ jeˬ miˇ neh ngaˇ shaˇ-eu jeˬ, Miˬyehˇ ngaˬ-ahˇ maˬ biꞈ laꞈ-ehˇ, shaˇ dawˬ maˬ naˇ haˬ nehˬ laꞈ ta.

⁹ Aˬ yawꞈ ngaˬ-ahˇ sehꞈ law nmˇ-aˬ, ngaˬ-euˬ gʼaˇ duˬ zaˬ dzehˬ tehꞈ-a.

¹⁰ Aˬ yawꞈ ngaˬ-ahˇ sehꞈ tehꞈ-a lehˇ ngaˇ ya siˬ duˬ law nmˇ-aˬ, aˇ naˆ ni ya naˇ ya gawˇ kʼawꞈ ehˬ-ehˇ ngeuˇ-iˬ. Ngaˇ laˬ kʼaˬ cehˇ cehˇ-ehˇ tsawˬ ma. Miˬyehˇ-aˬ, muiˬ meh shawˇ meh lehˇ ngaˇ siˬ nya ma. Aˬ yawꞈ-euˬ dawˬ-ahˇ ngaˇ tiˬ jawˇ-iˬ maˬ leuˇ haw-aˬ.

¹¹ Mehˬ hu paw dehꞈ daˆ leꞈ-eu gʼaˇ duˬ ngaˬ-euˬ gʼaˬ aˬ gaˇ paˇ ahˇ ta. Noeˬ tmˬ duˬ maˬ jaˆ gaˇ aˬ jeˬ gʼeh yaw dehꞈ paˇ dehꞈ nmˇ.

¹² Ngaˇ kʼaˬ lo-euˬ gʼaˬ tsoꞈ-awˇ, ngaˬ-euˬ shaˬ jiˇ guiˬ shuiˇ-a loˇ.

¹³ Ngaˇ yawˬ haˇ yawˬ ha ka kʼoꞈ nya-eu gʼaˬ maˬ paˇ ahˇ-ehˇ, tahˬ shaˇ duˬ tiˬ gaˇ-iˬ maˬ paˇ jaˆ ma.

¹⁴ Heu loꞈ-ehˇ gʼeh-eu shaˬ zahˬ puˬ le ngeh, Miˬyehˇ-ahˇ ngaˇ byehˇ dzeh-eu maˬ kaˬ, maˬ byehˇ dzeh-eu maˬ kaˬ, saˇ jaˇ ziꞈ-eu cawˬ-ahˇ ngaˇ loˬ miˇ-a.

¹⁵ Ehˇ kʼawꞈ, ngaˬ-euˬ cawˬ deuˬ-oˇ, uˬ yehˇ maˬ jaˆ ngeh gui-iˇ-eu lawˇ gawˆ deuˬ loꞈ-ehˇ, naw maꞈ ngaˬ-ahˇ saˇ jaˇ maˬ ziꞈ-a.

¹⁶ Lawˇ gawˆ kʼoeˇ deuˬ-ahˇ ceuˬ hawˇ-eu ngehˇ teuˇ laˇ taˬ-euˬ meh.

¹⁷ Ehˇ kʼawꞈ, nahˇ tsaˇ kʼaˆ ngeh byoˆ-iˇ jiˇ-awˇ, gawˆ lah-ehˇ gui jiˇ-awˇ neˇ myawˆ ni jaˆ-eu meh.

¹⁸ Baw gaꞈ aˇ muˇ deuˬ iˇ cuꞈ poˆ-awˇ poˆ byoˆ-euˬ meh. Kʼaˇ shuiꞈ deh-ahˇ aˬ yawꞈ maꞈ cah cah-ehˇ shiˇ-euˬ meh.

¹⁹ Sheˬba meuˬ hawˇ-eu Teˬmaˇ meuˬ-ahˇ jawˇ-eu baw gaꞈ aˇ muˇ deuˬ iˇ cuꞈ poˆ le-euˬ meh.

²⁰ Ehˇ kʼawꞈ, gui coˇ ni jaˆ-eu lawˇ gawˆ kʼoeˇ deuˬ-ahˇ mawˇ ngeh, noeˬ tmˬ duˬ byoˆ-awˇ nui ma cawˆ dui dui-eu meh.

²¹ Naw maꞈ ngaˬ-euˬ gʼaˇ duˬ lawˇ gawˆ kʼoeˇ deuˬ-ahˇ duˇ-eu miˇ neh, ngaˇ shaˬ zahˬ naꞈ gaˇ mawˇ ngeh, guˆ-awˇ tsoˆ leˇ taˬ-euˬ meh.

²² Ngaˬ-ahˇ laꞈ sawˬ biꞈ laꞈ sheˇ lehˇ, naw maꞈ-ahˇ ngaˇ shaˇ haw taˬ loˇ. Ngaˬ-euˬ dah zaˇ laꞈ nmꞈ nmꞈ ni, naw maꞈ-ahˇ ngaˇ kʼehˇ haw taˬ loˇ.

²³ Muiˇ-eu deuˬ kʼehˬ laꞈ kʼaˆ laꞈ ngeh, ngaˬ-ahˇ ka kʼoꞈ nehˬ laꞈ sheˇ lehˇ, naw maꞈ-ahˇ ngaˇ shaˇ haw taˬ loˇ.

²⁴ Ngaˬ-ahˇ mehˬ nehˬ tsoˆ nehˬ laꞈ-awˇ, ngaˬ-euˬ iˬ baˇ-ahˇ toeˬ mehˬ laꞈ-awˬ. Ciˬ cuˇ ni ngaˇ naˇ haˬ geuꞈ ma.

²⁵ Dawˇ coe ni ngehˬ-eu tmˇ-eu dawˬ, nui ma-ahˇ gʼaˬ biꞈ lahˬ-eu meh. Ehˇ kʼawꞈ naw maꞈ ngehˬ-eu dawˬ-aˬ, gaˇ dahˇ tsoeˬ-eu jeˬ maˬ ahˇ nya.

²⁶ Jaˬ lehˇ loꞈ-ehˇ gʼeh-eu dawˬ yawꞈ ngehꞈ tehꞈ-ehˇ ngaˇ ngehˬ luꞈ meh lehˇ naw maꞈ noeˬ meh. Toˆ-ehˇ ngeuˇ naˇ ngaˇ nui ma cawˆ-awˇ toˇ ngeh naw maꞈ ngaˬ-ahˇ aˬ jeˬ miˇ neh dawˬ ngehˬ cawˬ laˇ te.

²⁷ Muˇ coe aˬ nmˇ zaˬ kʼaˆ deuˬ-ahˇ naw maꞈ kʼehˬ-awˇ, naw maꞈ-ahˇ gʼoeˇ-eu cawˬ deuˬ kʼoeˇ taˆ gahˇ dzaˬ-eu meh.

²⁸ Ngaˬ-euˬ myaˆ pyawˬ-ahˇ haw sheˇ. Ngaˇ jaˬ myawꞈ myawꞈ dzaˬ-eu tsawˇ haˬ maˬ ngeuˇ.

²⁹ Naw maꞈ maˬ tsaˬ maˬ dawˇ-eu jeˬ aˇ dzehˬ mˇ dzeuˇ gʼaˬ meh. Maˬ paˇ mˇ ni byehˇ dzeh-awˬ. Ngaˬ-ahˇ naw maꞈ taˬ ja doeˇ. Ngaˇ-aˬ, tsaˬ-eu dawˇ-eu ma.

³⁰ Ehˇ kʼawꞈ, ngaˇ jaˬ myawꞈ myawꞈ luꞈ meh lehˇ naw maꞈ noeˬ-awˇ, tsaˬ-eu jeˬ hawˇ-eu lehˬ-eu jeˬ tseˇ paˆ-awˇ maˬ ngehˬ maˬ tmˇ nya-a lehˇ noeˬ luꞈ meh.