Yawˇbaˆ 40 - Akha

¹ Kʼoeˇ naˇ, Yawˇbaˆ-ahˇ Sahˬpaˬ Miˬyehˇ paˇ ehˇ nehˬ-eu,

² “Yawˇbaˆ-oˇ, Baoˬ huiˬ-eu Miˬyehˇ nehˬ-ehˇ ja haw mawꞈ nya lehˇ nawˇ ehˇ-eu meh. Nawˇ maˬ paˇ ja ni byehˇ nmˇ loˇ. Maˬ ngeuˇ naˇ ngaˬ neh kʼaˇ naˇ haˬ-euˬ jeˬ-ahˇ ehˇ kʼoꞈ nmˇ loˇ.”

³ Yawˇbaˆ ehˇ-eu,

⁴ “Sahˬpaˬ Miˬyehˇ-oˇ, ngaˇ siˬ-eu nya-eu tsawˇ haˬ maˬ ngeuˇ. Ngaˇ nawˬ-ahˇ aˬ jeˬ paˇ ehˇ kʼoꞈ nya nmˇ. Ngaˇ tiˬ jeˬ-iˬ leh jeh-awˇ maˬ paˇ ehˇ ma.

⁵ Ngehˬ paˬ tmˇ paˬ-ehˇ gʼeh-eu naˆ maˬ tseˇ ngaˇ ngehˬ dzeuˇ tmˇ dzeuˇ taˬ-euˬ ma.”

⁶ Kʼoeˇ naˇ, jaˬ lehˇ lehˇ ma baw-eu laꞈ kʼoeˇ, Yawˇbaˆ-ahˇ Sahˬpaˬ Miˬyehˇ heu loꞈ-ehˇ paˇ ehˇ nehˬ-euˬ meh.

⁷ “Kaˬ dzeˇ zaˬ tiˬ gʼaˬ loꞈ-ehˇ yawꞈ-awˇ, ngaˇ kʼaˇ naˇ haˬ-eu jeˬ ehˇ kʼoꞈ-awˬ.

⁸ Ngaˇ maˬ tsaˬ maˬ dawˇ-a lehˇ nawˇ ja duˬ mawꞈ te loˇ. Ngaˇ lehˬ-eu gʼaˬ pyeuꞈ-awˇ, nawˇ yaw tsaˬ ma lehˇ ehˇ mawꞈ te loˇ.

⁹ Nawˇ ngaˇ naˆ ni gʼaˬ kʼaˆ te loˇ. Ngaˇ loꞈ-ehˇ mˬ jeˬ bi jeˬ mahˇ nya te loˇ.

¹⁰ Toˆ-ehˇ ngeuˇ naˇ, huiˬ dui mahˇ dui dui-eu jeˬ laꞈ kʼoeˇ tuˇ-awˇ, baoˬ yaw shehꞈ kʼahˬ sehˇ-ahˇ dm-awˬ.

¹¹ Nawˬ-euˬ nui ma pehˇ-eu jeˬ pyehˬ doˆ gʼeh-awˇ, nui ma huiˬ-eu mahˇ-eu tsawˇ haˬ deuˬ-ahˇ zuiˆ gʼaˬ-awˬ.

¹² Aˬ yawꞈ maꞈ-ahˇ dehˬ awˆ nehˬ-awˇ, nui ma maˬ dawˇ-eu tsawˇ haˬ deuˬ yawꞈ luꞈ gaˇ nawˬ pyehˆ nehˬ-awˬ.

¹³ Aˬ yawꞈ maꞈ-ahˇ miˇ tsaˬ-ahˇ duˬ pahˬ jiˇ-awˇ, shiˇ-eu miˇ kʼahˬ-ahˇ aˬ yawꞈ maꞈ-ahˇ paꞈ tawꞈ taˬ-awˬ.

¹⁴ Kʼoeˇ naˇ, aˬ cawˬ-euˬ mehˬ hu ngaˇ nawˬ-ahˇ ja ceuˬ-awˇ, nawˇ gʼaˬ leˇ-euˬ gʼaˬ pyeuꞈ-eu nga lehˇ sawˇ nehˬ ma.

¹⁵ Gʼawˇ mawˇ huiˬ dui dui-eu nehꞈ za-ahˇ haw sheˇ. Nawˬ-ahˇ beh-euˬ loꞈ-ehˇ nehꞈ za-ahˇ kʼawꞈ ngaˇ beh-euˬ ma. Mawˇ neˇ loꞈ-ehˇ yaˇ moꞈ tehꞈ-ehˇ aˬ yawꞈ dzaˬ-euˬ meh.

¹⁶ Ehˇ kʼawꞈ, aˬ yawꞈ-euˬ gʼawˇ mawˇ gʼaˬ aˇ naˆ ni kʼaˆ-eu nga. Aˬ yawꞈ-euˬ shaˬ jiˇ-ahˇ gʼaˬ aˇ naˆ ni dawꞈ-eu nga.

¹⁷ Aˬ yawꞈ-euˬ dawˬ miˬ, shuˬ liˇ aˇ bawˇ loꞈ-ehˇ deuˇ-awˇ, aˬ yawꞈ-euˬ aˬ kuiˇ aˬ laꞈ gʼaˬ tsoꞈ dui dui-eu meh.

¹⁸ Aˬ yawꞈ-euˬ shaˬ yoeˬ guiˬ shuiˇ loꞈ-ehˇ gʼahˇ-awˇ, aˬ yawꞈ-euˬ aˬ kuiˇ aˬ laꞈ shmˇ shmˇ kahˬ-ahˇ duˇ-eu meh.

¹⁹ Aˬ yawꞈ-aˬ, ngaˬ neh kʼaˇ beh taˬ-eu yaw dehꞈ dehꞈ-eu jeˬ dawˬ tawˆ luꞈ laꞈ kʼoeˇ zahˬ dui dui leˇ paˬ-ehˇ gʼeh-eu jeˬ meh. Aˬ yawꞈ-ahˇ beh-euˬ gʼaˬ tehꞈ-ehˇ aˬ yawꞈ-ahˇ gʼaˬ leˇ-eu meh.

²⁰ Gawˬ jawˬ kʼoeˇ taˆ bawˇ tsahˬ jeˬ zaˬ deuˬ niˇ gʼa duˬ-ahˇ dehꞈ-eu yaˇ moꞈ dzaˬ-awˇ, aˬ yawꞈ huiˬ laˇ-eu meh.

²¹ Aˬ gah baw duˆ uˬ moˆ doe ni aˬ yawꞈ yuꞈ-awˇ, lah yaˬ-ahˇ dehꞈ-eu aˇ toꞈ yaˇ laꞈ kʼoeˇ dzuˇ zaꞈ-eu meh.

²² Lawˇ baˬ lawˇ deh-ahˇ dehꞈ-eu aˬ gah baw duˆ hawˇ-eu iˇ nmˬ aˇ bawˇ deuˬ uˬ moˆ, aˬ yawꞈ naˇ shmˇ awˆ-eu meh.

²³ Iˇ kʼawˇ kʼaˆ-eu lawˇ baˬ-ahˇ aˬ yawꞈ maˬ guˆ-a. Yawˇdaˬ lawˇ baˬ iˇ kʼawˇ aˬ yawꞈ-euˬ baˬ ba-ahˇ ciˬ tahˬ kʼawꞈ, aˬ yawꞈ-ahˇ maˬ deuˬ leˇ-a.

²⁴ Aˬ suˇ gʼaˬ aˬ yawꞈ-ahˇ myaˆ nuiˆ laˆ behꞈ-awˇ nyehꞈ mi nya ta. Aˬ yawꞈ-euˬ naˇ mehˇ-ahˇ kuˆ seuˬ diˬ ceuˬ-awˇ kʼmˇ paꞈ nya-eu aˬ suˇ gʼaˬ jawˇ ta.