Yawˇbaˆ 37 - Akha

¹ “Jaˬ lehˇ lehˇ ma baw ngeh ngaˬ-euˬ nui ma cehˇ tahˬ tahˬ dui dui nya.

² Mˬ jeˬ jeˬ-eu loꞈ-ehˇ Miˬyehˇ-euˬ kʼaˬ meh-ahˇ neh doˆ le-eu, aˬ yawꞈ-euˬ dawˬ-ahˇ naw maꞈ yawˬ gʼaˬ na luꞈ naˇ haˬ-awˬ.

³ Miˇ tsaˬ tahˬ kʼawˇ heu dzeˇ kʼoeˇ dzeˇ doˆ ni, mˬ kʼoeˇ taˆ aˬ yawꞈ mˬ myawꞈ bi myawꞈ-eu meh.

⁴ Mˬ jeˬ tsawˬ tehˆ tehˆ ngeh, baoˬ huiˬ-eu aˬ yawꞈ-euˬ teˇ saˇ mˬ jeˬ jeˬ-eu loꞈ-ehˇ mahˇ doˆ laˇ-eu meh.

⁵ Miˬyehˇ dawˬ biꞈ ngeh aˬ dui zahˬ leˇ paˬ-ehˇ gʼeh-eu kʼaˆ jeˬ-ehˇ gʼeh-eu jeˬ pyeuꞈ doˆ laˇ-eu meh.

⁶ Ngehˇ hawˇ-eu uˬ yehˇ miˇ tsaˬ kʼoeˇ taˆ ga le ni aˬ yawꞈ dawˬ biꞈ-eu meh.

⁷ Tsawˇ haˬ zaˬ mˇ-eu gaˇ naˬ leˇ ni aˬ yawꞈ jahˇ-awˇ, aˬ yawꞈ gaˇ mˇ luꞈ-eu bi siˬ bi mawˇ-eu meh.

⁸ Bawˇ tsahˬ jeˬ zaˬ deuˬ byoe-ahˇ uˇ-iˇ jiˇ-awˇ, boeˬ tahˬ tahˬ leˇ jiˇ-eu meh.

⁹ Laꞈ oˆ paw pyawˬ-ahˇ neh jaˬ lehˇ lehˇ ma baw gʼeh laꞈ-awˇ, laꞈ taˆ paw pyawˬ-ahˇ neh yaw tsehꞈ oe-eu meh.

¹⁰ Miˬyehˇ-euˬ saꞈ iˇ cuꞈ-ahˇ bi ymˇ leˇ-awˇ, ngehˇ ngehˇ km bi pyeuꞈ-iˇ-eu meh.

¹¹ Mˬ dmˇ-ahˇ uˬ yehˇ dzuiꞈ tiˬ byah ni bi tawˬ-awˇ, mˬ dmˇ kʼaˇ jaˆ gaˇ mˬ myawꞈ bi myawꞈ-eu meh.

¹² Miˬyehˇ neh bi cah-euˬ loꞈ-ehˇ aˬ yawꞈ maꞈ mˬ kʼoeˇ taˆ cah ngeh, Miˬyehˇ neh dawˬ kʼaˇ biꞈ-euˬ loꞈ-ehˇ, miˇ tsaˬ doe ni aˬ yawꞈ maꞈ mˇ-eu meh.

¹³ Tsawˇ haˬ zaˬ-ahˇ kʼehˬ-eu gʼaˇ duˬ maˬ ehˇ, aˬ yawꞈ maꞈ-ahˇ bi muiˬ leˇ-eu gʼaˇ duˬ maˬ ehˇ, miˇ tsaˬ kʼoeˇ taˆ aˬ yawꞈ uˬ yehˇ pyehˬ leꞈ nya-eu meh.

¹⁴ Yawˇbaˆ-oˇ, tiˬ kʼehˇ kʼehˬ naˬ-awˇ ngaˇ ehˇ gaˇ paˇ naˇ haˬ sheˇ. Miˬyehˇ neh mˇ-euˬ zahˬ leˇ paˬ-ehˇ gʼeh-eu gaˇ kawˆ deuˬ shaˇ noeˬ haw sheˇ.

¹⁵ Miˬyehˇ dawˬ aˬ joˆ-ehˇ biꞈ-awˇ mˬ dmˇ laꞈ kʼoeˇ mˬ jeˬ tsawˬ tehˆ bi tehˆ-euˬ nawˇ siˬ nya ma loˇ.

¹⁶ Zahˬ leˇ dui dui paˬ-ehˇ tsawˇ gahˇ ahˇ-eu Miˬyehˇ neh, mˬ dmˇ deuˬ mˬ kʼoeˇ taˆ jaˆ nya ni aˬ joˆ-ehˇ jahˇ taˬ-euˬ nawˇ siˬ nya ma loˇ.

¹⁷ Laꞈ oˆ paw pyawˬ-ahˇ neh lahˇ dui dui-eu jaˬ lehˇ baw ahˇ laꞈ ngeh, yaw piˇ yaw lahˇ lahˇ-eu jeˬ nawˬ-ahˇ maˬ bi kʼehˬ ni nawˇ aˬ jeˬ jahˇ nya te.

¹⁸ Miˬyehˇ mˬ toˆ pyeh-awˇ, tsehˬ ka gʼahˇ taˬ-euˬ shmˇ loꞈ-ehˇ gʼahˇ laˇ ni jahˇ ngeh, aˬ yawꞈ-ahˇ nawˇ caw mˇ nya te loˇ.

¹⁹ Miˬyehˇ-ahˇ aˬ joˆ-ehˇ ya ngehˬ cawˬ-eu nga maꞈ-ahˇ mehˬ nehˬ laꞈ-awˬ. Nga maꞈ-euˬ nui ma laꞈ kʼoeˇ aˬ joˆ-ehˇ ya ngehˬ ya tmˇ-eu maˬ shaˇ noeˬ doˆ nya nya.

²⁰ Miˬyehˇ-ahˇ dawˬ bi ngehˬ cawˬ nehˬ laꞈ lehˇ ngaˇ shaˇ-awˇ ngaˬ-euˬ gʼawˇ mawˇ ya luˬ ya seˇ-iˇ ni ngaˇ maˬ mˇ.

²¹ Nymˬ-mˇ mˬ kʼoeˇ taˆ-euˬ yaw shehꞈ kʼoeˇ aˇ dzehˬ-ehˇ bya-eu miˇ neh, naˇ guiˇ guiˇ laˇ-awˇ maˬ haw coeˇ nya. Mˬ siˬ lah-ehˇ jaˬ lehˇ neh shawˇ jehˆ ni bi baw shawˇ taˬ-euˬ meh.

²² Laꞈ taˆ paw pyawˬ-ahˇ shuiˇ loꞈ-ehˇ bya doˆ laˇ-awˇ, Miˬyehˇ-euˬ yaw shehꞈ kʼahˬ sehˇ-ahˇ aˬ dui maꞈ zahˬ leˇ miˇ-a.

²³ Miˬyehˇ-euˬ baoˬ huiˬ dui dui-eu miˇ neh, aˬ yawꞈ dawˬ peh aˬ dui maˬ nyiˬ leˇ nya-a. Aˬ yawꞈ tsawˇ haˬ zaˬ-ahˇ yaw tsaˬ yaw dawˇ laꞈ kʼoeˇ cawˬ cawˬ taꞈ-eu meh.

²⁴ Tsawˇ haˬ yawˬ gʼaˬ na luꞈ aˬ yawꞈ mehˬ shi ya tsoˆ leˇ gaˇ zahˬ leˇ duˬ maˬ jaˆ-a. Yawˬ haˇ yawˬ ha zaˬ siˬ tsawˇ gahˇ ahˇ ma lehˇ ehˇ-eu deuˬ aˬ yawꞈ mehˬ shi yawꞈ ngehꞈ meh.”