Yawˇbaˆ 34 - Akha

¹ Kʼoeˇ naˇ, Eˇliˇhuˆ paˇ ehˇ-eu,

² “Naw maꞈ siˬ-eu gahˇ-eu tsawˇ haˬ deuˬ, nymˬ-mˇ ngaˇ ehˇ gaˇ naˇ haˬ-awˬ.

³ Naw maꞈ kʼaˬ meh-ahˇ dzaˬ-eu dzaˇ, kuiˇ-eu maˬ kuiˇ-eu siˬ nya kʼawꞈ, naw maꞈ-euˬ naˬ bawˇ-ahˇ gaˬ laˇ-eu dawˬ, tsawˇ gahˇ ahˇ maˬ ahˇ-eu naw maꞈ maˬ siˬ nya nga.

⁴ Gaˇ kawˆ heu hmˬ tsaˬ-eu maˬ tsaˬ-eu saˇ sawˇ-eu gʼaˇ duˬ, aˬ dui maꞈ-euˬ aˬ laꞈ laꞈ kʼoeˇ jaˆ-eu meh.

⁵ Yawˇbaˆ aˬ yawꞈ iˬ baˇ maˬ ahˇ gaˇ, Miˬyehˇ yaw tsaˬ yaw dawˇ dawˇ-ehˇ maˬ jahˇ nehˬ laꞈ nga lehˇ ehˇ luꞈ-eu meh.

⁶ ‘Ngaˇ maˬ lehˬ gaˇ lehˬ-eu ma lehˇ aˬ joˆ-ehˇ jaˬ myawꞈ myawꞈ-awˇ ehˇ nmˇ. Ngaˇ shiˇ taw tehˬ ni naˇ luꞈ gawˇ luꞈ kʼawꞈ, iˬ baˇ ahˇ-eu tsawˇ haˬ maˬ ngeuˇ’ lehˇ aˬ yawꞈ ehˇ-eu meh.

⁷ Yawˇbaˆ loꞈ-ehˇ gʼeh-eu tsawˇ haˬ naw maꞈ mawˇ haw maˬ loˇ. Aˬ yawꞈ Miˬyehˇ-ahˇ yaw zeu tiˬ pawꞈ-iˬ maˬ baw-a.

⁸ Yaw haiˬ jeˬ mˇ-eu aˇ muˇ-ahˇ aˬ yawꞈ gm leˇ-awˇ, iˬ baˇ zaˬ deuˬ nehˬ-ehˇ cah taꞈ-eu meh.

⁹ Miˬyehˇ nui ma tsaˬ-eu jeˬ-ahˇ caw teh-awˇ mˇ-eu tiˬ jeˬ-iˬ gaˇ dahˇ maˬ tsoeˬ-a lehˇ aˬ yawꞈ ehˇ-eu meh.

¹⁰ Noeˬ siˬ noeˬ mawˇ nya-eu tsawˇ haˬ deuˬ-oˇ, ngaˇ ehˇ gaˇ naˇ haˬ sheˇ. Baoˬ huiˬ-eu Miˬyehˇ yaw lehˬ jeˬ mˇ tehꞈ-a loˇ.

¹¹ Tsawˇ haˬ zaˬ mˇ-eu shaˇ-eu gaˇ haw-awˇ aˬ yawꞈ guiˬ lahˬ biꞈ-eu loꞈ-ehˇ, aˬ yawꞈ maꞈ-ahˇ kʼaˇ geuˇ-eu jeˬ ciˬ pi-awˇ bi daˬ-eu meh.

¹² Baoˬ huiˬ-eu Miˬyehˇ-aˬ, yaw haiˬ jeˬ tiˬ jawˇ-iˬ maˬ mˇ-ehˇ, tsawˇ haˬ tiˬ gʼaˬ-ahˇ-iˬ maˬ tsaˬ maˬ dawˇ-eu jeˬ maˬ jahˇ nehˬ-a.

¹³ Miˬyehˇ-ahˇ aˬ cawˬ neh baoˬ biꞈ nehˬ taˬ ta loˇ. Aˬ yawꞈ-ahˇ aˬ cawˬ neh kʼehˇ-awˇ miˇ tsaˬ kʼoeˇ taˆ bi haw bi pyaˆ taˬ loˇ.

¹⁴ Miˬyehˇ neh dehꞈ luꞈ-eu saꞈ laˇ yuˇ kʼoꞈ nehˬ naˇ,

¹⁵ tsawˇ haˬ yawˬ gʼaˬ na luꞈ miˇ tsaˬ paˇ pyeuꞈ jiˇ tehꞈ-a.

¹⁶ Nymˬ-mˇ nawˇ zaˬ siˬ tsawˇ gahˇ ahˇ-eu ngeuˇ naˇ, ngaˇ ehˇ gaˇ naˇ haˬ-awˬ.

¹⁷ Tsaˬ-eu dawˇ-eu Miˬyehˇ-ahˇ nawˇ iˬ baˇ taˬ te loˇ. Yaw tsaˬ yaw dawˇ jeˬ-ahˇ aˬ yawꞈ bye meh lehˇ nawˇ noeˬ te loˇ.

¹⁸ Sahˬ paˬ sahˬ ma deuˬ nui ma gʼoꞈ-awˇ gaˇ dahˇ maˬ tsoeˬ naˇ, aˬ yawꞈ maꞈ-ahˇ Miˬyehˇ iˬ baˇ taˬ-eu meh.

¹⁹ Sahˬ paˬ sahˬ ma deuˬ-ahˇ aˬ yawꞈ gʼaˬ baꞈ maˬ baꞈ-ehˇ, yaw shaˬ zaˬ mehˬ shi smˇ muiˬ deuˬ jawˇ paw maˬ pyawˬ-a. Aˬ jeˬ miˇ neh ehˇ naˇ, yawˬ gʼaˬ na luꞈ-ahˇ aˬ yawꞈ neh beh taˬ-euˬ meh.

²⁰ Tsawˇ haˬ zaˬ uˬ ciꞈ paw ja pyuˬ ni shiˇ nya-eu meh. Miˬyehˇ neh tsawˇ haˬ zaˬ-ahˇ diˬ naˇ, aˬ yawꞈ maꞈ ya shiˇ-eu meh. Baoˬ huiˬ-eu tsawˇ haˬ-ahˇ kʼawꞈ, aˬ yawꞈ gʼaˬ tiˬ pawꞈ-iˬ maˬ shaˇ ni laˆ sehꞈ nya-eu meh.

²¹ Tsawˇ haˬ zaˬ-euˬ kuiˇ toꞈ yawˬ toꞈ na luꞈ-ahˇ aˬ yawꞈ haw luꞈ-eu meh.

²² Miˬyehˇ maˬ bi mawˇ nya ni iˬ baˇ zaˬ deuˬ cehˆ zaꞈ nya paˬ-ehˇ jawˇ duˬ yaw zahˇ maˬ jaˆ-a.

²³ Tsawˇ haˬ zaˬ-ahˇ yaˇ kʼaˬ daˇ nehˬ-eu gʼaˇ duˬ, Miˬyehˇ nah tsaˬ tsoˆ tsoˆ-ehˇ jawˇ-eu maˬ loˬ-a.

²⁴ Aˬ yuiꞈ aˬ tsu deuˬ-ahˇ yuˇ dzeh-awˇ nui gʼaˬ bi daˆ leˇ-eu gʼaˇ duˬ, aˬ yawꞈ pyehˆ tseˇ pyehˆ tseˇ-ehˇ jawˇ-eu maˬ loˬ-a.

²⁵ Aˬ yawꞈ maꞈ mˇ luꞈ-eu jeˬ aˬ yawꞈ siˬ nya-eu miˇ neh, uˬ ciꞈ paw neh aˬ yawꞈ maꞈ-ahˇ aˇ yaˬ yuˇ ka-awˇ nawˬ pahˬ nehˬ-eu meh.

²⁶ Iˬ baˇ zaˬ deuˬ-ahˇ tsawˇ haˬ dawˬ tawˆ luꞈ mehˬ shi aˬ yawꞈ kʼehˬ nehˬ kʼaˆ nehˬ-eu meh.

²⁷ Aˬ yawꞈ maꞈ aˬ yawꞈ mehˬ nah maˬ caw teh ni byehˇ-awˇ, aˬ yawꞈ-euˬ dawˬ-ahˇ maˬ naˇ haˬ ni jawˇ ngeh, kʼoeˇ loꞈ-ehˇ jahˇ nehˬ-eu meh.

²⁸ Iˇ shaˬ zaˬ deuˬ Miˬyehˇ-ahˇ guˇ gaˇ keuˆ ni aˬ yawꞈ maꞈ kʼaˆ dzaˬ-awˇ, caw ba le-awˬ lehˇ iˇ shaˬ zaˬ deuˬ guˇ gaˇ Miˬyehˇ gaˬ-eu meh.

²⁹ Miˬyehˇ tiˬ jeˬ-iˬ maˬ paˇ mˇ ma lehˇ noeˬ tsehˆ shaw naˇ, tiˬ gʼaˬ-iˬ aˬ yawꞈ-ahˇ iˬ baˇ maˬ taˬ nya-a. Aˬ yawꞈ-euˬ myaˆ pyawˬ-ahˇ aˬ yawꞈ dehˬ kaˬ taˬ naˇ, tsawˇ haˬ zaˬ neh maˬ paˇ laˆ luˆ nya meh.

³⁰ Miˬyehˇ maˬ baw-eu tsawˇ haˬ deuˬ neh bi uˆ lahˇ-awˇ maˬ bi kʼehˬ ni, miˇ kʼahˬ tsawˇ jeuˬ deuˬ tiˬ jeˬ-iˬ maˬ jahˇ nya-a.

³¹ Yawˇbaˆ-oˇ, nawˬ-euˬ iˬ baˇ-ahˇ Miˬyehˇ mehˬ shi pah mehˬ nehˬ-awˇ, iˬ baˇ maˬ paˇ mˇ ma lehˇ saˇ jaˇ dzaˬ gʼaˬ maˬ loˇ.

³² Nawˬ-euˬ iˬ baˇ toeˬ mehˬ nehˬ laꞈ lehˇ Miˬyehˇ-ahˇ nawˇ shaˇ-awˇ, yaw haiˬ jeˬ maˬ paˇ mˇ ma lehˇ ehˇ tsehˆ nehˬ maˬ loˇ.

³³ Miˬyehˇ neh mˇ-euˬ jeˬ-ahˇ nawˇ maˬ geuꞈ mawꞈ-eu-aˬ, nawˇ nui ma tsaˬ-eu jeˬ aˬ yawꞈ mˇ nehˬ laꞈ gaˇ, nawˇ noeˬ tmˬ nya te loˇ. Nymˬ-mˇ noeˬ tsehˆ paˬ-ehˇ gʼeh-eu gʼaˬ ngaˇ maˬ ngeuˇ. Nawˇ meh. Nawˇ aˬ joˆ-ehˇ noeˬ luꞈ-eu nga maꞈ-ahˇ ehˇ nehˬ laꞈ sheˇ.

³⁴ Noeˬ siˬ noeˬ mawˇ nya-eu deuˬ ngaˇ ehˇ gaˇ nui ma tsaˬ tehꞈ-a. Ngaˬ-euˬ dawˬ-ahˇ ya gaˬ-eu tsawˇ gahˇ ahˇ-eu deuˬ heu loꞈ-ehˇ ehˇ tehꞈ-a.

³⁵ ‘Yawˇbaˆ-aˬ zaˬ siˬ tsawˇ gahˇ maˬ ahˇ-eu dawˬ ngehˬ-eu nya. Aˬ yawꞈ neh ngehˬ-euˬ dawˬ gaˇ dahˇ maˬ tsoeˬ nya.

³⁶ Yawˇbaˆ kʼaˇ ehˇ-eu yawˬ jeˬ na luꞈ-ahˇ shaˇ noeˬ haw naˇ, haiˬ-eu tsawˇ haˬ dawˬ ngehˬ gaˇ duˇ nya.

³⁷ Aˬ yawꞈ iˬ baˇ ahˇ-eu taꞈ-ehˇ Miˬyehˇ-ahˇ paˇ puiˬ tehˬ-awˇ, aˬ dui yawˬ gʼaˬ na luꞈ mehˬ shi Miˬyehˇ-ahˇ aˬ yawꞈ ja bu ja doeˇ-eu meh’ lehˇ ehˇ tehꞈ-a.”