Yawˇbaˆ 33 - Akha

¹ Yawˇbaˆ-oˇ, nymˬ-mˇ ngaˇ kʼaˇ ngehˬ kʼaˇ tmˇ-eu jeˬ-ahˇ yaw muiˬ paˬ-ehˇ naˇ haˬ-awˬ.

² Ngaˬ-euˬ nui ma laꞈ kʼoeˇ kʼaˇ ahˇ-eu loꞈ-ehˇ ngehˬ ma lehˇ ngaˇ lehˬ hmˬ taˬ-euˬ ma.

³ Ngaˬ-euˬ dawˬ deuˬ dawˇ coe ni gʼeh-awˇ, yaw tsaˬ yaw dawˇ jeˬ tehꞈ-ehˇ ngehˬ-eu ma.

⁴ Miˬyehˇ-euˬ yaw sahˇ neh ngaˬ-ahˇ beh-awˇ, dehꞈ-eu saꞈ laˇ biꞈ laꞈ-euˬ meh.

⁵ Nawˇ ngaˬ-ahˇ ngehˬ kʼoꞈ nya naˇ ngehˬ kʼoꞈ-eu gʼaˇ duˬ, yaw muiˬ paˬ-ehˇ lehˬ hmˬ taˬ-awˬ.

⁶ Nawˇ hawˇ-eu ngaˇ Miˬyehˇ mehˬ shi tiˬ kawˆ ma. Nyiˬ gʼaˬ luꞈ-ahˇ shaˬ jehˆ neh tehˆ taˬ-euˬ meh.

⁷ Kʼoeˇ miˇ neh nawˇ ngaˬ-ahˇ guˆ-eu maˬ loˬ-a. Nawˬ-ahˇ zuiˆ gʼaˬ-eu jeˬ ngaˇ maˬ jahˇ.

⁸ Nawˇ heu loꞈ-ehˇ ehˇ-eu ngaˇ gaˬ-euˬ ma.

⁹ ‘Ngaˇ yaw lehˬ mˇ-euˬ tiˬ jeˬ-iˬ maˬ jaˆ-ehˇ shawˇ jehˆ ni gʼeh-eu iˬ baˇ maˬ ahˇ-eu tsawˇ haˬ ma.

¹⁰ Ehˇ kʼawꞈ, Miˬyehˇ ngaˬ-ahˇ iˬ baˇ poˆ-awˇ, muiˇ-eu tsawˇ haˬ tiˬ gʼaˬ loꞈ-ehˇ jahˇ nehˬ laꞈ-euˬ meh.

¹¹ Ngaˬ-euˬ aˬ kuiˇ-ahˇ aˬ yawꞈ kuiˇ cuꞈ cuꞈ-awˇ, ngaˇ kʼaˇ luˆ-iˇ gaˇ haw tsoˆ taˬ-euˬ meh’ lehˇ nawˇ ehˇ-eu meh.

¹² Ehˇ kʼawꞈ, nawˇ yaw lehˬ meh lehˇ nawˬ-ahˇ ngaˇ ehˇ-eu ma. Miˬyehˇ-aˬ, tsawˇ haˬ yawˬ gʼaˬ na luꞈ naˆ maˬ tseˇ huiˬ dzehˬ meh.

¹³ Tsawˇ haˬ zaˬ-euˬ dawˬ-ahˇ maˬ naˇ haˬ nehˬ laꞈ nga lehˇ, aˬ jeˬ miˇ neh Miˬyehˇ-ahˇ nawˇ iˬ baˇ taˬ te.

¹⁴ Tiˬ poˆ saˇ-iˬ tiˬ poˆ Miˬyehˇ dawˬ ngehˬ kʼawꞈ, aˬ yawꞈ-euˬ dawˬ-ahˇ tiˬ gʼaˬ-iˬ maˬ naˇ haˬ-a.

¹⁵ Uˬ ciꞈ paw tsawˇ haˬ zaˬ yuꞈ kʼaˆ ngeh, yuꞈ maˆ maˆ-eu laꞈ kʼoeˇ hawˇ-eu yaw sahˇ laꞈ kʼoeˇ Miˬyehˇ dawˬ ngehˬ cawˬ-eu meh.

¹⁶ Aˬ yawꞈ-euˬ dawˬ-ahˇ tsawˇ haˬ zaˬ naˇ haˬ ni aˬ yawꞈ jahˇ ngeh, aˬ yawꞈ mehˬ-eu dawˬ-ahˇ aˬ yawꞈ maꞈ tsawˬ guˆ-iˇ-eu meh.

¹⁷ Aˬ yawꞈ maꞈ iˬ baˇ mˇ-eu byehˇ dzeh-awˇ, nui ma huiˬ-eu mahˇ-eu jeˬ laꞈ kʼoeˇ aˬ yawꞈ maꞈ-ahˇ ka kʼoꞈ-eu gʼaˇ duˬ, Miˬyehˇ dawˬ ngehˬ luꞈ-eu meh.

¹⁸ Aˬ yawꞈ maꞈ-ahˇ maˬ bi luˬ maˬ bi seˇ-iˇ ni haw lahˇ-awˇ, shiˇ-eu jeˬ laꞈ kʼoeˇ aˬ yawꞈ maꞈ-ahˇ ka kʼoꞈ-eu meh.

¹⁹ Naˇ-eu gawˇ-eu jeˬ bi keuˆ le-eu laꞈ kʼoeˇ, tsawˇ haˬ zaˬ-ahˇ Miˬyehˇ mehˬ-eu tsoˆ-eu meh.

²⁰ Naˇ-eu tsawˇ haˬ kʼaˬ meh byawˬ-iˇ-awˇ, kuiˇ dui dui-eu dzaˇ-ahˇ kʼawꞈ bye-eu meh.

²¹ Aˬ yawꞈ-euˬ shaˬ jiˇ iˇ byoˆ jiˇ-awˇ, shaˬ yoeˬ mawˇ laˇ jiˇ nya-eu miˇ neh,

²² shiˇ-eu miˇ kʼahˬ-ahˇ keuˆ-iˇ paˬ-ehˇ pyeuꞈ laˇ nya-eu meh.

²³ Tsawˇ haˬ zaˬ-ahˇ haw-eu pyaˆ-eu Miˬyehˇ-euˬ mˬ taˆ gʼaˬ kʼehˇ aˇ heˇ aˇ muiˇ gʼaˬ jawˇ-eu laꞈ kʼoeˇ, tiˬ gʼaˬ na aˬ yawꞈ-ahˇ ngehˬ gʼeh le law nmˇ-aˬ,

²⁴ mˬ taˆ gʼaˬ kʼehˇ kʼoeˇ gʼaˬ aˬ yawꞈ-ahˇ gʼawˬ shaˬ haw gaˬ-awˇ, ‘Aˬ yawꞈ-ahˇ shiˇ-eu miˇ kʼahˬ-ahˇ maˬ bi keuˆ-iˇ ni pyehˬ nehˬ-awˬ. Pyehˬ nehˬ poeˬ ngaˇ biꞈ ma’ lehˇ ehˇ tehꞈ-a.

²⁵ Aˬ yawꞈ-euˬ gʼawˇ mawˇ zaˬ guˬ loꞈ-ehˇ gʼaˬ paˇ ahˇ kʼoꞈ laˇ tehꞈ-a.

²⁶ Aˬ yawꞈ guiˬ lahˬ shaˇ ngeh, Miˬyehˇ naˇ haˬ nehˬ-awˇ, laˬ kʼaˬ cehˇ taˆ ni Miˬyehˇ-ahˇ aˬ yawꞈ uˬ duˬ tahˬ tehꞈ-a. Aˬ yawꞈ-euˬ gaˇ ma-ahˇ Miˬyehˇ paˇ laˆ saˆ nehˬ tehꞈ-a.

²⁷ Kʼoeˇ ngeh, tsawˇ haˬ aˇ maꞈ mehˬ shi aˬ yawꞈ heu loꞈ-ehˇ ehˇ tehꞈ-a. ‘Ngaˇ yaw tsaˬ yaw dawˇ jeˬ maˬ mˇ ni iˬ baˇ mˇ-euˬ ma. Ehˇ kʼawꞈ, Miˬyehˇ ngaˬ-ahˇ bi buˬ-iˇ laꞈ-euˬ meh.

²⁸ Aˬ yawꞈ ngaˬ-ahˇ shiˇ-eu miˇ kʼahˬ-ahˇ maˬ bi keuˆ-iˇ-euˬ miˇ neh, nymˬ-mˇ ngaˇ yaw dehꞈ ya dehꞈ-eu ma’ lehˇ ehˇ tehꞈ-a.

²⁹ “Miˬyehˇ kʼoeˇ loꞈ-ehˇ tiˬ poˆ saˇ-iˬ tiˬ poˆ mˇ luꞈ meh.

³⁰ Tsawˇ haˬ tiˬ gʼaˬ-euˬ saꞈ laˇ-ahˇ ka kʼoꞈ nehˬ-awˇ, laˬ kʼaˬ cehˇ taˆ ni bi dehꞈ-eu meh.

³¹ “Yawˇbaˆ-oˇ, ngaˇ ehˇ gaˇ naˇ haˬ sheˇ. Ciˬ cuˇ ni jawˇ-awˇ ngaˬ-ahˇ dawˬ bi ngehˬ laꞈ-awˬ.

³² Ehˇ kʼawꞈ, nawˇ ehˇ mawꞈ-eu jeˬ jaˆ naˇ ngaˇ naˇ haˬ ma. Nawˇ ehˇ-eu tsaˬ meh lehˇ ngaˇ laˬ kʼaˬ tiˬ cehˇ ha geuꞈ ma.

³³ Ehˇ kʼawꞈ, nawˇ ehˇ-eu jeˬ maˬ jaˆ naˇ, ciˬ cuˇ ni jawˇ-awˇ ngaˇ ehˇ gaˇ naˇ haˬ-awˬ. Ngaˇ nawˬ-ahˇ zaˬ siˬ tsawˇ gahˇ gaˇ kawˆ ja mehˬ ma.”