Yawˇbaˆ 31 - Akha

¹ Zaˬ miˬ aˬ buˇ-ahˇ mehˇ juiˇ juiˇ-eu myaˆ nuiˆ neh maˬ paˇ haw ma lehˇ, nymˬ-mˇ ngaˇ ziˇ tsehˆ-eu ma.

² Baoˬ huiˬ-eu Miˬyehˇ aˬ dui-ahˇ aˬ jeˬ mˇ nehˬ laꞈ ta. Tsawˇ haˬ zaˬ neh gaˇ mˇ-euˬ aˇ poeˬ aˬ yawꞈ aˬ jeˬ biꞈ nehˬ ta.

³ Mˇ lehˬ shaˇ lehˬ-euˬ tsawˇ haˬ deuˬ kʼoeˇ taˆ, luˬ-iˇ seˇ-iˇ-eu jeˬ aˬ yawꞈ bi keuˆ le-euˬ meh.

⁴ Ngaˇ kʼaˇ mˇ-eu yawˬ jeˬ na luꞈ-ahˇ Miˬyehˇ siˬ nya-awˇ, ngaˬ-euˬ kuiˇ toꞈ yawˬ toꞈ na luꞈ-ahˇ aˬ yawꞈ mawˇ luꞈ meh.

⁵ Ngaˇ yaw haiˬ jeˬ tiˬ jawˇ-iˬ maˬ mˇ haw-ehˇ, aˬ cawˬ-ahˇ jaˬ myawꞈ maˬ myawꞈ haw-aˬ lehˇ kamˬ peuˬ ma.

⁶ Miˬyehˇ ngaˬ-ahˇ yaw tsaˬ yaw dawˇ paˆ yawˬ neh saˆ haw naˇ, ngaˇ iˬ baˇ maˬ ahˇ-eu aˬ yawꞈ ya mawˇ tehꞈ-a.

⁷ Yaw tsaˬ yaw dawˇ gaˇ ma-ahˇ ngaˇ byehˇ dzeh-awˇ, yaw haiˬ jeˬ mˇ mawꞈ-eu nui kʼahˇ jaˆ-awˇ, ngaˬ-euˬ aˬ laꞈ neh iˬ baˇ mˇ-euˬ ngeuˇ naˇ,

⁸ ngaˬ-euˬ dzaˬ la gʼo cehˇ deuˬ cawˆ-iˇ jiˇ-awˇ, ngaˬ neh kʼaˇ ka-euˬ jeˬ aˬ cawˬ dzaˬ luꞈ-uˇ.

⁹ Ngaˬ-euˬ dawˬ peh jawˇ-eu gʼaˬ-euˬ miˬ zaˬ-ahˇ ngaˇ mawꞈ leˇ-awˇ, aˬ yawꞈ-euˬ laˇ gʼoˆ baˇ laˇ-ahˇ dzuˇ zaꞈ-awˇ jawˬ-euˬ ngeuˇ naˇ,

¹⁰ ngaˬ-euˬ miˬ zaˬ aˬ cawˬ aˬ da-ahˇ dzaˇ bi jahˇ nehˬ-awˇ, aˬ cawˬ aˬ da nehˬ-ehˇ bi joe luꞈ-uˇ.

¹¹ Kʼoeˇ loꞈ-ehˇ gʼeh-eu haiˬ-eu jeˬ mˇ taˬ-euˬ jaˆ naˇ, shiˇ gaˇ keuˆ ni kʼehˬ nehˬ-eu tsaˬ tehꞈ-a.

¹² Kʼoeˇ-aˬ, laˆ luˬ laˆ seˇ-eu shiˬ buiˇ lah ma miˬ dzaˬ-ahˇ duˇ-awˇ, ngaˇ kʼaˇ jaˆ-eu jeˬ-ahˇ puiˆ dzaˬ jiˇ tehꞈ-a.

¹³ “Ngaˬ-euˬ zaˬ kʼaˆ tiˬ gʼaˬ na ngaˬ-ahˇ iˬ baˇ taˬ-eu dawˬ ngehˬ naˇ, aˬ yawꞈ-euˬ dawˬ-ahˇ naˇ haˬ-awˇ jahˇ tsaˬ nehˬ ma.

¹⁴ Kʼoeˇ loꞈ-ehˇ maˬ jahˇ naˇ Miˬyehˇ-ahˇ ngaˇ aˬ joˆ-ehˇ tahˬ puˬ nmˇ. Miˬyehˇ ngaˬ-ahˇ yaˇ kʼaˬ daˇ le ngeh ngaˇ aˬ jeˬ ehˇ nya nmˇ.

¹⁵ Ngaˬ-ahˇ beh-euˬ Miˬyehˇ hawˇ-eu ngaˬ-euˬ zaˬ kʼaˆ-ahˇ beh-euˬ Miˬyehˇ aˬ yawꞈ tiˬ gʼaˬ meh.

¹⁶ Shaˬ zaˬ zahˬ zaˬ deuˬ-ahˇ ngaˇ maˬ caw ba ni maˬ byehˇ dzeh-aˬ. Miˬ coeˬ miˬ ma deuˬ-ahˇ ngehˬ maˬ gʼeh ni maˬ bi shaˬ-aˬ.

¹⁷ Ngaˇ ya dzaˬ ya dawˇ dehˆ ngeh muˇ coe aˬ nmˇ deuˬ-ahˇ maˬ bi mehꞈ-aˬ.

¹⁸ Ngaˬ-euˬ tiˬ ziˇ aˬ yawꞈ maꞈ-ahˇ caw ba ngehˬ gʼeh nehˬ-euˬ ma.

¹⁹ Tsawˇ haˬ tiˬ gʼaˬ na shaˬ dui dui-awˇ, mehˬ tsoeˬ maˬ zeuˇ dm nya gaˇ ngaˇ ya mawˇ ngeh,

²⁰ ngaˬ-euˬ yawˇ yawˇ maꞈ-euˬ caꞈ hm tehˬ-awˇ zaꞈ-euˬ, yawˇ caꞈ hm mehˬ tsoeˬ biꞈ nehˬ-euˬ miˇ neh, aˬ yawꞈ-euˬ nui ma laꞈ kʼoeˇ keuˆ ni ngaˬ-ahˇ guiˬ lahˬ huiˬ-eu meh.

²¹ Muˇ coe aˬ nmˇ-ahˇ ngaˇ yaˇ kʼaˬ ja gʼaˬ nya ma lehˇ noeˬ-awˇ,

²² aˬ yawꞈ kʼoeˇ taˆ ngaˇ myawꞈ dzaˬ gahˇ dzaˬ-euˬ jaˆ naˇ, ngaˬ-euˬ aˬ laꞈ nyiˬ laꞈ luꞈ kʼehꞈ tsehˆ-awˇ, baꞈ pu yaw dahˬ-ehˇ ya jawˇ luꞈ-uˇ.

²³ Miˬyehˇ yaˇ kʼaˬ daˇ gaˇ ngaˇ guˆ-eu miˇ neh, kʼoeˇ loꞈ-ehˇ gʼeh-eu jeˬ tiˬ jawˇ-iˬ ngaˇ maˬ mˇ-aˬ.

²⁴ Pyuˇ shuiˇ myawˬ gahˬ-ahˇ ngaˇ tiˬ jawˇ-iˬ nui kʼaˬ maˬ tsmˬ-ehˇ,

²⁵ ngaˬ-euˬ pyuˇ shuiˇ-ahˇ ngaˇ nui ma maˬ huiˬ haw-aˬ.

²⁶ Yaw shehꞈ bya-eu nahˇ ma hawˇ-eu aˇ gʼehˇ muiˬ-eu ba la-ahˇ, ngaˇ tiˬ jawˇ-iˬ uˬ duˬ maˬ tahˬ haw-aˬ.

²⁷ Kʼoeˇ deuˬ-ahˇ taˬ huiˬ-awˇ yaw zeu baw-eu laꞈ kʼoeˇ, yawˬ ha-euˬ aˬ laꞈ-ahˇ mehˬ cuˇ cuˇ-eu jeˬ mˇ-awˇ, gaˇ ma maˬ cah bahˬ haw-aˬ.

²⁸ Kʼoeˇ loꞈ-ehˇ mˇ lehˬ-eu jeˬ-ahˇ shiˇ gaˇ keuˆ ni kʼehˬ nehˬ-eu tsaˬ tehꞈ-a. Kʼoeˇ-aˬ, Baoˬ huiˬ-eu Miˬyehˇ-ahˇ yehˬ baw sehˇ lu-ehˇ gʼeh-eu jeˬ pyeuꞈ-eu meh.

²⁹ Ngaˬ-ahˇ muiˇ-eu deuˬ shaˬ zahˬ naꞈ gaˇ ngaˇ laˬ kʼaˬ maˬ cehˇ-ehˇ, luˬ-iˇ seˇ-iˇ-eu jeˬ-ahˇ aˬ yawꞈ maꞈ tahˬ puˬ ngeh ngaˇ nui kʼahˇ maˬ shiˇ-aˬ.

³⁰ Aˬ yawꞈ maꞈ ya shiˇ ni guiˬ lahˬ shaˇ-eu laꞈ kʼoeˇ iˬ baˇ maˬ mˇ-aˬ.

³¹ Boeˇ miˬ siˬ kʼaˬ deuˬ-ahˇ ngaˇ aˬ myah luꞈ nymˇ daˆ kuˇ daˆ-euˬ gaˇ kawˆ, ngaˬ-euˬ gaˇ mˇ-eu tsawˇ haˬ dawˬ tawˆ luꞈ siˬ nya meh.

³² Miˇ kʼahˬ-ahˇ cah-eu tsawˇ haˬ deuˬ gaˇ ma gaˇ dzeˇ maˬ bi yaꞈ ni, ngaˬ-euˬ nymˇ-ahˇ ha ahˇ-awˇ bi yaꞈ-euˬ ma.

³³ Aˬ cawˬ yawˬ ha-euˬ iˬ baˇ baꞈ zaꞈ kʼawꞈ, ngaˬ-euˬ iˬ baˇ-ahˇ ngaˇ tiˬ jawˇ-iˬ maˬ zaꞈ taˬ haw-aˬ.

³⁴ Aˬ cawˬ ngaˬ-ahˇ ehˇ laˇ gaˇ ngaˇ maˬ guˆ-ehˇ, aˬ cawˬ ja doeˇ gaˇ maˬ gaˬ peuˬ-eu miˇ neh iˇ kahˇ laꞈ kʼoeˇ ciˬ cuˇ ni jawˇ byoˆ-euˬ maˬ jaˆ haw-aˬ.

³⁵ Ngaˇ dawˬ ngehˬ gaˇ tiˬ gʼaˬ-iˬ maˬ naˇ haˬ-a loˇ. Yawˬ dawˬ na luꞈ tsaˬ ma lehˇ ngaˇ kamˬ peuˬ ma. Baoˬ huiˬ-eu Miˬyehˇ ngaˬ-ahˇ ngehˬ cawˬ le luꞈ-uˇ. Ngaˬ-euˬ yaw lehˬ jeˬ-ahˇ toeˬ mehˬ-eu deuˬ neh ngehˬ-euˬ dawˬ-ahˇ ngaˇ mawˇ nya ni boꞈ doˆ taˬ law nmˇ-aˬ,

³⁶ dawˬ kʼoeˇ deuˬ-ahˇ ngaˬ-euˬ baꞈ pu-ahˇ ngaˇ shaꞈ-awˇ, shuiˇ uˬ kʼoˆ loꞈ-ehˇ jahˇ-awˇ uˬ duˬ-ahˇ kʼoˆ ma.

³⁷ Ngaˬ neh kʼaˇ mˇ kʼaˇ shaˇ-euˬ yawˬ jeˬ na luꞈ Miˬyehˇ-ahˇ ngaˇ dzawˇ nehˬ-awˇ, aˬ yawꞈ-euˬ mehˬ shi ngaˬ-euˬ uˬ duˬ mˇ jeh haw nehˬ ma.

³⁸ Nymˬ-mˇ ngaˇ mˇ dzaˬ luꞈ-eu miˇ tsaˬ heu, aˬ cawˬ-euˬ laꞈ-ahˇ neh kʼoeˬ taˬ-euˬ ngeuˇ lawˬ naˇ,

³⁹ kʼoeˇ gaˇ mˇ za-euˬ hawˬ ngaˇ dzaˬ-awˇ, mˇ-euˬ deuˬ-ahˇ bi mehꞈ-euˬ ngeuˇ lawˬ naˇ,

⁴⁰ cehˇ hawˇ-eu lawˬ loeˇ ka taˬ-euˬ gaˇ, yaˇ moꞈ hawˇ-eu aˬ gah dehꞈ laˇ luꞈ-uˇ.” Yawˇbaˆ-euˬ dawˬ heu gaˇ aˇ saˬ saˬ-euˬ meh.