Yawˇbaˆ 30 - Akha

¹ Ehˇ kʼawꞈ, ngaˇ naˆ-ehˇ aˇ kʼoꞈ maˬ kʼawˆ-eu tsawˇ haˬ deuˬ nymˬ-mˇ ngaˬ-ahˇ naˬ gʼa-eu meh. Aˬ yawꞈ maꞈ-euˬ aˬ da deuˬ gaˇ dahˇ tiˬ pawꞈ-iˬ maˬ tsoeˬ-ehˇ, yawˇ bo-eu ngaˬ-euˬ aˬ kuiˬ maˬ tawˬ-a.

² Aˬ yawꞈ maꞈ gʼaˬ tiˬ pawꞈ-iˬ ma tsoꞈ-ehˇ, ngaˬ-euˬ gaˇ tiˬ jeˬ-iˬ maˬ mˇ pyeuꞈ nya-a.

³ Aˬ yawꞈ maꞈ shaˬ dui dui-awˇ, mehꞈ dui shuꞈ dui dui-eu miˇ neh. uˬ ciꞈ paw tsawˇ haˬ maˬ jawˇ-eu jawˇ duˬ-ahˇ, duˬ ciˇ yaw koˆ gʼoˬ dzaˬ-eu meh.

⁴ Bawˇ tsahˬ-ahˇ dehꞈ-eu jaˆ gaˆ deuˬ, aˬ yawꞈ maꞈ gʼeu doˆ dzaˬ-eu meh. Dzaˇ kuiˇ dzaˇ myehˇ maˬ siˬ laˇ-eu, baw duˆ duˬ ciˇ maˬ paˇ tseˇ-a.

⁵ Smˇ kʼoeˬ-ahˇ guˇ guˇ-ehˇ teh-eu loꞈ-ehˇ, yawˬ gʼaˬ na luꞈ aˬ yawꞈ maꞈ-ahˇ guˇ guˇ-ehˇ teh dzeh-eu meh.

⁶ Lo kʼahˬ hawˇ-eu lo guˇ-ahˇ duˬ taˬ-euˬ maˇ byoe doe ni aˬ yawꞈ maꞈ jawˇ-eu meh.

⁷ Bawˇ tsahˬ-ahˇ jeˬ zaˬ loꞈ-ehˇ aˬ yawꞈ maꞈ mahˇ mahˇ-ehˇ cah-awˇ, baw duˆ uˬ moˆ uiˬ leˇ uiˬ leˇ-ehˇ jawˇ-eu meh.

⁸ Tsawˇ myahˇ maˬ baw-eu gaˇ dahˇ maˬ tsoeˬ-eu baˬ maꞈ pyeuꞈ-eu miˇ neh, miˇ kʼahˬ laꞈ kʼoeˇ maˬ bi jawˇ ni bi teh dzeh-euˬ meh.

⁹ Nymˬ-mˇ aˬ yawꞈ maꞈ ngaˬ-ahˇ naˬ gʼa laˇ-eu meh. Ngaˇ-aˬ aˬ yawꞈ maꞈ-euˬ cehꞈ lehꞈ ka niˇ gʼa duˬ-ahˇ duˇ miˇ-a.

¹⁰ Aˬ yawꞈ maꞈ ngaˬ-ahˇ nui daˆ daˆ-eu meh. Aˬ yawꞈ maꞈ ngaˇ naˆ maˬ tseˇ muiˬ dzehˬ ma lehˇ noeˬ-awˇ, ngaˬ-euˬ myaˆ pyawˬ-ahˇ duˬ kʼaˬ kʼa shehˬ laˇ-eu meh.

¹¹ Miˬyehˇ ngaˬ-ahˇ gʼaˬ bi baˬ-iˇ-awˇ, juˆ lehˆ ni pyeuꞈ-iˇ-euˬ miˇ neh, aˬ yawꞈ maꞈ ngaˬ-ahˇ nui kʼahˇ tiˬ shiˇ jahˇ gʼeh haw-eu meh.

¹² Tsawˇ haˬ heu deuˬ ngaˬ-ahˇ ciˬ tahˬ laˇ-eu meh. Aˬ yawꞈ maꞈ ngaˬ-ahˇ teh cehˆ-awˇ, aˇ saˬ saˬ-eu jeˬ jahˇ nehˬ-eu lehˇ lehˬ hmˬ-eu meh.

¹³ Ngaˇ law-iˇ-eu gaˇ ma aˬ yawꞈ maꞈ deuˆ tsehˆ-awˇ, aˬ yawꞈ maꞈ-ahˇ laˆ naˬ-eu tiˬ gʼaˬ-iˬ maˬ jawˇ-a

¹⁴ Ngaˇ aˬ yawꞈ maꞈ-ahˇ laˆ tsoeˬ taˬ kʼawꞈ, maˇ pehꞈ-ahˇ neh yoeˇ ahˇ leꞈ-awˇ, ngaˬ-euˬ kʼoeˇ taˆ ga daˆ le-eu meh.

¹⁵ Ngaˇ aˇ dzehˬ guˆ dzeuˇ-euˬ miˇ-a. Ngaˬ-euˬ kʼahˬ sehˇ jaˬ lehˇ neh baw byoˆ gʼeh-awˇ, ngaˬ-euˬ pyuˇ shuiˇ myawˬ gahˬ mˬ dmˇ loꞈ-ehˇ zaw byoˆ jiˇ-euˬ miˇ-a.

¹⁶ Nymˬ-mˇ ngaˇ shiˇ taw tehˬ le-awˇ, naˇ gawˇ taˬ leˇ-eu gaˇ ma maˬ dahˇ miˇ-a.

¹⁷ Uˬ ciꞈ paw shaˬ yoeˬ shaˬ laꞈ dawˬ tawˆ luꞈ teuꞈ dzaˬ-awˇ, ngaˬ-ahˇ kawꞈ dzaˬ luꞈ-eu naˇ gawˇ heu hmˬ tiˬ jawˇ-iˬ maˬ paˇ tsehˆ leˇ miˇ-a.

¹⁸ Miˬyehˇ ngaˬ-euˬ pehˇ kʼahˬ lahˇ baˆ-ahˇ tsuˆ tehˬ-awˇ, ngaˬ-euˬ mehˬ tsoeˬ-ahˇ yeuꞈ ti yeuꞈ tiˇ nehˬ laꞈ-euˬ meh.

¹⁹ Aˬ yawꞈ ngaˬ-ahˇ shaˬ jehˆ-ahˇ biˬ puꞈ-awˇ, ngaˬ-euˬ gʼawˇ mawˇ shaˬ jehˆ taꞈ-ehˇ maˬ dzehˬ miˇ-a.

²⁰ Miˬyehˇ-oˇ, ngaˇ nawˬ-ahˇ kuˇ kʼawꞈ, nawˇ maˬ haw cawˬ nehˬ laꞈ-a. Ngaˇ guiˬ lahˬ shaˇ kʼawꞈ nawˇ maˬ naˇ haˬ nehˬ laꞈ-a.

²¹ Nawˇ ngaˬ-ahˇ tiˬ pawꞈ-iˬ gʼawˬ shaˬ maˬ gaˬ ni, nawˬ-euˬ baoˬ neh ngaˬ-ahˇ kʼehˬ nehˬ laꞈ-eu meh.

²² Nawˇ ngaˬ-ahˇ jaˬ lehˇ bi baw dzeh-awˇ, jaˬ lehˇ lehˇ ma baw gaˇ ngaˬ-ahˇ dzeh diˇ niˇ gʼa-eu meh.

²³ Yawˬ gʼaˬ na luꞈ tiˬ poˆ ya uˇ-iˇ-eu jawˇ duˬ pyeuꞈ-eu shiˇ-eu miˇ kʼahˬ-ahˇ nawˇ ngaˬ-ahˇ yuˇ gʼeh luꞈ-eu ngaˇ siˬ nya ma.

²⁴ Gʼawˬ shaˬ gaˬ nehˬ laꞈ-awˬ lehˇ shaˇ-eu taꞈ-ehˇ tiˬ jeˬ-iˬ maˬ jahˇ nya-eu, shiˇ leˇ luꞈ-eu tsawˇ haˬ-ahˇ nawˇ aˬ jeˬ gʼeh kʼehˬ te.

²⁵ Noeˬ shaˬ noeˬ zahˬ-eu deuˬ nehˬ-ehˇ ngaˇ caw ngoeˇ-awˇ, maˬ jaˆ-eu tsawˇ haˬ-ahˇ ngaˇ gʼawˬ shaˬ gaˬ-euˬ maˬ ngeuˇ-a loˇ.

²⁶ Laˬ kʼaˬ cehˇ-eu jeˬ hawˇ-eu yaw shehꞈ-ahˇ ngaˇ noeˬ tmˬ-euˬ kʼawꞈ, noeˬ shaˬ noeˬ zahˬ-eu jeˬ hawˇ-eu yaw zahˇ jeˬ keuˆ le-euˬ meh.

²⁷ Noeˬ shaˬ-eu jeˬ hawˇ-eu naˇ-eu gawˇ-eu jeˬ ngaˬ-ahˇ cehˬ pyaˬ cehˬ shaˇ-awˇ, tiˬ nah saˇ-i tiˬ nah naˇ gawˇ kʼaˆ laˇ miˇ-a.

²⁸ Nahˇ ma yaw shehꞈ maˬ jaˆ-eu yaw zahˇ-ahˇ ngaˇ cah-awˇ, tsawˇ haˬ aˇ maꞈ mehˬ shi tuˇ-awˇ caw ba nehˬ laꞈ lehˇ shaˇ-euˬ ma.

²⁹ Ngaˬ-euˬ teˇ saˇ-aˬ, cawˬ maˬ baw-ehˇ mahˇ-eu bawˇ tsahˬ aˬ kuiˬ teˇ saˇ hawˇ-eu, bo-mˬ bo lo teˇ saˇ-ahˇ duˇ miˇ-a.

³⁰ Shaˬ jiˇ naˆ cawꞈ ni pyeuꞈ-iˇ-awˇ, pyaˬ dui dui-awˇ lahˇ dui dui nya.

³¹ Dzeuˇ laˇ ngeh naˇ haˬ muiˬ-eu caˇ dawˬ ya gaˬ gaˇ, tsawˇ ngoeˇ ngoeˇ-eu teˇ saˇ tehꞈ-ehˇ gaˬ laˇ miˇ-a.