Yawˇbaˆ 3 - Akha

Yawˇbaˆ nui ma cawˆ-eu dawˬ ngehˬ-euˬ

¹ Kʼoeˇ naˇ, Yawˇbaˆ dawˬ ngehˬ doˆ laˇ-awˇ, aˬ yawꞈ dehꞈ le-euˬ aˇ nah kʼoeˇ nah-ahˇ yaˬ kʼehˇ yaˬ-euˬ meh.

² Yawˇbaˆ ehˇ-eu,

³ “Miˬyehˇ-oˇ, ngaˇ dehꞈ le-euˬ aˇ nah kʼoeˇ nah-ahˇ yaˬ kʼehˇ yaˬ-awˬ. Ngaˇ tsehˆ leˇ-euˬ, uˬ ciꞈ kʼoeˇ miˇ-ahˇ yaˬ kʼehˇ yaˬ-awˬ.

⁴ Miˬyehˇ-oˇ, aˇ nah kʼoeˇ nah zahˇ tsui ni bi pyeuꞈ-iˇ-awˬ. Aˇ nah kʼoeˇ nah-ahˇ tiˬ jawˇ-iˬ maˬ noeˬ keuˆ ni byehˇ dzeh-awˇ, kʼoeˇ ngeh nah-ahˇ yaw shehꞈ taˬ paˇ bi bya law.

⁵ Aˇ nah kʼoeˇ nah-ahˇ zahˇ dui dui-eu aˇ nah bi pyeuꞈ-awˬ. Mˬ dmˇ neh ciˬ gʼoeˬ-awˇ, nahˇ ma-ahˇ dehˬ kaˬ-awˬ.

⁶ Uˬ ciꞈ kʼoeˇ miˇ-ahˇ aˇ kʼoꞈ aˇ la laꞈ kʼoeˇ sawˇ doˆ dzeh-awˇ, tiˬ jawˇ-iˬ maˬ gui ahˇ ni bi byehˇ-awˬ.

⁷ Zaˬ maˬ jawˇ le nya-eu, laˬ kʼaˬ maˬ cehˇ-eu tiˬ miˇ bi pyeuꞈ-awˬ.

⁸ Byaˆ yahˬ-ahˇ kʼehˇ dzaˬ nya-eu nyiˇ paˬ shaˆ ma deuˬ-ahˇ, aˇ nah kʼoeˇ nah-ahˇ yaˬ kʼehˇ yaˬ-awˬ lehˇ ehˇ nehˬ-awˬ.

⁹ Uˬ ciꞈ kʼoeˇ miˇ-ahˇ shawˬ ga shawˬ miˇ maˬ bi tsehˬ-ehˇ, uˬ bya bya laˇ tsaˬ maˬ siˬ ni bi jaˆ-awˬ.

¹⁰ Ngaˇ dehꞈ le-awˇ shaˬ zahˬ naꞈ ni jahˇ-euˬ miˇ neh, uˬ ciꞈ kʼoeˇ miˇ-ahˇ yaˬ kʼehˇ yaˬ-awˬ.

¹¹ “Ngaˬ ma-euˬ uˬ maˆ laꞈ kʼoeˇ neh shiˇ-euˬ law nmˇ-aˬ gʼaˬ miˇ-a. Maˬ ngeuˇ naˇ kʼawꞈ, dehꞈ le-euˬ nehˬ-ehˇ shiˇ-euˬ law nmˇ-aˬ shaw miˇ-a.

¹² Aˬ jeˬ miˇ neh ngaˬ ma ngaˬ-ahˇ aˬ yawꞈ-euˬ bawˇ kʼahˇ-ahˇ ciˬ-awˇ, aˬ coeˇ bi dawˇ nehˬ laꞈ taˬ.

¹³ Ngaˇ kʼoeˇ ngeh neh shiˇ dzeuˇ-euˬ law nmˇ-aˬ, nymˬ-mˇ saˇ lehˆ ni ya naˬ luꞈ-awˇ,

¹⁴ aˇ hu sahˬ paˬ-euˬ nymˇ deuˬ-ahˇ tsoˆ muiˬ geuꞈ-eu sahˬ paˬ hawˇ-eu uˆ lahˇ-eu deuˬ loꞈ-ehˇ ya yuꞈ luꞈ tehꞈ-a.

¹⁵ Nymˇ laꞈ kʼoeˇ shuiˇ hawˇ-eu pyuˇ tawˬ byah taˬ-euˬ sahˬ paˬ zaˬ yo deuˬ loꞈ-ehˇ, ngaˇ ya yuꞈ luꞈ tehꞈ-a.

¹⁶ Maˬ ngeuˇ naˇ, yaw shiˇ-ehˇ dehꞈ doˆ le-euˬ zaˬ tiˬ gʼaˬ loꞈ-ehˇ ngaˇ ya yuꞈ luꞈ tehꞈ-a.

¹⁷ Lmˬ bymˇ-ahˇ le keuˆ ngeh haiˬ-eu tsawˇ haˬ deuˬ yaw haiˬ jeˬ maˬ paˇ mˇ nya meh. Gʼaˬ doeˇ mˇ doeˇ-euˬ tsawˇ haˬ deuˬ kʼoeˇ gaˇ gʼaˬ naˬ ya naˬ-eu meh.

¹⁸ Tawˬ-ahˇ uˇ-euˬ tsawˇ haˬ deuˬ kʼawꞈ, dehˬ-eu guˇ-eu teˇ saˇ-ahˇ maˬ paˇ ya gaˬ-ehˇ, coꞈ ngehˇ ni ya jawˇ-eu meh.

¹⁹ Smˇ muiˬ zaˬ coeˬ maˬ ehˇ ni, yawˬ gʼaˬ na luꞈ kʼoeˇ gaˇ jawˇ-awˇ zaˬ kʼaˆ kʼawꞈ buˬ-iˇ law-iˇ-eu meh.

²⁰ “Aˬ jeˬ miˇ neh tsawˇ haˬ zaˬ-ahˇ shaˬ zahˬ naꞈ naꞈ-ehˇ bi dehꞈ ta. Aˬ jeˬ miˇ neh noeˬ shaˬ luꞈ-eu deuˬ-ahˇ yaw shehꞈ bya nehˬ ta.

²¹ Shiˇ-eu jeˬ-ahˇ aˬ yawꞈ maꞈ loꞈ luꞈ kʼawꞈ, tiˬ jawˇ-iˬ keuˆ le-eu maˬ baw-a. Pyuˇ shuiˇ naˆ maˬ tseˇ lmˬ bymˇ-ahˇ aˬ yawꞈ maꞈ gaˬ-eu meh.

²² Shiˇ gʼaˬ-awˇ maˬ bi duˬ pahˬ dzeuˇ kʼoeˇ keuˆ ni, aˬ yawꞈ maꞈ laˬ kʼaˬ maˬ cehˇ-a.

²³ Aˬ yawꞈ maꞈ-euˬ aˇ nah aˇ yamˬ-ahˇ Miˬyehˇ dehˬ kaˬ taˬ-awˇ, yawˬ pyawˬ na luꞈ-ahˇ ciˬ gʼoeˬ taˬ-euˬ meh.

²⁴ Dzaˬ-eu dah zaˇ ngoeˇ-eu oꞈ-awˇ, ngoeˇ taˬ-euˬ maˬ baw miˇ-a.

²⁵ Ngaˬ neh guˆ-euˬ jeˬ keuˆ le-awˇ, kʼahˬ lahˇ-euˬ jeˬ teuˇ le-euˬ nya.

²⁶ Nui saˇ maˬ za, jawˇ naˬ maˬ oꞈ. shaˬ zahˬ yaw li maˬ mawˇ miˇ-a.”