Yawˇbaˆ 28 - Akha

Zaˬ siˬ tsawˇ gahˇ-ahˇ ja ceuˬ-eu

¹ Pyuˇ duˬ-eu duˬ kʼahˬ deuˬ jaˆ-awˇ, shuiˇ baw guiˇ-awˇ laˆ shawˇ-eu jawˇ duˬ deuˬ jaˆ-eu meh.

² Tsawˇ haˬ zaˬ miˇ tsaˬ-ahˇ shmˇ duˬ doˆ-awˇ, kʼaˬ lo laꞈ kʼoeˇ guiˬ shuiˇ baw guiˇ doˆ geuꞈ-eu meh.

³ Zahˇ dui dui gaˇ tsawˇ haˬ uˇ-iˇ-awˇ, miˇ tsaˬ dawˬ dah naꞈ dui dui gaˇ pyehˆ tseˇ-iˇ-awˇ, yaw zahˇ laꞈ kʼoeˇ kʼaˬ lo duˬ doˆ laˬ-iˇ-eu meh.

⁴ Tsawˇ haˬ tiˬ gʼaˬ-iˬ maˬ jawˇ-eu jawˇ duˬ, tsawˇ haˬ zaˬ neh aˬ kuiˇ maˬ cawˬ taˬ haw-euˬ gaˇ, tsawˇ haˬ zaˬ miˇ tsaˬ dawˬ dah duˬ byoe uˇ gʼeh-eu meh. Duˬ kʼahˬ laꞈ kʼoeˇ aˇ caˆ-ahˇ aˬ yawꞈ maꞈ ga gʼeu-awˇ, cawˬ maˬ baw ni gaˇ mˇ-eu meh.

⁵ Dzaˬ la gʼo cehˇ bi dehꞈ doˆ laˇ-eu miˇ tsaˬ tahˬ kʼawˇ heu siˬ, dawˬ dah yaw pyaˆ yaw shaˆ, yaw noeˆ yaw nmˆ meh.

⁶ Miˇ tsaˬ tahˬ kʼawˇ laꞈ kʼoeˇ jaˆ-eu kʼaˬ lo laꞈ kʼoeˇ, nyoeˇ leuˬ leuˬ-eu kʼaˬ lo sehˇ ahˇ-awˇ, miˇ tsaˬ miˇ jehꞈ laꞈ kʼoeˇ shuiˇ ahˇ-eu meh.

⁷ Kʼaˬ lo duˬ kʼahˬ-ahˇ iˇ-eu gaˇ ma-ahˇ kʼaˬ dzeˇ pyawˆ maˬ haw mawˇ nya-ehˇ, jeˬ shiˇ kʼaˬ dzeˇ deuˬ kʼoeˇ-euˬ kʼoeˇ taˆ tiˬ jawˇ-iˬ maˬ zaw tsehˆ haw-aˬ.

⁸ Aˇ laˬ jaˬ shiˇ hawˇ-eu bawˇ tsahˬ jeˬ zaˬ yaw haiˬ deuˬ, gaˇ ma kʼoeˇ kahˇ-ahˇ tiˬ jawˇ-iˬ maˬ cah haw-aˬ.

⁹ Gʼahˇ dui dui-eu kʼaˬ lo deuˬ-ahˇ tsawˇ haˬ zaˬ duˬ paˆ-awˇ, gawˬ jawˬ deuˬ-ahˇ dawˬ dahˬ-ahˇ neh duˬ dzeh-eu meh.

¹⁰ Kʼaˬ lo-ahˇ aˬ yawꞈ maꞈ byoe byoe uˇ gʼeh ngeh, aˇ poeˬ kʼaˆ-eu kʼaˬ lo sehˇ deuˬ duˬ mawˇ-eu meh.

¹¹ Miˇ tsaˬ dawˬ dah jaˆ-eu lawˇ baˬ deuˬ-ahˇ aˬ yawꞈ maꞈ duˬ tsiˇ-awˇ, zaꞈ taˬ-euˬ jeˬ yuˇ doˆ laꞈ nya-eu meh.

¹² Ehˇ kʼawꞈ, zaˬ siˬ tsawˇ gahˇ-ahˇ aˬ geu gaˇ poˆ mawˇ-iˇ nmˇ. Gʼoˆ siˬ gʼoˆ shaw nya-eu jeˬ aˬ geu gaˇ laˬ-iˇ nmˇ.

¹³ Zaˬ siˬ tsawˇ gahˇ-aˬ, tsawˇ haˬ zaˬ nehˬ-ehˇ maˬ jaˆ-a. Zaˬ siˬ tsawˇ gahˇ aˇ naˆ ni poeˬ-eu tiˬ gʼaˬ-iˬ maˬ siˬ nya-a.

¹⁴ Iˬ ma laˆ shaˆ naꞈ dui dui-eu tsahˇ kʼawꞈ, zaˬ siˬ tsawˇ gahˇ kʼoeˇ gaˇ maˬ jaˆ-a lehˇ ehˇ luꞈ meh.

¹⁵ Pyuˇ hawˇ-eu shuiˇ neh zaˬ siˬ tsawˇ gahˇ maˬ zeuˇ za nya-a.

¹⁶ Muiˬ dui dui-eu shuiˇ hawˇ-eu kʼaˬ lo sehˇ deuˬ, kʼoeˇ naˆ ni maˬ poeˬ-a.

¹⁷ Zaˬ siˬ tsawˇ gahˇ-aˬ, shuiˇ naˆ maˬ tseˇ aˇ poeˬ kʼaˆ-awˇ, shuiˇ myawˬ guˇ hawˇ-eu muiˬ dui dui-eu kʼaw teuꞈ ba la sehˇ neh maˬ paˇ za nya-a.

¹⁸ Zaˬ siˬ tsawˇ gahˇ-aˬ, laˆ shaˆ sehˇ, aˇ caˇ caˇ kʼawꞈ sehˇ hawˇ-eu, yaw neˇ neˇ-eu kʼaˬ lo sehˇ naˆ maˬ tseˇ poeˬ-eu meh.

¹⁹ Muiˬ dui dui-eu shuiˇ nyehˆ ni gʼeh-eu kʼaˬ lo sehˇ hawˇ-eu shawˇ jehˆ ni gʼeh-eu shuiˇ kʼawꞈ, zaˬ siˬ tsawˇ gahˇ loꞈ-ehˇ maˬ poeˬ-a.

²⁰ Toˆ-ehˇ ngeuˇ naˇ, zaˬ siˬ tsawˇ gahˇ-euˬ dawˬ pehˬ aˬ geu gaˇ jaˆ ta. Gʼoˆ siˬ gʼoˆ shaw nya-eu jeˬ-ahˇ aˬ gaˇ laˬ-iˇ nya ta.

²¹ Yaw dehꞈ kʼaˇ dehꞈ-eu jeˬ, zaˬ siˬ tsawˇ gahˇ-ahˇ maˬ mawˇ nya-a. Zaw luꞈ-eu aˇ jiˇ kʼawꞈ maˬ mawˇ nya-a.

²² Shiˇ-eu jeˬ hawˇ-eu luˬ-iˇ seˇ-iˇ-eu jeˬ kʼawꞈ, zaˬ siˬ tsawˇ gahˇ gaˇ kawˆ aˬ cawˬ ja-eu gaˬ haw-eu tehꞈ ma lehˇ ehˇ-eu meh.

²³ “Zaˬ siˬ tsawˇ gahˇ jaˆ gaˇ le-eu gaˇ ma hawˇ-eu jaˆ duˬ-ahˇ, Miˬyehˇ tiˬ gʼaˬ tehꞈ-ehˇ siˬ nya-eu meh.

²⁴ Mˬ dzeˇ miˇ dzeˇ keuˆ ni aˬ yawꞈ haw mawˇ nya-eu miˇ neh, mˬ-euˬ laꞈ oˆ kʼaˇ jaˆ-eu yawˬ jeˬ na luꞈ-ahˇ aˬ yawꞈ mawˇ-eu meh.

²⁵ Miˬyehˇ jaˬ lehˇ-ahˇ baoˬ biꞈ-awˇ, iˬ ma laˆ shaˆ-ahˇ dehˬ dza haw ngeh,

²⁶ Uˬ yehˇ bi yehˇ le-eu pehˇ tsahˇ aˬ yawꞈ laˆ baw-awˇ, mˬ jeˬ tsawˬ tehˆ-euˬ gaˇ ma beh nehˬ ngeh,

²⁷ zaˬ siˬ tsawˇ gahˇ-ahˇ aˬ yawꞈ mawˇ-awˇ, aˇ naˆ ni poeˬ-eu lawˬ haw-euˬ meh. Kʼoeˇ ngeh, zaˬ siˬ tsawˇ gahˇ-euˬ poeˬ sawˇ lawˬ aˬ yawꞈ daˇ tsehˆ-euˬ meh.

²⁸ “Kʼoeˇ naˇ, Sahˬpaˬ Miˬyehˇ-ahˇ guˆ-eu jeˬ-aˬ, zaˬ siˬ tsawˇ gahˇ pyeuꞈ-awˇ, yaw haiˬ jeˬ-ahˇ gaˇ jaw jaw-eu jeˬ-aˬ, gʼoˆ siˬ gʼoˆ shaw nya-eu jeˬ pyeuꞈ-eu meh lehˇ, tsawˇ haˬ zaˬ-ahˇ Miˬyehˇ ehˇ taˬ-euˬ meh.”