Yawˇbaˆ 27 - Akha

¹ Yawˇbaˆ paˇ ehˇ-eu,

² “Ngaˬ-euˬ kʼoeˇ taˆ yaw tsaˬ yaw dawˇ jeˬ maˬ bi keuˆ le-ehˇ, ngaˇ yaw dehꞈ dehꞈ-eu jeˬ-ahˇ kʼaˬ jehꞈ ni bi pyeuꞈ laˇ-euˬ gʼaˬ pyeuꞈ-eu, Baoˬ huiˬ-eu Miˬyehˇ mehˬ shi ngaˇ heu loꞈ-ehˇ ehˇ tsehˆ-eu ma.

³ Miˬyehˇ ngaˬ-ahˇ saꞈ kʼaˇ bi gʼawˇ kʼoeˇ keuˆ ni,

⁴ Ngaˬ-euˬ kʼaˬ meh yaw haiˬ jeˬ maˬ paˇ ngehˬ-ehˇ, ngaˬ-euˬ mehˬ laˇ jaˬ myawꞈ maˬ paˇ myawꞈ ma.

⁵ Naw maꞈ tsaˬ meh lehˇ ngaˇ tiˬ jawˇ-iˬ maˬ ehˇ, ngaˇ shiˇ ngeh keuˆ ni ngaˇ iˬ baˇ maˬ ahˇ lehˇ pyehˇ sehꞈ leꞈ ma.

⁶ Ngaˇ yaw tsaˬ ma lehˇ ngaˇ ehˇ luꞈ-eu heu maˬ paˇ pyehˬ dzeh ma. Ngaˇ kʼaˇ dehꞈ kʼoeˇ keuˆ ni ngaˬ-euˬ nui ma shawˇ jehˆ ni jaˆ ma.

⁷ Ngaˬ-ahˇ maˬ tsaˬ-ehˇ kʼaˇ ceh laˇ-eu tsawˇ haˬ deuˬ-ahˇ, maˬ tsaˬ maˬ dawˇ-eu haiˬ-eu tsawˇ haˬ loꞈ-ehˇ kʼehˬ nehˬ kʼaˆ nehˬ gaˇ ya daˬ luꞈ-uˇ.

⁸ Aˬ yawꞈ maꞈ-euˬ saꞈ laˇ-ahˇ Miˬyehˇ yuˇ kʼoꞈ ngeh, Miˬyehˇ maˬ baw-eu tsawˇ haˬ deuˬ aˬ gaˇ noeˬ tmˬ kʼaˇ paˇ za ta.

⁹ Shaˬ-eu zahˬ-eu jeˬ puˬ le ngeh, aˬ yawꞈ maꞈ guˇ-eu teˇ saˇ-ahˇ Miˬyehˇ naˇ haˬ nehˬ tehꞈ-a loˇ.

¹⁰ Miˬyehˇ neh biꞈ-euˬ laˬ kʼaˬ cehˇ-eu jeˬ-ahˇ aˬ yawꞈ maꞈ nui kʼahˇ shiˇ-eu tsaˬ-awˇ, aˬ yawꞈ-ahˇ maˬ tsehˆ leˇ ni guiˬ lahˬ shaˇ-eu tsaˬ meh.

¹¹ Miˬyehˇ baoˬ aˇ naˆ ni huiˬ-awˇ, aˬ yawꞈ gaˇ mˇ-eu gʼaˇ duˬ gaˇ kawˆ kawˆ taˬ-euˬ jeˬ, naw maꞈ-ahˇ ngaˇ ja mehˬ nehˬ nyaˇ.

¹² Gaˇ kawˆ heu deuˬ naw maꞈ-euˬ mawˇ do ya mawˇ duˬ gʼaˬ-euˬ meh. Ehˇ kʼawꞈ, aˬ jeˬ miˇ neh gaˇ dahˇ maˬ tsoeˬ-eu dawˬ heu deuˬ naw maꞈ ngehˬ te.

¹³ Heu-aˬ, yaw haiˬ jeˬ mˇ-eu tsawˇ haˬ deuˬ-ahˇ Baoˬ huiˬ-eu Miˬyehˇ aˬ joˆ-ehˇ kʼehˬ nehˬ kʼaˆ nehˬ-eu gaˇ kawˆ meh.

¹⁴ Aˬ yawꞈ maꞈ aˬ li gʼawˬ mya gʼaˬ jawˇ kʼawꞈ, guiˇ deuˆ gaˇ shiˇ jiˇ-awˇ, aˬ yawꞈ maꞈ-euˬ aˬ buˇ aˬ li deuˬ maˬ dzaˬ maˬ dawˇ dehˆ ni ya shaˬ tehꞈ-a.

¹⁵ Maˬ shiˇ-ehˇ kʼaˇ dzeuˇ-iˇ-euˬ deuˬ naˇ gawˇ gawˇ sehꞈ jiˇ-awˇ, miˬ coeˬ coeˬ-iˇ-euˬ aˬ yawꞈ maꞈ-euˬ miˬ zaˬ deuˬ kʼawꞈ, aˬ yawꞈ maꞈ gʼaˇ duˬ tsawˇ ngoeˇ maˬ ngoeˇ nehˬ-aˇ.

¹⁶ Haiˬ-eu tsawˇ haˬ deuˬ pyuˇ maˬ gui jiˇ coeˇ gaˇ keuˆ ni jaˆ-awˇ, mehˬ tsoeˬ maˬ dm jiˇ coeˇ gaˇ keuˆ ni jaˆ kʼawꞈ,

¹⁷ tsawˇ muiˬ deuˬ mehˬ tsoeˬ kʼoeˇ deuˬ ya dm-awˇ, yaw sui yaw dawˇ deuˬ pyuˇ kʼoeˇ deuˬ za tehꞈ-a.

¹⁸ Haiˬ-eu tsawˇ haˬ deuˬ aˬ oˬ loˬ ma aˇ kahˇ kahˇ taˬ-euˬ loꞈ-ehˇ nymˇ tsoˆ-awˇ, deh yaˇ-ahˇ loꞈ piˇ-eu zaˬ kʼaˆ deuˬ-euˬ yaˇ cmˇ loꞈ-ehˇ tsoˆ-eu meh.

¹⁹ Aˬ yawꞈ maꞈ smˇ muiˬ muiˬ-awˇ yuꞈ kʼaˆ-eu meh. Ehˇ kʼawꞈ, uˬ noeˬ noeˬ laˇ ngeh aˬ yawꞈ maꞈ-euˬ pyuˇ shuiˇ myawˬ gahˬ maˬ jaˆ-a.

²⁰ Ja pyuˬ ni oe-euˬ iˇ jeuˬ loꞈ-ehˇ aˬ yawꞈ maꞈ kʼoeˇ taˆ guˆ-eu gaˆ-eu jeˬ keuˆ le-awˇ, uˬ ciꞈ paw baw-eu jaˬ lehˇ aˬ yawꞈ maꞈ-ahˇ baw byoˆ gʼeh tehꞈ-a.

²¹ Nahˇ ma doˆ kʼehˬ paw neh baw laꞈ-euˬ jaˬ lehˇ aˬ yawꞈ maꞈ-ahˇ nymˇ laꞈ kʼoeˇ neh baw doˆ gʼeh -awˇ,

²² aˬ yawꞈ maꞈ cehˆ dzeuˇ-eu lehˇ leh jeh ngeh,

²³ Aˬ yawꞈ maꞈ kʼaˇ cehˆ gaˇ jaˬ lehˇ kʼoeˇ haˬ haˬ-ehˇ baw-awˇ, laˆ cawˆ-eu baoˬ neh aˬ yawꞈ maꞈ-ahˇ laˆ guˆ nehˬ tehꞈ-a.