Yawˇbaˆ 23 - Akha

¹ Kʼoeˇ naˇ, Yawˇbaˆ ehˇ-eu,

² “Nymˬ-mˇ kʼawꞈ, Miˬyehˇ-ahˇ ngaˇ nui ma naˇ-awˇ toˇ te siˬ. Ngaˇ naˇ-eu miˇ neh, maˬ mahˇ doˆ-ehˇ maˬ dzahˬ tehˬ coeˇ nya.

³ Aˬ yawꞈ-ahˇ aˬ gaˇ poˆ mawˇ-awˇ, aˬ yawꞈ jawˇ gaˇ aˬ joˆ-ehˇ le keuˆ nya-eu siˬ nya law nmˇ-aˬ lehˇ noeˬ laˇ nya.

⁴ Ngaˬ-euˬ gaˇ kawˆ heu aˬ yawꞈ mehˬ shi pyehˬ kʼawˬ-awˇ, yaw kʼaˆ-ehˇ ja ceh ceh mawꞈ nya.

⁵ Aˬ yawꞈ aˬ joˆ-ehˇ ehˇ laˇ-awˇ, aˬ joˆ-ehˇ ngehˬ kʼoꞈ tmˇ kʼoꞈ laˇ nga lehˇ siˬ mawꞈ nya.

⁶ Miˬyehˇ aˬ yawꞈ-euˬ huiˬ-eu baoˬ neh ngaˬ-ahˇ kʼehˬ tehꞈ-a loˇ. Maˬ ngeuˇ-aˇ. Ngaˇ ehˇ gaˇ aˬ yawꞈ naˇ haˬ tehꞈ-a.

⁷ Ngaˇ-aˬ yaw sui yaw dawˇ miˇ neh Miˬyehˇ-ahˇ ja cawˬ peuˬ ma. Ngaˇ mˇ lehˬ taˬ-euˬ maˬ jaˆ-a lehˇ mˬ maˬ maˬ byaˆ zaˇ ziˇ aˬ yawꞈ daˇ tsehˆ tehꞈ-a.

⁸ Ngaˇ nahˇ ma doˆ kʼehˬ paw iˇ kʼawꞈ, Miˬyehˇ-ahˇ maˬ poˆ mawˇ nya-a. Nahˇ ma ga kʼehˬ paw poˆ-iˇ kʼawꞈ maˬ poˆ mawˇ nya-a.

⁹ Laꞈ taˆ paw pyawˬ hawˇ-eu laꞈ oˆ paw pyawˬ-ahˇ Miˬyehˇ gaˇ mˇ luꞈ kʼawꞈ, aˬ yawꞈ-ahˇ ngaˇ maˬ ya mawˇ-a.

¹⁰ Ehˇ kʼawꞈ, ngaˬ-euˬ kuiˇ toꞈ aˬ yawꞈ toꞈ yawˬ Miˬyehˇ siˬ nya meh. Aˬ yawꞈ ngaˬ-ahˇ lawˬ haw naˇ, ngaˇ shawˇ jehˆ ni gʼeh gaˇ aˬ yawꞈ ya mawˇ tehꞈ-a.

¹¹ Aˬ yawꞈ neh tseˇ doˆ taˬ-euˬ gaˇ ma-ahˇ ngaˇ saˇ jaˇ ziꞈ-awˇ, gaˇ oˆ gaˇ taˆ maˬ uˇ-iˇ ni cah luꞈ-eu ma.

¹² Aˬ yawꞈ-euˬ ehˇ dawˬ-ahˇ ngaˇ aˬ myah luꞈ naˇ haˬ geuꞈ-awˇ, ngaˬ-euˬ nui kʼahˇ maˬ mˇ ni aˬ yawꞈ-euˬ nui noeˬ-ahˇ caw teh luꞈ-eu ma.

¹³ Aˬ yawꞈ tiˬ jawˇ-iˬ poˆ laˇ paˇ laˇ-eu maˬ baw-ehˇ, tsawˇ haˬ tiˬ gʼaˬ-iˬ aˬ yawꞈ-ahˇ maˬ ciˬ daˬ leˇ peuˬ-a. Aˬ yawꞈ mˇ mawꞈ-eu jeˬ mˇ gaˇ kʼawꞈ, tiˬ gʼaˬ-iˬ maˬ laˆ tsoeˬ leˇ nya-a.

¹⁴ Ngaˬ-euˬ gʼaˇ duˬ aˬ yawꞈ neh lehˬ hmˬ taˬ-euˬ loꞈ-ehˇ aˬ yawꞈ mˇ byah tehꞈ-a. Kʼoeˇ loꞈ-ehˇ lehˬ hmˬ taˬ-euˬ jeˬ aˬ yawꞈ-euˬ nui ma laꞈ kʼoeˇ maˬ ehˇ jiˇ coeˇ ni jaˆ luꞈ meh.

¹⁵ Kʼoeˇ miˇ neh aˬ yawꞈ-euˬ mehˬ shi ngaˬ-ahˇ yaw dzuˬ dzuˬ nya. Gaˇ kawˆ heu deuˬ shaˇ noeˬ ngeh ngaˬ-ahˇ yaw zawˇ guˆ nya.

¹⁶ Ngaˬ-euˬ nui ma gʼaˬ baˬ ni Miˬyehˇ jahˇ-euˬ meh.

¹⁷ Ehˇ kʼawꞈ, ngaˬ-euˬ myaˆ pyawˬ-ahˇ dehˬ kaˬ taˬ-euˬ zahˇ tsui ni gʼeh-eu jeˬ-ahˇ, ngaˇ guˆ-awˇ ciˬ cuˇ ni jawˇ-eu maˬ ngeuˇ.