Yawˇbaˆ 22 - Akha

DAWˬ JA JA-EU SMˬ DEUˆ TIˬ DEUˆ

¹ Kʼoeˇ naˇ, Teˬmaˬ meuˬ-ahˇ jawˇ-eu Eˇliˇpaˬ gʼaˬ ehˇ-eu,

² “Miˬyehˇ mehˬ shi gaˇ dahˇ tsoeˬ-eu tsawˇ haˬ jawˇ meh loˇ. Tsawˇ gahˇ ahˇ dui dui-eu tsawˇ haˬ kʼawꞈ aˬ yawꞈ mehˬ shi gaˇ dahˇ tsoeˬ tehꞈ-a loˇ.

³ Nawˇ yaw tsaˬ yaw dawˇ dawˇ-ehˇ dehꞈ gaˇ Miˬyehˇ nui kʼahˇ shiˇ tehꞈ-a loˇ. Nawˇ yaw muiˬ yaw jaˬ jeˬ mˇ-eu aˬ yawꞈ gʼaˇ duˬ gaˇ dahˇ tsoeˬ tehꞈ-a loˇ.

⁴ Nawˇ Miˬyehˇ-ahˇ guˆ-eu baˬ da neh, aˬ yawꞈ nawˬ-ahˇ bye-awˇ kʼehˬ-eu maˬ ngeuˇ-a.

⁵ Nawˇ iˬ baˇ aˇ dzehˬ mˇ dzeuˇ-euˬ miˇ neh, nawˬ neh mˇ-euˬ yaw haiˬ jeˬ dawˬ tawˆ luꞈ gʼaˇ duˬ aˬ yawꞈ nawˬ-ahˇ kʼehˬ-eu meh.

⁶ Nawˬ-euˬ mehˇ nmˇ nawˬ-ahˇ dziˇ dzoˆ tsoeˬ ni, aˬ yawꞈ-euˬ mehˬ tsoeˬ nawˇ lehˆ doˆ-awˇ, mehˬ tsoeˬ dm-eu maˬ jaˆ ni bi shaˬ-euˬ meh.

⁷ Gʼaˬ doeˇ doeˇ-eu tsawˇ haˬ-ahˇ nawˇ iˇ cuꞈ maˬ bi dawˇ-ehˇ, hawˬ mehꞈ-eu tsawˇ haˬ-ahˇ nawˇ hawˬ maˬ bi dzaˬ-a.

⁸ Nawˬ-euˬ baoˬ hawˇ-eu gʼaˬ-ahˇ nawˇ gʼoe-awˇ, miˇ tsaˬ gʼawˬ mya ni laˆ za geuꞈ-euˬ meh.

⁹ Miˬ coeˬ miˬ ma deuˬ-ahˇ nawˇ ngehˬ maˬ gʼeh ni byehˇ taˬ-euˬ uˬ taꞈ, muˇ coeˬ aˬ nmˇ deuˬ-ahˇ nawˇ kʼaˆ dzaˬ-awˇ yehˬ bawˬ-ehˇ gʼeh nehˬ-euˬ meh.

¹⁰ Kʼoeˇ miˇ neh nymˬ-mˇ nawˬ-euˬ tiˬ jawˬ lahˇ ju bi kʼmˇ coeˬ-awˇ, nawˇ tsawˬ guˆ dui dui-iˇ-euˬ meh.

¹¹ Zahˇ dui dui le-euˬ miˇ neh nawˇ tiˬ gaˇ-iˬ maˬ haw mawˇ nya-ehˇ, iˇ jeuˬ oe-awˇ nawˬ-ahˇ dehˬ pymˬ-euˬ meh.

¹² Aˬ guiˇ deuˬ yaw goˇ-ahˇ jaˆ gaˇ duˇ kʼawꞈ, goˇ dui dui gaˇ Miˬyehˇ jawˇ-awˇ, aˬ guiˇ-ahˇ haw ka luꞈ-eu maˬ ngeuˇ-a loˇ.

¹³ Ehˇ kʼawꞈ, Miˬyehˇ aˬ jeˬ siˬ nya ta lehˇ nawˇ ehˇ-eu meh. Aˬ yawꞈ-ahˇ mˬ dmˇ jaˆ tsoeˬ taˬ-eu miˇ neh aˬ dui-ahˇ yaˇ kʼaˬ daˇ nya tehꞈ-a loˇ lehˇ ehˇ-eu meh.

¹⁴ Mˬ hawˇ-eu miˇ tsaˬ yaw kaˬ-ahˇ aˬ yawꞈ cah ngeh, tuˇ jawˬ ni gʼeh-eu mˬ dmˇ jaˆ tsoeˬ-eu miˇ neh, aˬ dui-ahˇ aˬ yawꞈ maˬ mawˇ nya-a lehˇ nawˇ noeˬ-eu meh.

¹⁵ Haiˬ-eu tsawˇ haˬ deuˬ maˬ byehˇ dzeh ni cah-eu gaˇ ma-ahˇ, nawˇ cah ma lehˇ noeˬ tsehˆ taˬ teˬ loˇ.

¹⁶ Aˬ yawꞈ maꞈ-euˬ aˇ nah aˇ yamˬ maˬ keuˆ laˇ mi naˆ-ehˇ, iˇ jeuˬ oe-awˇ bi dehˬ dzaˬ-euˬ meh.

¹⁷ Tsawˇ haˬ heu deuˬ Miˬyehˇ-ahˇ maˬ ha geuꞈ-ehˇ, aˬ yawꞈ maꞈ-ahˇ Miˬyehˇ tiˬ jeˬ-iˬ maˬ jahˇ laˇ nya-a lehˇ jah-eu meh.

¹⁸ Ehˇ kʼawꞈ, aˬ yawꞈ maꞈ baw le za le ni jahˇ nehˬ-eu gʼaˬ Miˬyehˇ meh. Haiˬ-eu tsawˇ haˬ deuˬ-euˬ nui noeˬ ngaˬ-ahˇ maˬ gʼoˆ shaw nya nya.

¹⁹ Haiˬ-eu tsawˇ haˬ deuˬ kʼehˬ-eu kʼaˆ-eu jeˬ-ahˇ ya daˬ ngeh, tsawˇ muiˬ deuˬ laˬ kʼaˬ cehˇ-awˇ, iˬ baˇ maˬ mˇ-euˬ deuˬ uiˇ yoeˇ-eu meh.

²⁰ Haiˬ-eu tsawˇ haˬ deuˬ kʼaˇ jaˆ-eu jeˬ bi laˆ cawˆ jiˇ-awˇ, kʼaˇ dzeˇ yaꞈ-euˬ jeˬ-ahˇ miˬ dzaˬ puiˆ dzaˬ jiˇ tehꞈ-a.

²¹ Yawˇbaˆ-oˇ, Miˬyehˇ-ahˇ dehꞈ tsaˬ-awˇ, aˬ yawꞈ-ahˇ muiˇ-eu tsawˇ haˬ loꞈ-ehˇ taˬ paˇ mˇ. Nawˇ kʼoeˇ loꞈ-ehˇ jahˇ naˇ aˬ yawꞈ guiˬ lahˬ biꞈ laꞈ tehꞈ-a.

²² Aˬ yawꞈ mehˬ-eu tsoˆ-eu jeˬ-ahˇ naˇ haˬ geuꞈ-awˇ, aˬ yawꞈ-euˬ dawˬ nawˬ-euˬ nui ma laꞈ kʼoeˇ bi ahˇ-awˬ.

²³ Miˬyehˇ jawˇ gaˇ nui ma nahˬ yu ni gʼoꞈ leˇ-awˇ, nawˬ-euˬ nymˇ jiˇ laꞈ kʼoeˇ kʼaˇ mˇ-euˬ yaw haiˬ jeˬ byehˇ dzeh jiˇ-awˬ.

²⁴ Nawˬ-euˬ shuiˇ biˬ dzeh-awˬ. Muiˬ dui dui-eu nawˬ-euˬ shuiˇ deuˬ-ahˇ gui coˇ ni gʼeh-eu lawˇ baˬ dawˬ dah tahˬ dzeh-awˬ.

²⁵ Baoˬ huiˬ-eu Miˬyehˇ-ahˇ nawˬ-euˬ shuiˇ bi pyeuꞈ-awˬ. Aˬ yawꞈ-ahˇ nawˬ-euˬ gʼaˇ duˬ baꞈ cu taˬ-euˬ pyuˇ bi pyeuꞈ-awˬ.

²⁶ Kʼoeˇ ngeh Miˬyehˇ-ahˇ nawˇ aˬ myah luꞈ gʼoe-awˇ, aˬ yawꞈ nawˬ-euˬ laˬ kʼaˬ cehˇ duˬ pyeuꞈ gaˇ ya mawˇ tehꞈ-a.

²⁷ Nawˇ guiˬ lahˬ shaˇ ngeh aˬ yawꞈ naˇ haˬ geuꞈ nehˬ laꞈ-awˇ, nawˬ-euˬ saˇ jaˇ-ahˇ nawˇ ziꞈ tehꞈ-a.

²⁸ Nawˇ kʼaˇ mˇ kʼaˇ shaˇ-eu jeˬ huiˬ laˇ mahˇ laˇ-awˇ, nawˬ-euˬ gaˇ ma-ahˇ yaw shehꞈ bya tehꞈ-a.

²⁹ Nui ma huiˬ-eu mahˇ-eu tsawˇ haˬ-ahˇ Miˬyehˇ dehˬ awˆ-awˇ, nui ma nahˬ yu ni gʼeh-eu tsawˇ haˬ-ahˇ aˬ yawꞈ ka kʼoꞈ tehꞈ-a.

³⁰ Nawˇ iˬ baˇ maˬ mˇ ni yaw tsaˬ yaw dawˇ jeˬ mˇ naˇ, aˬ yawꞈ nawˬ-ahˇ ka kʼoꞈ tehꞈ-a.”