Yawˇbaˆ 20 - Akha

¹ Kʼoeˇ naˇ, Naˬmaˬ miˇ kʼahˬ-ahˇ jawˇ-eu Zoˇpaˬ gʼaˬ ehˇ-eu,

² “Yawˇbaˆ-oˇ nawˬ-euˬ dawˬ ngaˬ-ahˇ coeˬ dui dui laˇ nya. Nymˬ-mˇ nawˬ-ahˇ dawˬ ngehˬ cawˬ-eu maˬ paˇ oˇ coeˇ miˇ-a.

³ Nawˇ ngaˬ-ahˇ bi coeˬ leˇ-eu dawˬ ngehˬ nehˬ laꞈ-euˬ meh. Ehˇ kʼawꞈ, nawˬ-ahˇ aˬ joˆ-ehˇ paˇ ya ehˇ kʼoꞈ-eu ngaˇ siˬ nya ma.

⁴ Aˇ hu-euˬ ziˇ-ahˇ pyeuꞈ yaꞈ-euˬ gaˇ kawˆ nawˇ yaw muiˇ siˬ nya meh. Tsawˇ haˬ zaˬ miˇ tsaˬ kʼoeˇ taˆ jawˇ dahˬ beh ngeh neh,

⁵ haiˬ-eu tsawˇ haˬ tiˬ gʼaˬ-iˬ gʼawˬ myahˇ ni laˬ kʼaˬ cehˇ cehˇ-ehˇ maˬ ya dehꞈ haw-aˬ.

⁶ Mˬ-ahˇ tuˆ ni aˬ yawꞈ dehꞈ huiˬ dehꞈ mahˇ-awˇ, aˬ yawꞈ-euˬ uˬ duˬ mˬ dmˇ-ahˇ tuˆ kʼawꞈ,

⁷ kʼaˬ lehˇ loꞈ-ehˇ bi baw byoˆ nya-eu meh. Aˬ yawꞈ-ahˇ siˬ nya-eu tsawˇ haˬ deuˬ, aˬ yawꞈ aˬ geu gaˇ iˇ byoˆ-euˬ nga lehˇ ya zahˬ leˇ tehꞈ-a.

⁸ Yuꞈ maˆ maˆ-eu hawˇ-eu uˬ ciꞈ paw yaw sahˇ laꞈ kʼoeˇ ya mawˇ-eu loꞈ-ehˇ, aˬ yawꞈ byoˆ kʼaꞈ-iˇ-awˇ, tiˬ jawˇ-iˬ maˬ paˇ ya mawˇ meh.

⁹ Aˬ yawꞈ neh jawˇ-euˬ jawˇ duˬ-ahˇ neh aˬ yawꞈ ya byoˆ tsehˆ-awˇ,

¹⁰ iˇ shaˬ zaˬ deuˬ kʼoeˇ taˆ aˬ yawꞈ neh kʼaˆ dzaˬ taˬ-euˬ jeˬ-ahˇ, aˬ yawꞈ-euˬ aˬ li deuˬ paˇ ya mˇ tsoeˬ kʼoꞈ tehꞈ-a.

¹¹ Gʼaˬ kʼaˆ gʼaˬ loeˇ soeˇ-i gʼeh-eu aˬ yawꞈ-euˬ gʼawˇ mawˇ, tiˬ kʼehˇ kʼehˬ laꞈ kʼoeˇ kʼaˬ lehˇ pyeuꞈ-iˇ tehꞈ-a.

¹² Yaw haiˬ jeˬ mˇ-eu aˬ yawꞈ-euˬ kʼaˬ meh-ahˇ kuiˇ leˇ-awˇ, mehˬ laˇ uˬ moˆ myuˇ zaꞈ taˬ kʼawꞈ,

¹³ kʼoeˇ jeˬ-ahˇ aˬ yawꞈ maˬ meh dzeh mawꞈ-ehˇ, aˬ yawꞈ-euˬ kʼaˬ meh laꞈ kʼoeˇ myuˇ taˬ kʼawꞈ,

¹⁴ Aˬ yawꞈ-euˬ uˬ maˆ laꞈ kʼoeˇ dzaˇ kʼoeˇ kʼaˬ jehꞈ ni gʼeh-awˇ, doꞈ loꞈ-ehˇ doeˇ dui dui-eu meh.

¹⁵ Haiˬ-eu tsawˇ haˬ-aˬ, yawˬ ha neh kʼoeˬ uiˬ taˬ-euˬ pyuˇ shuiˇ myawˬ gahˬ deuˬ-ahˇ uˬ pehꞈ ya pehꞈ doˆ meh. Uˬ maˆ laꞈ kʼoeˇ ahˇ kʼawꞈ Miˬyehˇ yuˇ doˆ kʼoꞈ tehꞈ-a.

¹⁶ Haiˬ-eu tsawˇ haˬ deuˬ neh kʼaˇ myoꞈ ahˇ-euˬ jeˬ doꞈ-ahˇ duˇ-awˇ, doꞈ kʼaˆ dui dui-eu aˇ lawˇ neh bi toˆ-euˬ loꞈ-ehˇ aˬ yawꞈ-ahˇ laˆ sehꞈ-eu meh.

¹⁷ Saˬ loˬ tsiˇ lawˇ baˬ loꞈ-ehˇ yoeˇ le-awˇ, mawˇ neˇ aˬ coeˇ hawˇ-eu byaˬ byaˬ uiˇ lawˇ gawˆ yoeˇ le-eu ya mawˇ gaˇ keuˆ ni, aˬ yawꞈ maˬ dehꞈ maˬ jawˇ keuˆ nya-a.

¹⁸ Yawˬ ha neh mˇ za-euˬ jeˬ-ahˇ byehˇ dzeh-awˇ, yawˬ ha-euˬ pyuˇ shuiˇ myawˬ gahˬ ya zmˬ byawˬ gaˇ maˬ keuˆ leˇ-a.

¹⁹ Aˬ jeˬ miˇ neh ehˇ naˇ, shaˬ-eu tsawˇ haˬ deuˬ-ahˇ aˬ yawꞈ kʼaˆ dzaˬ-awˇ byehˇ dzeh nehˬ-euˬ uˬ taꞈ, aˬ cawˬ neh tsoˆ taˬ-eu nymˇ-ahˇ kʼaˆ geuꞈ-euˬ meh.

²⁰ Aˬ yawꞈ-euˬ nui kʼahˇ naˬ leˇ duˬ maˬ jaˆ-a.

²¹ Aˬ yawꞈ dzaˬ ngeh dawˇ ngeh, tiˬ jeˬ-iˬ maˬ bi dzeˇ yaꞈ-a. Kʼoeˇ miˇ neh aˬ yawꞈ-euˬ myawˬ gahˬ maˬ gmˬ-a.

²² Aˬ yawꞈ kʼaˇ jaˆ maˬ jaˆ jaˆ ngeh, shaˬ zahˬ dawˬ tawˆ luꞈ kaꞈ dzahˬ-awˇ keuˆ le tehꞈ-a.

²³ Aˬ yawꞈ kʼaˇ dzaˬ mawꞈ-eu jeˬ bi dzaˬ yawˬ. Miˬyehˇ nui ma pehˇ-eu laꞈ kʼoeˇ aˬ yawꞈ-ahˇ kʼehˬ tehꞈ-a.

²⁴ Shmˇ mi cehˇ-ahˇ aˬ yawꞈ cehˆ dzeuˇ-eu leh jeh luꞈ ngeh, guiˬ shuiˇ kaˆ myaˬ aˬ yawꞈ-ahˇ beuˆ coˬ tehꞈ-a.

²⁵ Kaˆ myaˬ neh aˬ yawꞈ-euˬ gʼawˇ mawˇ-ahˇ deh byoe-awˇ, guiˇ nyiˬ ni gʼeh-eu kaˆ myaˬ uˬ duˬ-ahˇ aˬ yawꞈ-euˬ shiˬ jaˆ ka-eu miˇ neh, aˬ yawꞈ guˆ dui dui-eu meh.

²⁶ Aˬ yawꞈ neh kʼaˇ jeˬ hmˬ taˬ-euˬ jeˬ bi laˆ cawˆ jiˇ-awˇ, tsawˇ haˬ zaˬ neh maˬ laˆ doꞈ-euˬ miˬ dzaˬ, aˬ yawꞈ hawˇ-eu aˬ yawꞈ-euˬ nymˇ jiˇ-ahˇ puiˆ byoˆ tehꞈ-a.

²⁷ Tsawˇ haˬ kʼoeˇ gʼaˬ-euˬ iˬ baˇ-ahˇ mˬ pah mehˬ-awˇ, miˇ tsaˬ tahˬ kʼawˇ saˇ kiˇ kamˬ tehꞈ-a.

²⁸ Aˬ yawꞈ-euˬ pyuˇ shuiˇ myawˬ gahˬ dawˬ tawˆ luꞈ, Miˬyehˇ nui ma pehˇ-eu jeˬ laꞈ kʼoeˇ ya cawˆ-iˇ jiˇ tehꞈ-a.

²⁹ Heu-aˬ, haiˬ-eu tsawˇ haˬ-euˬ guiˬ lahˬ meh. Miˬyehˇ neh aˬ yawꞈ maꞈ kʼoeˇ taˆ bi keuˆ le-euˬ guiˬ lahˬ heu naˆ tehꞈ meh.”