Yawˇbaˆ 19 - Akha

¹ Kʼoeˇ naˇ, Yawˇbaˆ paˇ ehˇ-eu,

² “Aˬ jeˬ miˇ neh naw maꞈ ngaˬ-ahˇ dawˬ ngehˬ ngehˬ-awˇ maˬ tsehˆ leˇ ni kʼehˬ luꞈ kʼaˆ luꞈ te.

³ Tiˬ poˆ saˇ-iˬ tiˬ poˆ naw maꞈ ngaˬ-ahˇ naˬ gʼa-awˇ, shaꞈ dawˇ maˬ baw ni ngaˬ-ahˇ cehꞈ lehꞈ ka niˇ gʼa-eu meh.

⁴ Ngaˇ yaw lehˬ jeˬ mˇ-euˬ law hawˇ kʼawꞈ, naw maꞈ-ahˇ aˬ jeˬ coeˬ ta.

⁵ Naw maꞈ ngaˇ naˆ maˬ tseˇ maˬ gaˇ ma lehˇ noeˬ-awˇ, ngaˇ ya shaˬ ya zahˬ-eu heu ngaˬ-euˬ iˬ baˇ baˬ da neh meh lehˇ noeˬ-eu meh.

⁶ Heu loꞈ-ehˇ pyeuꞈ laˇ ni mˇ-euˬ gʼaˬ Miˬyehˇ meh lehˇ, naw maꞈ-ahˇ maˬ siˬ laˇ nya loˇ. Ngaˇ bi paꞈ leˇ-eu lehˇ aˬ yawꞈ lahˇ ju kʼmˇ-euˬ maˬ ngeuˇ-a loˇ.

⁷ Aˬ yawꞈ ngaˬ-ahˇ mˇ nehˬ laꞈ-euˬ heu maˬ tsaˬ-a lehˇ ngaˇ ehˇ kʼawꞈ, naˇ haˬ nehˬ laꞈ-eu gʼaˬ maˬ jawˇ-a. Yaw tsaˬ yaw dawˇ jeˬ bi keuˆ le-awˬ lehˇ ngaˇ guˇ gaˇ, naˬ bawˇ gaˬ leˇ-eu tiˬ gʼaˬ-iˬ maˬ jawˇ-a.

⁸ Miˬyehˇ gaˇ ma laˆ tsoeˬ taˬ-awˇ, ngaˬ-ahˇ maˬ iˇ doˆ nya nya. Ngaˬ-euˬ gaˇ ma-ahˇ yaw zahˇ laꞈ kʼoeˇ aˬ yawꞈ laˆ zaꞈ taˬ-euˬ meh.

⁹ Ngaˬ-euˬ pyuˇ shuiˇ myawˬ gahˬ dawˬ tawˆ luꞈ aˬ yawꞈ yuˇ gʼeh-awˇ, ngaˬ-euˬ myaˆ pyawˬ naˇ mehˇ laˆ cawˆ nehˬ laꞈ-euˬ meh.

¹⁰ Aˬ yawꞈ ngaˬ-ahˇ yawˬ pyawˬ na luꞈ ciˬ tahˬ laˇ-awˇ, Ngaˬ-euˬ noeˬ tmˬ duˬ gʼeu lehˆ dzeh-awˇ, nyoeˬ-iˇ koˆ-iˇ-awˇ bi shiˇ-eu lehˇ byehˇ dzeh nehˬ laꞈ-euˬ meh.

¹¹ Miˬyehˇ ngaˬ-ahˇ nui ma pehˇ dui dui-awˇ, aˬ yawꞈ-ahˇ muiˇ dui dui-eu gʼaˬ loꞈ-ehˇ jahˇ nehˬ laꞈ-euˬ meh.

¹² Aˬ yawꞈ-euˬ guiˇ maꞈ ngaˬ-ahˇ bi deuˆ le-awˇ, ngaˬ-euˬ sehˬ gʼawˆ-ahˇ taˆ duˬ jawˬ-awˇ loꞈ le-euˬ meh.

¹³ “Ngaˬ-euˬ mehˇ nmˇ deuˬ ngaˬ-ahˇ byehˇ dzeh ni Miˬyehˇ jahˇ-awˇ, ngaˬ-ahˇ gʼoeˇ-eu deuˬ kʼawꞈ boeˇ miˬ siˬ kʼaˬ loꞈ-ehˇ pyeuꞈ jiˇ-euˬ meh.

¹⁴ Ngaˬ-euˬ aˬ yuiꞈ aˬ nyiˇ deuˬ hawˇ-eu cawˬ deuˬ maˬ paˇ jawˇ ma.

¹⁵ Ngaˬ-euˬ nymˇ-ahˇ daˬ yah geuꞈ haw-euˬ deuˬ ngaˬ-ahˇ ngehˇ jiˇ-awˇ, ngaˬ-euˬ zaˬ kʼaˆ zaˬ miˬ zaˬ deuˬ kʼawꞈ, maˬ siˬ maˬ suˇ-eu boeˇ miˬ siˬ kʼaˬ tiˬ gʼaˬ loꞈ-ehˇ ngaˬ-ahˇ sawˇ nehˬ laꞈ-euˬ meh.

¹⁶ Ngaˬ-euˬ zaˬ kʼaˆ tiˬ gʼaˬ-ahˇ ngaˇ kuˇ kʼawꞈ, oˬ maˬ toˬ nehˬ laꞈ-a. Caw ba nehˬ laꞈ sheˇ lehˇ shaˇ kʼawꞈ, myaˆ haw maˬ cawˬ nehˬ laꞈ-a.

¹⁷ Ngaˇ saꞈ gʼawˇ-eu behꞈ laꞈ gaˇ, ngaˬ-euˬ miˬ zaˬ maˬ daˬ coeˇ-a. Ngaˬ-euˬ mehˇ nmˇ deuˬ kʼawꞈ, ngaˬ-euˬ dawˬ peh maˬ nyiˬ laˇ-a.

¹⁸ Aˬ buˇ aˬ li deuˬ kʼawꞈ ngaˬ-ahˇ ja bu ja doeˇ-awˇ, kʼaˇ mawˇ le ngeh uiˇ-eu meh.

¹⁹ Ngaˇ gʼoeˇ dui dui-eu cawˬ deuˬ ngaˬ-ahˇ nui daˆ daˆ-awˇ, ngaˇ gaˬ dui dui-eu tsawˇ haˬ deuˬ ngaˬ-ahˇ byehˇ dzeh-euˬ meh.

²⁰ Ngaˬ-euˬ baˆ kʼoˆ shaˬ yoeˬ kʼoeˇ taˆ ga juˬ le-euˬ meh. Ui cuiˆ cuiˆ-ahˇ neh tsawˇ shiˇ uˬ kʼawˇ buˬ-iˇ-euˬ ma.

²¹ Naw maꞈ ngaˬ-euˬ cawˬ ma. Gʼawˬ shaˬ gaˬ nehˬ laꞈ-awˬ. Miˬyehˇ-euˬ aˬ laꞈ ngaˬ-ahˇ dehˬ coˬ-euˬ meh.

²² Miˬyehˇ ngaˬ-ahˇ kʼehˬ-eu loꞈ-ehˇ naw maꞈ aˬ jeˬ gʼeh paˇ ya kʼehˬ ta. Naw maꞈ ngaˬ-ahˇ maˬ kʼehˬ dehˆ nyaˬ siˬ loˇ.

²³ Tsawˇ haˬ tiˬ gʼaˬ na ngaˬ-euˬ dawˬ deuˬ-ahˇ juiˇ taˬ-awˇ, sahˬ boꞈ laꞈ kʼoeˇ boꞈ ahˇ taˬ law nmˇ-aˬ lehˇ noeˬ miˇ-a.

²⁴ Maˬ ngeuˇ naˇ dawˬ heu deuˬ miˇ tsaˬ kʼoeˇ taˆ maˬ ya byoˆ-iˇ ni, kʼaˬ lo kʼoeˇ taˆ taꞈ boꞈ taˬ law nmˇ-aˬ gʼaˬ tehꞈ-a.

²⁵ Ehˇ kʼawꞈ, aˇ saˬ saˬ ngeh ngaˬ-ahˇ ka kʼoꞈ le-eu gʼaˬ, mˬ kʼoeˇ taˆ jawˇ meh lehˇ ngaˇ siˬ nya ma.

²⁶ Ngaˬ-euˬ baˆ kʼoˆ-ahˇ maˇ naˇ neh dzaˬ byoˆ jiˇ kʼawꞈ, shiˬ shaˬ jiˇ pi-awˇ Miˬyehˇ-ahˇ ngaˇ ya mawˇ tehꞈ-a.

²⁷ Ngaˬ-euˬ myaˆ nuiˆ neh aˬ yawꞈ-ahˇ ya mawˇ-awˇ, aˬ yawꞈ-aˬ, boeˇ miˬ siˬ kʼaˬ loꞈ-ehˇ maˬ paˇ ngeuˇ-aˇ. Ngaˬ-euˬ nui ma ga ka-iˇ miˇ-a.

²⁸ Aˬ jeˬ miˇ neh ehˇ naˇ, ngaˬ-ahˇ aˬ joˆ-ehˇ kʼehˬ nmˇ lehˇ naw maꞈ ehˇ-awˇ, ngaˬ-ahˇ kʼehˬ-eu gaˇ ma poˆ luꞈ meh.

²⁹ Ehˇ kʼawꞈ, mi cehˇ-ahˇ naw maꞈ guˆ yawˬ. Iˬ baˇ-ahˇ nui ma pehˇ-eu Miˬyehˇ-euˬ mi cehˇ-ahˇ guˆ yawˬ. Yaˇ kʼaˬ daˇ-eu gʼaˬ jawˇ luꞈ-eu naw maꞈ ya siˬ tehꞈ-a.”