Yawˇbaˆ 18 - Akha

¹ Kʼoeˇ naˇ, Shuˇaˬ miˇ kʼahˬ-ahˇ jawˇ-eu Biˇlaˬdaˇ gʼaˬ ehˇ-eu,

² “Yawˇbaˆ-oˇ, nawˇ loꞈ-ehˇ gʼeh-eu tsawˇ haˬ ciˬ cuˇ ni maˬ jawˇ nya ta loˇ. Nawˇ ciˬ cuˇ ni naˬ leˇ naˇ, nga maꞈ nawˬ-ahˇ paˇ ngehˬ cawˬ nya tehꞈ-a.

³ Aˬ jeˬ miˇ neh nawˇ nga maꞈ-ahˇ aˬ nyoˬ mawˇ neˇ loꞈ-ehˇ sawˇ nehˬ laꞈ te.

⁴ Nawˇ nui ma pehˇ-eu teu-aˬ, yawˬ haˇ yawˬ ha coeˬ leˇ ni mˇ-eu tehꞈ nga. Nawˇ nui ma pehˇ-eu miˇ neh, miˇ tsaˬ tahˬ kʼawˇ heu cawˬ maˬ baw-ehˇ pyeuꞈ-iˇ tehꞈ-a loˇ. Nawˇ nui kʼahˇ bi shiˇ-eu lehˇ Miˬyehˇ gawˬ jawˬ deuˬ-ahˇ ciˬ jiˆ nehˬ laꞈ tehꞈ-a loˇ.

⁵ Haiˬ-eu tsawˇ haˬ-euˬ yaw shehꞈ miˆ-iˇ tehꞈ-a. Miˬ dzaˬ miˬ lmˇ maˬ paˇ doˆ laˇ-ehˇ pyeuꞈ-iˇ tehꞈ-a.

⁶ Aˬ yawꞈ-euˬ sehˬ gʼawˆ laꞈ kʼoeˇ doꞈ-eu tsiˇ kʼmˬ miˆ-iˇ tehꞈ-a.

⁷ Aˬ yawꞈ-euˬ kuiˇ toꞈ ziꞈ dah ni gʼeh-euˬ kʼawꞈ, nymˬ-mˇ sahˬ tiꞈ tiꞈ-euˬ meh. Aˬ yawꞈ coˬ-iˇ-euˬ aˬ cawˬ maˬ guˬ-a.

⁸ Lahˇ ju tahˇ taˬ-euˬ gaˇ aˬ yawꞈ aˬ kuiˇ cawˬ ahˇ-awˇ paꞈ leˇ-euˬ meh.

⁹ Aˬ yawꞈ-euˬ kuiˇ nuiꞈ lahˇ ju-ahˇ paꞈ leˇ-awˇ, ziꞈ dah ni bi paꞈ-euˬ meh.

¹⁰ Miˇ tsaˬ-ahˇ caˆ kʼmˇ beuˬ pahˬ taˬ-awˇ, aˬ yawꞈ iˇ-eu gaˇ ma-ahˇ lahˇ ju kʼmˇ taˬ-euˬ meh.

¹¹ Guˆ-eu gaˆ-eu jeˬ aˬ yawꞈ-euˬ tiˬ jawˬ loꞈ luꞈ-awˇ aˬ yawꞈ kuiˇ toꞈ kʼaˇ ciˬ gaˇ caw teh luꞈ meh.

¹² Aˬ yawꞈ smˇ muiˬ muiˬ-euˬ kʼawꞈ, nymˬ-mˇ hawˬ mehꞈ mehꞈ luꞈ meh. Luˬ-iˇ seˇ-iˇ-eu jeˬ aˬ yawꞈ dawˬ peh yawꞈ-awˇ aˬ yawꞈ-ahˇ loꞈ luꞈ meh.

¹³ Shiˇ taw tehˬ-eu naˇ gawˇ aˬ yawꞈ-euˬ gʼawˇ mawˇ cah byah-awˇ, aˬ kuiˇ aˬ laꞈ buꞈ-iˇ-eu lehˇ gʼeh luꞈ meh.

¹⁴ Aˬ yawꞈ ziꞈ dah ni dehꞈ-euˬ sehˬ gʼawˆ-ahˇ neh bi tsahˇ doˆ laꞈ-awˇ, shiˇ-eu miˇ kʼahˬ-euˬ sahˬ paˬ jawˇ gaˇ bi gʼeu gʼeh-euˬ meh.

¹⁵ Nymˬ-mˇ aˬ yawꞈ-euˬ nymˇ-ahˇ aˇ mawˇ bi shiˇ-eu gʼaˇ duˬ miˬ dzaˇ dzaˇ shuiˇ byaˆ gʼaˬ naˇ, aˬ suˇ gʼaˬ maˬ kaˬ jawˇ nya tehꞈ-a.

¹⁶ Aˬ yawꞈ-euˬ duˬ ciˇ hawˇ-eu uˬ laꞈ deuˬ nyoeˬ-iˇ koˆ-iˇ jiˇ-euˬ meh.

¹⁷ Aˬ yawꞈ-euˬ pu hawˇ-eu miˇ kʼahˬ doe ni aˬ yawꞈ tsawˇ myahˇ doˆ-eu byoˆ-iˇ-awˇ, aˬ cawˬ tiˬ gʼaˬ-iˬ aˬ yawꞈ-ahˇ maˬ paˇ siˬ nya meh.

¹⁸ Dehꞈ-eu deuˬ jawˇ-eu miˇ kʼahˬ-ahˇ neh aˬ yawꞈ-ahˇ teh dzeh-awˇ, yaw shehꞈ bya gaˇ neh yaw zahˇ laꞈ kʼoeˇ bi teh uˇ tehꞈ-a.

¹⁹ Aˬ yawꞈ zaˬ tiˬ gʼaˬ-iˬ maˬ jawˇ yaꞈ-ehˇ tsuiꞈ dahˬ dahˬ-iˇ tehꞈ-a.

²⁰ Nahˇ ma doˆ kʼehˬ-ahˇ neh nahˇ ma ga kʼehˬ-ahˇ doˆ ni, aˬ yawꞈ gaˇ kawˆ kʼaˇ ya gaˬ-eu tsawˇ haˬ deuˬ, tsawˬ guˆ-iˇ-awˇ yaw dzuˬ dzuˬ tehꞈ-a.

²¹ Haiˬ-eu tsawˇ haˬ-euˬ guiˬ lahˬ-aˬ, kʼoeˇ naˆ ni tehꞈ meh. Miˬyehˇ gaˇ kawˆ maˬ shaˇ noeˬ-eu tsawˇ haˬ-euˬ guiˬ lahˬ-aˬ, kʼoeˇ naˆ ni tehꞈ meh.”