Yawˇbaˆ 17 - Akha

¹ Ngaˇ ziˇ jiˇ le-eu peh laˇ miˇ-a. Ngaˬ-ahˇ saꞈ maˬ paˇ gʼawˇ coeˇ laˇ miˇ-a. Ngaˬ-euˬ gʼaˇ duˬ lmˬ bymˇ maˬ ngeuˇ naˇ nui jeˬ maˬ paˇ jaˆ meh.

² Tsawˇ haˬ yawˬ gʼaˬ na luꞈ ngaˬ-ahˇ yehˬ bawˬ sehˇ lu-ehˇ ehˇ niˇ gʼa gaˇ ngaˇ mawˇ luꞈ-eu ma.

³ Miˬyehˇ-oˇ, ngaˇ yaw sui yaw dawˇ ma. Ngaˬ-euˬ dawˬ-ahˇ ha geuꞈ nehˬ laꞈ-awˬ. Ngaˬ neh ngehˬ-euˬ dawˬ ngeuˇ meh lehˇ ehˇ nehˬ laꞈ-eu tiˬ gʼaˬ-iˬ maˬ jawˇ-a.

⁴ Aˬ yawꞈ maꞈ noeˬ siˬ noeˬ mawˇ nya-eu nui ma-ahˇ nawˇ piˬ tehˬ taˬ-euˬ loꞈ-ehˇ, aˬ yawꞈ maꞈ neh ngaˬ-ahˇ taˬ bi gʼaˬ leˇ nehˬ laꞈ.

⁵ Tsawˇ haˬ tiˬ gʼaˬ pyuˇ shuiˇ myaˆ pyawˬ-ahˇ haw-awˇ yawˬ ha-euˬ cawˬ-ahˇ byehˇ naˇ, yawˬ ha-euˬ zaˬ deuˬ ya shaˬ ya zahˬ tehꞈ-a lehˇ dawˬ daˬ jaˆ-eu meh.

⁶ Nymˬ-mˇ aˬ cawˬ dawˬ daˬ kʼoeˇ hmˬ zmˬ-awˇ ngaˬ-ahˇ laꞈ noeˇ toeˬ luꞈ meh. Aˬ yawꞈ maꞈ ngaˬ-euˬ myaˆ kʼahˬ-ahˇ duˬ kʼaˬ kʼa shehˬ laˇ-eu meh.

⁷ Ngaˇ noeˬ shaˬ dui dui-eu miˇ neh myaˆ behꞈ behꞈ-iˇ shaw-iˬ miˇ-a. Ngaˬ-euˬ aˬ kuiˇ aˬ laꞈ kʼawꞈ nyiˇ dui dui-iˇ-awˇ, naˇ shmˇ baˇ laˇ loꞈ-ehˇ pyeuꞈ-iˇ-euˬ miˇ-a.

⁸ Yawˬ haˇ yawˬ ha yaw sui yaw dawˇ ma lehˇ ehˇ-eu deuˬ tsawˬ guˆ-iˇ-awˇ, aˬ yawꞈ maꞈ dawˬ tawˆ luꞈ ngaˬ-ahˇ miˬ yehˇ maˬ baw-eu tsawˇ haˬ nga lehˇ ja bu ja doeˇ-eu meh.

⁹ Yawˬ haˇ yawˬ ha yaw tsaˬ yaw dawˇ ma lehˇ ehˇ-eu tsawˇ haˬ deuˬ, aˬ yawꞈ maꞈ yaw tsaˬ ma lehˇ, ngehˬ jawˇ ngehˬ noeˬ luꞈ meh.

¹⁰ Ehˇ kʼawꞈ, aˬ yawꞈ maꞈ dawˬ tawˆ luꞈ ngaˬ-euˬ mehˬ shi yawꞈ laˇ naˇ, tiˬ gʼaˬ-iˬ tsawˇ gahˇ maˬ ahˇ gaˇ ngaˇ ya mawˇ tehꞈ-a.

¹¹ Ngaˬ-euˬ aˇ nah aˇ yamˬ dzeuˇ-iˇ-awˇ, ngaˬ neh noeˬ taˬ-euˬ jeˬ maˬ paˇ mˇ pyeuꞈ nya miˇ-a. Noeˬ tmˬ duˬ kʼawꞈ tiˬ jeˬ-iˬ maˬ paˇ jaˆ miˇ-a.

¹² Ehˇ kʼawꞈ, ngaˬ-euˬ cawˬ deuˬ uˬ ciꞈ-ahˇ nah gʼahˇ lehˇ ehˇ luꞈ meh. yaw shehꞈ keuˆ le-eu peh laˇ luꞈ meh lehˇ aˬ yawꞈ maꞈ ehˇ luꞈ meh. Ehˇ kʼawꞈ, ngaˇ yaw zahˇ laꞈ kʼoeˇ jawˇ luꞈ-eu ngaˇ siˬ nya ma.

¹³ Ngaˇ noeˬ tmˬ duˬ tiˬ tsahˇ jaˆ-eu tehꞈ ma. Kʼoeˇ-aˬ, zahˇ tsui ni gʼeh gaˇ ngaˇ ya coˬ yuꞈ-eu, shiˇ-eu miˇ kʼahˬ kʼoeˇ tsahˇ meh.

¹⁴ Lmˬ bymˇ-ahˇ ngaˬ da lehˇ ngaˇ kuˇ-awˇ, ngaˬ-euˬ yaw buꞈ dzaˬ laˇ-eu buˬ joe deuˬ-ahˇ, ngaˬ ma hawˇ-eu ngaˬ-euˬ dmˇ ma deuˬ lehˇ ngaˇ kuˇ ma.

¹⁵ Ngaˬ-euˬ noeˬ tmˬ duˬ aˬ geu tsahˇ-ahˇ jaˆ ta. Ngaˬ-euˬ noeˬ tmˬ duˬ-ahˇ aˬ suˇ gʼa mawˇ ta.

¹⁶ Shiˇ-eu miˇ kʼahˬ-ahˇ ngaˇ iˇ gʼeh ngeh, noeˬ tmˬ duˬ kʼoeˇ ngaˬ nehˬ-ehˇ tiˬ kawˆ loꞈ-ehˇ iˇ nya meh loˇ.”