Yawˇbaˆ 14 - Akha

¹ Zaˬ miˬ zaˬ-euˬ uˬ maˆ-ahˇ neh dehꞈ doˆ le-euˬ tsawˇ haˬ zaˬ-aˬ, dehꞈ ziˇ aˇ nah aˇ yamˬ nymˇ-awˇ, shaˬ zahˬ tiˬ byah ni jaˆ meh.

² Yaw kawˇ-ehˇ poˬ laˇ-eu aˇ yehˆ, yaw kawˇ-ehˇ nyoeˬ-iˇ gaˇ duˇ-awˇ, naˇ shmˇ loꞈ-ehˇ byoˆ-iˇ-eu meh.

³ Miˬyehˇ-oˇ, ngaˇ loꞈ-ehˇ gʼeh-eu tsawˇ haˬ-ahˇ nawˇ haw cawˬ ma loˇ. Maˬ ngeuˇ naˇ, ngaˬ-ahˇ caw tseˇ haw-awˇ yaˇ kʼaˬ daˇ te loˇ.

⁴ Tsawˇ haˬ zaˬ loꞈ-ehˇ gʼeh-eu maˬ muiˬ maˬ shawˇ-eu jeˬ laꞈ kʼoeˇ, muiˬ-eu shawˇ-eu jeˬ maˬ doˆ laˇ nya-a.

⁵ Tsawˇ haˬ-euˬ ziˇ hawˇ-eu aˬ yawꞈ ya dehꞈ-eu ba la aˇ siˬ-ahˇ, yaw beh neh diˬ tsehˆ taˬ-euˬ meh. Nawˬ neh laˆ tsaˬ jiˇ taˬ-euˬ miˇ neh maˬ paˇ laˆ paˇ nya meh.

⁶ Aˬ yawꞈ-ahˇ maˬ haw cawˬ ni byehˇ dzeh nehˬ-awˇ, aˬ yawꞈ kʼoeˇ taˆ keuˆ le-eu shaˬ zahˬ daˬ coeˇ naˇ bi daˬ haw-awˬ.

⁷ “Bi tuˇ dzeh-euˬ aˇ bawˇ noeˬ tmˬ duˬ jaˆ-a siˬ. Baw nmˬ nmˬ doˆ laˇ-awˇ bawˇ ma ma laˇ nya-a siˬ.

⁸ Aˬ yawꞈ-euˬ duˬ ciˇ mawˬ laˇ-awˇ, sahˬ nyiꞈ gui-iˇ kʼawꞈ,

⁹ iˇ cuꞈ aˬ laˇ ngeh baw nmˬ paˇ nmˬ doˆ laˇ-awˇ, bawˇ byeꞈ loꞈ-ehˇ paˇ tuˇ laˇ nya meh.

¹⁰ Ehˇ kʼawꞈ, tsawˇ haˬ zaˬ shiˇ ngeh, dawˬ tawˆ luꞈ aˇ saˬ saˬ-eu meh. Aˬ yawꞈ shiˇ dzeuˇ shaw naˇ, aˬ gaˇ paˇ nmˬ laˇ nya ta.

¹¹ Iˇ cuꞈ yoeˇ gui-euˬ lawˇ baˬ hawˇ-eu, gui-iˇ-euˬ lah loꞈ-ehˇ,

¹² shiˇ-euˬ tsawˇ haˬ maˬ paˇ tuˇ laˇ nya meh. Mˬ kʼaˇ ziꞈ kʼoeˇ keuˆ ni maˬ tuˇ laˇ-ehˇ, maˬ luˆ maˬ laˆ ni yuꞈ tehꞈ-a.

¹³ “Shiˇ-eu miˇ kʼahˬ laꞈ kʼoeˇ nawˇ ngaˬ-ahˇ ciˬ zaꞈ nehˬ laꞈ law nmˇ-aˬ lehˇ noeˬ miˇ-a. Nawˇ nui ma pehˇ-eu shuꞈ-iˇ ngeh keuˆ ni, ngaˬ-ahˇ kʼoeˇ gaˇ ciˬ zaꞈ-awˇ, ngaˬ-ahˇ noeˬ keuˆ-eu aˇ nah tiˬ nah bi baw-awˬ.

¹⁴ Tsawˇ haˬ zaˬ shiˇ dzeuˇ shaw naˇ paˇ dehꞈ laˇ nya ta loˇ. Ehˇ kʼawꞈ, muiˬ-eu aˇ nah aˇ yamˬ-ahˇ ngaˇ dawˬ keuˆ ma. Shaˬ-eu zahˬ-eu aˇ nah aˇ yamˬ heu deuˬ dzeuˇ-iˇ ngeh keuˆ ni dawˬ ma.

¹⁵ Kʼoeˇ ngeh, nawˇ ngaˬ-ahˇ kuˇ naˇ ngaˇ oˬ toˬ ma. Nawˬ neh beh-euˬ ngaˬ-ahˇ nawˇ nui kʼahˇ shiˇ tehꞈ-a.

¹⁶ Kʼoeˇ ngeh, ngaˬ-euˬ kuiˇ toꞈ yawˬ toꞈ na luꞈ-ahˇ nawˇ haw kʼawꞈ, ngaˬ-euˬ iˬ baˇ-ahˇ nawˇ pehˬ zaˇ maˬ caw-aˇ.

¹⁷ Ngaˬ-euˬ iˬ baˇ-ahˇ nawˇ pyehˬ nehˬ laꞈ-awˇ, sha dzeh nehˬ laꞈ tehꞈ-a. Ngaˬ neh mˇ lehˬ-euˬ jeˬ dawˬ tawˆ luꞈ-ahˇ nawˇ shiˆ byoˆ tehꞈ-a.

¹⁸ Gawˬ jawˬ deuˬ byaˆ-iˇ-awˇ, lo guˇ deuˬ bi ciˬ jiˆ-eu aˇ nah keuˆ le tehꞈ-a.

¹⁹ Kʼaˬ lo-ahˇ iˇ cuꞈ dehˬ dzaˬ-awˇ, uˬ yehˇ yehˇ ma yehˇ le-awˇ miˇ tsaˬ hehˇ dzaˬ gʼeh tehꞈ-a. Tsawˇ haˬ zaˬ-euˬ noeˬ tmˬ duˬ-ahˇ nawˇ kʼoeˇ loꞈ-ehˇ laˆ cawˆ nehˬ tehꞈ-a.

²⁰ Tsawˇ haˬ tiˬ gʼaˬ-ahˇ nawˇ gʼaˬ leˇ-awˇ gaˇ mahˇ kaˬ gaˇ teh byoˆ gʼeh-eu meh. Aˬ yawꞈ-ahˇ nawˇ miˇ kʼahˬ poˆ laˆ tsahˇ paˇ nehˬ-awˇ bi iˇ byoˆ gʼeh-eu meh.

²¹ Aˬ yawꞈ-euˬ aˬ li deuˬ-ahˇ aˬ cawˬ taˬ huiˬ taˬ mahˇ nehˬ kʼawꞈ, aˬ yawꞈ maˬ paˇ ya siˬ meh. Aˬ yawꞈ maꞈ-ahˇ aˬ cawˬ kʼaˆ dzaˬ kʼawꞈ, aˬ yawꞈ maˬ paˇ mawˇ nya meh.

²² Aˬ yawꞈ-euˬ gʼawˇ mawˇ naˇ naˇ-ehˇ gawˇ-awˇ, aˬ yawꞈ-euˬ nui ma shaˬ zahˬ naꞈ luꞈ gaˇ tehꞈ-ehˇ aˬ yawꞈ noeˬ-eu meh.”