Yawˇbaˆ 13 - Akha

¹ Naw maꞈ kʼaˇ ehˇ-eu yawˬ jeˬ na luꞈ-ahˇ ngaˇ myaˆ mawˇ haw-awˇ, naˬ gaˬ haw-euˬ ma.

² Naw maꞈ kʼaˇ siˬ nya-eu jeˬ, ngaˇ kʼawꞈ siˬ nya ma. Ngaˇ naw maꞈ naˆ maˬ tseˇ teˬ-eu tsawˇ haˬ maˬ ngeuˇ.

³ Ngaˇ Miˬyehˇ nehˬ-ehˇ ja dzaˬ luꞈ-eu ma. Naw maꞈ nehˬ-ehˇ ja dzaˬ-eu maˬ ngeuˇ. Ngaˬ-euˬ gaˇ kawˆ aˬ yawꞈ nehˬ-ehˇ ja duˬ mawꞈ-eu ma.

⁴ Naw maꞈ-aˬ, yawˬ ha maˬ siˬ maˬ nya-eu jeˬ-ahˇ jaˬ myawꞈ myawꞈ-eu laꞈ kʼoeˇ dehˬ kaˬ-awˇ, naˇ gawˇ maˬ laˆ taˬ nya-eu jaˆ gʼaˬ yaˇ-eu tsawˇ haˬ-ahˇ duˇ-eu meh.

⁵ Naw maꞈ tiˬ jeˬ-iˬ maˬ ehˇ ni jawˇ naˇ, tsawˇ gahˇ ahˇ-eu tsawˇ haˬ nga lehˇ tiˬ gʼaˬ na noeˬ tehꞈ-a.

⁶ Ngaˬ-euˬ gaˇ kawˆ ngaˇ ja ngeh, ngaˬ-euˬ nui noeˬ-ahˇ naˇ haˬ sheˇ.

⁷ Aˬ jeˬ miˇ neh naw maꞈ jaˬ myawꞈ myawꞈ te. Naw maꞈ jaˬ myawꞈ myawꞈ-eu teu Miˬyehˇ mehˬ shi gaˇ dahˇ tsoeˬ tehꞈ-a lehˇ noeˬ te loˇ.

⁸ Naw maꞈ Miˬyehˇ jawˇ paw gʼaˬ baꞈ baꞈ-eu gʼeh te loˇ. Aˬ yawꞈ jawˇ paw pyawˬ-awˇ yaˇ kʼaˬ ja-eu gʼeh te loˇ.

⁹ Miˬyehˇ naw maꞈ-ahˇ yaw muiˬ paˬ-ehˇ pyehˆ tseˇ haw naˇ, yaw muiˬ tiˬ jeˬ na-ahˇ aˬ yawꞈ ya mawˇ tehꞈ-a loˇ. Tsawˇ haˬ zaˬ-ahˇ mehˇ shuiˇ shuiˇ-eu loꞈ-ehˇ Miˬyehˇ-ahˇ shuiˇ dzaˬ nya ma lehˇ noeˬ te loˇ.

¹⁰ Naw maꞈ myaˆ pyawˬ huiˬ nyiˇ tseˇ-eu jeˬ ciˬ cuˇ ni mˇ kʼoeˬ kʼawꞈ, naw maꞈ-ahˇ aˬ yawꞈ haw bye-awˇ,

¹¹ aˬ yawꞈ-euˬ baoˬ naw maꞈ-ahˇ laˆ guˆ ngeh, naw maꞈ kʼoeˇ taˆ guˆ-eu gaˆ-eu jeˬ keuˆ le tehꞈ-a.

¹² Naw maꞈ-euˬ dawˬ daˬ deuˬ gaˇ dahˇ maˬ tsoeˬ-eu kʼaˬ lehˇ-ahˇ duˇ-awˇ, naw maꞈ ja-eu dawˬ deuˬ shaˬ jehˆ-ahˇ duˇ-eu meh.

¹³ Ciˬ cuˇ ni jawˇ-awˇ ngaˇ ja gaˇ naˇ haˬ sheˇ. Ngaˬ-euˬ kʼoeˇ taˆ kʼaˇ keuˆ le-eu jeˬ, ehˬ-ehˇ keuˆ le luꞈ-uˇ.

¹⁴ Ngaˇ yawˬ ha-euˬ shaˬ jiˇ-ahˇ seuˬ neh tsehꞈ tehˬ-awˇ, ngaˬ-euˬ saꞈ laˇ-ahˇ aˬ laꞈ neh tuˆ tehˬ taˬ ma.

¹⁵ Ngaˇ noeˬ tmˬ duˬ tiˬ jeˬ-iˬ maˬ paˇ jaˆ-eu-aˬ, Miˬyehˇ ngaˬ-ahˇ sehꞈ kʼawꞈ aˬ jeˬ gʼeh nmˇ. Ngaˬ-euˬ gaˇ kawˆ aˬ yawꞈ nehˬ-ehˇ ngaˇ ja ma.

¹⁶ Haiˬ-eu tsawˇ haˬ Miˬyehˇ-ahˇ maˬ tahˬ puˬ leˇ peuˬ-eu-aˬ, ngaˬ-euˬ nui kʼaˬ ngaˬ-ahˇ ka kʼoꞈ-eu maˬ siˬ.

¹⁷ Nymˬ-mˇ ngaˇ ngehˬ-eu dawˬ-ahˇ, naw maꞈ naˬ bawˇ ciˬ kʼmˇ-awˇ naˇ haˬ sheˇ.

¹⁸ Ngaˇ yaw tsaˬ ma lehˇ ngaˇ siˬ nya-eu miˇ neh, ngaˬ-euˬ gaˇ kawˆ ja-eu lehˇ ngaˇ lehˬ hmˬ taˬ-euˬ ma.

¹⁹ Miˬyehˇ-oˇ, nawˇ ngaˬ-ahˇ iˬ baˇ ahˇ nga lehˇ ehˇ le-eu gʼeh te loˇ. Toˆ-ehˇ ngeuˇ naˇ, ngaˇ dawˬ maˬ tmˇ ni shiˇ ma.

²⁰ Ngaˬ-ahˇ dawˬ nyiˬ dawˬ bi ngehˬ nehˬ laꞈ-awˬ. Nawˬ-euˬ mehˬ shi ngaˇ maˬ cehˆ zaꞈ ni jawˇ ma.

²¹ Ngaˬ-ahˇ maˬ kʼehˬ maˬ kʼaˆ nehˬ laꞈ ni byehˇ-awˇ, guˆ-eu gaˆ-eu jeˬ taˬ bi keuˆ le laꞈ.

²² Miˬyehˇ-oˇ, nawˇ dawˬ jeˬ hu ngehˬ-awˬ. Ngaˇ ngehˬ kʼoꞈ ma. Maˬ ngeuˇ naˇ ngaˬ-ahˇ jeˬ huˬ bi ngehˬ laꞈ-awˇ, nawˇ ngehˬ kʼoꞈ nehˬ laꞈ-awˬ.

²³ Ngaˬ-euˬ iˬ baˇ aˬ jeˬ-a. Ngaˇ mˇ lehˬ-euˬ aˬ jeˬ jaˆ ta. Ngaˬ-euˬ yaw lehˬ toeˬ mehˬ laꞈ-awˬ.

²⁴ “Aˬ jeˬ miˇ neh nawˬ-euˬ myaˆ pyawˬ ngaˬ-ahˇ maˬ bi mawˇ laꞈ te. Aˬ jeˬ miˇ neh muiˇ-eu tsawˇ haˬ tiˬ gʼaˬ loꞈ-ehˇ sawˇ nehˬ laꞈ te.

²⁵ Nawˇ ngaˬ-ahˇ laˆ guˆ-eu lehˇ gʼeh te loˇ. Ngaˇ-aˬ, aˇ paꞈ tiˬ paꞈ maˬ tawˬ-eu tsawˇ haˬ ma. Nawˇ gʼo yoeˬ-ahˇ ceh gaˇ duˇ meh.

²⁶ Ngaˇ zaˬ guˬ guˬ ngeh mˇ lehˬ-euˬ jeˬ-ahˇ kʼawꞈ, nawˇ noeˬ taˬ-awˇ ngaˬ-ahˇ haw ca-eu meh.

²⁷ Ngaˬ-euˬ aˬ kuiˇ-ahˇ nawˇ caˆ shoˆ shoˆ-awˇ, kuiˇ toꞈ yawˬ toꞈ na luꞈ-ahˇ haw-eu uˬ taꞈ, aˬ kuiˇ pehˬ zaˇ-ahˇ kʼawꞈ pyehˆ tseˇ-eu meh.

²⁸ Uˬ duˬ duˬ laˇ ngeh, daˇ kawˬ yaw peuˬ loꞈ-ehˇ ngaˇ meuˇ-iˇ-awˇ, aˬ iˬ dzaˬ peuˬ-euˬ mehˬ tsoeˬ loꞈ-ehˇ byoˆ-iˇ miˇ-a.