Yawˇbaˆ 10 - Akha

¹ Ngaˇ yaw dehꞈ maˬ paˇ dehꞈ coeˇ miˇ-a. Ngaˇ nui ma naˇ-awˇ toˇ gaˇ naˇ haˬ nehˬ laꞈ sheˇ.

² Miˬyehˇ-oˇ, ngaˬ-ahˇ taˬ jahˇ doeˇ nehˬ laꞈ. Aˬ jeˬ baˬ da neh ngaˬ-ahˇ heu loꞈ-ehˇ jahˇ nehˬ laꞈ te lehˇ ehˇ nehˬ laꞈ sheˇ.

³ Nawˇ gʼawˬ shaˬ gaˬ-eu nui ma tiˬ pawꞈ-iˬ maˬ ahˇ ni, nawˬ neh beh-euˬ jeˬ-ahˇ yaw zeu maˬ baw-ehˇ, haiˬ-eu tsawˇ haˬ deuˬ-euˬ gaˇ kawˆ-ahˇ nui kʼahˇ shiˇ-eu tsaˬ tehꞈ-a loˇ.

⁴ Nawˇ shiˬ shaˬ jiˇ myaˆ nuiˆ tsoꞈ ma loˇ. Tsawˇ haˬ zaˬ kʼaˇ haw mawˇ-eu loꞈ-ehˇ nawˇ haw mawˇ ma loˇ.

⁵ Nawˬ-euˬ aˇ nah aˇ yamˬ tsawˇ haˬ zaˬ-euˬ aˇ nah aˇ yamˬ-ahˇ duˇ-awˇ, nawˬ-euˬ aˇ kʼoꞈ aˇ la kʼawꞈ tsawˇ haˬ zaˬ-euˬ aˇ kʼoꞈ aˇ la-ahˇ duˇ ma loˇ.

⁶ Kʼoeˇ miˇ neh nawˇ ngaˬ-ahˇ iˬ baˇ poˆ-awˇ, ngaˇ mˇ lehˬ gaˇ pyehˆ tseˇ haw luꞈ te loˇ.

⁷ Ngaˇ iˬ baˇ maˬ ahˇ-eu gaˇ kawˆ hawˇ-eu, tsawˇ haˬ tiˬ gʼaˬ-iˬ nawˬ-euˬ laꞈ-ahˇ neh ngaˬ-ahˇ maˬ ka kʼoꞈ nya-eu gaˇ kawˆ nawˇ siˬ nya meh.

⁸ Nawˬ-euˬ aˬ laꞈ neh ngaˬ-ahˇ tehˆ-awˇ, nawˬ-euˬ aˬ laꞈ ngaˬ-ahˇ paˇ laˆ cawˆ-eu meh.

⁹ Shaˬ jehˆ yuˇ-awˇ nawˇ ngaˬ-ahˇ tehˆ-euˬ gaˇ noeˬ keuˆ sheˇ. Shaˬ jehˆ paˇ bi pyeuꞈ-iˇ-eu lehˇ nawˇ ngaˬ-ahˇ nyehꞈ meuˇ nyehꞈ loeˇ-eu gʼeh te loˇ.

¹⁰ Ngaˇ tsawˇ haˬ pyeuꞈ laˇ ni ngaˬ da-ahˇ guiˬ lahˬ biꞈ-awˇ, ngaˬ ma-euˬ uˬ maˆ laꞈ kʼoeˇ bi bymˬ huiˬ-euˬ maˬ ngeuˇ loˇ.

¹¹ Ngaˬ-euˬ gʼawˇ mawˇ-ahˇ shaˬ yoeˬ hawˇ-eu shaˬ guˬ neh nawˇ mawˇ kawˇ kawˇ-awˇ, shaˬ jiˇ hawˇ-eu baˆ kʼoˆ neh tawˆ gʼoeˬ-euˬ meh.

¹² Nawˇ ngaˬ-ahˇ dehꞈ-eu saˬ laˆ biꞈ laꞈ-awˇ, maˬ tsehˆ leˇ ni gaˬ-eu uˬ taꞈ, nawˇ bo saˆ haw piˇ-eu laꞈ kʼoeˇ ngaˬ-ahˇ yaw dehꞈ bi dehꞈ laꞈ-euˬ meh.

¹³ Ehˇ kʼawꞈ, aˇ yamˬ kʼoeˇ dawˬ tawˆ luꞈ laꞈ kʼoeˇ, ngaˬ-ahˇ heu loꞈ-ehˇ jahˇ coeˬ nehˬ-eu gʼaˇ duˬ nawˇ nawˬ jawˬ luꞈ-eu nymˬ-mˇ ngaˇ siˬ duˬ ma.

¹⁴ Ngaˬ-ahˇ iˬ baˇ maˬ pyehˬ nehˬ ni kʼehˬ-eu gʼaˇ duˬ, ngaˇ iˬ baˇ mˇ nga loˇ lehˇ nawˇ haw luꞈ-eu meh.

¹⁵ Ngaˇ iˬ baˇ mˇ-eu nehˬ-ehˇ nawˬ-euˬ lahˇ ju-ahˇ paꞈ leˇ-euˬ gaˇ duˇ-eu meh. Ehˇ kʼawꞈ ngaˇ yaw muiˬ jeˬ mˇ ngeh, nawˇ noeˬ muiˬ nehˬ laꞈ-euˬ maˬ jaˆ-a. Ngaˇ shaˬ zahˬ naꞈ-awˇ, shaꞈ dawˇ-eu jeˬ tiˬ byah jaˆ luꞈ ma.

¹⁶ Ngaˇ tiˬ jeˬ paˬ mˇ pyeuꞈ-eu lehˇ gʼeh ngeh, aˇ laˬ jaˬ shiˇ loꞈ-ehˇ nawˇ ngaˬ-ahˇ teh le-awˇ, ngaˬ-ahˇ laˆ coeˬ laˆ ciˆ-eu gʼaˇ duˬ, kʼaˆ jeˬ-ehˇ gʼeh-eu jeˬ kʼawꞈ nawˇ mˇ-eu meh.

¹⁷ Nawˇ ngaˬ-euˬ kʼoeˇ taˆ saˇ kiˇ saˇ seˬ aˬ myah luꞈ jaˆ luꞈ meh. Nawˇ ngaˬ-ahˇ nui ma pehˇ-eu jeˬ tiˬ jawˇ saˇ-iˬ tiˬ jawˇ huiˬ laˇ-awˇ, ngaˬ-ahˇ laˆ coeˬ-eu gʼaˇ duˬ aˬ myah luꞈ shaˇ noeˬ luꞈ meh.

¹⁸ “Miˬyehˇ-oˇ, nawˇ ngaˬ-ahˇ aˬ jeˬ miˇ neh bi dehꞈ le teˬ. Tsawˇ haˬ tiˬ gʼaˬ-iˬ ngaˬ-ahˇ maˬ mawˇ mi naˆ-ehˇ shiˇ dzeuˇ law nmˇ-aˬ gʼaˬ law hawˇ miˇ-a.

¹⁹ Uˬ maˆ laꞈ kʼoeˇ neh tiˬ poˆ tehꞈ-ehˇ lmˬ bymˇ-ahˇ ya uˇ-iˇ law nmˇ-aˬ, tsawˇ haˬ zaˬ maˬ ya pyeuꞈ le-euˬ naˆ ni muiˬ tehꞈ-a.

²⁰ Ngaˬ-euˬ ziˇ jiˇ-eu keuˆ le-euˬ maˬ ngeuˇ-a loˇ. Dzeˇ-eu aˇ yamˬ heu tiˬ kʼehˇ kʼehˬ laꞈ kʼoeˇ ngaˇ ya dehꞈ byawˬ ni, nawˇ ngaˬ-ahˇ byehˇ dzeh-awˇ bi jawˇ laꞈ-awˬ.

²¹ Ngaˇ nymˬ-mˇ ya iˇ byoˆ gʼeh-awˇ maˬ paˇ ya gʼoꞈ doˆ laˇ meh. Zahˇ tsui ni gʼeh-eu miˇ kʼahˬ-ahˇ ngaˇ ya iˇ meh.

²² Yaw zahˇ jeˬ hawˇ-eu yaw bahˬ yaw lahˇ-ehˇ gʼeh-eu jeˬ tehꞈ-ehˇ byah luꞈ-eu, yaw shehꞈ kʼawꞈ yaw zahˇ loꞈ-ehˇ gʼeh-eu miˇ kʼahˬ-ahˇ ngaˇ iˇ-eu ma.”