Yawˇbaˆ 1 - Akha

Yawˇbaˆ-ahˇ nehꞈ Saˬdaˬ lawˬ haw-euˬ

¹ Uˇzaˆ miˇ kʼahˬ laꞈ kʼoeˇ Yawˇbaˆ lehˇ myahˇ-euˬ tsawˇ haˬ tiˬ gʼaˬ jawˇ-eu meh. Aˬ yawꞈ-aˬ, Miˬyehˇ-ahˇ saˇ jaˇ ziꞈ-eu laꞈ kʼoeˇ uˬ duˬ tahˬ-eu meh. Yaw lehˬ jeˬ maˬ mˇ ni yahˇ yahˇ-ehˇ dehꞈ luꞈ-eu muiˬ-eu jaˬ-eu tsawˇ haˬ tiˬ gʼaˬ kʼawꞈ pyeuꞈ-eu meh.

² Aˬ yawꞈ-aˬ, aˬ li shiꞈ li jawˇ-awˇ, aˬ buˇ smˬ buˇ jawˇ-eu meh.

³ Yawˇ shiꞈ heˇ mawˇ, law taw smˬ heˇ mawˇ, mawˇ neˇ ngaˬ yaˇ gu hawˇ-eu, mahˬ tahˬ laˆ ngaˬ yaˇ mawˇ jawˇ-eu meh. Aˬ yawꞈ-aˬ, zaˬ kʼaˆ kʼawꞈ gʼawˬ mya ni jawˇ-awˇ, nahˇ ma doˆ kʼehˬ paw coeˇ-ahˇ aˬ cawˬ naˆ maˬ tseˇ smˇ muiˬ muiˬ-eu gʼaˬ pyeuꞈ-eu meh.

⁴ Yawˇbaˆ-euˬ aˬ li deuˬ-aˬ, tiˬ gʼaˬ tiˬ poˆ tiˬ poˆ-ehˇ, yawˬ ha-euˬ nymˇ laꞈ kʼoeˇ dawˬ tawˆ luꞈ-ahˇ hawˬ byawˇ lawˇ-awˇ, aˬ yawꞈ maꞈ-euˬ dmˇ ma deuˬ-ahˇ kʼawꞈ kuˇ-awˇ bi dzaˬ bi dawˇ-eu meh.

⁵ Dzaˬ byawˇ kʼaˇ lawˇ ngeh, yawˬ shawˬ yawˬ uˬ shawˬ yaw naꞈ-ehˇ Yawˇbaˆ tuˇ-awˇ, aˬ yawꞈ-euˬ zaˬ aˬ yawꞈ gʼaˬ yawꞈ gʼaˇ duˬ lawˇ-eu shehˇ-eu jeˬ mˇ-awˇ, shawˇ nehˬ-eu meh. Aˬ yawꞈ-euˬ zaˬ tiˬ gʼaˬ na maˬ noeˬ maˬ duˇ-ehˇ Miˬyehˇ-ahˇ mˇ bahˬ-euˬ baw le lehˇ aˬ yawꞈ kʼahˬ lahˇ-eu baˬ da neh, kʼoeˇ loꞈ-ehˇ mˇ-euˬ meh.

⁶ Mˬ taˆ gʼaˬ kʼehˇ deuˬ Sahˬpaˬ Miˬyehˇ jawˇ gaˇ ya uiˬ laˇ-eu aˇ nah keuˆ laˇ ngeh, nehꞈ Saˬdaˬ gʼaˬ kʼawꞈ laˇ taˬ-euˬ meh.

⁷ “Nawˇ aˬ jeˬ mˇ mˇ-ehˇ jawˇ luꞈ te lehˇ” Saˬdaˬ-ahˇ Sahˬpaˬ Miˬyehˇ naˇ haˬ ngeh, “Miˇ tsaˬ tahˬ kʼawˇ doe ni cah cah-ehˇ jawˇ luꞈ-eu ma lehˇ” Saˬdaˬ ehˇ-eu meh.

⁸ Sahˬpaˬ Miˬyehˇ ehˇ-eu, “Ngaˬ-euˬ zaˬ kʼaˆ Yawˇbaˆ-ahˇ nawˇ siˬ nya ma loˇ. Aˬ yawꞈ loꞈ-ehˇ saˇ jaˇ ziꞈ-eu muiˬ-eu jaˬ-eu tsawˇ haˬ miˇ tsaˬ kʼoeˇ taˆ tiˬ gʼaˬ-iˬ maˬ jawˇ-a. Aˬ yawꞈ ngaˬ-ahˇ uˬ duˬ tahˬ-awˇ, yaw lehˬ yaw ca jeˬ maˬ ya mˇ ni yahˇ dui dui-eu laꞈ kʼoeˇ dehꞈ luꞈ meh.”

⁹ Saˬdaˬ ehˇ-eu, “Aˬ yawꞈ-ahˇ muiˬ leˇ duˬ maˬ jaˆ naˇ Yawˇbaˆ nawˬ-ahˇ uˬ duˬ tahˬ tehꞈ-a loˇ.

¹⁰ Aˬ yawꞈ-ahˇ maˬ ehˇ, aˬ yawꞈ-euˬ nymˇ jiˇ-ahˇ maˬ ehˇ, aˬ yawꞈ kʼaˇ jaˆ-eu yawˬ jeˬ na luꞈ-ahˇ maˬ ehˇ, nawˇ yaw muiˬ paˬ-ehˇ haw piˇ nehˬ-euˬ meh. Aˬ yawꞈ kʼaˇ mˇ kʼaˇ shaˇ-eu yawˬ jeˬ na luꞈ laꞈ kʼoeˇ nawˇ guiˬ lahˬ biꞈ-awˇ, miˇ kʼahˬ kʼoeˇ kʼahˬ tiˬ byah ni jawˇ-eu jeˬ zaˬ kʼoeˇ deuˬ aˬ yawꞈ-ahˇ nawˇ biꞈ taˬ-euˬ meh.

¹¹ Ehˇ kʼawꞈ, nymˬ-mˇ aˬ yawꞈ kʼaˇ jaˆ-eu yawˬ jeˬ na luꞈ nawˇ yuˇ kʼoꞈ nehˬ jiˇ law nmˇ-aˬ, nawˬ-euˬ myaˆ kʼeh tuˆ ni aˬ yawꞈ nawˬ-ahˇ yaˬ kʼehˇ yaˬ tehꞈ-a.”

¹² Saˬdaˬ-ahˇ Sahˬpaˬ Miˬyehˇ ehˇ nehˬ-eu, “Muiˬ tehꞈ-a. Aˬ yawꞈ kʼaˇ jaˆ-eu yawˬ jeˬ na luꞈ nawˬ-euˬ aˬ laꞈ laꞈ kʼoeˇ ngaˇ a nehˬ-eu ma. Ehˇ kʼawꞈ, Yawˇbaˆ-euˬ gʼawˇ mawˇ-ahˇ laˆ tahˬ laˆ naˇ-eu jeˬ nawˇ maˬ ya mˇ-a.” Kʼoeˇ naˇ, Saˬdaˬ gʼoˆ doˆ-iˇ-euˬ meh.

Yawˇbaˆ-euˬ zaˬ deuˬ hawˇ-eu pyuˇ shuiˇ myawˬ gahˬ deuˬ luˬ-iˇ seˇ-iˇ-euˬ

¹³ Tiˬ nah-aˬ, Yawˇbaˆ-euˬ zaˬ deuˬ aˬ yawꞈ maꞈ-euˬ aˇ doˆ aˬ yuiꞈ yuiꞈ saˬ gʼaˬ-euˬ nymˇ-ahˇ uiˬ leˇ-awˇ dzaˬ luꞈ dawˇ luꞈ-eu meh.

¹⁴ Kʼoeˇ ngeh, Yawˇbaˆ jawˇ gaˇ tsawˇ haˬ tiˬ gʼaˬ cehˆ laꞈ-awˇ heu loꞈ-ehˇ tsaꞈ gaˬ laˇ-euˬ meh. “Nga maꞈ mawˇ neˇ neh deh yaˇ tsehˬ luꞈ-awˇ, mahˬ tahˬ laˆ deuˬ dawˬ peh gaˆ dzaꞈ luꞈ-eu meh.

¹⁵ Kʼoeˇ ngeh, Saˬbyaˬ tsawˇ jeuˬ tsawˇ haˬ deuˬ ja pyuˬ ni oe doˆ-awˇ, jeˬ zaˬ dawˬ tawˆ luꞈ teh geuꞈ gʼeh-euˬ meh. Nawˬ-euˬ zaˬ kʼaˆ dawˬ tawˆ luꞈ aˬ yawꞈ maꞈ neh bi sehꞈ jiˇ-awˇ, gaˇ kawˆ heu nawˬ-ahˇ tsaꞈ gaˬ laˇ nya ni ngaˇ tiˬ gʼaˬ dzeuˇ-iˇ-euˬ tehꞈ ma.”

¹⁶ Tsawˇ haˬ kʼoeˇ gʼaˬ kʼoeˇ loꞈ-ehˇ ehˇ gʼaˬ-eu maˬ dah ni, zaˬ kʼaˆ tiˬ gʼaˬ paˇ cehˆ keuˆ laꞈ-awˇ ehˇ-eu, “Yawˇ deuˬ hawˇ-eu yawˇ bo-eu deuˬ dawˬ tawˆ luꞈ tsoꞈ bi deh sehꞈ jiˇ-awˇ, gaˇ kawˆ heu nawˬ-ahˇ tsaꞈ gaˬ laˇ nya ni ngaˇ tiˬ gʼaˬ dzeuˇ-iˇ-euˬ tehꞈ ma.”

¹⁷ Zaˬ kʼaˆ kʼoeˇ gʼaˬ kʼoeˇ loꞈ-ehˇ ehˇ gʼaˬ-eu maˬ dah ni, zaˬ kʼaˆ tiˬ gʼaˬ paˇ cehˆ keuˆ laꞈ-awˇ ehˇ-eu, “Kaˬlaˬdehˇ tsawˇ jeuˬ taˆ smˬ taˆ nga maꞈ-ahˇ ceh le-awˇ, law taw dawˬ tawˆ luꞈ teh geuꞈ gʼeh-euˬ uˬ taꞈ, nawˬ-euˬ zaˬ kʼaˆ dawˬ tawˆ luꞈ-ahˇ sehꞈ jiˇ-awˇ, gaˇ kawˆ heu nawˬ-ahˇ tsaꞈ gaˬ laˇ nya ni ngaˇ tiˬ gʼaˬ dzeuˇ-iˇ-euˬ tehꞈ ma.”

¹⁸ Zaˬ kʼaˆ kʼoeˇ gʼaˬ kʼoeˇ loꞈ-ehˇ ehˇ gʼaˬ-eu maˬ dah ni, zaˬ kʼaˆ tiˬ gʼaˬ paˇ cehˆ keuˆ laꞈ-awˇ ehˇ-eu, “Nawˬ-euˬ zaˬ deuˬ nawˬ li aˬ yuiꞈ yuiꞈ saˬ gʼaˬ-euˬ nymˇ-ahˇ tiˬ kawˆ loꞈ-ehˇ dzaˬ taꞈ dawˇ taꞈ luꞈ-eu meh.

¹⁹ Kʼoeˇ ngeh, kʼaˇ shuiꞈ deh yaˇ paw neh jaˬ lehˇ lehˇ ma baw gʼeh laꞈ-awˇ, nymˇ kʼoeˇ nymˇ baw coˬ-awˇ, aˬ yawꞈ maꞈ dawˬ tawˆ luꞈ shiˇ jiˇ-euˬ meh. Gaˇ kawˆ heu nawˬ-ahˇ tsaꞈ gaˬ laˇ nya ni ngaˇ tiˬ gʼaˬ dzeuˇ-iˇ-euˬ tehꞈ ma.”

²⁰ Kʼoeˇ ngeh, Yawˇbaˆ tsawˬ tuˇ laˇ-awˇ, noeˬ shaˬ dui dui-eu laꞈ kʼoeˇ mehˬ tsoeˬ cehˬ pyaˬ-euˬ meh. Aˬ yawꞈ uˬ jehˆ jehˆ dzeh-awˇ, miˇ tsaˬ-ahˇ moꞈ tsahˬ-ehˇ yuꞈ-euˬ meh.

²¹ Aˬ yawꞈ ehˇ-eu, “Ngaˇ ngaˬ ma-euˬ uˬ maˆ laꞈ kʼoeˇ dehꞈ doˆ le ngeh tiˬ jeˬ-iˬ maˬ yuˇ leꞈ-euˬ loꞈ-ehˇ, shiˇ ngeh kʼawꞈ tiˬ jeˬ-iˬ maˬ paˇ yuˇ gʼeh ma. Sahˬpaˬ Miˬyehˇ-aˬ, biꞈ-eu gʼaˬ pyeuꞈ-eu loꞈ-ehˇ, yuˇ kʼoꞈ-eu gʼaˬ kʼawꞈ pyeuꞈ luꞈ-uˇ. Aˬ yawꞈ-euˬ tsawˇ myahˇ-ahˇ ja ceuˬ-eu jeˬ oꞈ luꞈ-uˇ.”

²² Yawˇbaˆ-aˬ, kʼoeˇ naˆ naˆ-ehˇ gʼeh-eu jeˬ aˬ yawꞈ kʼoeˇ taˆ keuˆ le-euˬ kʼawꞈ, Miˬyehˇ-ahˇ iˬ baˇ taˬ-eu dawˬ ngehˬ-awˇ iˬ baˇ maˬ mˇ-a.