Yaˬkoˆ 5 - Akha

Smˇ muiˬ smˇ baw deuˬ-ahˇ mehˬ-eu dawˬ

¹ Smˇ muiˬ smˇ baw deuˬ-oˇ, ngaˇ ehˇ gaˇ naˇ haˬ sheˇ. Naw maꞈ kʼoeˇ taˆ shaˬ-eu zahˬ-eu jeˬ keuˆ le-eu lehˇ gʼeh-eu miˇ neh guˇ guˇ-ehˇ ngoeˇ-awˬ.

² Naw maꞈ-euˬ myawˬ gahˬ peuˬ byoˆ jiˇ-awˇ, naw maꞈ-euˬ dm gʼaˬ dm lmˇ aˬ iˬ jaˬ byoˆ jiˇ-euˬ meh.

³ Naw maꞈ-euˬ pyuˇ shuiˇ shmˇ kaw kaw leˇ jiˇ-awˇ, shmˇ kaw kʼoeˇ naw maꞈ-euˬ iˬ baˇ gaˇ kawˆ saˇ kiˇ pyeuꞈ-eu uˬ taꞈ, miˬ dzaˬ puiˆ-eu loꞈ-ehˇ naw maꞈ-euˬ shaˬ jiˇ dzaˬ byoˆ jiˇ tehꞈ-a. Aˇ saˬ saˬ-eu aˇ yamˬ heu laꞈ kʼoeˇ naw maꞈ-euˬ pyuˇ shuiˇ myawˬ gahˬ pu cu cu laˇ taˬ-euˬ meh.

⁴ Naw maꞈ-euˬ deh yaˇ-ahˇ gaˇ bi mˇ-euˬ tsawˇ haˬ deuˬ-ahˇ naw maꞈ gʼaˬ gaˇ poeˬ maˬ biꞈ-a. Aˬ yawꞈ maꞈ toˇ gaˇ naˇ haˬ sheˇ. Naw maꞈ-euˬ cehˇ laˆ luiˆ nehˬ-euˬ tsawˇ haˬ kʼoeˇ deuˬ ngoeˇ ngoeˇ-ehˇ guˇ-eu teˇ saˇ kʼoeˇ, Baoˬ huiˬ-eu Sahˬpaˬ Miˬyehˇ-euˬ naˬ bawˇ-ahˇ gaˬ keuˆ leˇ-euˬ meh.

⁵ Miˇ tsaˬ heu kʼoeˇ taˆ naw maꞈ yaw dehꞈ dehꞈ-euˬ-aˬ, laˬ kʼaˬ tiˬ cehˇ, nui kʼahˇ tiˬ shiˇ dehꞈ-euˬ meh. Bi sehꞈ dzaˬ-eu aˇ nah kʼoeˇ nah-euˬ gʼaˇ duˬ, naw maꞈ yawˬ haˇ yawˬ ha cu tsuˇ taˬ-euˬ meh.

⁶ Maˬ lehˬ maˬ ca-eu tsawˇ haˬ deuˬ-ahˇ naw maꞈ yaˇ kʼaˬ daˇ-awˇ sehꞈ-euˬ meh. Aˬ yawꞈ maꞈ laꞈ poˆ maˬ poˆ ni daˬ-euˬ meh.

Oˇ-eu hawˇ-eu guiˬ lahˬ shaˇ-eu

⁷ Aˬ yuiꞈ aˬ nyiˇ Ka li zaˬ deuˬ-oˇ, Sahˬpaˬ Yeˬsuˇ zaꞈ le ngeh keuˆ ni oˇ oˇ-ehˇ jawˇ-awˬ. Deh ma mˇ-eu tsawˇ haˬ tiˬ gʼaˬ aˇ poeˬ kʼaˆ dui dui-eu cehˇ deuˬ keuˆ le ngeh keuˆ ni, aˬ yawꞈ-euˬ deh ma-ahˇ aˬ joˆ-ehˇ dawˬ-eu gaˇ kawˆ shaˇ sawˇ-awˬ. Yehˇ gʼahˇ ahˇ dahˬ beh le ngeh neh yehˇ gʼahˇ jiˇ le ngeh keuˆ ni oˇ oˇ-ehˇ dawˬ-eu meh.

⁸ Naw maꞈ kʼawꞈ, kʼoeˇ loꞈ-ehˇ ya oˇ meh. Sahˬpaˬ Yeˬsuˇ zaꞈ le-eu Aˇnah peh laˇ-euˬ miˇ neh, noeˬ tmˬ-eu nui ma ziꞈ dah ni bi jaˆ-awˬ.

⁹ Aˬ yuiꞈ aˬ nyiˇ Ka li zaˬ deuˬ-oˇ, Miˬyehˇ yaˇ kʼaˬ daˇ gaˇ maˬ ya daˬ-eu gʼaˇ duˬ, tiˬ gʼaˬ tiˇ gʼaˬ iˬ baˇ taˬ-eu dawˬ maˬ ngehˬ ni yahˇ-awˬ. Yaˇ kʼaˬ daˇ le-eu gʼaˬ, laˇ gʼoˆ dawˬ peh oe keuˆ-awˇ yawꞈ luꞈ meh.

¹⁰ Aˬ yuiꞈ aˬ nyiˇ Ka li zaˬ deuˬ-oˇ, Sahˬpaˬ Miˬyehˇ-euˬ tsawˇ myahˇ uˬ moˆ ngehˬ-euˬ tmˇ-euˬ Miˬyehˇ gʼaˇ duˬ ngehˬ dah yaꞈ-euˬ kʼoeˇ deuˬ-ahˇ noeˬ keuˆ-awˬ. Shaˬ-eu zahˬ-eu jeˬ-ahˇ ya daˬ ngeh, aˬ yawꞈ maꞈ oˇ oˇ-ehˇ daˬ dzeuˇ yaꞈ-euˬ gaˇ kawˆ-ahˇ noeˬ mawˇ-awˬ.

¹¹ Aˬ yawꞈ maꞈ daˬ dzeuˇ oˇ dzeuˇ nya-euˬ miˇ neh guiˬ lahˬ huiˬ-eu tsawˇ haˬ lehˇ aˬ dui kuˇ-eu ma. Yawˇbaˆ aˬ joˆ-ehˇ oˇ-euˬ gaˇ kawˆ hawˇ-eu, aˇ saˬ saˬ ngeh Sahˬpaˬ Miˬyehˇ aˬ yawꞈ-ahˇ guiˬ lahˬ aˬ joˆ-ehˇ biꞈ nehˬ-euˬ gaˇ kawˆ naw maꞈ siˬ nya meh. Aˬ jeˬ miˇ neh ehˇ naˇ, Sahˬpaˬ Miˬyehˇ-aˬ, gʼawˬ shaˬ gaˬ-eu jeˬ tiˬ byah ni ahˇ-eu meh.

¹² Aˬ yuiꞈ aˬ nyiˇ Ka li zaˬ deuˬ-oˇ, dawˬ tawˆ luꞈ kʼoeˇ taˆ naw maꞈ yahˇ paˬ-ehˇ gʼeh-eu jeˬ-aˬ, naw maꞈ tiˬ jeˬ paˬ saˇ jaˇ dzaˬ ngeh kamˬ-eu jeˬ taˬ jahˇ. Mˬ-ahˇ gʼoe-awˇ maˬ ehˇ, miˇ tsaˬ-ahˇ gʼoe-awˇ maˬ ehˇ, aˬ geu jeˬ-ahˇ gʼoe-awˇ maˬ ehˇ, taˬ kamˬ. Ngeuˇ naˇ, “Ngeuˇ ma”, maˬ ngeuˇ naˇ, “Maˬ ngeuˇ” lehˇ tehꞈ-ehˇ ehˇ-awˬ. Koeˇ loꞈ-ehˇ jahˇ naˇ, Miˬyehˇ neh yaˇ kʼaˬ daˇ-euˬ jeˬ-ahˇ naw maꞈ maˬ ya daˬ-aˇ.

¹³ Naw maꞈ laꞈ kʼoeˇ, tsawˇ haˬ ti gʼaˬ na shaˬ dui zahˬ dui dui-eu jeˬ-ahˇ ya daˬ luꞈ ta loˇ. Aˬ yawꞈ guiˬ lahˬ shaˇ-eu tsaˬ meh. Tiˬ gʼaˬ na laˬ kʼaˬ cehˇ luꞈ ta loˇ. Aˬ yawꞈ Miˬyehˇ-ahˇ ja ceuˬ-awˇ caˇ-eu tsaˬ meh.

¹⁴ Ti gʼaˬ na naˇ luꞈ gawˇ luꞈ ta loˇ. Aˬ yawꞈ-euˬ gʼaˇ duˬ guiˬ lahˬ bi shaˇ nehˬ-awˇ, Sahˬpaˬ Yeˬsuˇ-euˬ tsawˇ myahˇ uˬ moˆ aˬ yawꞈ-ahˇ saˬ loˬ tsiˇ bi lehꞈ-eu gʼaˇ duˬ, Ka li zaˬ aˇ muˇ-euˬ aˬ yuiꞈ aˬ tsu deuˬ-ahˇ bi kuˇ-iˇ-eu tsaˬ meh.

¹⁵ Jah-eu laꞈ kʼoeˇ guiˬ lahˬ shaˇ-eu jeˬ-aˬ, naˇ-eu tsawˇ haˬ-ahˇ bi taˬ leˇ-eu meh. Sahˬpaˬ Miˬyehˇ aˬ yawꞈ-ahˇ jawˇ saˇ bi doˆ laˇ-awˇ, aˬ yawꞈ iˬ baˇ mˇ taˬ-euˬ jaˆ naˇ, iˬ baˇ pyehˬ nehˬ tehꞈ-a.

¹⁶ Kʼoeˇ miˇ neh, naw maꞈ naˇ-eu gawˇ-eu taˬ leˇ nya ni tiˬ gʼaˬ tiˇ gʼaˬ iˬ baˇ ja doˆ-awˇ, tiˬ gʼaˬ tiˇ gʼaˬ guiˬ lahˬ shaˇ nehˬ-awˬ. Yaw tsaˬ yaw dawˇ tsawˇ haˬ tiˬ gʼaˬ neh guiˬ lahˬ shaˇ-euˬ-aˬ, baoˬ jaˆ-eu meh.

¹⁷ Eˇliˇyaˆ-aˬ, aˬ dui loꞈ-ehˇ gʼeh-eu tsawˇ haˬ tiˬ gʼaˬ meh. Uˬ yehˇ maˬ bi yehˇ le-eu gʼaˇ duˬ aˬ yawꞈ nui ma keuˆ dui dui-eu laꞈ kʼoeˇ guiˬ lahˬ shaˇ ngeh, miˇ kʼahˬ kʼoeˇ kʼahˬ smˇ kʼoꞈ tiˬ paˆ keuˆ ni mˬ gʼoˇ gʼoˇ-euˬ meh.

¹⁸ Aˬ yawꞈ guiˬ lahˬ tiˬ poˆ paˇ shaˇ ngeh, mˬ-ahˇ neh uˬ yehˇ paˇ yehˇ le-awˇ, miˇ tsaˬ-ahˇ dzaˬ la gʼo cehˇ loˆ le-euˬ meh.

¹⁹ Aˬ yuiꞈ aˬ nyiˇ Ka li zaˬ deuˬ-oˇ, naw maꞈ laꞈ kʼoeˇ tiˬ gʼaˬ na, yaw tsaˬ yaw dawˇ jeˬ-ahˇ gaˇ mahˇ kaˬ-iˇ-awˇ, yawˬ gʼaˬ yawˬ neh aˬ yawꞈ-ahˇ paˇ sheuˬ kʼoꞈ laꞈ naˇ,

²⁰ heu loꞈ-ehˇ siˬ nya-awˬ. Iˬ baˇ zaˬ tiˬ gʼaˬ yawˬ ha-euˬ yaw lehˬ-ahˇ noeˬ poˆ leˇ ni sheuˬ pyawˇ nehˬ-euˬ tsawˇ haˬ aˬ geu gʼaˬ maˬ kaˬ, iˬ baˇ zaˬ kʼoeˇ gʼaˬ-euˬ saꞈ laˇ-ahˇ shiˇ-eu jeˬ laꞈ kʼoeˇ neh ka kʼoꞈ-awˇ, myaˬ dui dui-eu iˬ baˇ gʼaˇ duˬ iˬ baˇ pyehˬ nehˬ-eu jeˬ bi keuˆ le-eu meh.