Yaˬkoˆ 1 - Akha

¹ Miˬyehˇ hawˇ-eu Sahˬpaˬ Yeˬsuˇ Ka li-euˬ zaˬ kʼaˆ pyeuꞈ-eu ngaˇ Yaˬkoˆ, Miˇ tsaˬ heu kʼoeˇ taˆ jawˇ byaˆ taˬ-euˬ Miˬyehˇ-euˬ tsawˇ haˬ dawˬ tawˆ luꞈ-ahˇ dawˬ cawˬ puˬ ahˇ laꞈ-eu ma.

Jah-eu jeˬ hawˇ-eu zaˬ siˬ tsawˇ gahˇ

² Aˬ yuiꞈ aˬ nyiˇ Ka li zaˬ deuˬ-oˇ, lawˬ haw-eu gʼawˬ mya jeˬ-ahˇ ya tahˬ puˬ ngeh, yaw muiˬ jeˬ keuˆ le-euˬ loꞈ-ehˇ laˬ kʼaˬ cehˇ-awˬ.

³ Aˬ jeˬ miˇ neh ehˇ naˇ, naw maꞈ-euˬ jah-eu jeˬ-ahˇ lawˬ haw-eu kʼoeˇ-aˬ, naw maꞈ-ahˇ daˬ coeˇ oˇ coeˇ-eu tsawˇ haˬ bi pyeuꞈ laˇ-eu meh.

⁴ Naw maꞈ tiˬ jeˬ-iˬ ehˇ kʼaˇ maˬ za ni byah-eu loꞈ-eu tsawˇ haˬ pyeuꞈ laˇ nya ni, aˬ myah luꞈ maˬ tsehˆ leˇ ni daˬ dzeuˇ oˇ dzeuˇ nya-eu yaw duˬ bi baw-awˬ.

⁵ Ehˇ kʼawꞈ, naw maꞈ laꞈ kʼoeˇ tiˬ gʼaˬ na zaˬ siˬ tsawˇ gahˇ teˬ luꞈ naˇ, Miˬyehˇ-ahˇ guiˬ lahˬ shaˇ-eu tsaˬ meh. Miˬyehˇ aˬ yawꞈ-ahˇ zaˬ siˬ tsawˇ gahˇ biꞈ tehꞈ-a. Aˬ jeˬ miˇ neh ehˇ naˇ, Miˬyehˇ-aˬ, tsawˇ haˬ dawˬ tawˆ luꞈ-ahˇ gʼawˬ shaˬ gaˬ-eu laꞈ kʼoeˇ tsawˇ tsiˇ maˬ tsiˇ ni biꞈ-eu meh.

⁶ Ehˇ kʼawꞈ, naw maꞈ guiˬ lahˬ shaˇ ngeh maˬ jah coeˇ-eu nui ma maˬ bi ahˇ ni, jah-eu laꞈ kʼoeˇ shaˇ-awˬ. Maˬ jah coeˇ-eu tsawˇ haˬ-aˬ, jaˬ lehˇ kʼaˇ hehˇ-eu paw pyawˇ-iˇ-eu iˬ ma laˆ shaˆ iˇ luˆ dzeh gaˇ duˇ-eu meh.

⁷ Kʼoeˇ loꞈ-ehˇ gʼeh-eu tsawˇ haˬ-aˬ, yawˬ ha loˬ-eu jeˬ Sahˬpaˬ Miˬyehˇ biꞈ laꞈ tehꞈ-a lehˇ maˬ noeˬ pyawˬ-eu zaˬ dzehˬ meh.

⁸ Aˬ jeˬ miˇ neh ehˇ naˇ, aˬ yawꞈ kʼaˇ mˇ kʼaˇ shaˇ-eu jeˬ laꞈ kʼoeˇ nui ma poˆ poˆ laˆ laˆ-ehˇ noeˬ-awˇ, nui tsehˆ maˬ ahˇ-a.

Iˇshaˬ hawˇ-eu smˇ muiˬ

⁹ Iˇ shaˬ shaˬ-eu Ka li zaˬ tiˬ gʼaˬ-aˬ, Miˬyehˇ aˬ yawꞈ-ahˇ ciˬ goˇ nehˬ ngeh laˬ kʼaˬ cehˇ-eu tsaˬ meh.

¹⁰ Smˇ muiˬ muiˬ-eu Ka li zaˬ tiˬ gʼaˬ-aˬ, Miˬyehˇ aˬ yawꞈ-ahˇ taˬ awˆ nehˬ ngeh laꞈ kʼaˬ cehˇ-eu tsaˬ meh. Aˬ jeˬ miˇ neh ehˇ naˇ, smˇ muiˬ muiˬ-eu tsawˇ haˬ-aˬ, yaˇ moꞈ aˇ yehˆ loꞈ-ehˇ ya byoˆ-iˇ tehꞈ-a.

¹¹ Nahˇ ma doˆ laˇ-awˇ nahˇ tsaˇ kʼaˆ laˇ ngeh, yaˇ moꞈ kʼoeˇ nyoeˬ-iˇ koˆ-iˇ-eu meh. Kʼoeˇ ngeh jawˇ, aˇ yehˆ kʼoeˇ ga ka-awˇ haw muiˬ-eu jeˬ cawˆ-iˇ jiˇ-eu meh. Kʼoeˇ gaˇ duˇ ni, smˇ muiˬ muiˬ-eu tsawˇ haˬ kʼawꞈ, yawˬ ha-euˬ gaˇ-ahˇ kʼoꞈ gʼa luꞈ ngeh ya luˬ ya seˇ-iˇ tehꞈ-a.

Lawˬ haw-eu jeˬ hawˇ-eu muˇ juˇ juˇ-eu jeˬ

¹² Lawˬ haw-eu jeˬ-ahˇ ya daˬ ngeh saˇ jaˇ ziꞈ-eu tsawˇ haˬ guiˬ lahˬ huiˬ-eu meh. Aˬ jeˬ miˇ neh ehˇ naˇ, lawˬ haw-eu jeˬ-ahˇ aˬ yawꞈ daˬ dzeuˇ oˇ dzeuˇ gʼaˬ ngeh jawˇ, Miˬyehˇ-ahˇ gaˬ-eu tsawˇ haˬ deuˬ gʼaˇ duˬ Miˬyehˇ neh lehˬ hmˬ taˬ-euˬ dehꞈ-eu jeˬ-euˬ shuiˇ uˬ kʼoˆ laꞈ sawˬ za tehꞈ-a.

¹³ Tsawˇ haˬ tiˬ gʼaˬ na, koeˇ loꞈ-ehˇ lawˬ haw-awˇ muˇ juˇ juˇ gaˇ ya daˬ ngeh, “Muˇ juˇ juˇ-eu heu, Miˬyehˇ jawˇ gaˇ neh oe-euˬ meh” lehˇ ehˇ-eu maˬ tsaˬ-a. Aˬ jeˬ miˇ neh ehˇ naˇ, yaw haiˬ jeˬ Miˬyehˇ-ahˇ muˇ juˇ maˬ juˇ nya-a. Kʼoeˇ loꞈ-ehˇ duˇ ni, tsawˇ haˬ tiˬ gʼaˬ-ahˇ-iˬ Miˬyehˇ muˇ juˇ maˬ juˇ-a.

¹⁴ Ehˇ kʼawꞈ, tsawˇ haˬ tiˬ gʼaˬ-aˬ, yawˬ ha-euˬ maˬ muiˬ maˬ jaˬ-eu nui kʼahˇ neh bi tsahˇ pyawˇ-awˇ lahˇ ju bi kʼmˇ ngeh, muˇ juˇ juˇ-eu jeˬ-ahˇ ya daˬ-eu meh.

¹⁵ Kʼoeˇ naˇ, aˬ yawꞈ-euˬ maˬ muiˬ maˬ jaˬ-eu nui kʼahˇ kʼoeˇ zaˬ jeuˬ-eu loꞈ-ehˇ jeuˬ leˇ-awˇ, iˬ baˇ bi dehꞈ doˆ le-eu meh. Iˬ baˇ kʼoeˇ huiˬ loˆ laˇ ngeh, shiˇ-eu jeˬ bi dehꞈ doˆ le-eu meh.

¹⁶ Ngaˇ gaˬ dui dui-eu aˬ yuiꞈ aˬ nyiˇ Ka li zaˬ deuˬ-oˇ, taˬ noeˬ lehˬ.

¹⁷ Muiˬ-eu guiˬ lahˬ hawˇ-eu byah-eu laꞈ sawˬ dawˬ tawˆ luꞈ, mˬ paw neh yaw shehꞈ-euˬ Aˬda jawˇ gaˇ neh oe-euˬ meh. Aˬ yawꞈ laꞈ kʼoeˇ poˆ laˇ paˇ laˇ nya-eu naˇ shmˇ maˬ ahˇ-a.

¹⁸ Kʼaˇ beh dehꞈ taˬ-euˬ jeˬ dawˬ tawˆ luꞈ laꞈ kʼoeˇ aˬ dui aˬ cawˬ jeˬ hu hu saˬ ya jawˇ ni, aˬ yawꞈ nui ma kʼaˇ tsaˬ-eu loꞈ-ehˇ yaw tsaˬ yaw dawˇ dawˬ-ahˇ gʼoe-awˇ aˬ dui-ahˇ beh dehꞈ taˬ-euˬ meh.

Naˬ bawˇ ya gaˬ-eu hawˇ-eu ya mˇ-eu

¹⁹ Ngaˇ gaˬ dui dui-eu aˬ yuiꞈ aˬ nyiˇ Ka li zaˬ deuˬ-oˇ, gaˇ kawˆ heu deuˬ-ahˇ yaw muiˬ paˬ-ehˇ noeˬ taˬ-awˬ. Tsawˇ haˬ yawˬ gʼaˬ na luꞈ aˬ cawˬ ehˇ gaˇ yaw kawˇ-ehˇ naˇ haˬ-awˬ. Ehˇ kʼawꞈ, dawˬ ngehˬ-eu taˬ tehˬ. Nui ma pehˇ-eu aˬ huˬ taˬ huˬ.

²⁰ A jeˬ miˇ neh ehˇ naˇ, tsawˇ haˬ zaˬ-euˬ nui ma pehˇ-eu jeˬ-aˬ, Miˬyehˇ neh noeˬ taˬ-euˬ yaw tsaˬ yaw dawˇ jeˬ maˬ mˇ doˆ laꞈ nya-a.

²¹ Kʼoeˇ miˇ neh, yaw jawꞈ jeˬ dawˬ tawˆ luꞈ hawˇ-eu maˬ muiˬ maˬ jaˬ-eu jeˬ dawˬ tawˆ luꞈ byehˇ dzeh jiˇ-awˇ, Miˬyehˇ-euˬ nui noeˬ geuꞈ-eu laꞈ kʼoeˇ, aˬ yawꞈ neh naw maꞈ-euˬ nui ma laꞈ kʼoeˇ ka taˬ-euˬ naw maꞈ-ahˇ ka kʼoꞈ nya-eu dawˬ-ahˇ naˇ haˬ geuꞈ-awˬ.

²² Aˬ yawꞈ-euˬ dawˬ-ahˇ naˬ bawˇ tehꞈ-ehˇ gaˬ-awˇ, yawˬ haˇ yawˬ ha jaˬ myawꞈ myawꞈ-eu tsawˇ haˬ taˬ bi pyeuꞈ. Naˇ haˬ geuꞈ-eu tsawˇ haˬ bi pyeuꞈ-awˬ.

²³ Miˬyehˇ-euˬ dawˬ-ahˇ ya gaˬ-euˬ loꞈ-ehˇ maˬ mˇ maˬ shaˇ-eu tsawˇ haˬ-aˬ, pyawˬ haw laꞈ kʼoeˇ yawˬ ha-euˬ myaˆ pyawˬ-ahˇ yawˬ ha haw-eu tsawˇ haˬ-ahˇ duˇ-eu tehꞈ meh.

²⁴ Aˬ yawꞈ yaw muiˬ paˬ-ehˇ haw duˬ gʼaˬ-awˇ doˆ-iˇ ngeh, yawˬ ha-euˬ pyawˬ naˬ aˇ gʼehˇ-ahˇ tiˬ poˆ tehꞈ-ehˇ ngehˇ shaw-euˬ meh.

²⁵ Ehˇ kʼawꞈ, tsawˇ haˬ zaˬ-ahˇ bi buˬ bi law-iˇ-eu byah dui dui-eu zahˇ dawˬ kʼoꞈ dawˬ-ahˇ haw duˬ-awˇ, kʼaˇ ya gaˬ-euˬ jeˬ maˬ ngehˇ byoˆ ni yaw muiˬ paˬ-ehˇ caw teh-awˇ mˇ gʼeh shaˇ gʼeh-eu tsawˇ haˬ-aˬ, aˬ yawꞈ kʼaˇ mˇ kʼaˇ shaˇ-eu jeˬ laꞈ koeˇ Miˬyehˇ guiˬ lahˬ biꞈ nehˬ tehꞈ-a.

²⁶ Tsawˇ haˬ tiˬ gʼaˬ na uˬ duˬ tahˬ-eu zahˇ sahˇ kʼoꞈ-ahˇ yaw muiˬ paˬ-ehˇ caw teh luꞈ ma lehˇ noeˬ luꞈ ta loˇ. Yawˬ haˬ-euˬ kʼaˬ meh mehˬ boeˬ-ahˇ yawˬ ha maˬ gʼaˬ leˇ naˇ, aˬ yawꞈ-euˬ uˬ duˬ tahˬ-eu zahˇ sahˇ kʼoꞈ kʼoeˇ aˬ yawꞈ gʼaˇ duˬ gaˇ dahˇ maˬ tsoeˬ-eu uˬ taꞈ, yawˬ haˇ yawˬ ha jaˬ myawꞈ myawꞈ gaˇ duˇ-eu meh.

²⁷ Aˬ da Miˬyehˇ-euˬ mehˬ shi shawˇ jehˆ ni gʼeh-awˇ maˇ jawˆ ni gʼeh-eu uˬ duˬ tahˬ-eu zahˇ sahˇ kʼoꞈ-aˬ, muˇ coe aˬ nmˇ deuˬ hawˇ-eu miˬ coeˬ miˬ ma deuˬ shaˬ gaˇ zahˬ gaˇ caw ba nehˬ-awˇ, miˇ tsaˬ shiˬ shaˬ jiˇ-euˬ nui kʼahˇ neh maˬ bi laˆ jawꞈ ni yawˬ haˇ yawˬ ha yahˇ-awˇ dehꞈ-eu jeˬ pyeuꞈ-eu meh.