Uˬ duˬ 8 - Akha

Aˬloˬ hawˇ-eu aˬ yawꞈ-euˬ aˬ li deuˬ-ahˇ aˇ yaˬ biꞈ nehˬ-eu

¹ Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh.

² “Aˬloˬ hawˇ-eu aˬ yawꞈ-euˬ aˬ li deuˬ-ahˇ, ngaˇ jawˇ-eu Sehˬ gʼawˆ-ahˇ sheuˬ laꞈ-awˇ, piˇ ma-euˬ dm gʼaˬ dm lmˇ deuˬ, tseˇ doˆ-euˬ deuˬ-ahˇ lehꞈ-eu tsiˇ, iˬ baˇ shawˇ-eu lawˇ-eu jeˬ lawˇ-eu gʼaˇ duˬ mawˇ neˇ mawˇ gaw zaˬ, yawˇ aˬ buˬ nyiˬ mawˇ, dehˬ tseˬ maˬ ahˇ-eu kaˬ muˇ dawˆ ahˇ taˬ-euˬ kʼa sa, heu deuˬ yuˇ laꞈ-awˬ.

³ Kʼoeˇ naˇ, Iˇsaˬleˬlaˆ tsawˇ haˬ aˇ maꞈ aˇ muˇ dawˬ tawˆ luꞈ-ahˇ kʼoeˇ gaˇ kuˇ uiˬ-awˬ.”

⁴ Sahˬpaˬ Miˬyehˇ neh dawˬ biꞈ nehˬ-euˬ loꞈ-ehˇ Moˇseˬ mˇ-awˇ, Iˇsaˬleˬlaˆ tsawˇ haˬ aˇ maꞈ aˇ muˇ dawˬ tawˆ luꞈ uiˬ laˇ jiˇ-euˬ meh.

⁵ “Sahˬpaˬ Miˬyehˇ neh dawˬ biꞈ taˬ-euˬ loꞈ-ehˇ, nymˬ-mˇ ngaˇ mˇ-eu lehˇ gʼeh-eu ma” lehˇ, aˬ yawꞈ maꞈ-ahˇ Moˇseˬ ehˇ nehˬ-euˬ meh.

⁶ Moˇseˬ-aˬ, Aˬloˬ hawˇ-eu aˬ yawꞈ-euˬ aˬ li deuˬ-ahˇ mehˬ shi kuˇ doˆ-awˇ, iˇ cuꞈ dzuiꞈ shawˇ-eu zahˇ mˇ-awˬ lehˇ ehˇ nehˬ-euˬ meh.

⁷ Aˬloˬ-ahˇ, pehˇ kʼahˬ hawˇ-eu pehˇ kʼahˬ pehˇ mahˇ bi dm-awˇ, joꞈ-ahˇ joꞈ tsiˬ bi paꞈ-euˬ meh. Pehˇ kʼahˬ pehˇ nymˇ kʼawꞈ bi dm-awˇ, pehˇ kʼahˬ pehˇ nymˇ-ahˇ tsoꞈ-eu joꞈ paꞈ bi paꞈ ziꞈ-euˬ meh.

⁸ Kʼoeˇ naˇ, kʼahˬ-ahˇ dehˬ daˬ duˬ bi dm-awˇ, Uˇleˬ hawˇ-eu Duˇmeˬ dawˆ ahˇ nehˬ-euˬ meh.

⁹ Aˬ yawꞈ-euˬ uˬ duˬ-ahˇ uˬ dzahˬ bi dzahˬ-awˇ, Sahˬpaˬ Miˬyehˇ neh dawˬ biꞈ taˬ-eu loꞈ-ehˇ, a nehˬ-eu gaˇ taꞈ leˇ-eu muiˬ-eu shawˇ-eu saˇ kiˇ pyeuꞈ-eu muiˬ-eu shawˇ-eu shuiˇ pehˇ gʼawˆ yuˇ-awˇ, uˬ dzahˬ-euˬ mehˬ shi paꞈ tawꞈ nehˬ-euˬ meh.

¹⁰ Kʼoeˇ naˇ, Sahˬpaˬ Miˬyehˇ jawˇ-eu Sehˬ gʼawˆ kʼoeˇ taˆ maˬ ehˇ, Sehˬ gʼawˆ laꞈ kʼoeˇ jaˆ-eu keu ka deuˬ-ahˇ maˬ ehˇ, tseˇ doˆ-euˬ deuˬ-ahˇ lehꞈ-eu tsiˇ kʼoeˇ neh Moˇseˬ lehꞈ-awˇ, Sahˬpaˬ Miˬyehˇ-ahˇ a nehˬ-euˬ meh.

¹¹ Kʼoeˇ naˇ, tsiˇ kʼoeˇ ui cuiˆ paˇ yuˇ-awˇ, lawˇ duˬ hawˇ-eu kʼoeˇ gaˇ taꞈ leˇ-eu keu ka deuˬ-ahˇ maˬ ehˇ, sehˇ byehˇ hawˇ-eu kʼoeˇ-euˬ aˬ kuiˇ-ahˇ maˬ ehˇ, shiꞈ poˆ keuˆ ni byaˆ shehˬ-awˇ, Sahˬpaˬ Miˬyehˇ-ahˇ a nehˬ-euˬ meh.

¹² Tseˇ doˆ-euˬ deuˬ-ahˇ lehꞈ-eu tsiˇ kʼoeˇ ui cuiˆ yuˇ-awˇ, Aˬloˬ-euˬ uˬ duˬ-ahˇ shehˆ daˆ-awˇ, aˇ yaˬ biꞈ nehˬ-euˬ meh.

¹³ Kʼoeˇ naˇ, Aˬloˬ-euˬ aˬ li deuˬ-ahˇ, mehˬ shi paw Moˇseˬ kuˇ doˆ-awˇ, pehˇ kʼahˬ bi dm-euˬ meh. Sahˬpaˬ Miˬyehˇ neh dawˬ biꞈ taˬ-euˬ loꞈ-ehˇ joꞈ paꞈ bi paꞈ-awˇ uˬ kʼoˆ bi kʼoˆ-euˬ meh.

¹⁴ Kʼoeˇ naˇ, iˬ baˇ shawˇ-eu lawˇ-eu jeˬ lawˇ-eu gʼaˇ duˬ, mawˇ neˇ mawˇ gaw zaˬ kʼoeˇ mawˇ Moˇseˬ tsahˇ laꞈ-awˇ, Aˬloˬ hawˇ-eu aˬ yawꞈ-euˬ aˬ li deuˬ mawˇ neˇ kʼoeˇ mawˇ kʼoeˇ taˆ aˬ laꞈ baꞈ daˆ-euˬ meh.

¹⁵ Mawˇ neˇ kʼoeˇ mawˇ-ahˇ Moˇseˬ sehꞈ-euˬ meh. Lawˇ duˬ a nehˬ-eu gʼaˇ duˬ, mawˇ neˇ kʼoeˇ mawˇ-euˬ shiˬ ui cuiˆ yuˇ-awˇ, aˬ yawꞈ-euˬ laꞈ noeˇ kʼoeˇ gaˇ cawˬ duiˆ-awˇ, lawˇ duˬ-euˬ laꞈ coeˇ-ahˇ tsoꞈ doˆ-eu uˬ coeˇ deuˬ-ahˇ lehꞈ-euˬ meh. Dzehˬ laˇ-euˬ shiˬ deuˬ yuˇ-awˇ, lawˇ duˬ-euˬ dawˬ pehˬ-ahˇ shehˆ-euˬ meh. Kʼoeˇ loꞈ-ehˇ jahˇ-awˇ, lawˇ duˬ kʼoeˇ a nehˬ-awˇ bi muiˬ bi shawˇ laˇ-euˬ meh.

¹⁶ Tsahˬ nahˬ uˇ jiˇ-ahˇ dawꞈ-eu tsiˇ dawˬ tawˆ luꞈ maˬ ehˇ, muiˬ dui dui-eu shaˬ tsahˬ ui cuiˆ maˬ ehˇ, gʼawˬ siˬ hawˇ-eu kʼoeˇ gaˇ dawꞈ-eu tsiˇ maˬ ehˇ, Moˇseˬ yuˇ-awˇ, kʼoeˇ deuˬ dawˬ tawˆ luꞈ-ahˇ lawˇ duˬ kʼoeˇ taˆ dzah puiˆ-euˬ meh.

¹⁷ Baˆ kʼoˆ, shaˬ jiˇ hawˇ-eu baw uˇ baw ma ahˇ leˇ-ehˇ, mawˇ neˇ kʼoeˇ mawˇ laꞈ kʼoeˇ kʼaˇ dzehˬ laˇ-euˬ jeˬ dawˬ tawˆ luꞈ aˬ yawꞈ yuˇ-awˇ, Sahˬpaˬ Miˬyehˇ neh dawˬ biꞈ taˬ-eu loꞈ-ehˇ, pu pu dzeˇ keuˬ puiˆ dzeh-euˬ meh.

¹⁸ Kʼoeˇ naˇ, miˬ dzaˬ-ahˇ dzah puiˆ-awˇ lawˇ-eu jeˬ lawˇ-eu gʼaˇ duˬ yawˇ aˬ buˬ yawˬ mawˇ yawˬ Moˇseˬ tsahˇ laꞈ-awˇ, Aˬloˬ hawˇ-eu aˬ yawꞈ-euˬ aˬ li deuˬ yawˇ kʼoeˇ mawˇ-euˬ uˬ duˬ kʼoeˇ taˆ aˬ laꞈ baꞈ daˆ-euˬ meh.

¹⁹ Yawˇ kʼoeˇ mawˇ-ahˇ Moˇseˬ sehꞈ-awˇ, lawˇ duˬ-euˬ oeˬ pyawˬ luꞈ-ahˇ yawˇ-euˬ shiˬ neh byaˆ-euˬ meh.

²⁰ Yawˇ kʼoeˇ mawˇ pyaˆ-awˇ deuˆ gʼaˬ ngeh, uˬ duˬ maˬ ehˇ, deuˆ gʼaˬ-euˬ shaˬ jiˇ deuˬ maˬ ehˇ, tsiˇ deuˬ maˬ ehˇ, Moˇseˬ neh yuˇ-awˇ miˬ dzaˬ-ahˇ dzah puiˆ-euˬ meh.

²¹ Kʼoeˇ naˇ, tsahˬ nahˬ uˇ nahˬ baw uˇ baw ma dawˬ tawˆ luꞈ hawˇ-eu, aˬ kuiˇ aˬ laꞈ dawˬ tawˆ luꞈ-ahˇ tsiˬ shawˇ gʼaˬ ngeh, Sahˬpaˬ Miˬyehˇ neh dawˬ biꞈ taˬ-euˬ loꞈ-ehˇ, lawˇ duˬ kʼoeˇ taˆ Moˇseˬ dzah puiˆ-awˇ, miˬ dzaˬ dzah puiˆ-awˇ lawˇ-eu jeˬ Sahˬpaˬ Miˬyehˇ-ahˇ lawˇ nehˬ-euˬ meh. Miˬ dzaˬ dzah puiˆ-awˇ lawˇ-eu kʼoeˇ-aˬ, dzaˬ dzaˬ dawˇ dawˇ lawˇ-eu jeˬ pyeuꞈ-awˇ, kʼoeˇ-euˬ yaw saꞈ-ahˇ Sahˬpaˬ Miˬyehˇ nui ma tsaˬ-eu meh.

²² Kʼoeˇ naˇ, piˇ ma deuˬ Miˬyehˇ-ahˇ a nehˬ-eu gʼaˇ duˬ, yawˇ aˬ buˬ yawˬ mawˇ yawˬ Moˇseˬ tsahˇ-awˇ, Aˬloˬ hawˇ-eu aˬ yawꞈ-euˬ aˬ li deuˬ, yawˇ kʼoeˇ mawˇ-euˬ uˬ duˬ kʼoeˇ taˆ aˬ laꞈ baꞈ daˆ-euˬ meh.

²³ Yawˇ kʼoeˇ mawˇ-ahˇ, Moˇseˬ sehꞈ-awˇ, shiˬ ui cuiˆ yuˇ-awˇ, Aˬloˬ-euˬ aˇ maˇ paw naˬ paꞈ naˬ dzaˬ-ahˇ maˬ ehˇ, aˇ maˇ laꞈ laꞈ ma-ahˇ maˬ ehˇ, aˇ maˇ kuiˇ kuiˇ ma-ahˇ maˬ ehˇ, lehꞈ-euˬ meh.

²⁴ Kʼoeˇ naˇ, Aˬloˬ-euˬ aˬ li deuˬ-ahˇ mehˬ shi paw sheuˬ doˆ laꞈ-awˇ, aˬ yawꞈ maꞈ-euˬ aˇ maˇ paw naˬ paꞈ naˬ dzaˬ-ahˇ maˬ ehˇ, aˇ maˇ laꞈ laꞈ ma-ahˇ maˬ ehˇ, aˇ maˇ kuiˇ kuiˇ ma-ahˇ maˬ ehˇ, yawˇ kʼoeˇ mawˇ-euˬ shiˬ lehꞈ nehˬ-euˬ meh. Dzehˬ laˇ-euˬ shiˬ deuˬ Moˇseˬ yuˇ-awˇ, lawˇ duˬ-euˬ oeˬ pyawˬ luꞈ-ahˇ shehˆ-euˬ meh.

²⁵ Yawˇ kʼoeˇ mawˇ-euˬ tsiˇ maˬ ehˇ, tsiˇ dawꞈ dui dui-eu dawˬ miˬ maˬ ehˇ, tsahˬ nahˬ uˇ jiˇ-ahˇ dawꞈ-eu tsiˇ dawˬ tawˆ luꞈ maˬ ehˇ, aˬ kuiˇ aˇ maˇ kuiˇ maˬ ehˇ, Moˇseˬ yuˇ-euˬ meh.

²⁶ Kʼoeˇ naˇ, Sahˬpaˬ Miˬyehˇ-ahˇ damˬ nehˬ-euˬ dehˬ tseˬ maˬ ahˇ-eu kaˬ muˇ dawˆ ahˇ taˬ-euˬ kaˬ muˇ kʼa sa laꞈ kʼoeˇ ahˇ-eu kaˬ muˇ tiˬ siˬ, tsiˇ keuˬ-awˇ jahˇ taˬ-euˬ kaˬ muˇ tiˬ siˬ hawˇ-eu, kaˬ muˇ aˇ yaˆ yaˆ zaˬ tiˬ yaˆ aˬ yawꞈ yuˇ-awˇ, yawˇ kʼoeˇ mawˇ-euˬ tsiˇ hawˇ-eu aˬ kuiˇ aˇ maˇ kuiˇ-euˬ kʼoeˇ taˆ bi jaˆ-euˬ meh.

²⁷ Dzaˇ heu deuˬ dawˬ tawˆ luꞈ, Aˬloˬ hawˇ-eu aˬ yawꞈ-euˬ aˬ li deuˬ-euˬ aˬ laꞈ laꞈ kʼoeˇ aˬ yawꞈ dawˆ ahˇ nehˬ-awˇ, dzaˇ kʼoeˇ deuˬ-ahˇ aˬ yawꞈ maꞈ bi ciˬ nyeh-awˇ muiˬ dui dui-eu laꞈ sawˬ loꞈ-ehˇ Sahˬpaˬ Miˬyehˇ-ahˇ damˬ nehˬ-euˬ meh.

²⁸ Kʼoeˇ naˇ, dzaˇ kʼoeˇ deuˬ Moˇseˬ paˇ yuˇ-awˇ, miˬ dzaˬ dzah puiˆ-awˇ, lawˇ-eu jeˬ kʼoeˇ taˆ puiˆ daˆ-awˇ, aˇ yaˬ biꞈ-eu lawˇ-eu jeˬ lawˇ-euˬ meh. Heu-aˬ, dzaˬ dzaˬ dawˇ dawˇ lawˇ-eu jeˬ pyeuꞈ-awˇ, kʼoeˇ-euˬ yaw saꞈ-ahˇ, Sahˬpaˬ Miˬyehˇ nui ma tsaˬ-eu meh.

²⁹ Kʼoeˇ naˇ, yawˇ kʼoeˇ mawˇ-euˬ kʼahˬ Moˇseˬ yuˇ-awˇ, muiˬ dui dui-eu laꞈ sawˬ Sahˬpaˬ Miˬyehˇ-ahˇ biꞈ nehˬ-euˬ meh. Kʼoeˇ-aˬ, a nehˬ-eu gʼaˇ duˬ sehꞈ-euˬ yawˇ kʼoeˇ mawˇ laꞈ kʼoeˇ, Moˇseˬ-ahˇ oꞈ-eu shaˬ bymˇ meh. Sahˬpaˬ miˬyehˇ neh dawˬ biꞈ taˬ-euˬ loꞈ-ehˇ, yawˬ jeˬ na luꞈ Moˇseˬ mˇ-euˬ meh.

³⁰ Moˇseˬ-aˬ, tseˇ doˆ-euˬ deuˬ-ahˇ lehꞈ-eu tsiˇ hawˇ-eu lawˇ duˬ kʼoeˇ taˆ jaˆ-eu shiˬ ui cuiˆ yuˇ-awˇ, Aˬloˬ hawˇ-eu aˬ yawꞈ-euˬ aˬ li deuˬ-ahˇ maˬ ehˇ, aˬ yawꞈ maꞈ-euˬ mehˬ tsoeˬ-ahˇ maˬ ehˇ, byaˆ shehˬ nehˬ-euˬ meh. Kʼoeˇ loꞈ-ehˇ jahˇ-awˇ, aˬ yawꞈ maꞈ hawˇ-eu aˬ yawꞈ maꞈ-euˬ dm gʼaˬ dm lmˇ deuˬ, Sahˬpaˬ Miˬyehˇ-ahˇ Moˇseˬ a nehˬ-euˬ meh.

³¹ Aˬloˬ hawˇ-eu aˬ yawꞈ-euˬ aˬ li deuˬ-ahˇ Moˇseˬ ehˇ nehˬ-eu, “Sahˬpaˬ Miˬyehˇ neh dawˬ biꞈ taˬ-euˬ loꞈ-ehˇ, Sahˬpaˬ Miˬyehˇ jawˇ-eu Sehˬ gʼawˆ gʼoˆ kʼehˬ-ahˇ shaˬ jiˇ yuˇ gʼeh-awˇ caꞈ-eu laꞈ kʼoeˇ, a nehˬ-eu lawˇ-eu jeˬ gʼaˇ duˬ kaˬ muˇ dawˆ ahˇ taˬ-euˬ kʼa sa laꞈ kʼoeˇ ahˇ-eu kaˬ muˇ nehˬ-ehˇ kʼoeˇ gaˇ dzaˬ-awˬ.

³² Dzehˬ laˇ-euˬ kaˬ muˇ hawˇ-eu shaˬ jiˇ deuˬ keuˬ puiˆ dzeh-awˬ.

³³ Naw maꞈ-euˬ gʼawˇ mawˇ a nehˬ-eu lawˇ-eu shehˇ-eu zahˇ sahˇ kʼoꞈ heu hmˬ maˬ mˇ byah-euˬ nmˇ kaˬ, shiꞈ nah keuˆ ni tiˬ gaˇ-iˬ maˬ iˇ-ehˇ, sehˬ gʼawˆ gʼoˆ kʼehˬ-ahˇ tehꞈ-ehˇ jawˇ-awˬ.

³⁴ Naw maꞈ-euˬ iˬ baˇ tsiˬ shawˇ-eu gʼaˇ duˬ, iˬ nah aˬ dui maꞈ mˇ-eu gaˇ heu deuˬ mˇ-awˬ lehˇ, Sahˬpaˬ Miˬyehˇ aˬ dui-ahˇ dawˬ biꞈ taˬ-euˬ meh.

³⁵ Uˬ ciꞈ nah gʼahˇ maˬ ehˇ, Sahˬpaˬ Miˬyehˇ neh ehˇ taˬ-euˬ gaˇ deuˬ ahˇ mˇ mˇ-ehˇ, shiꞈ nah keuˆ ni sehˬ gʼawˆ gʼoˆ kʼehˬ-ahˇ naw maꞈ ya jawˇ meh. Kʼoeˇ loꞈ-ehˇ maˬ mˇ naˇ, naw maꞈ ya shiˇ tehꞈ-a. Sahˬpaˬ Miˬyehˇ neh heu loꞈ-ehˇ dawˬ biꞈ taˬ-euˬ meh.”

³⁶ Kʼoeˇ naˇ, Aˬloˬ hawˇ-eu aˬ yawꞈ-euˬ aˬ li deuˬ-aˬ, Sahˬpaˬ Miˬyehˇ neh Moˇseˬ-ahˇ gʼoe-awˇ, aˬ yawꞈ maꞈ-ahˇ dawˬ kʼaˇ biꞈ-euˬ yawˬ jeˬ na luꞈ mˇ-euˬ meh.