Uˬ duˬ 4 - Akha

Maˬ noeˬ maˬ duˇ-ehˇ mˇ lehˬ-euˬ Iˬ baˇ gʼaˇ duˬ lawˇ-eu shehˇ-eu jeˬ

¹ Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh.

² Tsawˇ haˬ tiˬ gʼaˬ na, maˬ noeˬ maˬ duˇ-euˬ laꞈ kʼoeˇ, Sahˬpaˬ Miˬyehˇ-euˬ zahˇ dawˬ kʼoꞈ dawˬ tiˬ dawˬ na-ahˇ mˇ bahˬ naˇ, zahˇ sahˇ kʼoꞈ heu deuˬ-ahˇ ya caw teh meh lehˇ Iˇsaˬleˬlaˆ tsawˇ haˬ deuˬ-ahˇ ehˇ nehˬ-awˬ.

³ Piˇ ma yaw huiˬ gʼaˬ iˬ baˇ mˇ-awˇ, Iˇsaˬleˬlaˆ tsawˇ haˬ deuˬ kʼoeˇ taˆ iˬ baˇ keuˆ le naˇ, maˇ byawꞈ maˬ baw-eu mawˇ neˇ mawˇ gaw zaˬ tiˬ mawˇ aˬ yawꞈ tsahˇ laꞈ-awˇ, aˬ yawꞈ-euˬ iˬ baˇ gʼaˇ duˬ, Sahˬpaˬ Miˬyehˇ-ahˇ ya lawˇ meh.

⁴ Mawˇ neˇ kʼoeˇ mawˇ sehˬ gʼawˆ gʼoˆ kʼehˬ-ahˇ aˬ yawꞈ tsahˇ laꞈ-awˇ, mawˇ neˇ-euˬ uˬ duˬ kʼoeˇ taˆ, aˬ yawꞈ-euˬ aˬ laꞈ ya baꞈ daˆ meh. Kʼoeˇ gaˇ, Sahˬpaˬ Miˬyehˇ mehˬ shi, mawˇ neˇ kʼoeˇ mawˇ aˬ yawꞈ ya sehꞈ meh.

⁵ Kʼoeˇ naˇ, Piˇ ma Yaw huiˬ gʼaˬ Sehˬ gʼawˆ laꞈ kʼoeˇ mawˇ neˇ kʼoeˇ mawˇ-euˬ shiˬ ui cuiˆ ya yuˇ ahˇ gʼeh meh.

⁶ Aˬ yawꞈ-euˬ laꞈ noeˇ shiˬ laꞈ kʼoeˇ cawˬ duiˆ-awˇ, lawˆ kaˬ taw taˬ-euˬ muiˬ-eu shawˇ-eu saˬ paˇ mehˬ shi, shiꞈ poˆ keuˆ ni ya byaˆ shehˬ meh.

⁷ Kʼoeˇ naˇ, Sehˬ gʼawˆ laꞈ coeˇ jaˆ-eu yaw saw jeˬ lawˇ-eu lawˇ duˬ-euˬ laꞈ coeˇ oeˬ coeˇ-ahˇ tsoꞈ-eu uˬ coeˇ deuˬ-ahˇ, shiˬ kʼoeˇ ui cuiˆ yuˇ-awˇ ya lehꞈ meh. Dzehˬ laˇ-euˬ shiˬ deuˬ aˬ yawꞈ yuˇ-awˇ, Sehˬ gʼawˆ gʼoˆ kʼehˬ-ahˇ jaˆ-eu miˬ dzaˬ dzah puiˆ-awˇ lawˇ-eu lawˇ duˬ-euˬ dawˬ pehˬ-ahˇ ya shehˆ meh.

⁸ Mawˇ neˇ kʼoeˇ mawˇ laꞈ kʼoeˇ kʼaˇ ahˇ-eu tsiˇ dawˬ tawˆ luꞈ aˬ yawꞈ ya yuˇ doˆ meh. Tsahˬ nahˬ uˇ jiˇ-ahˇ kʼaˇ dawꞈ-eu tsiˇ maˬ ehˇ,

⁹ gʼawˬ siˬ hawˇ-eu kʼoeˇ gaˇ dawꞈ-eu tsiˇ deuˬ maˬ ehˇ, muiˬ dui dui-eu shaˬ tsahˬ ui cuiˆ maˬ ehˇ, aˬ yawꞈ ya yuˇ doˆ meh.

¹⁰ Cawˬ cawˬ taꞈ-eu lawˇ-eu jeˬ gʼaˇ duˬ sehꞈ-euˬ jeˬ zaˬ-euˬ tsiˇ yuˇ-awˇ lawˇ ngeh loꞈ-ehˇ, mawˇ neˇ kʼoeˇ mawˇ-euˬ tsiˇ kʼoeˇ piˇ ma gʼaˬ yuˇ-awˇ, miˬ dzaˬ-ahˇ dzah puiˆ-awˇ lawˇ-eu jeˬ lawˇ-eu lawˇ duˬ k oeˇ taˆ puiˆ-awˇ ya lawˇ meh.

¹¹ Ehˇ kʼawꞈ, mawˇ neˇ kʼoeˇ mawˇ-euˬ baˆ kʼoˆ, shaˬ jiˇ, uˬ duˬ, aˬ kuiˇ aˬ laꞈ, tsahˬ nahˬ uˇ jiˇ hawˇ-eu baw uˇ baw ma dawˬ tawˆ luꞈ-ahˇ,

¹² Sehˬ gʼawˆ-euˬ laꞈ nyiˇ paw kʼaˬ lehˇ tawˆ dzeh-eu muiˬ-eu shawˇ-eu jawˇ duˬ-ahˇ aˬ yawꞈ yuˇ gʼeh-awˇ, miˬ dzaˬ ya dzah puiˆ meh.

¹³ Iˇsaˬleˬlaˆ tsawˇ haˬ aˇ maꞈ aˇ muˇ dawˬ tawˆ luꞈ, maˬ noeˬ maˬ duˇ-euˬ laꞈ kʼoeˇ, Sahˬpaˬ Miˬyehˇ-euˬ zahˇ dawˬ kʼoꞈ dawˬ tiˬ dawˬ na-ahˇ mˇ bahˬ-awˇ, iˬ baˇ doˆ laˇ naˇ,

¹⁴ iˬ baˇ ahˇ-eu gaˇ kawˆ siˬ laˇ-eu nehˬ-ehˇ tiˬ poˆ tehꞈ-ehˇ, mawˇ neˇ mawˇ gaw zaˬ tiˬ mawˇ aˬ yawꞈ maꞈ tsahˇ laꞈ-awˇ, iˬ baˇ tsiˬ shawˇ-eu lawˇ-eu jeˬ aˬ yawꞈ maꞈ ya lawˇ meh. Mawˇ neˇ mawˇ gaw zaˬ kʼoeˇ mawˇ-ahˇ, Sahˬpaˬ miˬyehˇ jawˇ-eu Sehˬ gʼawˆ mehˬ shi aˬ yawꞈ maꞈ ya tsahˇ keuˆ laꞈ meh.

¹⁵ Iˇsaˬleˬlaˆ tsawˇ haˬ aˇ maꞈ aˇ muˇ kʼoeˇ taˆ aˬ yuiꞈ aˬ tsu geuꞈ-eu deuˬ, mawˇ neˇ kʼoeˇ mawˇ-euˬ kʼoeˇ taˆ aˬ laꞈ baꞈ daˆ-awˇ, kʼoeˇ gaˇ ya sehꞈ meh.

¹⁶ Piˇ ma Yaw huiˬ gʼaˬ Sehˬ gʼawˆ laꞈ kʼoeˇ mawˇ neˇ kʼoeˇ mawˇ-euˬ shiˬ ui cuiˆ ya yuˇ ahˇ gʼeh meh.

¹⁷ Aˬ yawꞈ-euˬ laꞈ noeˇ shiˬ kʼoeˇ-euˬ laꞈ kʼoeˇ cawˬ duiˆ-awˇ, lawˆ kaˬ taw taˬ-euˬ saˬ paˇ mehˬ shi, shiꞈ poˆ keuˆ ni ya byaˆ shehˬ meh.

¹⁸ Sehˬ gʼawˆ laꞈ kʼoeˇ jaˆ-eu yaw saw jeˬ lawˇ-eu lawˇ duˬ-euˬ laꞈ coeˇ oeˬ coeˇ-ahˇ tsoꞈ-eu uˬ coeˇ deuˬ-ahˇ, shiˬ kʼoeˇ neh lehꞈ-awˇ, dzehˬ laˇ taˬ-euˬ shiˬ kʼoeˇ deuˬ aˬ yawꞈ yuˇ-awˇ, Sehˬ gʼawˆ gʼoˆ kʼehˬ-ahˇ jaˆ-eu miˬ dzaˬ dzah puiˆ-awˇ lawˇ-eu jeˬ lawˇ-eu lawˇ duˬ dawˬ pehˬ-ahˇ ya shehˆ meh.

¹⁹ Mawˇ neˇ kʼoeˇ mawˇ-euˬ tsiˇ dawˬ tawˆ luꞈ aˬ yawꞈ yuˇ-awˇ, lawˇ duˬ kʼoeˇ taˆ ya dzah puiˆ meh.

²⁰ Iˬ baˇ shawˇ-eu lawˇ-eu jeˬ lawˇ ngeh sehꞈ-awˇ lawˇ-euˬ mawˇ neˇ mawˇ gaw kʼoeˇ mawˇ-ahˇ aˬ yawꞈ lawˇ-euˬ loꞈ-ehˇ, heu mawˇ-ahˇ kʼawꞈ, kʼoeˇ loꞈ-ehˇ ya lawˇ meh. Kʼoeˇ loꞈ-ehˇ, Iˇsaˬleˬlaˆ tsawˇ haˬ deuˬ-euˬ iˬ baˇ gʼaˇ duˬ lawˇ-eu shehˇ-eu jeˬ aˬ yawꞈ maꞈ mˇ-awˇ, Iˇsaˬleˬlaˆ tsawˇ haˬ deuˬ iˬ baˇ ya buˬ-iˇ-eu meh.

²¹ Kʼoeˇ naˇ, aˬ yawꞈ-euˬ iˬ baˇ gʼaˇ duˬ lawˇ-euˬ mawˇ neˇ mawˇ gaw kʼoeˇ mawˇ-ahˇ dzah puiˆ-euˬ loꞈ-ehˇ, heu mawˇ-ahˇ kʼawꞈ, Sehˬ gʼawˆ laꞈ nyiˇ yuˇ doˆ-awˇ, ya dzah puiˆ meh. Heu-aˬ, Iˇsaˬleˬlaˆ tsawˇ haˬ aˇ maꞈ aˇ muˇ deuˬ-euˬ iˬ baˇ yuˇ dzeh-eu gʼaˇ duˬ lawˇ-eu jeˬ pyeuꞈ-eu meh.

²² Aˬ yuiꞈ aˬ tsu geuꞈ-awˇ uˆ lahˇ-eu tsawˇ haˬ tiˬ gʼaˬ na, maˬ noeˬ maˬ duˇ-euˬ laꞈ kʼoeˇ, Sahˬpaˬ Miˬyehˇ-euˬ zahˇ dawˬ kʼoꞈ dawˬ tiˬ dawˬ na-ahˇ mˇ bahˬ naˇ,

²³ aˬ yawꞈ iˬ baˇ ahˇ-eu gaˇ kawˆ yawˬ haˇ yawˬ ha siˬ leˇ-eu nehˬ-ehˇ tiˬ poˆ tehꞈ-ehˇ, aˬ yawꞈ-euˬ iˬ baˇ aˇ poeˬ lawˇ-eu gʼaˇ duˬ, maˇ byawꞈ maˬ baw-eu ciꞈ myehꞈ ciꞈ buˬ tiˬ mawˇ aˬ yawꞈ ya tsahˇ laꞈ meh.

²⁴ Ciꞈ myehꞈ kʼoeˇ mawˇ-euˬ uˬ duˬ kʼoeˇ taˆ aˬ yawꞈ aˬ laꞈ baꞈ daˆ-awˇ, miˬ dzaˬ dzah puiˆ-awˇ lawˇ-eu jeˬ zaˬ deuˬ-ahˇ sehꞈ-eu jawˇ duˬ pyeuꞈ-eu lawˇ duˬ laꞈ taˆ paw pyawˬ kʼoeˇ tsahˇ-ahˇ, ciꞈ myehꞈ kʼoeˇ mawˇ-ahˇ aˬ yawꞈ ya sehꞈ meh. Heu-aˬ, iˬ baˇ yuˇ dzeh-eu lawˇ-eu jeˬ pyeuꞈ-eu meh.

²⁵ Piˇ ma gʼaˬ, yawˬ ha-euˬ laꞈ noeˇ jeˬ zaˬ kʼoeˇ mawˇ-euˬ shiˬ laꞈ kʼoeˇ cawˬ duiˆ-awˇ, lawˇ duˬ-euˬ laꞈ coeˇ deuˬ-ahˇ tsoꞈ-eu uˬ coeˇ deuˬ-ahˇ ya lehꞈ meh. Dzehˬ laˇ-euˬ shiˬ deuˬ, lawˇ duˬ-euˬ dawˬ pehˬ-ahˇ aˬ yawꞈ ya shehˆ meh.

²⁶ Cawˬ cawˬ taꞈ-eu lawˇ-eu jeˬ lawˇ ngeh sehꞈ-euˬ jeˬ zaˬ-euˬ tsiˇ dzah puiˆ-euˬ loꞈ-ehˇ, ciꞈ myehꞈ kʼoeˇ mawˇ-euˬ tsiˇ yuˇ-awˇ, lawˇ duˬ kʼoeˇ taˆ aˬ yawꞈ ya dzah puiˆ meh. Kʼoeˇ loꞈ-ehˇ, piˇ ma iˬ baˇ aˇ poeˬ lawˇ-eu jeˬ lawˇ gʼaˬ ngeh, aˬ yuiꞈ geuꞈ-awˇ uˆ lahˇ-eu tsawˇ haˬ kʼoeˇ gʼaˬ iˬ baˇ ya buˬ-iˇ-eu meh.

²⁷ Miˇ kʼahˬ zaˬ tiˬ gʼaˬ na, maˬ noeˬ maˬ duˇ-euˬ laꞈ kʼoeˇ, Sahˬpaˬ Miˬyehˇ-euˬ zahˇ dawˬ kʼoꞈ dawˬ tiˬ dawˬ na-ahˇ mˇ bahˬ-awˇ iˬ baˇ jaˆ laˇ naˇ,

²⁸ aˬ yawꞈ iˬ baˇ mˇ gʼaˬ-euˬ gaˇ kawˆ aˬ yawˇ yawꞈ siˬ leˇ-euˬ nehˬ-ehˇ tiˬ poˆ tehꞈ-ehˇ, aˬ yawꞈ-euˬ iˬ baˇ aˇ poeˬ lawˇ-eu gʼaˇ duˬ, maˇ byawꞈ maˬ baw-eu ciꞈ myehꞈ ciꞈ ma tiˬ mawˇ ya tsahˇ laꞈ-eu meh.

²⁹ Ciꞈ myehꞈ kʼoeˇ mawˇ-euˬ uˬ duˬ kʼoeˇ taˆ aˬ yawꞈ aˬ laꞈ baꞈ daˆ-awˇ, lawˇ duˬ-eu laꞈ taˆ paw jaˆ-eu miˬ dzaˬ dzah puiˆ-awˇ lawˇ-eu jeˬ zaˬ deuˬ sehꞈ-eu jawˇ duˬ kʼoeˇ tsahˇ-ahˇ, ciꞈ myehꞈ kʼoeˇ mawˇ-ahˇ aˬ yawꞈ ya sehꞈ meh.

³⁰ Piˇ ma gʼaˬ, aˬ yawꞈ-euˬ laꞈ noeˇ jeˬ zaˬ kʼoeˇ mawˇ-euˬ shiˬ laꞈ kʼoeˇ cawˬ duiˆ-awˇ, lawˇ duˬ-euˬ laꞈ coeˇ deuˬ-ahˇ tsoꞈ-eu uˬ coeˇ deuˬ-ahˇ ya lehꞈ meh. Dzehˬ laˇ-euˬ shiˬ deuˬ, lawˇ duˬ dawˬ pehˬ-ahˇ aˬ yawꞈ ya shehˆ meh.

³¹ Kʼoeˇ naˇ, cawˬ cawˬ taꞈ-eu lawˇ-eu jeˬ lawˇ ngeh sehꞈ-euˬ jeˬ zaˬ-euˬ tsiˇ deuˬ yuˇ doˆ-euˬ loꞈ-ehˇ, ciꞈ myehꞈ kʼoeˇ mawˇ-euˬ tsiˇ dawˬ tawˆ luꞈ aˬ yawꞈ yuˇ doˆ-awˇ, lawˇ-euˬ yaw saꞈ-ahˇ Sahˬpaˬ Miˬyehˇ nui ma tsaˬ ni, ciꞈ myehꞈ kʼoeˇ mawˇ-ahˇ, lawˇ duˬ kʼoeˇ taˆ dzah puiˆ-awˇ ya lawˇ meh. Kʼoeˇ loꞈ-ehˇ, piˇ ma gʼaˬ tsawˇ haˬ kʼoeˇ gʼaˬ-euˬ iˬ baˇ gʼaˇ duˬ lawˇ-eu shehˇ-eu jeˬ mˇ-awˇ, tsawˇ haˬ kʼoeˇ gʼaˬ iˬ baˇ ya buˬ-iˇ-eu meh.

³² Tsawˇ haˬ tiˬ gʼaˬ, iˬ baˇ tsiˬ shawˇ-eu lawˇ-eu jeˬ lawˇ-eu gʼaˇ duˬ yawˇ tsahˇ laꞈ ngeh, maˇ byawꞈ maˬ baw-eu yawˇ aˬ ma tiˬ mawˇ ya tsahˇ laꞈ meh.

³³ Yawˇ kʼoeˇ mawˇ-euˬ uˬ duˬ kʼoeˇ taˆ aˬ yawꞈ aˬ laꞈ baꞈ daˆ-awˇ, miˬ dzaˬ-ahˇ dzah puiˆ-awˇ lawˇ-eu jeˬ zaˬ deuˬ sehꞈ-eu jawˇ duˬ pyeuꞈ-eu, lawˇ duˬ-euˬ laꞈ taˆ paw pyawˬ-ahˇ jaˆ-eu jawˇ duˬ kʼoeˇ tsahˇ-ahˇ, yawˇ kʼoeˇ mawˇ-ahˇ aˬ yawꞈ ya sehꞈ meh.

³⁴ Piˇ ma gʼaˬ, aˬ yawꞈ-euˬ laꞈ noeˇ jeˬ zaˬ kʼoeˇ mawˇ-euˬ shiˬ-ahˇ cawˬ duiˆ-awˇ, lawˇ duˬ-euˬ laꞈ coeˇ deuˬ-ahˇ tsoꞈ-eu uˬ coeˇ deuˬ-ahˇ ya lehꞈ meh. Dzehˬ laˇ-euˬ shiˬ deuˬ lawˇ duˬ dawˬ pehˬ-ahˇ aˬ yawꞈ ya shehˆ meh.

³⁵ Kʼoeˇ naˇ, cawˬ cawˬ taꞈ-eu lawˇ-eu jeˬ lawˇ ngeh sehꞈ-euˬ yawˇ-euˬ tsiˇ deuˬ yuˇ doˆ-eu loꞈ-ehˇ, yawˇ kʼoeˇ mawˇ-euˬ tsiˇ dawˬ tawˆ luꞈ aˬ yawꞈ yuˇ doˆ-awˇ, Sahˬpaˬ Miˬyehˇ-ahˇ lawˇ nehˬ-eu dzaˬ dzaˬ dawˇ dawˇ lawˇ-eu jeˬ nehˬ-ehˇ tiˬ kawˆ loꞈ-ehˇ, lawˇ duˬ kʼoeˇ taˆ dzah puiˆ-awˇ ya lawˇ meh. Kʼoeˇ loꞈ-ehˇ, piˇ ma gʼaˬ tsawˇ haˬ kʼoeˇ gʼaˬ-euˬ iˬ baˇ gʼaˇ duˬ lawˇ-eu shehˇ-eu jeˬ mˇ-awˇ, tsawˇ haˬ kʼoeˇ gʼaˬ iˬ baˇ ya buˬ-iˇ-eu meh.