Uˬ duˬ 3 - Akha

Cawˬ cawˬ taꞈ-eu lawˇ-eu jeˬ

¹ Tsawˇ haˬ tiˬ gʼaˬ na, cawˬ cawˬ taꞈ-eu lawˇ-eu jeˬ gʼaˇ duˬ mawˇ neˇ lawˇ mawꞈ naˇ, maˇ byawꞈ maˬ baw-eu mawˇ gaw maˬ ngeuˇ naˇ, maˇ byawꞈ maˬ baw-eu mawˇ ma ya lawˇ meh.

² Mawˇ neˇ kʼoeˇ mawˇ-euˬ uˬ duˬ-ahˇ tsawˇ haˬ kʼoeˇ gʼaˬ aˬ laꞈ baꞈ daˆ-awˇ, Sahˬpaˬ Miˬyehˇ jawˇ-eu Sehˬ gʼawˆ gʼoˆ kʼehˬ-ahˇ, mawˇ neˇ kʼoeˇ mawˇ ya sehꞈ meh. Aˬloˬ-euˬ aˬ li piˇ ma deuˬ mawˇ neˇ kʼoeˇ mawˇ-euˬ shiˬ yuˇ-awˇ, lawˇ duˬ-euˬ oeˬ paw pyawˬ luꞈ-ahˇ ya byaˆ meh.

³ Kʼoeˇ naˇ, Sahˬpaˬ Miˬyehˇ-ahˇ dzaˬ dzaˬ dawˇ dawˇ lawˇ-eu jeˬ lawˇ-eu gʼaˇ duˬ, mawˇ neˇ kʼoeˇ mawˇ-euˬ tsahˬ nahˬ uˇ jiˇ deuˬ-ahˇ kʼaˇ dawꞈ-eu tsiˇ maˬ ehˇ,

⁴ gʼawˬ siˬ hawˇ-eu kʼoeˇ gaˇ dawꞈ-eu tsiˇ maˬ ehˇ, muiˬ dui dui-eu shaˬ tsahˬ ui cuiˆ maˬ ehˇ, ya lawˇ meh.

⁵ Heu deuˬ-ahˇ piˇ ma yuˇ-awˇ, miˬ dzaˬ-ahˇ dzah puiˆ-awˇ lawˇ-eu jeˬ nehˬ-ehˇ ya lawˇ keuˬ meh. Heu loꞈ-ehˇ lawˇ-euˬ dzaˬ dzaˬ dawˇ dawˇ lawˇ-eu yaw saꞈ-ahˇ, Sahˬpaˬ Miˬyehˇ nui ma tsaˬ-eu meh.

⁶ Cawˬ cawˬ taꞈ-eu lawˇ-eu jeˬ gʼaˇ duˬ, yawˇ maˬ ehˇ, ciꞈ myehꞈ maˬ ehˇ, lawˇ naˇ, aˬ buˬ kʼawꞈ muiˬ, aˬ ma kʼawꞈ muiˬ, geuꞈ nya meh. Ehˇ kʼawꞈ, maˇ byawꞈ maˬ ya bi baw-a.

⁷ Tsawˇ haˬ tiˬ gʼaˬ yawˇ lawˇ nehˬ naˇ,

⁸ yawˇ kʼoeˇ mawˇ-euˬ uˬ duˬ-ahˇ aˬ yawꞈ-euˬ aˬ laꞈ baꞈ daˆ-awˇ, sehˬ gʼawˆ-euˬ mehˬ shi yawˇ kʼoeˇ mawˇ-ahˇ ya sehꞈ meh. Piˇ ma deuˬ yawˇ kʼoeˇ mawˇ-euˬ shiˬ yuˇ-awˇ, lawˇ duˬ oeˬ paw pyawˬ luꞈ-ahˇ ya byaˆ meh.

⁹ Kʼoeˇ naˇ, Sahˬpaˬ Miˬyehˇ-ahˇ dzaˬ dzaˬ dawˇ dawˇ lawˇ-eu jeˬ lawˇ nehˬ-eu gʼaˇ duˬ, yawˇ kʼoeˇ mawˇ-euˬ tsiˇ deuˬ maˬ ehˇ, tsahˬ nahˬ uˇ jiˇ-ahˇ kʼaˇ dawꞈ-eu tsiˇ deuˬ maˬ ehˇ,

¹⁰ gʼawˬ siˬ hawˇ-eu kʼoeˇ gaˇ dawꞈ-eu tsiˇ deuˬ maˬ ehˇ, muiˬ dui dui-eu shaˬ tsahˬ ui cuiˆ maˬ ehˇ, ya lawˇ meh.

¹¹ Aˬ yuiꞈ geuꞈ-awˇ gaˇ mˇ luꞈ-eu piˇ ma gʼaˬ, heu deuˬ dawˬ tawˆ luꞈ-ahˇ lawˇ duˬ kʼoeˇ taˆ dzah puiˆ-awˇ, dzaˬ dzaˬ dawˇ dawˇ lawˇ-eu jeˬ Sahˬpaˬ Miˬyehˇ-ahˇ ya lawˇ meh.

¹² Tsawˇ haˬ tiˬ gʼaˬ ciꞈ myehꞈ lawˇ naˇ,

¹³ ciꞈ myehꞈ kʼoeˇ mawˇ-euˬ uˬ duˬ-ahˇ aˬ yawꞈ-euˬ aˬ laꞈ baꞈ daˆ-awˇ, Sahˬpaˬ Miˬyehˇ jawˇ-eu Sehˬ gʼawˆ-euˬ mehˬ shi ciꞈ myehꞈ kʼoeˇ mawˇ ya sehꞈ meh. Piˇ ma deuˬ ciꞈ myehꞈ kʼoeˇ mawˇ-euˬ shiˬ yuˇ-awˇ, lawˇ duˬ-euˬ oeˬ pyawˬ luꞈ-ahˇ ya byaˆ meh.

¹⁴ Kʼoeˇ naˇ, Sahˬpaˬ Miˬyehˇ-ahˇ dzaˬ dzaˬ dawˇ dawˇ lawˇ-eu jeˬ lawˇ nehˬ-eu gʼaˇ duˬ, tsahˬ nahˬ uˇ jiˇ-ahˇ kʼaˇ dawꞈ-eu tsiˇ deuˬ maˬ ehˇ,

¹⁵ gʼawˬ siˬ hawˇ-eu kʼoeˇ gaˇ dawꞈ-eu tsiˇ deuˬ maˬ ehˇ, muiˬ dui dui-eu shaˬ tsahˬ ui cuiˆ maˬ ehˇ, ya lawˇ meh.

¹⁶ Sahˬpaˬ Miˬyehˇ nui ma tsaˬ-eu dzaˬ dzaˬ dawˇ dawˇ lawˇ-eu jeˬ lawˇ nehˬ-eu gʼaˇ duˬ, heu deuˬ dawˬ tawˆ luꞈ-ahˇ piˇ ma gʼaˬ yuˇ-awˇ, lawˇ duˬ kʼoeˇ taˆ dzah puiˆ-awˇ ya lawˇ meh. Shaˬ tsuˇ dawˬ tawˆ luꞈ, Sahˬpaˬ Miˬyehˇ-euˬ pyeuꞈ-eu meh.

¹⁷ Iˇsaˬleˬlaˆ tsawˇ haˬ tiˬ gʼaˬ-iˬ, shaˬ tsuˇ hawˇ-eu shiˬ maˬ ya dzaˬ-a. Iˇsaˬleˬlaˆ tsawˇ haˬ deuˬ aˬ geu gaˇ jawˇ keuˆ-euˬ maˬ kaˬ, zahˇ sahˇ kʼoꞈ heu hmˬ-ahˇ, mˬ maˬ maˬ byaˆ zaˇ ziˇ ya caw teh meh.