Uˬ duˬ 27 - Akha

Sahˬpaˬ Miˬyehˇ-ahˇ damˬ nehˬ-eu jeˬ-ahˇ taꞈ leˇ-eu zahˇ sahˇ kʼoꞈ

¹ Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh.

² Iˇsaˬleˬlaˆ tsawˇ haˬ deuˬ-ahˇ heu loꞈ-ehˇ ehˇ nehˬ-awˬ. Tsawˇ haˬ tiˬ gʼaˬ na, saˇ jaˇ tiˬ jeˬ paˬ mˇ-eu laꞈ kʼoeˇ, Sahˬpaˬ Miˬyehˇ-ahˇ tsawˇ haˬ damˬ nehˬ mawꞈ naˇ, tsawˇ haˬ-euˬ aˇ poeˬ pyuˇ sawˇ doˆ-awˇ damˬ ngeh, heu loꞈ-ehˇ ya sawˇ meh.

³ Nyiˬ tseˇ kʼoꞈ-ahˇ neh koꞈ tseˇ kʼoꞈ yaw kaˬ-ahˇ jawˇ luꞈ-eu kʼaˬ dzeˇ zaˬ-euˬ aˇ poeˬ-aˬ, uˬ duˬ tahˬ nymˇ-ahˇ zmˬ-eu pyuˇ maˇ byaˆ ngaˬ tseˇ byaˆ meh.

⁴ Zaˬ miˬ zaˬ ngeuˇ naˇ, smˬ tseˇ byaˆ meh.

⁵ Ngaˬ kʼoꞈ-ahˇ neh nyiˬ tseˇ kʼoꞈ yaw kaˬ-ahˇ jawˇ-eu kʼaˬ dzeˇ zaˬ tiˬ gʼaˬ-euˬ aˇ poeˬ, nyiˬ tseˇ byaˆ meh. Zaˬ miˬ zaˬ ngeuˇ naˇ, tseˇ byaˆ meh.

⁶ Ba la tiˬ siˬ hawˇ-eu ngaˬ kʼoꞈ yaw kaˬ-ahˇ jawˇ-eu aˬ li tiˬ li-euˬ aˇ poeˬ ngaˬ byaˆ pyeuꞈ-awˇ, aˬ buˇ tiˬ buˇ-euˬ aˇ poeˬ smˬ byaˆ meh.

⁷ Koꞈ tseˇ kʼoꞈ dzehˬ-iˇ-euˬ kʼaˬ dzeˇ zaˬ aˇ poeˬ pyuˇ maˇ byaˆ tseˇ ngaˬ byaˆ pyeuꞈ-awˇ, zaˬ miˬ zaˬ aˇ poeˬ tseˇ byaˆ meh.

⁸ Saˇ jaˇ dzaˬ-eu laꞈ kʼoeˇ, tsawˇ haˬ damˬ nehˬ mawꞈ-eu tsawˇ haˬ tiˬ gʼaˬ na, aˇ dzehˬ-ehˇ shaˬ-eu miˇ neh, aˬ cawˬ neh daˇ tsehˆ taˬ-euˬ aˇ poeˬ maˬ biꞈ keuˆ nya naˇ, aˬ yawꞈ damˬ nehˬ mawꞈ-eu tsawˇ haˬ-ahˇ, piˇ ma jawˇ gaˇ sheuˬ gʼeh-awˇ, piˇ ma gʼaˬ tsawˇ haˬ kʼoeˇ gʼaˬ biꞈ tsehˆ coeˇ ni shaˇ noeˬ-awˇ, aˇ poeˬ yaw yaˇ yaˇ-ehˇ ya daˇ nehˬ meh.

⁹ Saˇ jaˇ dzaˬ-eu laꞈ kʼoeˇ, Sahˬpaˬ Miˬyehˇ-ahˇ lawˇ-eu shehˇ-eu jeˬ mˇ gaˇ geuꞈ nya-eu jeˬ zaˬ tiˬ mawˇ na biꞈ mawꞈ naˇ, Sahˬpaˬ Miˬyehˇ-ahˇ kʼaˇ biꞈ-euˬ jeˬ zaˬ-aˬ, jeˬ shawˇ meh.

¹⁰ Saˇ jaˇ dzaˬ-eu tsawˇ haˬ kʼoeˇ gʼaˬ, jeˬ zaˬ kʼoeˇ mawˇ-euˬ dah zaˇ, yawˬ mawˇ yawˬ maˬ ya biꞈ paˇ-a. Kʼoeˇ loꞈ-ehˇ jahˇ naˇ, jeˬ zaˬ kʼoeˇ nyiˬ mawˇ luꞈ, Sahˬpaˬ Miˬyehˇ-euˬ jeˬ zaˬ pyeuꞈ-iˇ-eu meh.

¹¹ Ehˇ kʼawꞈ, saˇ jaˇ dzaˬ-eu laꞈ kʼoeˇ, Sahˬpaˬ Miˬyehˇ-ahˇ lawˇ-eu shehˇ-eu jeˬ mˇ gaˇ maˬ geuꞈ nya-eu maˬ shawˇ-eu jeˬ zaˬ biꞈ mawꞈ naˇ, biꞈ-euˬ tsawˇ haˬ kʼoeˇ gʼaˬ, piˇ ma jawˇ gaˇ jeˬ zaˬ kʼoeˇ mawˇ ya tsahˇ gʼeh meh.

¹² Piˇ ma gʼaˬ, jeˬ zaˬ kʼoeˇ mawˇ muiˬ-eu maˬ muiˬ-eu haw-awˇ, aˇ poeˬ ya daˇ tsehˆ nehˬ meh. Jeˬ zaˬ kʼoeˇ mawˇ-euˬ aˇ poeˬ-aˬ, piˇ ma neh pyehˆ tsehˆ taˬ-euˬ loꞈ-ehˇ ya bi jaˆ meh.

¹³ Yaw sahˇ gʼaˬ jeˬ zaˬ kʼoeˇ mawˇ paˇ zeuˇ kʼoꞈ geuꞈ mawꞈ naˇ, jeˬ zaˬ kʼoeˇ mawˇ-euˬ aˇ poeˬ uˬ taꞈ, ngaˬ bymˇ tiˬ bymˇ paˇ ya biꞈ dzehˬ meh.

¹⁴ Tsawˇ haˬ tiˬ gʼaˬ na, yawˬ ha-euˬ nymˇ Sahˬpaˬ Miˬyehˇ-ahˇ damˬ nehˬ naˇ, piˇ ma gʼaˬ nymˇ kʼoeˇ nymˇ muiˬ-eu maˬ muiˬ-eu haw-awˇ, aˇ poeˬ ya daˇ tsehˆ nehˬ meh. Nymˇ kʼoeˇ nymˇ-euˬ aˇ poeˬ-aˬ, piˇ ma neh daˇ tsehˆ taˬ-euˬ loꞈ-ehˇ ya bi jaˆ meh.

¹⁵ Nymˇ damˬ nehˬ-euˬ yaw sahˇ kʼoeˇ gʼaˬ, yawˬ ha-euˬ nymˇ paˇ zeuˇ kʼoꞈ mawꞈ naˇ, nymˇ aˇ poeˬ uˬ taꞈ, ngaˬ bymˇ tiˬ bymˇ paˇ ya biꞈ dzehˬ meh.

¹⁶ Tsawˇ haˬ tiˬ gʼaˬ yawˬ ha-euˬ miˇ tsaˬ tiˬ tsahˇ na Sahˬpaˬ Miˬyehˇ-ahˇ damˬ nehˬ naˇ, miˇ tsaˬ kʼoeˇ tsahˇ-ahˇ jiˇ leˇ-eu cehˇ siˬ yoeˬ-ahˇ haw-awˇ, aˇ poeˬ ya pyehˆ meh. Siˬ yoeˬ nyiˬ tseˇ pehˬ jiˇ leˇ naˇ, pyuˇ maˇ byaˆ tseˇ byaˆ meh.

¹⁷ Juˬbiˬliˬ Aˇ kʼoꞈ jiˇ-eu nehˬ-ehˇ tiˬ poˆ tehꞈ-ehˇ damˬ nehˬ naˇ, aˇ poeˬ tiˬ byah ni ya biꞈ byah meh.

¹⁸ Ehˇ kʼawꞈ, Juˬbiˬliˬ Aˇ kʼoꞈ dzeuˇ-iˇ gʼaˬ-awˇ, aˇ kʼoꞈ myahˇ laˇ ngeh hawˇ-eu damˬ naˇ, Juˬbiˬliˬ Aˇ kʼoꞈ paˇ keuˆ le-eu aˇ kʼoꞈ aˇ myaˆ kʼoꞈ dzeˇ-eu nga lehˇ, piˇ ma gʼaˬ sawˇ doˆ-awˇ, aˇ poeˬ ya sawˇ teˬ nehˬ meh.

¹⁹ Miˇ tsaˬ yaw sahˇ gʼaˬ yawˬ ha-euˬ miˇ tsaˬ paˇ zeuˇ kʼoꞈ geuꞈ mawꞈ naˇ, miˇ tsaˬ aˇ poeˬ uˬ taꞈ, ngaˬ bymˇ tiˬ bymˇ paˇ ya biꞈ dzehˬ meh.

²⁰ Sahˬpaˬ Miˬyehˇ-euˬ laꞈ-ahˇ neh, miˇ tsaˬ kʼoeˇ tsahˇ aˬ yawꞈ maˬ zeuˇ kʼoꞈ geuꞈ mi naˆ-ehˇ, aˬ cawˬ-ahˇ paˇ ahˬ dzaˬ naˇ, miˇ tsaˬ kʼoeˇ tsahˇ aˬ yawꞈ zeuˇ kʼoꞈ geuꞈ nya-eu zahˇ maˬ paˇ jaˆ meh.

²¹ Juˬbiˬliˬ Aˇ kʼoꞈ paˇ keuˆ le ngeh, miˇ tsaˬ kʼoeˇ tsahˇ Sahˬpaˬ Miˬyehˇ-euˬ miˇ tsaˬ pyeuꞈ tsehˆ-euˬ meh. Miˇ tsaˬ kʼoeˇ piˇ ma deuˬ-euˬ laꞈ-ahˇ ahˇ leˇ-eu meh.

²² Tsawˇ haˬ tiˬ gʼaˬ na, yawˬ ha neh zeuˇ-euˬ miˇ tsaˬ Sahˬpaˬ Miˬyehˇ-ahˇ damˬ nehˬ naˇ,

²³ Juˬbiˬliˬ Aˇ kʼoꞈ keuˆ le-eu gʼaˇ duˬ dzeˇ-eu aˇ kʼoꞈ deuˬ-ahˇ piˇ ma gʼaˬ sawˇ doˆ-awˇ, aˇ poeˬ ya daˇ tsehˆ nehˬ meh. Kʼoeˇ ngeh nah, aˬ yawꞈ aˇ poeˬ ya biꞈ tsehˆ-awˇ, pyuˇ kʼoeˇ Sahˬpaˬ Miˬyehˇ-euˬ pyeuꞈ-iˇ-eu meh.

²⁴ Juˬbiˬliˬ Aˇ kʼoꞈ keuˆ le ngeh, miˇ tsaˬ kʼoeˇ tsahˇ-ahˇ, yaw sahˇ gʼaˬ-ahˇ maˬ ngeuˇ naˇ, yaw sahˇ gʼaˬ-euˬ zaˬ deuˬ-ahˇ ya biꞈ kʼoꞈ meh.

²⁵ Aˇ poeˬ kʼaˇ daˇ tsehˆ-euˬ dawˬ tawˆ luꞈ, kaˇ daˬ-ahˇ ya bi tsaˬ meh.

²⁶ Dehꞈ beh beh le-euˬ jeˬ zaˬ-aˬ, Sahˬpaˬ Miˬyehˇ-euˬ pyeuꞈ-eu miˇ neh, tsawˇ haˬ tiˬ gʼaˬ-iˬ dehꞈ beh beh le-euˬ jeˬ zaˬ yuˇ-awˇ, nui ma keuˆ-eu lawˇ-eu jeˬ loꞈ-ehˇ aˬ yawꞈ-ahˇ maˬ ya lawˇ nehˬ-a. Dehꞈ beh beh le-euˬ mawˇ neˇ mawˇ zaˬ, yawˇ zaˬ, ciꞈ myehꞈ ciꞈ zaˬ, heu deuˬ-aˬ, Sahˬpaˬ Miˬyehˇ-euˬ pyeuꞈ-eu meh.

²⁷ Ehˇ kʼawꞈ, dehꞈ beh beh le-euˬ maˬ shawˇ-eu jeˬ zaˬ deuˬ-ahˇ, kʼaˇ poeˬ kʼaˇ lawˬ-euˬ uˬ taꞈ-ehˇ, ngaˬ bymˇ tiˬ bymˇ biꞈ dzehˬ-awˇ zeuˇ kʼoꞈ geuꞈ nya meh. Maˬ zeuˇ kʼoꞈ geuꞈ naˇ, kʼaˇ poeˬ kʼaˇ lawˬ-eu loꞈ-ehˇ aˬ cawˬ-ahˇ ya ahˬ nehˬ meh.

²⁸ Yawˬ ha neh Sahˬpaˬ Miˬyehˇ-ahˇ damˬ tsehˆ-euˬ tsawˇ haˬ maˬ ehˇ, jeˬ zaˬ maˬ ehˇ, miˇ tsaˬ maˬ ehˇ, tsawˇ haˬ tiˬ gʼaˬ-iˬ ahˬ taꞈ zeuˇ taꞈ-eu jeˬ maˬ ya mˇ-a. Kʼoeˇ-aˬ, Sahˬpaˬ Miˬyehˇ-euˬ pyeuꞈ tsehˆ-euˬ meh.

²⁹ Tsawˇ haˬ zaˬ kʼawꞈ, Sahˬpaˬ Miˬyehˇ-ahˇ damˬ tsehˆ nehˬ gʼaˬ-euˬ ngeuˇ naˇ, maˬ zeuˇ kʼoꞈ geuꞈ ni ya sehꞈ dzeh meh.

³⁰ Dzaˬ la gʼo cehˇ maˬ ehˇ, aˇ siˬ aˇ lu maˬ ehˇ, miˇ tsaˬ-ahˇ kʼaˇ mˇ za-euˬ jeˬ dawˬ tawˆ luꞈ laꞈ kʼoeˇ, tseˇ bymˇ tiˬ bymˇ Sahˬpaˬ Miˬyehˇ-euˬ pyeuꞈ-eu meh.

³¹ Tsawˇ haˬ tiˬ gʼaˬ na, tseˇ bymˇ tiˬ bymˇ zeuˇ kʼoꞈ geuꞈ mawꞈ naˇ, kʼaˇ poeˬ kʼaˇ lawˬ-eu uˬ taꞈ ngaˬ bymˇ tiˬ bymˇ biꞈ dzehˬ-awˇ ya zeuˇ kʼoꞈ geuꞈ meh.

³² Cu taˬ-euˬ jeˬ zaˬ tseˇ mawˇ tiˬ mawˇ Sahˬpaˬ Miˬyehˇ-euˬ pyeuꞈ-eu meh. Jeˬ zaˬ gui ngeh, tseˇ mawˇ gui byah-euˬ mawˇ, Sahˬpaˬ Miˬyehˇ-euˬ pyeuꞈ-eu meh.

³³ Jeˬ zaˬ yaw doeˇ deuˬ-ahˇ zaˬ leˇ ni, yaw sahˇ gʼaˬ jeˬ zaˬ teh yehꞈ-awˇ maˬ ya gui-a. Gui gʼaˬ-euˬ jeˬ zaˬ-ahˇ, gui poˆ maˬ ya poˆ-a. Jeˬ zaˬ tiˬ mawˇ-ahˇ, yawˬ mawˇ yawˬ neh paˇ kʼoꞈ geuꞈ naˇ, nyiˬ mawˇ luꞈ Sahˬpaˬ Miˬyehˇ-euˬ jeˬ zaˬ pyeuꞈ-iˇ-awˇ, maˬ zeuˇ kʼoꞈ geuꞈ kʼmˬ-a.

³⁴ Heu deuˬ-a, Iˇsaˬleˬlaˆ tsawˇ haˬ deuˬ gʼaˇ duˬ, Siˇnaˆ gawˬ jawˬ kʼoeˇ taˆ Moˇseˬ-ahˇ Sahˬpaˬ Miˬyehˇ biꞈ nehˬ-euˬ zahˇ dawˬ kʼoꞈ dawˬ deuˬ pyeuꞈ-eu meh.