Uˬ duˬ 19 - Akha

Yaw muiˬ yaw shawˇ hawˇ-eu yaw tsaˬ yaw dawˇ jeˬ-ahˇ taꞈ-eu zahˇ dawˬ kʼoꞈ dawˬ deuˬ

¹ Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh.

² “Iˇsaˬleˬlaˆ tsawˇ haˬ deuˬ-ahˇ heu loꞈ-ehˇ ehˇ nehˬ-awˬ. Naw maꞈ yaw muiˬ yaw shawˇ shawˇ-ehˇ dehꞈ-awˬ. Aˬ jeˬ miˇ neh ehˇ naˇ, naw maꞈ-euˬ Miˬyehˇ, Sahˬpaˬ Miˬyehˇ pyeuꞈ-eu ngaˇ-aˬ, yaw muiˬ yaw shawˇ ma.

³ Ngaˬ neh dawˬ biꞈ taˬ-euˬ loꞈ-ehˇ, naw maꞈ yawˬ gʼaˬ na luꞈ, yawˬ ha-euˬ aˬ ma aˬ da-ahˇ yaw zeu baw-awˇ, jawˇ nah-ahˇ lah daw-awˬ. Ngaˇ-aˬ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ ma.

⁴ “Ngaˬ-ahˇ byehˇ dzeh-awˇ, tahˬ pahˬ aˬ ma mawˇ kawˇ deuˬ-ahˇ naw maꞈ uˬ duˬ taˬ tahˬ. Shmˇ, shuiˇ, pyuˇ, kʼoeˇ loꞈ-ehˇ gʼeh-eu deuˬ neh miˬ yehˇ mawˇ kawˇ tehˆ-awˇ, uˬ duˬ taˬ tahˬ. Ngaˇ-aˬ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ ma.

⁵ “Cawˬ cawˬ taꞈ-eu lawˇ-eu jeˬ lawˇ-eu gʼaˇ duˬ, naw maꞈ jeˬ zaˬ sehꞈ ngeh, ngaˬ neh biꞈ taˬ-euˬ zahˇ sahˇ kʼoꞈ-ahˇ tsaˬ ni mˇ-awˬ. Kʼoeˇ loꞈ-ehˇ jahˇ naˇ, naw maꞈ neh lawˇ-euˬ jeˬ-ahˇ ngaˇ ha geuꞈ ma.

⁶ Jeˬ zaˬ kʼoeˇ mawˇ sehꞈ ngeh nah maˬ ngeuˇ naˇ, yawˬ nah yawˬ laꞈ kʼoeˇ, jeˬ zaˬ kʼoeˇ mawˇ-euˬ shaˬ jiˇ deuˬ ya dzaˬ jiˇ meh. Smˬ nah jaˆ keuˆ-euˬ shaˬ jiˇ deuˬ ya keuˬ dzeh jiˇ meh.

⁷ Aˬ jeˬ miˇ neh ehˇ naˇ, shaˬ jiˇ kʼoeˇ-aˬ, maˬ shawˇ-eu shaˬ jiˇ pyeuꞈ-iˇ-euˬ meh. Tsawˇ haˬ tiˬ gʼaˬ na shaˬ jiˇ kʼoeˇ dzaˬ naˇ, lawˇ-eu jeˬ-ahˇ ngaˇ maˬ paˇ ha geuꞈ nya meh.

⁸ Shaˬ jiˇ kʼoeˇ dzaˬ-eu tsawˇ haˬ iˬ baˇ ahˇ-eu meh. Aˬ jeˬ miˇ neh ehˇ naˇ, ngaˬ-ahˇ damˬ gʼaˬ-eu yaw muiˬ yaw shawˇ jeˬ-ahˇ, maˬ muiˬ maˬ shawˇ-eu jeˬ loꞈ-ehˇ sawˇ-awˇ dzaˬ-euˬ meh. Tsawˇ haˬ kʼoeˇ gʼaˬ-ahˇ, ngaˬ-euˬ tsawˇ haˬ lehˇ maˬ paˇ sawˇ nehˬ nya meh.

⁹ “Naw maꞈ yawˬ ha-euˬ cehˇ yehˬ cehˇ diˬ luiˆ ngeh, deh yaˇ deh dzeˇ paw dehꞈ-eu cehˇ maˬ ya yehˬ-a. Yehˬ tehˬ yaꞈ-euˬ cehˇ nmˇ deuˬ, maˬ ya pyehˆ poˆ-a.

¹⁰ Yawˬ ha-euˬ aˬ gaꞈ yaˇ kmˇ-ahˇ paˇ gʼoꞈ poˆ-iˇ-awˇ, pyaˆ tehˬ yaꞈ-euˬ aˬ gaꞈ aˇ siˬ deuˬ maˬ ya pyaˆ-a. Ga ka yaꞈ-euˬ aˬ gaꞈ aˇ siˬ deuˬ kʼawꞈ, maˬ ya gʼoˆ kʼoꞈ geuꞈ-a. Yaw shaˬ zaˬ deuˬ hawˇ-eu, boeˇ miˬ shiˬ kʼaˬ deuˬ gʼaˇ duˬ, kʼoeˇ loꞈ-ehˇ ya bi jaˆ yaꞈ meh. Ngaˇ-aˬ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ ma.

¹¹ “Smˇ kʼoeˬ taˬ kʼoeˬ. Tsawˇ gahˇ taˬ gahˇ. Jaˬ myawꞈ taˬ myawꞈ.

¹² Saˇ jaˇ ziꞈ ma lehˇ naw maꞈ maˬ noeˬ tsehˆ-euˬ gaˇ, ngaˬ-euˬ tsawˇ myahˇ uˬ moˆ saˇ jaˇ taˬ dzaˬ. Ngaˇ-aˬ naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ ma.

¹³ “Aˬ cawˬ kʼoeˇ taˆ mehˇ shuiˇ taˬ shuiˇ dzaˬ. Tahˇ joe taˬ joe dzaˬ. Yawˬ ha-ahˇ gʼaˬ mahˇ mahˇ dzaˬ-eu tsawˇ haˬ-ahˇ gʼaˬ gaˇ aˇ poeˬ maˬ biꞈ ni, tiˬ miˇ tehꞈ-ehˇ kʼawꞈ taˬ bi dzeuˇ-iˇ.

¹⁴ Naˬ bawˬ-ahˇ yaˬ kʼehˇ taˬ yaˬ. Myaˆ behꞈ-ahˇ sahˬ tiꞈ taˬ kʼmˇ. Ngaˬ-ahˇ guˆ-awˬ. Ngaˇ-aˬ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ ma.

¹⁵ “Naw maꞈ yaˇ kʼaˬ daˇ ngeh, yaw sui yaw dawˇ laꞈ kʼoeˇ, yaw tsaˬ yaw dawˇ dawˇ-ehˇ daˇ-awˬ. Yaw shaˬ zaˬ paw gʼaˬ baꞈ baꞈ-eu maˬ ehˇ, smˇ muiˬ smˇ baw-ahˇ guˆ-eu maˬ ehˇ, taˬ bi pyeuꞈ.

¹⁶ Aˬ cawˬ gaˇ kawˆ jaˬ myawꞈ myawꞈ-eu laꞈ kʼoeˇ taˬ ja bu. Tsawˇ haˬ tiˬ gʼaˬ na, tsawˇ shiˇ uˬ kʼawˇ-ahˇ deuˬ ni yaˇ kʼaˬ daˇ nehˬ-eu jeˬ-ahˇ ya daˬ paˬ-ehˇ keuˆ laˇ ngeh, aˬ yawꞈ-ahˇ caw ba nya-eu saˇ kiˇ saˇ seˬ jaˆ naˇ, ngehˬ doˆ tmˇ doˆ nehˬ-awˬ. Ngaˇ-aˬ, Sahˬpaˬ Miˬyehˇ ma.

¹⁷ “Aˬ cawˬ kʼoeˇ taˆ nui ma taˬ laˆ jaˆ. Ehˇ kʼawꞈ, aˬ cawˬ baˬ da neh yawˬ ha laꞈ kʼoeˇ iˬ baˇ maˬ ya doˆ laˇ ni, aˬ cawˬ nehˬ-ehˇ jahˇ tsaˬ geuꞈ-awˬ.

¹⁸ Aˬ cawˬ-ahˇ jahˇ kʼoꞈ nehˬ mawꞈ-eu nui ma taˬ bi ahˇ. Aˬ cawˬ-ahˇ bye-eu nui ma taˬ bi jaˆ. Ehˇ kʼawꞈ, yawˬ haˇ yawˬ ha gaˬ-eu loꞈ-ehˇ, yawˬ ha dawˬ peh jawˇ-eu tsawˇ haˬ-ahˇ gaˬ-awˬ. Ngaˇ-aˬ, Sahˬpaˬ Miˬyehˇ ma.

¹⁹ “Ngaˬ-euˬ zahˇ dawˬ kʼoꞈ dawˬ deuˬ-ahˇ naˇ haˬ geuꞈ-awˬ. Aˇ jeuˬ maˬ duˇ leˇ-eu jeˬ zaˬ yaw kaˬ, zaˬ taˬ bi caw taꞈ. Yaˇ tiˬ kawˬ laꞈ kʼoeˇ, maˬ duˇ leˇ-eu siˬ yoeˬ nuiˆ yoeˬ nyiˬ jeˬ taˬ ka keuˬ. Saˬ kahˇ hawˇ-eu yawˇ zaˬ caꞈ hm zaꞈ keuˬ-awˇ, mehˬ tsoeˬ taˬ guꞈ dm.

²⁰ “Tsawˇ haˬ tiˬ gʼaˬ na, yawˬ ha-euˬ zaˬ miˬ zaˬ zaˬ kʼaˆ-ahˇ, aˬ cawˬ-euˬ ma nyiˇ bi geuꞈ-eu gʼaˇ duˬ ahˬ nehˬ ma lehˇ saˇ jaˇ dzaˬ gʼaˬ-euˬ kʼawꞈ, zeuˇ-eu gʼaˬ pyuˇ maˬ biꞈ tsehˆ mi naˆ-ehˇ, zaˬ miˬ zaˬ kʼoeˇ gʼaˬ nehˬ-ehˇ aˬ yawꞈ paˇ yuꞈ taꞈ ngeh, aˬ yawꞈ hawˇ-eu zaˬ miˬ zaˬ zaˬ kʼaˆ kʼoeˇ gʼaˬ-ahˇ maˬ ya sehꞈ-a. Kʼehˬ-eu tehꞈ-ehˇ ya kʼehˬ nehˬ meh. Aˬ jeˬ miˇ neh ehˇ naˇ, zaˬ miˬ zaˬ kʼoeˇ gʼaˬ aˬ yawꞈ-euˬ zaˬ kʼaˆ pyeuꞈ luꞈ-a siˬ.

²¹ Zaˬ kʼaˆ yaw sahˇ kʼoeˇ gʼaˬ dziˇ dzoˆ tsoeˬ-eu lawˇ-eu jeˬ lawˇ-eu gʼaˇ duˬ, ngaˇ jawˇ-eu Sehˬ gʼawˆ gʼoˆ kʼehˬ-ahˇ, yawˇ aˬ buˬ tiˬ mawˇ ya tsahˇ laꞈ meh.

²² Kʼoeˇ naˇ, yawˇ kʼoeˇ mawˇ-ahˇ piˇ ma gʼaˬ yuˇ-awˇ, tsawˇ haˬ kʼoeˇ gʼaˬ-euˬ iˬ baˇ shawˇ-eu gʼaˇ duˬ iˬ baˇ shawˇ-eu zahˇ jahˇ ngeh, tsawˇ haˬ kʼoeˇ gʼaˬ-ahˇ Miˬyehˇ iˬ baˇ pyehˬ nehˬ tehꞈ-a.

²³ “Kaˬnaˬ miˇ kʼahˬ-ahˇ naw maꞈ le keuˆ-awˇ, aˇ siˬ aˇ lu ka dzaˬ ngeh, smˇ kʼoꞈ keuˆ ni aˇ siˬ aˇ lu kʼoeˇ deuˬ maˬ shawˇ-a lehˇ naw maꞈ ya noeˬ taˬ meh. Aˇ yamˬ kʼoeˇ smˇ kʼoꞈ laꞈ kʼoeˇ aˇ siˬ aˇ lu kʼoeˇ deuˬ naw maꞈ maˬ ya dzaˬ-a.

²⁴ Oeˬ kʼoꞈ tiˬ kʼoꞈ-ahˇ Sahˬpaˬ Miˬyehˇ-euˬ guiˬ lahˬ-ahˇ noeˬ keuˆ-eu laꞈ kʼoeˇ, aˇ siˬ aˇ lu dawˬ tawˆ luꞈ ya lawˇ nehˬ meh.

²⁵ Ehˇ kʼawꞈ, ngaˬ kʼoꞈ tiˬ kʼoꞈ keuˆ laˇ ngeh, aˇ siˬ aˇ lu kʼoeˇ deuˬ naw maꞈ dzaˬ nya tehꞈ-a. Naw maꞈ kʼoeˇ loꞈ-ehˇ jahˇ ngeh, aˇ siˬ aˇ lu za dzehˬ le-eu gaˇ ya mawˇ tehꞈ-a. Ngaˇ-aˬ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ ma.

²⁶ “Shiˬ maˬ yoeˇ dzeˇ-euˬ shaˬ jiˇ taˬ dzaˬ. Mah loˬ taˬ loˬ.

²⁷ Uˬ duˬ-euˬ laꞈ oˆ paw jawˬ jawˬ-ehˇ, tsehˇ kahˇ maˬ ya tehˬ jawˬ-a. Mehˬ mahˬ mehˬ dzaˬ maˬ ya tehˬ cuˬ-a.

²⁸ Sahˬ tsawˆ-awˇ, shaˬ jiˇ-ahˇ aˇ boꞈ maˬ ya boꞈ-a. Yawˬ ha-euˬ shaˬ jiˇ-ahˇ laˆ tahˬ laˆ naˇ gaˇ keuˆ ni, shiˇ-euˬ tsawˇ haˬ deuˬ gʼaˇ duˬ tsawˇ ngoeˇ maˬ ya ngoeˇ-a. Ngaˇ-aˬ, Sahˬpaˬ Miˬyehˇ pyeuꞈ-eu ma.

²⁹ “Lawˇ ciꞈ zaˬ-euˬ uˬ duˬ tahˬ nymˇ-ahˇ meh maˬ laˇ bi geuꞈ-iˇ-eu laꞈ kʼoeˇ, yawˬ ha-euˬ aˬ buˇ-ahˇ yehˬ bawˬ sehˇ lu-ehˇ maˬ ya gʼeh-a. Naw maꞈ kʼoeˇ loꞈ-ehˇ jahˇ naˇ, miˬyehˇ nui deuˬ-ahˇ naw maꞈ uˬ duˬ tahˬ-awˇ, miˇ kʼahˬ kʼoeˇ kʼahˬ laꞈ kʼoeˇ maˬ muiˬ maˬ jaˬ-eu jeˬ byah jiˇ tehꞈ-a.

³⁰ Jawˇ nah-ahˇ lah-awˇ daw-awˇ, ngaˬ-ahˇ uˬ duˬ tahˬ-eu jawˇ duˬ-ahˇ taˬ huiˬ taˬ mahˇ-awˬ. Ngaˇ-aˬ, Sahˬpaˬ Miˬyehˇ ma.

³¹ “Nyiˇ paˬ-ahˇ laꞈ jeuˬ taˬ shaˇ. Naw maꞈ kʼoeˇ loꞈ-ehˇ jahˇ naˇ, maˬ shawˇ-eu tsawˇ haˬ pyeuꞈ-eu meh. Ngaˇ-aˬ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ ma.

³² “Tsawˇ mawˬ tsawˇ kʼaˆ deuˬ-ahˇ yaw zeu baw-awˇ, taˬ huiˬ taˬ mahˇ-awˬ.

³³ “Naw maꞈ miˇ kʼahˬ laꞈ kʼoeˇ jawˇ-eu boeˇ miˬ siˬ kʼaˬ deuˬ-ahˇ yehˬ bawˬ sehˇ lu-ehˇ taˬ gʼeh.

³⁴ Iˇsaˬleˬlaˆ tsawˇ haˬ yaw kaˬ cawˬ cawˬ taꞈ-eu loꞈ-ehˇ, aˬ yawꞈ maꞈ-ahˇ cawˬ cawˬ taꞈ-awˬ. Yawˬ haˇ yawˬ ha gaˬ-eu loꞈ-ehˇ, aˬ yawꞈ maꞈ-ahˇ gaˬ-awˬ. Iˇjiˇtuˆ miˇ kʼahˬ laꞈ kʼoeˇ naw maꞈ boeˇ miˬ siˬ kʼaˬ pyeuꞈ haw-euˬ gaˇ taˬ ngehˇ. Ngaˇ-aˬ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ ma.

³⁵ “Daˇ dza dza ngeh maˬ ehˇ, myawˬ saˆ ngeh maˬ ehˇ, tiˬ jeˬ paˬ gui ngeh maˬ ehˇ, aˬ cawˬ kʼoeˇ taˆ tsawˇ gahˇ taˬ gahˇ dzaˬ.

³⁶ Tsaˬ-eu daˇ dza, tsaˬ-eu lu jawꞈ-i hawˇ-eu, tsaˬ-eu cehˇ pehˬ zmˬ-awˬ. Ngaˇ-aˬ, naw maꞈ-euˬ Miˬyehˇ, Sahˬpaˬ Miˬyehˇ pyeuꞈ-awˇ, Iˇjiˇtuˆ miˇ kʼahˬ laꞈ kʼoeˇ neh naw maꞈ-ahˇ sheuˬ doˆ nehˬ-euˬ ma.

³⁷ Ngaˬ-euˬ zahˇ dawˬ kʼoꞈ dawˬ dawˬ tawˆ luꞈ hawˇ-eu, ngaˬ neh dawˬ kʼaˇ biꞈ taˬ-euˬ dawˬ tawˆ luꞈ-ahˇ naˇ haˬ geuꞈ-awˬ. Ngaˇ-aˬ, Sahˬpaˬ Miˬyehˇ ma.”