Uˬ duˬ 16 - Akha

Iˬ baˇ sha dzeh-eu aˇ nah

¹ Aˬloˬ-euˬ aˬ li nyiˬ gʼaˬ maˬ muiˬ maˬ shawˇ-eu jeˬ dzah puiˆ-awˇ Sahˬpaˬ Miˬyehˇ-ahˇ lawˇ-euˬ miˇ neh shiˇ dzeuˇ gʼaˬ-awˇ, Sahˬpaˬ Miˬyehˇ Moˇseˬ-ahˇ dawˬ ngehˬ cawˬ-euˬ meh.

² Aˬ yawꞈ ehˇ-eu, “Saˬ paˇ paˇ ma lawˆ kaˬ taw paˆ taˬ-euˬ naˇ kʼah paw dzeˇ jaˆ-eu Muiˬ dui Shawˇ dui dui-eu Jawˇ duˬ-ahˇ, aˇ yamˬ tsaˬ ngeh tehꞈ-ehˇ ya uˇ leˇ meh lehˇ nawˬ-euˬ aˇ doˆ Aˬloˬ-ahˇ ehˇ nehˬ-awˬ. Aˬ jeˬ miˇ neh ehˇ naˇ, jawˇ duˬ kʼoeˇ tsahˇ-ahˇ jaˆ-eu Dawˬ ma saˇ jaˇ Bahˬ keuˆ kʼmˬ pymˬ kʼoeˇ taˆ mˬ dmˇ laꞈ kʼoeˇ ngaˇ zaꞈ le-eu ma. Ngaˬ-euˬ ehˇ dawˬ maˬ naˇ haˬ ni, kʼaˇ uˇ leˇ mawꞈ ngeh uˇ leˇ naˇ, aˬ yawꞈ ya shiˇ tehꞈ-a.

³ Iˬ baˇ shawˇ-eu lawˇ-eu jeˬ gʼaˇ duˬ mawˇ neˇ mawˇ gaw zaˬ tiˬ mawˇ hawˇ-eu, miˬ dzaˬ dzah puiˆ-awˇ lawˇ-eu jeˬ lawˇ-eu gʼaˇ duˬ yawˇ aˬ buˬ tiˬ mawˇ yuˇ laꞈ gʼaˬ ngeh hawˇ-eu, Muiˬ dui Shawˇ dui dui-eu Jawˇ duˬ kʼoeˇ tsahˇ laꞈ kʼoeˇ aˬ yawꞈ ya uˇ leˇ meh.”

⁴ Kʼoeˇ naˇ, Sahˬpaˬ Miˬyehˇ heu loꞈ-ehˇ dawˬ mehˬ dawˬ tsoˆ tsoˆ-euˬ meh. Muiˬ dui shawˇ dui dui-eu Jawˇ duˬ-ahˇ Aˬloˬ maˬ uˇ leˇ mi naˆ-ehˇ, aˬ yawꞈ-euˬ gʼawˇ mawˇ iˇ cuꞈ dzuiꞈ shawˇ-awˇ, piˇ ma-euˬ dm gʼaˬ dm lmˇ pyeuꞈ-eu, shawˇ jehˆ ni gʼeh-eu saˬ paˇ neh guꞈ taˬ-euˬ pehˇ kʼahˬ pehˇ mahˇ, laꞈ di laꞈ deu, joꞈ paꞈ hawˇ-eu, uˬ dzahˬ heu deuˬ-ahˇ, aˬ yawꞈ ya dm ya gʼaˬ meh.

⁵ Iˬ baˇ shawˇ-eu lawˇ-eu jeˬ lawˇ-eu gʼaˇ duˬ, ciꞈ myehꞈ ciꞈ buˬ nyiˬ mawˇ hawˇ-eu, miˬ dzaˬ dzah puiˆ-awˇ lawˇ-eu jeˬ lawˇ-eu gʼaˇ duˬ yawˇ aˬ buˬ tiˬ mawˇ, Aˬloˬ-ahˇ Iˇsaˬleˬlaˆ tsawˇ haˬ deuˬ ya biꞈ nehˬ meh.

⁶ Aˬ yawꞈ-euˬ iˬ baˇ hawˇ-eu aˬ yawꞈ-euˬ miˬ sawˇ zaˬ deuˬ-euˬ iˬ baˇ sha dzeh-eu gʼaˇ duˬ, mawˇ neˇ mawˇ gaw tiˬ mawˇ Aˬloˬ ya lawˇ meh.

⁷ Kʼoeˇ naˇ, ciꞈ myehꞈ ciꞈ buˬ kʼoeˇ nyiˬ mawˇ-ahˇ, Sahˬpaˬ Miˬyehˇ jawˇ-eu Sehˬ gʼawˆ-euˬ gʼoˆ kʼehˬ-ahˇ aˬ yawꞈ ya tsahˇ gʼeh meh.

⁸ Kʼoeˇ gaˇ, Sahˬpaˬ Miˬyehˇ gʼaˇ duˬ hawˇ-eu, Aˬzaˬzeˬlaˇ gʼaˇ duˬ lehˇ boꞈ taˬ-euˬ kʼaˬ lo nyiˬ siˬ yuˇ-awˇ, ciꞈ myehꞈ kʼoeˇ nyiˬ mawˇ-ahˇ ya bi tsaˬ geuꞈ meh.

⁹ Sahˬpaˬ Miˬyehˇ gʼaˇ duˬ, tsaˬ geuꞈ-euˬ ciꞈ myehꞈ kʼoeˇ mawˇ-ahˇ Aˬloˬ yuˇ-awˇ, iˬ baˇ shawˇ-eu lawˇ-eu jeˬ ya lawˇ meh.

¹⁰ Aˬzaˬzeˬlaˇ gʼaˇ duˬ tsaˬ geuꞈ-euˬ ciꞈ myehꞈ kʼoeˇ mawˇ-ahˇ, yaw dehꞈ-ehˇ Sahˬpaˬ Miˬyehˇ-ahˇ tsahˇ ha nehˬ leˇ-awˇ, Iˇsaˬleˬlaˆ tsawˇ haˬ deuˬ-euˬ iˬ baˇ bi pi dzeh-eu gʼaˇ duˬ, bawˇ tsahˬ bawˇ dahˇ-ahˇ, Aˬzaˬzeˬlaˇ jawˇ gaˇ ya pyehˬ gʼeh meh.

¹¹ Aˬ yawꞈ-euˬ iˬ baˇ hawˇ-eu aˬ yawꞈ-euˬ miˬ sawˇ zaˬ deuˬ-euˬ iˬ baˇ gʼaˇ duˬ, mawˇ neˇ mawˇ gaw kʼoeˇ mawˇ sehꞈ-awˇ, iˬ baˇ shawˇ-eu lawˇ-eu jeˬ Aˬloˬ lawˇ ngeh,

¹² lawˇ duˬ kʼoeˇ taˆ doꞈ luꞈ-eu miˬ dzaˬ miˬ jiˆ tiˬ byah ni pehˆ ahˇ taˬ-euˬ guiˬ gʼawˆ hawˇ-eu, muiˬ dui dui-eu yaw saw jeˬ laꞈ tsuˆ nyiˬ tsuˆ tsuˆ doˆ-awˇ, Muiˬ dui shawˇ dui dui-eu Jawˇ duˬ-ahˇ ya yuˇ leꞈ meh.

¹³ Kʼoeˇ gaˇ, Sahˬpaˬ Miˬyehˇ-euˬ mehˬ shi, yaw saw jeˬ kʼoeˇ miˬ dzaˬ-ahˇ aˬ yawꞈ dawˆ puiˆ-awˇ, Dawˬ ma saˇ jaˇ Bahˬ keuˆ kʼmˬ pymˬ-ahˇ aˬ yawꞈ maˬ ya haw mawˇ-eu gʼaˇ duˬ, miˬ dzaˬ uˬ kʼoeˬ neh ya bi dehˬ kaˬ-eu meh. Aˬ jeˬ miˇ neh ehˇ naˇ, bahˬ keuˆ kʼmˬ pymˬ-ahˇ aˬ yawꞈ ya haw mawˇ naˇ, aˬ yawꞈ ya shiˇ meh.

¹⁴ Mawˇ neˇ mawˇ gaw kʼoeˇ mawˇ-euˬ shiˬ ui cuiˆ yuˇ-awˇ, bahˬ keuˆ kʼmˬ pymˬ-ahˇ aˬ yawꞈ-euˬ laꞈ noeˇ neh ya byaˆ shehˬ meh. Kʼoeˇ naˇ, shiˬ kʼoeˇ neh, dawˬ ma saˇ jaˇ bahˬ keuˆ mehˬ shi, shiꞈ poˆ keuˆ ni ya byaˆ shehˬ meh.

¹⁵ Kʼoeˇ naˇ, Iˇsaˬleˬlaˆ tsawˇ haˬ deuˬ gʼaˇ duˬ iˬ baˇ shawˇ-eu lawˇ-eu jeˬ lawˇ-eu gʼaˇ duˬ, ciꞈ myehꞈ kʼoeˇ mawˇ aˬ yawꞈ ya sehꞈ meh. Ciꞈ myehꞈ kʼoeˇ mawˇ-euˬ shiˬ Muiˬ dui Shawˇ dui dui-eu Jawˇ duˬ laꞈ kʼoeˇ yuˇ ahˇ gʼeh-awˇ, mawˇ neˇ kʼoeˇ mawˇ-euˬ shiˬ byaˆ shehˬ-eu loꞈ-ehˇ, Dawˬ ma saˇ jaˇ Bahˬ keuˆ hawˇ-eu kʼoeˇ-euˬ kʼmˬ pymˬ mehˬ shi ya byaˆ shehˬ meh.

¹⁶ Iˇsaˬleˬlaˆ tsawˇ haˬ deuˬ-euˬ maˬ muiˬ maˬ shawˇ-eu jeˬ hawˇ-eu iˬ baˇ baˬ da neh, kʼoeˇ loꞈ-ehˇ jahˇ-awˇ, Muiˬ dui Shawˇ dui dui-eu Jawˇ duˬ shawˇ-eu zahˇ aˬ yawꞈ ya jahˇ meh. Sehˬ gʼawˆ gʼaˇ duˬ kʼawꞈ, aˬ yawꞈ kʼoeˇ loꞈ-ehˇ ya jahˇ meh. Aˬ jeˬ miˇ neh ehˇ naˇ, kʼoeˇ-aˬ, maˬ shawˇ-eu pu-euˬ gʼahˇ ceh jaˆ-eu miˇ neh meh.

¹⁷ Shawˇ-eu zahˇ jahˇ-eu gʼaˇ duˬ, Muiˬ dui Shawˇ dui dui-eu Jawˇ duˬ-ahˇ Aˬloˬ uˇ leˇ-awˇ doˆ le ngeh keuˆ ni, Sehˬ gʼawˆ laꞈ kʼoeˇ tsawˇ haˬ tiˬ gʼaˬ-iˬ maˬ ya jawˇ-a. Aˬ yawꞈ-euˬ gʼawˇ mawˇ gʼaˇ duˬ maˬ ehˇ, aˬ yawꞈ-euˬ miˬ sawˇ zaˬ deuˬ gʼaˇ duˬ maˬ ehˇ, tsawˇ haˬ aˇ maꞈ aˇ muˇ dawˬ tawˆ luꞈ-euˬ gʼaˇ duˬ maˬ ehˇ, aˬ yawꞈ zahˇ jahˇ gʼaˬ ngeh,

¹⁸ lawˇ duˬ shawˇ-eu gʼaˇ duˬ maˬ ehˇ, miˬ dzaˬ dzah puiˆ-awˇ lawˇ-eu jeˬ lawˇ-eu gʼaˇ duˬ maˬ ehˇ, lawˇ duˬ jaˆ gaˇ aˬ yawꞈ ya iˇ meh. Mawˇ neˇ-euˬ shiˬ hawˇ-eu ciꞈ myehꞈ-euˬ shiˬ yuˇ-awˇ, lawˇ duˬ-euˬ laꞈ coeˇ deuˬ-ahˇ tsoꞈ-eu uˬ coeˇ deuˬ-ahˇ aˬ yawꞈ ya lehꞈ meh.

¹⁹ Shiˬ kʼoeˇ yuˇ-awˇ, aˬ yawꞈ-euˬ laꞈ noeˇ neh, lawˇ duˬ-ahˇ shiꞈ poˆ keuˆ ni ya byaˆ shehˬ meh. Iˇsaˬleˬlaˆ tsawˇ haˬ deuˬ-euˬ iˬ baˇ baˬ da neh, aˬ yawꞈ kʼoeˇ loꞈ-ehˇ jahˇ-awˇ, lawˇ duˬ muiˬ laˇ shawˇ laˇ ni ya mˇ meh.

Iˬ baˇ pi dzeh-eu ciꞈ myehꞈ

²⁰ Muiˬ dui Shawˇ dui dui-eu Jawˇ duˬ, Sahˬpaˬ Miˬyehˇ jawˇ-eu sehˬ gʼawˆ, lawˇ duˬ, heu smˇ jeˬ shawˇ-eu zahˇ Aˬloˬ jahˇ gʼaˬ ngeh, Aˬzaˬzeˬlaˇ gʼaˇ duˬ tseˇ doˆ taˬ-euˬ ciꞈ myehꞈ kʼoeˇ mawˇ-ahˇ, Sahˬpaˬ Miˬyehˇ jawˇ gaˇ aˬ yawꞈ ya tsahˇ gʼeh meh.

²¹ Aˬ yawꞈ-euˬ aˬ laꞈ nyiˬ laꞈ luꞈ ciꞈ myehꞈ kʼoeˇ mawˇ kʼoeˇ taˆ baꞈ daˆ-awˇ, kʼoeˇ-euˬ kʼoeˇ taˆ, Iˇsaˬleˬlaˆ tsawˇ haˬ deuˬ-euˬ maˬ muiˬ maˬ jaˬ-eu jeˬ maˬ ehˇ, iˬ baˇ deuˬ maˬ ehˇ, Sahˬpaˬ Miˬyehˇ-ahˇ puiˬ-eu jeˬ maˬ ehˇ, dawˬ tawˆ luꞈ ehˇ doˆ jiˇ-awˇ, ciꞈ myehꞈ kʼoeˇ mawˇ-euˬ uˬ duˬ-ahˇ dawˬ tawˆ luꞈ ya ciˬ pi nehˬ meh.

²² Kʼoeˇ naˇ, tseˇ doˆ taˬ-euˬ tsawˇ haˬ tiˬ gʼaˬ neh, ciꞈ myehꞈ kʼoeˇ mawˇ-ahˇ, bawˇ tsahˬ bawˇ dahˇ-ahˇ ya bi teh ha byoˆ meh.

²³ Kʼoeˇ naˇ, Sehˬ gʼawˆ laꞈ kʼoeˇ Aˬloˬ uˇ leˇ-awˇ Muiˬ dui Shawˇ dui dui-eu Jawˇ duˬ-ahˇ aˬ yawꞈ uˇ leˇ-eu lehˇ gʼeh ngeh dm-eu piˇ ma-euˬ dm gʼaˬ dm lmˇ deuˬ, kʼoeˇ gaˇ ya lehˆ taˬ yaꞈ meh.

²⁴ Muiˬ-eu shawˇ-eu jawˇ duˬ tiˬ tsahˇ-ahˇ, aˬ yawꞈ iˇ cuꞈ ya dzuiꞈ shawˇ-awˇ, yawˬ ha-euˬ mehˬ tsoeˬ paˇ ya dm paˇ meh. Kʼoeˇ naˇ, aˬ yawꞈ doˆ-iˇ-awˇ, aˬ yawꞈ-euˬ iˬ baˇ maˬ ehˇ, Iˇsaˬleˬlaˆ tsawˇ haˬ deuˬ-euˬ iˬ baˇ maˬ ehˇ, ya buˬ ya law-iˇ-eu gʼaˇ duˬ, miˬ dzaˬ dzah puiˆ-awˇ lawˇ-eu jeˬ ya lawˇ meh.

²⁵ Iˬ baˇ shawˇ-eu lawˇ-eu jeˬ lawˇ gaˇ geuꞈ-eu jeˬ zaˬ-euˬ tsiˇ yuˇ-awˇ, lawˇ duˬ kʼoeˇ taˆ ya dzah puiˆ meh.

²⁶ Bawˇ tsahˬ bawˇ dahˇ-ahˇ, Aˬzaˬzeˬlaˇ jawˇ gaˇ ciꞈ myehꞈ bi teh ha-iˇ-eu tsawˇ haˬ kʼoeˇ gʼaˬ, pu-ahˇ maˬ gʼoꞈ uˇ laˇ mi naˆ-ehˇ, yawˬ ha-euˬ mehˬ tsoeˬ ya lehˬ tsiˬ shawˇ-awˇ, iˇ cuꞈ ya dzuiꞈ shawˇ meh.

²⁷ Iˬ baˇ shawˇ-eu lawˇ-eu jeˬ gʼaˇ duˬ maˬ ehˇ, Muiˬ dui Shawˇ dui dui-eu Jawˇ duˬ-ahˇ shiˬ yuˇ ahˇ gʼeh-eu gʼaˇ duˬ maˬ ehˇ, sehꞈ-euˬ mawˇ neˇ mawˇ gaw hawˇ-eu ciꞈ myehꞈ-ahˇ pu pu dzeˇ baꞈ doˆ-awˇ, ya dzah puiˆ dzeh meh. Baˆ kʼoˆ maˬ ehˇ, shaˬ jiˇ maˬ ehˇ, baw uˇ baw ma dawˬ tawˆ luꞈ maˬ ehˇ, ya dzah puiˆ dzeh meh.

²⁸ Jeˬ zaˬ kʼoeˇ nyiˬ mawˇ miˬ dzaˬ-ahˇ dzah puiˆ dzeh-euˬ tsawˇ haˬ kʼoeˇ gʼaˬ, pu-ahˇ maˬ gʼoꞈ uˇ leˇ mi naˆ-ehˇ, yawˬ ha-euˬ mehˬ tsoeˬ ya lehˬ tsiˬ-awˇ, iˇ cuꞈ ya dzuiꞈ meh.

²⁹ Mehˬ hu paw dehꞈ daˆ leꞈ-eu aˇ yamˬ laꞈ kʼoeˇ, zahˇ sahˇ kʼoꞈ heu deuˬ-ahˇ aˬ myah luꞈ ya caw teh meh. Ba la shiꞈ siˬ tiˬ siˬ tseˇ nah tiˬ nah-ahˇ, Iˇsaˬleˬlaˆ tsawˇ haˬ deuˬ hawˇ-eu aˬ yawꞈ maꞈ nehˬ-ehˇ jawˇ-eu boeˇ miˬ siˬ kʼaˬ deuˬ, maˬ dzaˬ maˬ dawˇ-ehˇ, gaˇ maˬ mˇ ni jawˇ-awˇ, ya lah ya daw meh.

³⁰ Aˬ yawꞈ maꞈ shawˇ laˇ ni, iˬ baˇ buˬ-iˇ-awˇ bi muiˬ bi shawˇ laˇ-eu zahˇ-ahˇ, kʼoeˇ ngeh nah ya jahˇ meh.

³¹ Kʼoeˇ ngeh nah-aˬ, aˬ yawꞈ maꞈ maˬ dzaˬ maˬ dawˇ-ehˇ, gaˇ maˬ mˇ ni jawˇ-awˇ, ya lah ya daw-eu muiˬ dui shawˇ dui dui-eu aˇ nah pyeuꞈ-eu meh. Mehˬ hu paw dehꞈ daˆ leꞈ-eu aˇ yamˬ laꞈ kʼoeˇ, zahˇ sahˇ kʼoꞈ heu deuˬ-ahˇ, aˬ myah luꞈ maˬ byehˇ ni, ya caw teh meh.

³² Piˇ ma Yaw huiˬ gʼaˬ geuꞈ-eu geuˇ-eu baˬ da neh, aˬ yawꞈ aˬ da-euˬ gaˇ bi mˇ tsaꞈ gʼeh-eu gʼaˇ duˬ aˇ yaˬ biꞈ-awˇ a nehˬ taˬ-euˬ gʼaˬ-aˬ, bi muiˬ bi shawˇ laˇ-eu zahˇ ya jahˇ meh. Piˇ ma-euˬ dm gʼaˬ dm lmˇ deuˬ aˬ yawꞈ ya dm meh.

³³ Kʼoeˇ naˇ, Muiˬ dui Shawˇ dui dui-eu Jawˇ duˬ, Sahˬpaˬ Miˬyehˇ jawˇ-eu Sehˬ gʼawˆ, lawˇ duˬ, piˇ ma deuˬ hawˇ-eu, Iˇsaˬleˬlaˆ tsawˇ haˬ aˇ maꞈ aˇ muˇ, heu deuˬ dawˬ tawˆ luꞈ bi muiˬ bi shawˇ laˇ-eu zahˇ aˬ yawꞈ ya jahˇ meh.

³⁴ Mehˬ hu paw dehꞈ daˆ leꞈ-eu aˇ yamˬ laꞈ kʼoeˇ, zahˇ sahˇ kʼoꞈ heu deuˬ-ahˇ, aˬ myah luꞈ maˬ byehˇ ni ya caw teh meh. Iˇsaˬleˬlaˆ tsawˇ haˬ deuˬ iˬ baˇ buˬ-iˇ law-iˇ-awˇ, bi muiˬ bi shawˇ laˇ-eu zahˇ heu hmˬ tiˬ kʼoꞈ tiˬ poˆ ya jahˇ meh. Kʼoeˇ loꞈ-ehˇ, Sahˬpaˬ Miˬyehˇ neh dawˬ kʼaˇ biꞈ taˬ-euˬ loꞈ-ehˇ Moˇseˬ mˇ-euˬ meh.