Uˬ duˬ 14 - Akha

Nyawˬ naˇ-eu shawˇ laˇ-euˬ

¹ Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh.

² Heu-aˬ, nyawˬ naˇ gʼaˬ-euˬ tsawˇ haˬ tiˬ gʼaˬ-ahˇ bi muiˬ bi shawˇ laˇ-eu aˇ nah-ahˇ, taꞈ leˇ-eu zahˇ sahˇ kʼoꞈ meh. Tsawˇ haˬ kʼoeˇ gʼaˬ yaw shawˇ meh lehˇ bi daˇ tsehˆ-eu aˇ nah-ahˇ piˇ ma aˬ yawꞈ-ahˇ ya sheuˬ laꞈ meh.

³ Piˇ ma gʼaˬ aˬ yawꞈ-ahˇ pu pu dzeˇ sheuˬ doˆ gʼeh-awˇ, ya pyehˆ tseˇ haw meh. Naˇ gawˇ taˬ leˇ gʼaˬ-euˬ ya mawˇ naˇ,

⁴ zahˇ jahˇ gaˇ geuꞈ nya-eu aˇ jiˇ nyiˬ mawˇ, siˬ daˬ miˬ shuˬ, saˬ kahˇ kahˇ neˇ, hiˇ soˆ baw nmˬ, heu deuˬ yuˇ laꞈ-awˬ lehˇ, piˇ ma gʼaˬ tsawˇ haˬ kʼoeˇ gʼaˬ-ahˇ ya ehˇ nehˬ meh.

⁵ Kʼoeˇ naˇ, tsawˬ biˬ-ahˇ yoeˇ-eu iˇ cuꞈ kʼawꞈ ahˇ taˬ-euˬ miˇ tsaˬ oeˬ lahˬ kʼoeˇ taˆ, aˇ jiˇ tiˬ mawˇ diˬ sehꞈ-awˬ lehˇ, piˇ ma gʼaˬ aˬ yawꞈ-ahˇ ya ehˇ nehˬ meh.

⁶ Kʼoeˇ naˇ, siˬ daˬ miˬ shuˬ, saˬ kahˇ kahˇ neˇ hawˇ-eu, hiˇ soˆ baw nmˬ ui cuiˆ yuˇ-awˇ, aˇ jiˇ yawˬ mawˇ yawˬ nehˬ-ehˇ tiˬ kawˆ loꞈ-ehˇ, diˬ sehꞈ-euˬ aˇ jiˇ kʼoeˇ mawˇ-euˬ shiˬ laꞈ kʼoeˇ ya dawˆ duiˆ meh.

⁷ Piˇ ma gʼaˬ shiˬ kʼoeˇ yuˇ-awˇ, bi shawˇ laˇ-eu lehˇ gʼeh-eu nyawˬ naˇ-eu tsawˇ haˬ kʼoeˇ gʼaˬ kʼoeˇ taˆ shiꞈ poˆ keuˆ ni byaˆ shehˬ-awˇ, tsawˇ haˬ kʼoeˇ gʼaˬ yaw shawˇ meh lehˇ ya daˇ tsehˆ nehˬ meh. Kʼoeˇ naˇ, aˇ jiˇ yaw dehꞈ kʼoeˇ mawˇ pyehˬ-awˇ, kʼoeˇ taˆ paw ya bi yaw byoˆ gʼeh meh.

⁸ Tsawˇ haˬ kʼoeˇ gʼaˬ yawˬ ha-euˬ mehˬ tsoeˬ lehˬ tsiˬ-awˇ, uˬ jehˆ jehˆ dzeh-awˇ, iˇ cuꞈ ya dzuiꞈ shawˇ meh. Kʼoeˇ naˇ, shawˇ-eu tsawˇ haˬ pyeuꞈ laˇ-eu meh. Pu laꞈ kʼoeˇ aˬ yawꞈ uˇ leˇ nya meh. Ehˇ kʼawꞈ, aˬ yawꞈ-euˬ sehˬ gʼawˆ laˬ nyiˇ, shiꞈ nah keuˆ ni aˬ yawꞈ ya jawˇ meh.

⁹ Shiꞈ nah aˬ yawꞈ nah-ahˇ, uˬ duˬ, mehˬ mahˬ, myaˆ nuiˆ myaˆ shehˆ hawˇ-eu, aˬ yawꞈ-euˬ gʼawˇ mawˇ-ahˇ kʼaˇ tsoꞈ-eu caꞈ hm deuˬ paˇ jehˆ dzeh jiˇ-awˇ, aˬ yawꞈ-euˬ mehˬ tsoeˬ lehˬ tsiˬ-awˇ, iˇ cuꞈ paˇ ya dzuiꞈ shawˇ meh. Kʼoeˇ ngeh, shawˇ-eu tsawˇ haˬ pyeuꞈ laˇ-eu meh.

¹⁰ Yehꞈ nah tiˬ nah-ahˇ, maˇ byawꞈ maˬ baw-eu yawˇ zaˬ aˬ buˬ nyiˬ mawˇ hawˇ-eu, maˇ byawꞈ maˬ baw-eu tiˬ myaˇ byah laˇ-euˬ yawˇ zaˬ aˬ ma tiˬ mawˇ tsahˇ laꞈ-awˇ, saˬ loˬ tsiˇ keuˬ-euˬ cehˇ meu smˇ pehˬ hawˇ-eu, saˬ loˬ tsiˇ maˇ tsaꞈ tiˬ kʼoeˆ dzehˬ ni, tsawˇ haˬ kʼoeˇ gʼaˬ ya yuˇ laꞈ meh.

¹¹ Tsawˇ haˬ kʼoeˇ gʼaˬ hawˇ-eu aˬ yawꞈ neh yuˇ laꞈ-euˬ lawˇ-eu jeˬ kʼoeˇ ahˇ, Sahˬpaˬ Miˬyehˇ jawˇ-eu sehˬ gʼawˆ-euˬ gʼoˆ kʼehˬ-ahˇ piˇ ma gʼaˬ ya yuˇ gʼeh-eu meh.

¹² Kʼoeˇ naˇ, piˇ ma gʼaˬ yawˇ zaˬ aˬ buˬ tiˬ mawˇ tsahˇ-awˇ, maˇ tsaꞈ-ahˇ dahˬ-eu tsiˇ smˬ bymˇ tiˬ bymˇ nehˬ-ehˇ, dziˇ dzoˆ tsoeˬ-eu lawˇ-eu jeˬ ya lawˇ meh. Lawˇ-eu jeˬ kʼoeˇ, muiˬ-eu laꞈ sawˬ loꞈ-ehˇ, piˇ ma deuˬ gʼaˇ duˬ Sahˬpaˬ Miˬyehˇ-ahˇ ya damˬ nehˬ meh.

¹³ Iˬ baˇ shawˇ-eu lawˇ-eu jeˬ lawˇ gaˇ hawˇ-eu, miˬ dzaˬ dzah puiˆ-awˇ lawˇ-eu jeˬ lawˇ gaˇ geuꞈ-eu jeˬ zaˬ deuˬ sehꞈ-eu muiˬ-eu shawˇ-eu jawˇ duˬ kʼoeˇ tsahˇ-ahˇ, yawˇ zaˬ kʼoeˇ mawˇ-ahˇ ya sehꞈ meh. Kʼoeˇ loꞈ-ehˇ aˬ yawꞈ ya jahˇ meh. Aˬ jeˬ miˇ neh ehˇ naˇ, dziˇ dzoˆ tsoeˬ-eu lawˇ-eu jeˬ kʼoeˇ-aˬ, iˬ baˇ shawˇ-eu lawˇ-eu jeˬ loꞈ-ehˇ, piˇ ma-ahˇ oꞈ-eu shaˬ bymˇ pyeuꞈ-awˇ, muiˬ dui shawˇ dui dui-eu meh.

¹⁴ Piˇ ma gʼaˬ yawˇ zaˬ kʼoeˇ mawˇ-euˬ shiˬ ui cuiˆ yuˇ-awˇ, bi shawˇ laˇ-eu lehˇ gʼeh-eu tsawˇ haˬ kʼoeˇ gʼaˬ-euˬ aˇ maˇ paw naˬ paꞈ naˬ dzaˬ-ahˇ maˬ ehˇ, aˇ maˇ kuiˇ kuiˇ ma-ahˇ maˬ ehˇ, ya lehꞈ nehˬ meh.

¹⁵ Piˇ ma gʼaˬ saˬ loˬ tsiˇ ui cuiˆ yuˇ-awˇ, yawˬ ha-euˬ aˇ caˇ laꞈ laꞈ zaˬ kʼoeˇ taˆ ya shehˆ daˆ meh.

¹⁶ Kʼoeˇ naˇ, aˇ maˇ laꞈ laꞈ noeˇ tsiˇ kʼoeˇ-ahˇ cawˬ duiˆ-awˇ, Sahˬpaˬ Miˬyehˇ jawˇ-eu mehˬ shi, shiꞈ poˆ keu ni ya byaˆ shehˬ meh.

¹⁷ Aˬ yawꞈ-euˬ laꞈ zaˬ-ahˇ ahˇ-eu tsiˇ ui cuiˆ hawˇ-eu, yawˇ zaˬ kʼoeˇ mawˇ-euˬ shiˬ ui cuiˆ yuˇ-awˇ, bi shawˇ laˇ-eu lehˇ gʼeh-eu tsawˇ haˬ kʼoeˇ gʼaˬ-euˬ aˇ maˇ paw naˬ paꞈ naˬ dzaˬ-ahˇ maˬ ehˇ, aˇ maˇ laꞈ laꞈ ma-ahˇ maˬ ehˇ, aˇ maˇ kuiˇ kuiˇ ma-ahˇ maˬ ehˇ, ya lehꞈ meh.

¹⁸ Aˬ yawꞈ-euˬ laꞈ zaˬ-ahˇ dzehˬ laˇ-euˬ tsiˇ kʼoeˇ yuˇ-awˇ, tsawˇ haˬ kʼoeˇ gʼaˬ-euˬ uˬ duˬ-ahˇ ya lehꞈ nehˬ meh. Kʼoeˇ loꞈ-ehˇ jahˇ-awˇ, bi shawˇ laˇ-eu zahˇ ya jahˇ nehˬ meh.

¹⁹ Kʼoeˇ naˇ, piˇ ma gʼaˬ iˬ baˇ shawˇ-eu lawˇ-eu jeˬ lawˇ-awˇ, bi shawˇ laˇ-eu zahˇ ya jahˇ meh. Kʼoeˇ sawˇ miˇ tsa, miˬ dzaˬ dzah puiˆ-awˇ lawˇ-eu jeˬ lawˇ-eu gʼaˇ duˬ, jeˬ zaˬ ya sehꞈ meh.

²⁰ Jeˬ zaˬ kʼoeˇ mawˇ-ahˇ, dzaˬ la gʼo cehˇ lawˇ-eu jeˬ nehˬ-ehˇ tiˬ kawˆ loꞈ-ehˇ, lawˇ duˬ kʼoeˇ taˆ ya lawˇ meh. Kʼoeˇ loꞈ-ehˇ jahˇ-awˇ, bi muiˬ bi shawˇ laˇ-eu zahˇ piˇ ma gʼaˬ ya jahˇ meh. Kʼoeˇ ngeh, tsawˇ haˬ kʼoeˇ gʼaˬ aˬ diˇ aˬ maˇ shawˇ laˇ-eu meh.

²¹ Tsawˇ haˬ kʼoeˇ gʼaˬ iˇ shaˬ shaˬ-eu miˇ neh maˬ gʼeh nya naˇ, shawˇ-eu zahˇ jahˇ-eu gʼaˇ duˬ, muiˬ-eu laꞈ sawˬ loꞈ-ehˇ, piˇ ma gʼaˇ duˬ Sahˬpaˬ Miˬyehˇ-ahˇ damˬ nehˬ-eu dziˇ dzoˆ tsoeˬ-eu lawˇ-eu jeˬ lawˇ-eu gʼaˇ duˬ, yawˇ aˬ buˬ tiˬ mawˇ ya tsahˇ laꞈ-eu tehꞈ meh. Dzaˬ dzaˬ dawˇ dawˇ lawˇ-eu jeˬ lawˇ-eu gʼaˇ duˬ, saˬ loˬ tsiˇ keuˬ-euˬ cehˇ meu tiˬ pehˬ hawˇ-eu, saˬ loˬ tsiˇ maˇ tsaꞈ tiˬ kʼoeˆ dzehˬ ni tehꞈ-ehˇ aˬ yawꞈ ya yuˇ laꞈ meh.

²² Kʼaˬ kʼoeˬ nyiˬ mawˇ, maˬ ngeuˇ naˇ, kʼaˬ guˬ nyiˬ mawˇ aˬ yawꞈ ya yuˇ laꞈ meh. Iˬ baˇ shawˇ-eu lawˇ-eu jeˬ gʼaˇ duˬ tiˬ mawˇ hawˇ-eu, miˬ dzaˬ dzah puiˆ-awˇ lawˇ-eu jeˬ lawˇ-eu gʼaˇ duˬ tiˬ mawˇ meh.

²³ Aˬ yawꞈ-ahˇ bi muiˬ bi shawˇ laˇ-eu aˇ nah yehꞈ nah tiˬ nah-ahˇ, Sehˬ gʼawˆ gʼoˆ kʼehˬ-ahˇ, piˇ ma jawˇ gaˇ, kʼoeˇ deuˬ aˬ yawꞈ ya yuˇ laꞈ meh.

²⁴ Piˇ ma gʼaˬ, yawˇ zaˬ kʼoeˇ mawˇ hawˇ-eu saˬ loˬ tsiˇ yuˇ-awˇ, muiˬ-eu laꞈ sawˬ loꞈ-ehˇ, piˇ ma gʼaˇ duˬ, Sahˬpaˬ Miˬyehˇ-ahˇ ya damˬ nehˬ meh.

²⁵ Piˇ ma gʼaˬ yawˇ zaˬ kʼoeˇ mawˇ sehꞈ-awˇ, shiˬ ui cuiˆ yuˇ-awˇ, bi shawˇ laˇ-eu lehˇ gʼeh-eu tsawˇ haˬ kʼoeˇ gʼaˬ-euˬ aˇ maˇ paw naˬ paꞈ naˬ dzaˬ-ahˇ maˬ ehˇ, aˇ maˇ laꞈ laꞈ ma-ahˇ maˬ ehˇ, aˇ maˇ kuiˇ kuiˇ ma-ahˇ maˬ ehˇ, ya lehꞈ meh.

²⁶ Piˇ ma gʼaˬ, yawˬ ha-euˬ aˇ caˇ laꞈ laꞈ zaˬ-ahˇ tsiˇ ui cuiˆ ya shehˆ ahˇ meh.

²⁷ Kʼoeˇ naˇ, aˬ yawꞈ-euˬ aˇ maˇ laꞈ laꞈ noeˇ neh, Sahˬpaˬ Miˬyehˇ-euˬ mehˬ shi, tsiˇ kʼoeˇ shiꞈ poˆ keuˆ ni ya byaˆ shehˬ meh.

²⁸ Yaw beh shiˬ yuˇ-awˇ lehꞈ-euˬ loꞈ-ehˇ, tsawˇ haˬ kʼoeˇ gʼaˬ-euˬ aˇ maˇ paw naˬ paꞈ naˬ dzaˬ-ahˇ maˬ ehˇ, aˇ maˇ laꞈ laꞈ ma-ahˇ maˬ ehˇ, aˇ maˇ kuiˇ kuiˇ ma-ahˇ maˬ ehˇ, tsiˇ kʼoeˇ neh piˇ ma gʼaˬ paˇ ya lehꞈ nehˬ meh.

²⁹ Aˬ yawꞈ-euˬ laꞈ kʼawˆ-ahˇ dzehˬ laˇ taˬ-euˬ tsiˇ kʼoeˇ, tsawˇ haˬ kʼoeˇ gʼaˬ-euˬ uˬ duˬ-ahˇ aˬ yawꞈ ya lehꞈ nehˬ meh. Kʼoeˇ loꞈ-ehˇ jahˇ-awˇ, bi muiˬ bi shawˇ laˇ-eu zahˇ ya jahˇ nehˬ meh.

³⁰ Kʼoeˇ naˇ, tsawˇ haˬ kʼoeˇ gʼaˬ kʼaˇ gʼeh nya-eu loꞈ-ehˇ, kʼaˬ kʼoeˬ nyiˬ mawˇ maˬ ngeuˇ naˇ, kʼaˬ guˬ nyiˬ mawˇ yuˇ-awˇ, heu loꞈ-ehˇ ya lawˇ meh.

³¹ Iˬ baˇ shawˇ-eu lawˇ-eu jeˬ gʼaˇ duˬ tiˬ mawˇ hawˇ-eu, miˬ dzaˬ dzah puiˆ-awˇ lawˇ-eu jeˬ gʼaˇ duˬ tiˬ mawˇ, dzaˬ la gʼo cehˇ lawˇ-eu jeˬ nehˬ-ehˇ ya lawˇ meh. Piˇ ma gʼaˬ kʼoeˇ loꞈ-ehˇ, bi muiˬ bi shawˇ laˇ-eu zahˇ ya jahˇ meh.

³² Heu-aˬ, yawˬ ha-euˬ gʼawˇ mawˇ bi shawˇ laˇ-eu gʼaˇ duˬ, zahˇ sahˇ kʼoꞈ jaˆ-eu loꞈ-ehˇ maˬ lawˇ maˬ shehˇ byah nehˬ nya-eu yaw shaˬ zaˬ deuˬ-ahˇ taꞈ-eu zahˇ sahˇ kʼoꞈ meh.

Nyawˬ naˇ-eu nymˇ

³³ Zahˇ sahˇ kʼoꞈ heu deuˬ, Moˇseˬ hawˇ-eu Aˬloˬ-ahˇ Sahˬpaˬ Miˬyehˇ biꞈ-euˬ meh.

³⁴ Heu-aˬ, nyawˬ naˇ-eu maˇ naˇ dawꞈ-eu nymˇ-ahˇ taꞈ-eu zahˇ sahˇ kʼoꞈ meh. Zahˇ sahˇ kʼoꞈ heu deuˬ-aˬ, Sahˬpaˬ Miˬyehˇ neh biꞈ-euˬ Kaˬnaˬ miˇ kʼahˬ-ahˇ Iˇsaˬleˬlaˆ tsawˇ haˬ deuˬ le keuˆ ngeh, Iˇsaˬleˬlaˆ tsawˇ haˬ deuˬ ya zmˬ-eu zahˇ sahˇ kʼoꞈ pyeuꞈ-eu meh.

³⁵ Yawˬ ha-euˬ nymˇ laꞈ kʼoeˇ, nyawˬ naˇ-eu maˇ naˇ ya mawˇ-eu tsawˇ haˬ aˬ geu gʼaˬ maˬ kaˬ, piˇ ma-ahˇ ya tsaꞈ gaˬ leˇ meh.

³⁶ Nymˇ kʼoeˇ nymˇ-ahˇ maˬ pyehˆ tseˇ haw-iˇ mi naˆ-ehˇ, kʼoeˇ gaˇ kʼaˇ jaˆ-eu myawˬ yawˬ jeˬ na luꞈ ya yuˇ doˆ jiˇ meh lehˇ, piˇ ma gʼaˬ dawˬ ya biꞈ taˬ meh. Kʼoeˇ loꞈ-ehˇ maˬ jahˇ naˇ, nymˇ kʼoeˇ nymˇ laꞈ kʼoeˇ kʼaˇ jaˆ-eu jeˬ dawˬ tawˆ luꞈ maˬ shawˇ-a lehˇ aˬ yawꞈ ya daˇ tsehˆ meh. Kʼoeˇ naˇ, nymˇ kʼoeˇ nymˇ-ahˇ iˇ-awˇ,

³⁷ nyawˬ naˇ-eu maˇ naˇ-ahˇ ya pyehˆ tseˇ haw meh. Nyoeˇ la la-eu, maˬ ngeuˇ naˇ, neˇ la la-eu maˇ naˇ deuˬ, nymˇ kaˇ pyawˇ-ahˇ dzaˬ naꞈ taˬ-euˬ gaˇ ya mawˇ naˇ,

³⁸ nymˇ laꞈ kʼoeˇ neh aˬ yawꞈ doˆ-iˇ-awˇ, shiꞈ nah keuˆ ni nymˇ laˇ gʼoˆ ya diˬ tehˬ taˬ meh.

³⁹ Shiꞈ nah aˬ yawꞈ nah-ahˇ, aˬ yawꞈ tiˬ poˆ paˇ ya pyehˆ tseˇ haw-iˇ meh. Nyawˬ naˇ-eu maˇ naˇ kʼoeˇ deuˬ paˇ myaˬ dzehˬ laˇ naˇ,

⁴⁰ maˇ naˇ kʼaˇ dawꞈ-eu kʼaˬ lo tsaˬ byaˆ deuˬ yuˇ doˆ-awˇ, meuˬ meuˬ dzeˇ paw maˬ shawˇ-eu jawˇ duˬ-ahˇ ya bi baꞈ dzeh meh.

⁴¹ Kʼoeˇ naˇ, laꞈ kʼoeˇ paw kaˇ pyawˇ dawˬ tawˆ luꞈ ya bi seuˆ shawˇ dzeh-awˇ, kʼaˇ seuˆ doˆ-euˬ miˇ tsaˬ deuˬ, meuˬ laꞈ nyiˇ maˬ shawˇ-eu jawˇ duˬ-ahˇ ya bi biˬ dzeh meh.

⁴² Kʼoeˇ naˇ, yuˇ dzeh-euˬ kʼaˬ lo tsaˬ byaˆ kʼoeˇ deuˬ jaˆ zaˇ-ahˇ, kʼaˬ lo tsaˬ byaˆ yaw shuiꞈ deuˬ paˇ ya dawˆ paˇ-awˇ, shaˬ jehˆ paˇ ya lehꞈ myahˬ meh.

⁴³ Nymˇ kʼoeˇ nymˇ-euˬ kʼaˬ lo tsaˬ byaˆ yuˇ doˆ gʼaˬ-awˇ, seuˆ shawˇ gʼaˬ-awˇ neh, miˇ tsaˬ paˇ lehꞈ myahˬ-awˇ laˆ saˆ gʼaˬ miˇ tsa, nyawˬ naˇ-eu maˇ naˇ paˇ doˆ laˇ naˇ,

⁴⁴ piˇ ma gʼaˬ paˇ ya haw-iˇ meh. Maˇ naˇ paˇ doˆ laˇ taˬ naˇ, nymˇ kʼoeˇ nymˇ maˬ shawˇ-a.

⁴⁵ Nymˇ kʼoeˇ nymˇ pyaˆ dzeh-awˇ, kʼaˬ lo tsaˬ byaˆ deuˬ, daˇ kawˬ deuˬ hawˇ-eu, miˇ tsaˬ dawˬ tawˆ luꞈ meuˬ meuˬ dzeˇ, maˬ muiˬ maˬ shawˇ-eu jawˇ duˬ-ahˇ ya baꞈ dzeh jiˇ meh.

⁴⁶ Nymˇ kʼoeˇ nymˇ-ahˇ laˇ gʼoˆ diˬ tehˬ taˬ ngeh, kʼaˇ uˇ leˇ-euˬ tsawˇ haˬ aˬ geu gʼaˬ maˬ kaˬ, uˬ ciꞈ paw keuˆ ni maˬ shawˇ-a.

⁴⁷ Nymˇ kʼoeˇ nymˇ laꞈ kʼoeˇ kʼaˇ yuꞈ-euˬ tsawˇ haˬ hawˇ-eu kʼaˇ dzaˬ kʼaˇ dawˇ-euˬ tsawˇ haˬ aˬ geu gʼaˬ maˬ kaˬ, yawˬ ha-euˬ mehˬ tsoeˬ ya lehˬ tsiˬ meh.

⁴⁸ Piˇ ma paˇ haw le ngeh, nymˇ kʼoeˇ nymˇ-ahˇ laˆ saˆ gʼaˬ naˇ kʼah, nyawˬ naˇ-eu maˇ naˇ paˇ doˆ laˇ taˬ-euˬ maˬ ya mawˇ naˇ, nymˇ kʼoeˇ nymˇ yaw shawˇ meh lehˇ aˬ yawꞈ ya daˇ tsehˆ meh. Aˬ jeˬ miˇ neh ehˇ naˇ, nyawˬ naˇ-eu maˇ naˇ kʼoeˇ byoˆ tsehˆ-euˬ meh.

⁴⁹ Nymˇ kʼoeˇ nymˇ-ahˇ mˇ shawˇ nehˬ-eu gʼaˇ duˬ, aˇ jiˇ nyiˬ mawˇ, shuˬ liˇ daˇ kawˬ, saˬ kahˇ neˇ, hiˇ soˆ baw nmˬ, heu deuˬ ya yuˇ laꞈ meh.

⁵⁰ Aˇ jiˇ tiˬ mawˇ aˬ yawꞈ yuˇ-awˇ, tsawˬ biˬ-ahˇ yoeˇ-eu iˇ cuꞈ kʼawꞈ ahˇ taˬ-euˬ miˇ tsaˬ oeˬ lahˬ kʼoeˇ taˆ ya sehꞈ daˆ meh.

⁵¹ Kʼoeˇ naˇ, siˬ daˬ miˬ shuˬ, hiˇ soˆ baw nmˬ hawˇ-eu, saˬ kahˇ neˇ heu deuˬ-ahˇ, aˇ jiˇ yaw dehꞈ kʼoeˇ mawˇ nehˬ-ehˇ tiˬ kawˆ loꞈ-ehˇ, tsawˬ biˬ-ahˇ kʼawꞈ-euˬ iˇ cuꞈ laꞈ kʼoeˇ sehꞈ duiˆ taˬ-euˬ aˇ jiˇ kʼoeˇ mawˇ-euˬ shiˬ-ahˇ dehˬ duiˆ-awˇ, nymˇ kʼoeˇ nymˇ-ahˇ shiꞈ poˆ keuˆ ni ya byaˆ shehˬ meh.

⁵² Kʼoeˇ loꞈ-ehˇ, aˇ jiˇ-euˬ shiˬ, tsawˬ biˬ iˇ cuꞈ, aˇ jiˇ yaw dehꞈ, siˬ daˬ miˬ shuˬ, hiˇ soˆ baw nmˬ hawˇ-eu, saˬ kahˇ neˇ heu deuˬ neh, nymˇ kʼoeˇ nymˇ-ahˇ aˬ yawꞈ ya mˇ shawˇ nehˬ meh.

⁵³ Kʼoeˇ naˇ, aˇ jiˇ yaw dehꞈ kʼoeˇ mawˇ-ahˇ aˬ yawꞈ pyehˬ-awˇ, meuˬ meuˬ dzeˇ paw ya bi zaw byoˆ gʼeh meh. Kʼoeˇ loꞈ-ehˇ nymˇ kʼoeˇ nymˇ bi shawˇ laˇ-eu zahˇ aˬ yawꞈ jahˇ ngeh, nymˇ kʼoeˇ nymˇ shawˇ laˇ-eu meh.

⁵⁴ Heu-aˬ, nyawˬ naˇ-eu jeˬ-ahˇ taꞈ leˇ-eu zahˇ dawˬ kʼoꞈ dawˬ meh.

^55-56 Maˇ naˇ deuˬ, shaˬ ciˬ deuˬ, maˇ lu deuˬ hawˇ-eu, nymˇ-ahˇ maˬ ehˇ, mehˬ tsoeˬ-ahˇ maˬ ehˇ, kʼaˇ dawꞈ leˇ taˬ-eu nyawˬ naˇ-eu maˇ naˇ deuˬ-ahˇ taꞈ-eu meh.

⁵⁷ Aˬ joˆ-ehˇ gʼeh naˇ, maˬ shawˇ-eu jeˬ pyeuꞈ-awˇ, aˬ joˆ-ehˇ gʼeh naˇ, shawˇ-eu jeˬ pyeuꞈ-eu gaˇ kawˆ, zahˇ dawˬ kʼoꞈ dawˬ heu deuˬ daˇ tsehˆ-eu meh.