Uˬ duˬ 12 - Akha

Zaˬ baw aˬ ma-ahˇ taꞈ-eu zahˇ sahˇ kʼoꞈ

¹ Moˇseˬ-ahˇ Sahˬpaˬ Miˬyehˇ zahˇ sahˇ kʼoꞈ heu deuˬ biꞈ-euˬ meh.

² Iˇsaˬleˬlaˆ tsawˇ haˬ deuˬ-ahˇ heu loꞈ-ehˇ ehˇ nehˬ-awˬ. Zaˬ miˬ zaˬ tiˬ gʼaˬ, aˬ li zaˬ nahˬ tiˬ gʼaˬ ciˬ-awˇ shiꞈ nah aˇ yamˬ laꞈ kʼoeˇ, aˬ yawꞈ ba la mawˇ ngeh loꞈ-ehˇ, maˬ shawˇ-eu aˇ yamˬ pyeuꞈ-eu meh.

³ Yehꞈ nah tiˬ nah-ahˇ, aˬ li kʼoeˇ li-ahˇ baˆ kʼoˆ mehˬ dzaˬ ya yehꞈ nehˬ meh.

⁴ Kʼoeˇ naˇ, shiˬ tsiˇ leˇ-awˇ shawˇ laˇ-eu gʼaˇ duˬ, dzaiˇ smˬ tseˇ smˬ nah paˇ ya dawˬ meh. Shawˇ laˇ-eu aˇ nah aˇ yamˬ maˬ byah laˇ kʼoeˇ keuˆ ni, muiˬ-eu shawˇ-eu jeˬ-ahˇ aˬ yawꞈ maˬ ya toeˬ ciˆ-a. Muiˬ-eu shawˇ-eu Sehˬ gʼawˆ-ahˇ maˬ ya uˇ leˇ-a.

⁵ Zaˬ miˬ zaˬ tiˬ gʼaˬ aˬ buˇ zaˬ nahˬ tiˬ gʼaˬ ciˬ ngeh, tseˇ oeˬ nah aˇ yamˬ laꞈ kʼoeˇ, ba la mawˇ ngeh loꞈ-ehˇ maˬ shawˇ-eu aˇ yamˬ pyeuꞈ-eu meh. Kʼoeˇ naˇ, shiˬ tsiˇ leˇ-awˇ shawˇ laˇ-eu gʼaˇ duˬ, dzaiˇ koꞈ tseˇ koꞈ nah paˇ ya dawˬ-eu meh.

⁶ Aˬ li ciˬ-euˬ maˬ ehˇ, aˬ buˇ ciˬ-euˬ maˬ ehˇ, shawˇ laˇ-eu aˇ nah aˇ yamˬ keuˆ laˇ ngeh, miˬ dzaˬ dzah puiˆ-awˇ lawˇ-eu jeˬ lawˇ-eu gʼaˇ duˬ, tiˬ myaˇ byah laˇ-euˬ yawˇ zaˬ tiˬ mawˇ hawˇ-eu, iˬ baˇ shawˇ-eu lawˇ-eu jeˬ lawˇ-eu gʼaˇ duˬ, kʼaˬ kʼoeˬ maˬ ngeuˇ naˇ kʼaˬ guˬ tiˬ mawˇ Sahˬpaˬ Miˬyehˇ jawˇ-eu Sehˬ gʼawˆ gʼoˆ kʼehˬ-ahˇ, piˇ ma jawˇ gaˇ aˬ yawꞈ ya yuˇ laꞈ-eu meh.

⁷ Aˬ yawꞈ neh yuˇ laꞈ-euˬ deuˬ Sahˬpaˬ Miˬyehˇ-ahˇ piˇ ma gʼaˬ lawˇ nehˬ-awˇ, aˬ yawꞈ-euˬ maˬ shawˇ-eu jeˬ-ahˇ shawˇ nehˬ-eu zahˇ ya jahˇ meh. Kʼoeˇ ngeh, aˬ yawꞈ shawˇ-eu tsawˇ haˬ pyeuꞈ laˇ-eu meh. Ehˇ dzeuˇ gʼaˬ-euˬ gaˇ kawˆ heu-aˬ, zaˬ miˬ zaˬ tiˬ gʼaˬ zaˬ ciˬ zaˬ cu mˇ gʼaˬ ngeh, ya mˇ-eu zahˇ sahˇ kʼoꞈ pyeuꞈ-eu meh.

⁸ Zaˬ miˬ zaˬ kʼoeˇ gʼaˬ yawˇ zaˬ maˬ jawˇ naˇ, kʼaˬ kʼoeˬ nyiˬ mawˇ, maˬ ngeuˇ naˇ kʼaˬ guˬ nyiˬ mawˇ ya yuˇ laꞈ meh. Miˬ dzaˬ dzah puiˆ-awˇ lawˇ-eu jeˬ lawˇ-eu gʼaˇ duˬ tiˬ mawˇ lawˇ-awˇ, iˬ baˇ shawˇ-eu lawˇ-eu jeˬ gʼaˇ duˬ tiˬ mawˇ ya lawˇ meh. Kʼoeˇ naˇ, aˬ yawꞈ laꞈ kʼoeˇ maˬ shawˇ-eu jeˬ bi shawˇ laˇ-eu zahˇ piˇ ma gʼaˬ mˇ-awˇ, ya bi shawˇ laˇ-eu meh.