Uˬ duˬ 10 - Akha

Naˬdehˇ hawˇ-eu Aˬbiˇhuˬ-euˬ iˬ baˇ

¹ Aˬloˬ-euˬ aˬ li Naˬdehˇ hawˇ-eu Aˬbiˇhuˬ aˬ nyaꞈ nmˇ-aˬ, miˬ jiˆ pehˆ ahˇ-eu guiˬ gʼawˆ yuˇ-awˇ, miˬ jiˆ pehˆ ahˇ-euˬ meh. Kʼoeˇ naˇ, yaw saw jeˬ dawˆ puiˆ-awˇ, Sahˬpaˬ Miˬyehˇ-ahˇ damˬ nehˬ-euˬ meh. Ehˇ kʼawꞈ, miˬ dzaˬ kʼoeˇ maˬ muiˬ maˬ shawˇ-a. Aˬ jeˬ miˇ neh ehˇ naˇ, kʼoeˇ loꞈ-ehˇ damˬ laˇ-awˬ lehˇ aˬ yawꞈ nyaꞈ-ahˇ Sahˬpaˬ Miˬyehˇ dawˬ biꞈ taˬ-euˬ maˬ jaˆ-a.

² Ja pyuˬ ni, Sahˬpaˬ Miˬyehˇ miˬ dzaˬ pyehˬ gʼeh leꞈ-awˇ, Sahˬpaˬ Miˬyehˇ-euˬ mehˬ shi, aˬ yawꞈ nyaꞈ-ahˇ miˬ dzaˬ puiˆ sehꞈ-euˬ meh.

³ Kʼoeˇ naˇ, Aˬloˬ-ahˇ Moˇseˬ ehˇ nehˬ-eu, “Sahˬpaˬ Miˬyehˇ neh ehˇ taˬ-euˬ gaˇ kawˆ-aˬ, heu loꞈ-ehˇ meh. Ngaˬ-euˬ gaˇ mˇ-eu tsawˇ haˬ dawˬ tawˆ luꞈ, ngaˬ-euˬ muiˬ-eu shawˇ-eu jeˬ-ahˇ yaw zeu ya baw meh. Ngaˬ-euˬ yaw shehꞈ kʼahˬ sehˇ ngaˬ-euˬ tsawˇ haˬ-ahˇ ngaˇ pah mehˬ nehˬ ma lehˇ ehˇ taˬ-euˬ meh.” Ehˇ kʼawꞈ, Aˬloˬ tiˬ jeˬ-iˬ maˬ ehˇ ni, ciˬ cuˇ ni jawˇ-euˬ meh.

⁴ Aˬloˬ-euˬ aˬ zawˇ Awˇzeˬlaˇ-euˬ aˬ li Miˇsheˬlaˇ hawˇ-eu Eˇlaˬzaˬpaˬ-ahˇ Moˇseˬ kuˇ-awˇ, heu loꞈ-ehˇ ehˇ nehˬ-euˬ meh. “Heu gaˇ laˇ-awˇ, naw nyaꞈ nmˇ-euˬ mehˇ nmˇ heu nyiˬ gʼaˬ-euˬ gʼawˇ mawˇ-ahˇ, muiˬ-eu shawˇ-eu sehˬ gʼawˆ ahˇ neh baꞈ doˆ gʼeh-awˇ, pu pu dzeˇ baꞈ gʼeh-awˬ.”

⁵ Kʼoeˇ ngeh, a yawꞈ nyaꞈ laˇ-awˇ, shiˇ taˬ-euˬ tsawˇ haˬ kʼoeˇ nyiˬ gʼaˬ-euˬ mehˬ tsoeˬ-ahˇ tsuˆ tehˬ-awˇ, pu pu dzeˇ sheu doˆ gʼeh-euˬ meh.

⁶ Aˬloˬ hawˇ-eu aˬ yawꞈ-euˬ aˬ li Eˇlaˬzaˬ hawˇ-eu Iˇdaˬmaˬ-ahˇ Moˇseˬ ehˇ nehˬ-eu, “Naw maꞈ noeˬ shaˬ-eu laꞈ kʼoeˇ tsawˇ ngoeˇ ngoeˇ luꞈ-eu gaˇ kawˆ bi siˬ bi mawˇ-eu gʼaˇ duˬ, uˬ duˬ tsehˇ kahˇ maˬ kaˆ juˇ ni jawˇ-eu maˬ ehˇ, mehˬ tsoeˬ cehˬ pyaˬ-eu maˬ ehˇ, taˬ jahˇ. Kʼoeˇ loꞈ-ehˇ jahˇ naˇ, naw maꞈ ya shiˇ-awˇ, Iˇsaˬleˬlaˆ tsawˇ haˬ aˇ maꞈ aˇ muˇ dawˬ tawˆ luꞈ-ahˇ Sahˬpaˬ Miˬyehˇ nui ma pehˇ tehꞈ-a. Ehˇ kʼawꞈ, naw maꞈ-euˬ cawˬ Iˇsaˬleˬlaˆ tsawˇ haˬ deuˬ-aˬ, Sahˬpaˬ Miˬyehˇ neh pyehˬ gʼeh leꞈ-euˬ miˬ dzaˬ baˬ da neh ya shiˇ-euˬ jeˬ gʼaˇ duˬ, tsawˇ ngoeˇ ngoeˇ nehˬ nya tehꞈ-a.

⁷ Sehˬ gʼawˆ-euˬ gʼoˆ kʼehˬ-ahˇ maˬ gʼawˬ-iˇ ni jawˇ-awˬ. Maˬ ngeuˇ naˇ, naw maꞈ ya shiˇ tehꞈ-a. Aˬ jeˬ miˇ neh ehˇ naˇ, tseˇ doˆ-euˬ deuˬ-ahˇ lehꞈ-eu Sahˬpaˬ Miˬyehˇ-euˬ tsiˇ neh lehꞈ-awˇ, naw maꞈ-euˬ gʼawˇ mawˇ a nehˬ taˬ-euˬ meh.” Kʼoeˇ ngeh, Moˇseˬ kʼaˇ ehˇ-eu loꞈ-ehˇ, aˬ yawꞈ maꞈ mˇ-euˬ meh.

Piˇ ma deuˬ ya caw teh-eu zahˇ sahˇ kʼoꞈ

⁸ Aˬloˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh.

⁹ “Nawˇ hawˇ-eu nawˬ-euˬ aˬ li deuˬ, aˬgaꞈ dzaˇ uiˇ maˬ ehˇ, bi yehꞈ laˇ-eu dzaˇ uiˇ tiˬ jeˬ na maˬ ehˇ dawˇ gʼaˬ naˇ, ngaˇ jawˇ-euˬ Sehˬ gʼawˆ laꞈ kʼoeˇ maˬ ya uˇ laˇ-a. Uˇ laˇ naˇ, naw maꞈ ya shiˇ tehꞈ-a. Heu-aˬ, nawˬ-euˬ zaˬ nawˬ-euˬ uˆ dawˬ tawˆ luꞈ ya caw teh-eu zahˇ pyeuꞈ-eu meh.

¹⁰ Miˬyehˇ-ahˇ taꞈ-eu jeˬ hawˇ-eu tsawˇ haˬ zaˬ-ahˇ taꞈ-eu jeˬ maˬ ehˇ, shawˇ-eu jeˬ hawˇ-eu maˬ shawˇ-eu jeˬ maˬ ehˇ, naw maꞈ ya tseˇ paˆ geuꞈ meh.

¹¹ Ngaˬ neh Moˇseˬ-ahˇ biꞈ-awˇ naw maꞈ-ahˇ bi biꞈ-euˬ zahˇ dawˬ kʼoꞈ dawˬ dawˬ tawˆ luꞈ, Iˇsaˬleˬlaˆ tsawˇ haˬ deuˬ-ahˇ naw maꞈ ya mehˬ ya tsoˆ nehˬ meh.”

¹² Aˬloˬ hawˇ-eu aˬ yawꞈ-euˬ aˬ li deuˬ laꞈ kʼoeˇ maˬ shiˇ ni dzeˇ-eu Eˇlaˬzaˬ hawˇ-eu Iˇdaˬmaˬ-ahˇ, Moˇseˬ heu loꞈ-ehˇ ehˇ nehˬ-euˬ meh. “Sahˬpaˬ Miˬyehˇ-ahˇ lawˇ-eu dzaˬ dzaˬ dawˇ dawˇ deuˬ laꞈ kʼoeˇ, dzehˬ laˇ-euˬ dzaˬ la gʼo cehˇ lawˇ-eu jeˬ kʼoeˇ yuˇ-awˇ, dehˬ tseˬ maˬ ahˇ-eu kaˬ muˇ jahˇ-awˇ lawˇ duˬ-euˬ dawˬ peh jawˇ-awˇ dzaˬ-awˬ. Aˬ jeˬ miˇ neh ehˇ naˇ, lawˇ-eu jeˬ kʼoeˇ-aˬ, muiˬ dui shawˇ dui dui-eu meh.

¹³ Muiˬ-eu shawˇ-eu jawˇ duˬ tiˬ tsahˇ-ahˇ, dzaˇ kʼoeˇ dzaˬ-awˬ. Kʼoeˇ-aˬ, Sahˬpaˬ Miˬyehˇ-ahˇ lawˇ nehˬ-euˬ dzaˬ dzaˬ dawˇ dawˇ deuˬ laꞈ kʼoeˇ, nawˇ hawˇ-eu nawˬ li deuˬ-ahˇ oꞈ-eu shaˬ bymˇ meh lehˇ, Sahˬpaˬ Miˬyehˇ dawˬ biꞈ taˬ-euˬ meh.

¹⁴ Ehˇ kʼawꞈ, piˇ ma deuˬ gʼaˇ duˬ, muiˬ-eu laꞈ sawˬ hawˇ-eu muiˬ-eu damˬ-eu jeˬ loꞈ-ehˇ Sahˬpaˬ Miˬyehˇ-ahˇ damˬ nehˬ-euˬ jeˬ zaˬ-eu kʼahˬ hawˇ-eu aˬ kuiˇ deuˬ-ahˇ, nawˇ hawˇ-eu nawˬ-euˬ miˬ sawˇ zaˬ dawˬ tawˆ luꞈ dzaˬ nya meh. Shawˇ-eu jawˇ duˬ laꞈ kʼoeˇ, kʼoeˇ deuˬ-ahˇ naw maꞈ ya dzaˬ meh. Kʼoeˇ-aˬ, Iˇsaˬleˬlaˆ tsawˇ haˬ deuˬ-euˬ cawˬ cawˬ taꞈ-eu lawˇ-eu jeˬ laꞈ kʼoeˇ, nawˇ hawˇ-eu nawˬ-euˬ zaˬ deuˬ-ahˇ biꞈ taˬ-euˬ naw maꞈ-ahˇ oꞈ-eu shaˬ bymˇ meh.

¹⁵ Jeˬ zaˬ-euˬ tsiˇ yuˇ-awˇ, dzaˬ dzaˬ dawˇ dawˇ lawˇ-eu jeˬ Sahˬpaˬ Miˬyehˇ-ahˇ lawˇ nehˬ ngeh, aˬ kuiˇ hawˇ-eu kʼahˬ aˬ yawꞈ maꞈ yuˇ laꞈ tehꞈ-a. Sahˬpaˬ Miˬyehˇ neh dawˬ biꞈ taˬ-euˬ loꞈ-ehˇ, aˬ kuiˇ hawˇ-eu kʼahˬ kʼoeˇ-aˬ, aˬ myah luꞈ nawˇ hawˇ-eu nawˬ-euˬ zaˬ deuˬ ahˇ oꞈ-eu shaˬ bymˇ pyeuꞈ-eu meh.”

¹⁶ Iˬ baˇ shawˇ-eu lawˇ-eu jeˬ gʼaˇ duˬ ciꞈ myehꞈ gaˇ kawˆ Moˇseˬ naˇ haˬ ngeh, miˬ dzaˬ-ahˇ dzah puiˆ gʼaˬ dzeuˇ-euˬ gaˇ,aˬ yawꞈ ya siˬ-euˬ meh. Kʼoeˇ loꞈ-ehˇ jahˇ-euˬ miˇ neh, Eˇlaˬzaˬ hawˇ-eu Iˇdaˬmaˬ-ahˇ aˬ yawꞈ nui ma pehˇ-awˇ, heu loꞈ-ehˇ ehˇ nehˬ-euˬ meh.

¹⁷ “Aˬ jeˬ miˇ neh iˬ baˇ shawˇ-eu lawˇ-eu jeˬ-ahˇ muiˬ-eu shawˇ-eu jawˇ duˬ laꞈ kʼoeˇ naw maꞈ maˬ dzaˬ te. Kʼoeˇ-aˬ, muiˬ dui shawˇ dui dui-awˇ, Iˇsaˬleˬlaˆ tsawˇ haˬ aˇ maꞈ aˇ muˇ deuˬ-euˬ iˬ baˇ shawˇ dzeh-eu gʼaˇ duˬ, Sahˬpaˬ Miˬyehˇ neh naw maꞈ-ahˇ biꞈ taˬ-euˬ jeˬ pyeuꞈ-eu meh.

¹⁸ Jeˬ zaˬ kʼoeˇ mawˇ-euˬ shiˬ-ahˇ, muiˬ-eu shawˇ-eu jawˇ duˬ laꞈ kʼoeˇ maˬ yuˇ ahˇ gʼeh-euˬ miˇ neh, ngaˬ neh naw maꞈ-ahˇ dawˬ biꞈ taˬ-euˬ loꞈ-ehˇ, lawˇ-euˬ shaˬ jiˇ kʼoeˇ-ahˇ, jawˇ duˬ kʼoeˇ tsahˇ-ahˇ dzaˬ-eu tsaˬ meh.”

¹⁹ Moˇseˬ-ahˇ Aˬloˬ ehˇ kʼoꞈ nehˬ-eu, “Iˬ baˇ shawˇ-eu lawˇ-eu jeˬ-ahˇ, iˬ nah ngaˇ dzaˬ gʼaˬ-euˬ law nmˇ-aˬ, aˬ joˆ-ehˇ gʼeh nmˇ. Kʼoeˇ loꞈ-ehˇ jahˇ-euˬ baˬ da neh, Sahˬpaˬ Miˬyehˇ laˬ kʼaˬ cehˇ tehꞈ-a loˇ. Iˬ nah Iˇsaˬleˬlaˆ tsawˇ haˬ deuˬ aˬ yawꞈ maꞈ-euˬ iˬ baˇ shawˇ-eu lawˇ-eu jeˬ lawˇ nehˬ laˇ-awˇ, miˬ dzaˬ dzah puiˆ-awˇ lawˇ-eu jeˬ yuˇ laꞈ-eu meh. Ehˇ kʼawꞈ, heu loꞈ-ehˇ guˆ laˆ paˬ-ehˇ gʼeh-eu jeˬ ngaˬ-euˬ kʼoeˇ taˆ paˇ keuˆ le-euˬ nga.”

²⁰ Dawˬ kʼoeˇ dawˬ-ahˇ Moˇseˬ ya gaˬ ngeh, nui kʼahˇ shiˇ-euˬ meh.