Uˬ duˬ 1 - Akha

Miˬ dzaˬ-ahˇ dzah puiˆ-awˇ lawˇ-eu jeˬ

¹ Sahˬpaˬ Miˬyehˇ jawˇ-eu Sehˬ gʼawˆ-ahˇ neh, Moˇseˬ-ahˇ Sahˬpaˬ Miˬyehˇ kuˇ-awˇ, zahˇ sahˇ kʼoꞈ heu deuˬ biꞈ nehˬ-euˬ meh.

² Zahˇ sahˇ kʼoꞈ heu deuˬ-aˬ, Iˇsaˬleˬlaˆ tsawˇ haˬ deuˬ lawˇ ngeh shehˇ ngeh, ya caw teh-eu zahˇ sahˇ kʼoꞈ deuˬ pyeuꞈ-eu meh. Tsawˇ haˬ tiˬ gʼaˬ na jeˬ zaˬ lawˇ ngeh lawˇ-eu mawˇ neˇ maˬ ehˇ, yawˇ maˬ ehˇ, ciꞈ myehꞈ maˬ ehˇ, aˬ yawꞈ neh cu taˬ-euˬ jeˬ zaˬ ya bi pyeuꞈ-eu meh.

³ Miˬ dzaˬ dzah puiˆ-awˇ lawˇ-eu jeˬ gʼaˇ duˬ mawˇ neˇ lawˇ mawꞈ naˇ, maˇ byawꞈ maˬ baw-eu mawˇ neˇ mawˇ gaw tiˬ mawˇ aˬ yawꞈ ya tsahˇ laꞈ meh. Aˬ yawꞈ neh lawˇ nehˬ-euˬ jeˬ-ahˇ Sahˬpaˬ Miˬyehˇ bi ha geuꞈ-eu gʼaˇ duˬ, mawˇ neˇ kʼoeˇ mawˇ-ahˇ, Sahˬpaˬ Miˬyehˇ jawˇ-eu Sehˬ gʼawˆ gʼoˆ kʼehˬ-ahˇ ya tsahˇ keuˆ laꞈ meh.

⁴ Kʼoeˇ naˇ, mawˇ neˇ kʼoeˇ mawˇ-euˬ uˬ duˬ kʼoeˇ taˆ aˬ yawꞈ-euˬ aˬ laꞈ ya baꞈ daˆ meh. Kʼoeˇ ngeh, aˬ yawꞈ-euˬ iˬ baˇ bi pi dzeh-eu gʼaˇ duˬ lawˇ-eu jeˬ pyeuꞈ-eu mawˇ neˇ kʼoeˇ mawˇ-ahˇ ha geuꞈ nehˬ tehꞈ-a.

⁵ Aˬ yawꞈ-euˬ mawˇ neˇ kʼoeˇ mawˇ-ahˇ, kʼoeˇ gaˇ aˬ yawꞈ ya sehꞈ meh. Kʼoeˇ naˇ, Aˬloˬ-euˬ aˬ li piˇ ma deuˬ, Sahˬpaˬ Miˬyehˇ jawˇ gaˇ mawˇ neˇ kʼoeˇ mawˇ-euˬ shiˬ yuˇ gʼeh-awˇ, sehˬ gʼawˆ gʼoˆ kʼehˬ-ahˇ jaˆ-eu lawˇ duˬ kʼoeˇ hmˬ-euˬ oeˬ paw pyawˬ luꞈ-ahˇ ya byaˆ shehˬ meh.

⁶ Kʼoeˇ naˇ, tsawˇ haˬ kʼoeˇ gʼaˬ mawˇ neˇ kʼoeˇ mawˇ pyaˆ-awˇ ya deuˆ meh.

⁷ Piˇ ma deuˬ-aˬ, lawˇ duˬ kʼoeˇ taˆ miˬ dzaˬ gahˬ daˆ-awˇ, miˬ dzaˬ ya baw doꞈ-eu meh.

⁸ Uˬ duˬ hawˇ-eu tsiˇ ahˇ leˇ-ehˇ, deuˆ tm taˬ-euˬ mawˇ neˇ kʼoeˇ mawˇ-euˬ shaˬ jiˇ kʼoeˇ deuˬ, miˬ dzaˬ kʼoeˇ taˆ ya dzah puiˆ-eu meh.

⁹ Tsawˇ haˬ kʼoeˇ gʼaˬ tsahˬ nahˬ uˇ jiˇ deuˬ hawˇ-eu aˬ kuiˇ deuˬ ya tsiˬ shawˇ-awˇ, aˬ yuiꞈ geuꞈ-awˇ gaˇ mˇ luꞈ-eu piˇ ma gʼaˬ-aˬ, mawˇ neˇ kʼoeˇ mawˇ mawˇ lah ni lawˇ duˬ kʼoeˇ taˆ ya dzah puiˆ meh. Heu loꞈ-ehˇ lawˇ-euˬ dzaˬ dzaˬ dawˇ dawˇ lawˇ-eu yaw saꞈ kʼoeˇ-ahˇ, Sahˬpaˬ Miˬyehˇ nui ma tsaˬ-eu meh.

¹⁰ Tsawˇ haˬ tiˬ gʼaˬ na, yawˬ ha-euˬ yawˇ maˬ ehˇ, ciꞈ myehꞈ maˬ ehˇ, lawˇ mawꞈ naˇ, maˇ byawꞈ maˬ baw-eu yawˇ aˬ buˬ maˬ ngeuˇ naˇ, maˇ byawꞈ maˬ baw-eu ciꞈ myehꞈ ciꞈ buˬ ya lawˇ meh.

¹¹ Jeˬ zaˬ kʼoeˇ mawˇ-ahˇ, lawˇ duˬ-euˬ laꞈ taˆ paw pyawˬ-ahˇ aˬ yawꞈ ya sehꞈ-awˇ, piˇ ma deuˬ jeˬ zaˬ kʼoeˇ mawˇ-euˬ shiˬ yuˇ-awˇ, lawˇ duˬ-euˬ oeˬ paw pyawˬ luꞈ-ahˇ ya byaˆ shehˬ meh.

¹² Tsawˇ haˬ kʼoeˇ gʼaˬ jeˬ zaˬ kʼoeˇ mawˇ pyaˆ-awˇ deuˆ gʼaˬ ngeh, uˬ duˬ hawˇ-eu tsiˇ ahˇ leˇ-ehˇ, deuˆ tm taˬ-euˬ jeˬ zaˬ kʼoeˇ mawˇ-euˬ shaˬ jiˇ dawˬ tawˆ luꞈ-ahˇ, aˬ yuiꞈ geuꞈ-awˇ gaˇ mˇ luꞈ-eu piˇ ma gʼaˬ yuˇ-awˇ, miˬ dzaˬ-ahˇ ya dzah puiˆ meh.

¹³ Jeˬ zaˬ kʼoeˇ mawˇ-euˬ tsahˬ nahˬ uˇ jiˇ deuˬ hawˇ-eu aˬ kuiˇ deuˬ-ahˇ tsawˇ haˬ kʼoeˇ gʼaˬ ya tsiˬ shawˇ meh. Kʼoeˇ naˇ, lawˇ-eu jeˬ kʼoeˇ-ahˇ, piˇ ma gʼaˬ Sahˬpaˬ Miˬyehˇ jawˇ gaˇ yuˇ gʼeh-awˇ, mawˇ lah-ehˇ lawˇ duˬ kʼoeˇ taˆ dzah puiˆ-awˇ ya lawˇ meh. Heu loꞈ-ehˇ lawˇ-eu dzaˬ dzaˬ dawˇ dawˇ lawˇ-eu jeˬ-euˬ yaw saꞈ-ahˇ, Sahˬpaˬ Miˬyehˇ nui ma tsaˬ-eu meh.

¹⁴ Tsawˇ haˬ tiˬ gʼaˬ na, aˇ jiˇ tiˬ mawˇ yuˇ-awˇ, miˬ dzaˬ-ahˇ dzah puiˆ-awˇ lawˇ-eu jeˬ lawˇ mawꞈ naˇ, kʼaˬ kʼoeˬ maˬ ngeuˇ naˇ kʼaˬ guˬ ya lawˇ meh.

¹⁵ Piˇ ma gʼaˬ, aˇ jiˇ kʼoeˇ mawˇ-ahˇ lawˇ duˬ jaˆ gaˇ yuˇ gʼeh-awˇ, kawˬ lahˇ ya yeuꞈ tsehˆ meh. Kʼoeˇ naˇ, uˬ duˬ yuˇ-awˇ, lawˇ duˬ kʼoeˇ taˆ ya puiˆ meh. Aˇ jiˇ kʼoeˇ mawˇ-euˬ shiˬ nyehꞈ dzeˇ-awˇ, lawˇ duˬ-euˬ gaˇ dzeˇ paw ya bi yoeˇ lehꞈ meh.

¹⁶ Behˇ jiˇ gʼeu tsehˆ doˆ-awˇ, lawˇ duˬ-euˬ nahˇ ma doˆ kʼehˬ paw paˆ, kʼaˬ lehˇ tawˆ taˬ duˬ-ahˇ ya biˬ dzeh meh.

¹⁷ Aˇ jiˇ kʼoeˇ mawˇ-euˬ a dahˇ-ahˇ aˬ yawꞈ tuˆ tehˬ-awˇ, aˬ dahˇ maˬ gʼeu tsehˆ doˆ-ehˇ, ya ngawˬ paˆ meh. Kʼoeˇ naˇ, mawˇ lah-ehˇ lawˇ duˬ kʼoeˇ taˆ ya dzah puiˆ meh. Heu loꞈ-ehˇ lawˇ-euˬ dzaˬ dzaˬ dawˇ dawˇ lawˇ-eu yaw saꞈ-ahˇ, Sahˬpaˬ Miˬyehˇ nui ma tsaˬ-eu meh.