Piˇliˇpiˆ 3 - Akha

Maˇ maˇ ni Miˬyehˇ-ahˇ tsaˬ leˇ dzoeˇ leˇ-eu jeˬ

¹ Aˬ yuiꞈ aˬ nyiˇ Ka li zaˬ deuˬ-oˇ, aˇ saˬ saˬ-eu dawˬ heu loꞈ-ehˇ ehˇ mawꞈ-eu ma. Sahˬpaˬ Yeˬsuˇ laꞈ kʼoeˇ laˬ kʼaˬ cehˇ-awˬ. Boꞈ dzeuˇ yaꞈ-euˬ jeˬ-ahˇ paˇ boꞈ poˆ-eu gʼaˇ duˬ ngaˇ nymˇ gawˬ maˬ gawˬ. Kʼoeˇ-aˬ, naw maꞈ guˆ kʼaˇ za-eu jeˬ bi teˬ-iˇ-eu gʼaˇ duˬ ma.

² Yaw haiˬ jeˬ mˇ-eu tsawˇ haˬ kʼoeˇ deuˬ-ahˇ yahˇ-awˬ. Aˬ kuiˬ kʼoeˇ deuˬ-ahˇ yahˇ-awˬ. Yawˬ ha-euˬ gʼawˇ mawˇ-ahˇ yehˬ-eu pyehˆ-eu tsawˇ haˬ kʼoeˇ deuˬ-ahˇ yahˇ-awˬ.

³ Dawˇ coe ni ya ehˇ naˇ, maˇ maˇ ni baˆ kʼoˆ mehˬ dzaˬ yehˬ-euˬ tsawˇ haˬ deuˬ-aˬ, aˬ yawꞈ maꞈ maˬ ngeuˇ-a. Aˬ dui maꞈ ma. Aˬ jeˬ miˇ neh ehˇ naˇ, Yaw sahˇ Miˬyehˇ-ahˇ gʼoe-eu laꞈ kʼoeˇ Miˬyehˇ-ahˇ aˬ dui u duˬ tahˬ-awˇ, Yeˬsuˇ Ka li laꞈ kʼoeˇ yaw dehꞈ dehꞈ-eu jeˬ-ahˇ aˬ dui laˬ kʼaˬ cehˇ-eu ma. Laꞈ nyiˇ paw mˇ mawˇ nya-eu zahˇ sahˇ kʼoꞈ deuˬ-ahˇ aˬ dui gʼoe-eu maˬ ngeuˇ.

⁴ Ngaˇ kʼawꞈ, kʼoeˇ loꞈ-ehˇ gʼeh-eu deuˬ-ahˇ gʼoe mawꞈ naˇ gʼoe nya ma. Laꞈ nyiˇ paw mˇ mawˇ nya-eu zahˇ sahˇ kʼoꞈ deuˬ-ahˇ gʼoe nya ma lehˇ aˬ cawˬ noeˬ-eu ngeuˇ naˇ, ngaˇ-aˬ, kʼoeˇ naˆ maˬ tseˇ noeˬ nya-eu gaˇ ma dahˇ ma.

⁵ Ngaˇ-aˬ, dehꞈ le-awˇ tiˬ jaw byah laˇ ngeh neh baˆ kʼoˆ mehˬ dzaˬ bi yehˬ-euˬ tsawˇ haˬ ma. Iˇsaˬleˬlaˇ tsawˇ jeuˬ laꞈ kʼoeˇ ahˇ-eu Beˬyaˬmiˬ tsawˇ jeuˬ tiˬ gʼaˬ ma. Maˇ maˇ ni shawˇ jehˆ ni gʼeh-eu Heˬbyehˇ tsawˇ haˬ ma. Yuˇdaˆ tsawˇ haˬ-euˬ Zahˇ dawˬ kʼoꞈ dawˬ mehˬ nah caw teh-eu paw dzeˇ neh paˇ ehˇ leꞈ naˇ, ngaˇ-aˬ, Paˬliˬsehˇ tiˬ gʼaˬ ma.

⁶ Miˬyehˇ-euˬ nui kʼahˇ mˇ byah mawꞈ dui dui-eu miˇ neh Ka li zaˬ aˇ muˇ-ahˇ kʼehˬ nehˬ kʼaˆ nehˬ haw-euˬ tsawˇ haˬ ma. Zahˇ dawˬ kʼoꞈ dawˬ-ahˇ mˇ byah-eu baˬ da neh tsawˇ haˬ zaˬ Miˬyehˇ-ahˇ tsaˬ leˇ tsahˇ leˇ nya lawˬ naˇ, ngaˇ-aˬ, ehˇ kʼaˇ maˬ za ni mˇ byah-euˬ tsawˇ haˬ tiˬ gʼaˬ ma.

⁷ Ehˇ kʼawꞈ, ngaˬ-euˬ gʼaˇ duˬ jiˇ jeuˬ ahˇ ma lehˇ ngaˬ neh kʼaˇ sawˇ taˬ-euˬ kʼoeˇ deuˬ dawˬ tawˆ luꞈ, Ka li-euˬ gʼaˇ duˬ smˬ-eu jeˬ pyeuꞈ law hawˇ ngaˬ lehˇ, nymˬ-mˇ sawˇ duˬ gʼaˬ-euˬ ma.

⁸ Kʼoeˇ naˆ ni tehꞈ-ehˇ maˬ ngeuˇ-a siˬ. Gaˇ dahˇ tsoeˬ dzehˬ-eu jeˬ pyeuꞈ-eu ngaˬ-euˬ Sahˬpaˬ Yeˬsuˇ Ka li-ahˇ siˬ nya-eu jeˬ-ahˇ shaˇ cehˆ haw ngeh, ngaˬ neh kʼaˇ mˇ dzeuˇ-euˬ yawˬ jeˬ na luꞈ maˇ maˇ ni smˬ dui dui-eu jeˬ tehꞈ law hawˇ ngaˬ lehˇ sawˇ duˬ gʼaˬ-euˬ ma. Ka li-ahˇ ngaˇ geuꞈ mawꞈ dzehˬ-eu miˇ neh, ngaˬ neh kʼaˇ mˇ kʼaˇ shaˇ dzeuˇ yaꞈ-euˬ jeˬ dawˬ tawˆ luꞈ bi smˬ-iˇ jiˇ-euˬ ma. Ka li-ahˇ ngaˇ za nya ni, kʼoeˇ deuˬ dawˬ tawˆ luꞈ-ahˇ yaˆ dzeh-euˬ jaˆ guˬ jaˆ meuˬ loꞈ-ehˇ tehꞈ-ehˇ sawˇ-euˬ ma.

⁹ A yawꞈ laꞈ kʼoeˇ tiˬ byah tiˬ loꞈ ya jawˇ ni, ngaˇ kʼoeˇ loꞈ-ehˇ sawˇ-euˬ ma. Zahˇ dawˬ kʼoꞈ dawˬ-ahˇ mˇ byah-eu baˬ da neh za nya meh lehˇ sawˇ taˬ-euˬ ngaˬ neh mˇ za-euˬ Miˬyehˇ-ahˇ tsaˬ leˇ tsahˇ leˇ-eu kʼoeˇ hmˬ tiˬ pawꞈ-iˬ maˬ paˇ ahˇ ma. Nymˬ-mˇ ngaˇ za taˬ-euˬ Miˬyehˇ-ahˇ tsaˬ leˇ tsahˇ leˇ-eu heu-aˬ, ngaˇ Ka li-ahˇ jah-eu baˬ da neh za taˬ-euˬ ma. Heu-aˬ, jah-eu kʼoeˇ taˆ Miˬyehˇ neh biꞈ nehˬ laꞈ-euˬ Miˬyehˇ-ahˇ tsaˬ leˇ tsahˇ leˇ-eu jeˬ pyeuꞈ-eu meh.

¹⁰ Ngaˇ geuꞈ mawꞈ-eu jeˬ-aˬ, Ka li-ahˇ siˬ nya-awˇ gʼoꞈ dehꞈ laˇ-euˬ Ka li neh mˇ yaꞈ-euˬ jeˬ-ahˇ mˇ nya laˇ mawꞈ-eu tiˬ jeˬ, aˬ yawꞈ kʼaˇ ya daˬ-euˬ loꞈ-ehˇ daˬ-awˇ aˬ yawꞈ kʼaˇ shiˇ-euˬ loꞈ-ehˇ shiˇ mawꞈ-eu tiˬ jeˬ,

¹¹ shiˇ-eu jeˬ laꞈ kʼoeˇ Miˬyehˇ ngaˬ-ahˇ bi gʼoꞈ dehꞈ laˇ tehꞈ-a lehˇ noeˬ tmˬ-eu tiˬ jeˬ, heu tehꞈ ma.

Laꞈ sawˬ za ni cehˆ ceh ceh-eu

¹² Ngaˇ heu loꞈ-ehˇ ehˇ-eu-aˬ, nymˬ-mˇ za gʼaˬ-euˬ ma lehˇ ehˇ-eu maˬ ngeuˇ. Byah laˇ gʼaˬ-euˬ ma lehˇ ehˇ-eu kʼawꞈ maˬ ngeuˇ. Yeˬsuˇ Ka li neh ngaˬ-ahˇ aˬ yawꞈ-euˬ tsawˇ haˬ bi pyeuꞈ laˇ-euˬ loꞈ-ehˇ, laꞈ sawˬ kʼoeˇ-ahˇ ngaˇ za nya ni leh jeh luꞈ-eu ma.

¹³ Aˬ yuiꞈ aˬ nyiˇ Ka li zaˬ deuˬ-oˇ, laꞈ sawˬ kʼoeˇ-ahˇ za gʼaˬ-euˬ ma lehˇ ngaˇ maˬ noeˬ. Ehˇ kʼawꞈ, ngaˇ mˇ luꞈ-eu tiˬ jeˬ-aˬ, naˇ kʼah paw mˇ dzeuˇ yaꞈ-euˬ jeˬ-ahˇ ngehˇ dzeh yaꞈ-awˇ, mehˬ hu paw mˇ paˬ-ehˇ jaˆ luꞈ-eu jeˬ-ahˇ miˇ leˇ ni leh jeh luꞈ-eu ma.

¹⁴ Kʼoeˇ miˇ neh, laꞈ sawˬ za nya-eu gʼaˇ duˬ cehˆ keuˆ duˬ-ahˇ dawˇ coe ni cehˆ gʼeh luꞈ-eu ma. Cehˆ keuˆ duˬ kʼoeˇ-aˬ, mˬ kʼoeˇ taˆ ya jawˇ ni Yeˬsuˇ Ka li-ahˇ gʼoe-eu laꞈ kʼoeˇ Miˬyehˇ aˬ dui-ahˇ kuˇ luꞈ-eu kʼoeˇ meh.

¹⁵ Guiˬ lahˬ saꞈ laˇ paw tsawˇ kʼaˆ kʼaˆ laˇ-euˬ aˬ dui dawˬ tawˆ luꞈ, kʼoeˇ loꞈ-ehˇ nui ma taˬ-eu tsaˬ meh. Ehˇ kʼawꞈ, naw maꞈ tiˬ paˆ na deuˬ nui ma taˬ-eu yawˬ jeˬ yawˬ jaˆ naˇ, naw maꞈ-ahˇ geuˇ-eu loꞈ-ehˇ gʼoˆ shaw nya ni Miˬyehˇ caw ba nehˬ laꞈ tehꞈ-a.

¹⁶ Aˬ geu gʼaˬ aˬ joˆ-ehˇ nui ma taˬ kʼawꞈ, aˬ dui neh caw teh gʼeh laꞈ-euˬ zahˇ sahˇ kʼoꞈ heu hmˬ-ahˇ tehꞈ-ehˇ caw teh-awˇ, ti kawˆ loꞈ-ehˇ mˇ daˆ shaˇ daˆ leꞈ kaˇ-euˇ.

¹⁷ Aˬ yuiꞈ aˬ nyiˇ Ka li zaˬ deuˬ-oˇ, ngaˇ yaw dehꞈ dehꞈ gaˇ dzaw geuꞈ-awˬ. Naw maꞈ bi caw teh-eu gʼaˇ duˬ nga maꞈ neh mehˬ taˬ yaꞈ-euˬ jeˬ-ahˇ caw teh luꞈ-eu tsawˇ haˬ deuˬ-ahˇ haw geuꞈ-awˬ.

¹⁸ Ngaˇ naw maꞈ-ahˇ gʼawˬ mya poˆ ehˇ dzeuˇ-euˬ dawˬ kʼoeˇ dawˬ-ahˇ, nymˬ-mˇ myaˆ biˇ doˆ-eu laꞈ kʼoeˇ tiˬ poˆ paˇ ehˇ poˆ-eu ma. Tsawˇ haˬ gʼawˬ mya gʼaˬ, Ka li kamˇ shiˇ-euˬ laꞈ yaꞈ-ahˇ muiˇ-eu jeˬ-ehˇ yaw dehꞈ dehꞈ luꞈ meh lehˇ ngaˇ paˇ ehˇ poˆ-eu ma.

¹⁹ Aˬ yawꞈ maꞈ-aˬ, shiˬ buiˇ lah ma-ahˇ aˇ saˬ ya saˬ-iˇ meh. Aˬ jeˬ miˇ neh ehˇ naˇ, aˬ yawꞈ maꞈ-euˬ shiˬ shaˬ jiˇ nui kʼahˇ-aˬ, aˬ yawꞈ maꞈ-euˬ miˬyehˇ meh. Aˬ yawꞈ maꞈ-aˬ, yawˬ ha shaꞈ dawˇ paˬ-ehˇ gʼeh-eu jeˬ-ahˇ maˬ shaꞈ dawˇ ni jahˇ gʼeh haw-awˇ, miˇ tsaˬ shiˬ shaˬ jiˇ-ahˇ taꞈ-eu jeˬ tehꞈ-ehˇ shaˇ noeˬ luꞈ-eu meh.

²⁰ Aˬ dui-aˬ, mˬ taˆ miˇ kʼahˬ zaˬ deuˬ pyeuꞈ-awˇ, aˬ dui-euˬ Ka kʼoꞈ-eu gʼaˬ pyeuꞈ-eu Sahˬpaˬ Yeˬsuˇ Ka li mˬ kʼoeˇ taˆ neh zaꞈ ka le gaˇ nui ma keuˆ-awˇ dawˬ luꞈ-eu tsawˇ haˬ deuˬ ma.

²¹ Kʼaˇ jawˇ kʼaˇ jaˆ-eu jeˬ dawˬ tawˆ luꞈ, aˬ yawꞈ uˆ lahˇ-eu uˬ moˆ bi jawˇ ni jahˇ nya-eu aˬ yawꞈ-euˬ baoˬ kʼoeˇ-ahˇ gʼoe-awˇ, buꞈ-iˇ cehˇ-iˇ nya-eu aˬ dui-euˬ gʼawˇ mawˇ heu-ahˇ, yaw shehꞈ kʼahˬ sehˇ byah-eu aˬ yawꞈ-euˬ gʼawˇ mawˇ-ahˇ duˇ leˇ ni beˬ paˇ nehˬ laꞈ tehꞈ-a.