Panmaeq 6 - AkhaDiˬ taˬ-euˬ jmˬ deuˬ 1 Kʼoeˇ naˇ, Yawˇzaˬ kʼoeˇ mawˇ jmˬ diˬ taˬ-euˬ yaw beh hmˬ-ahˇ ngawˬ paˆ gaˇ ngaˇ mawˇ-euˬ ma. Kʼoeˇ ngeh, dehꞈ luꞈ-eu jeˬ zaˬ kʼoeˇ oeˬ mawˇ laꞈ kʼoeˇ tiˬ mawˇ, “Laˇ-awˬ” lehˇ mˬ jeˬ jeˬ-eu teˇ saˇ loꞈ-ehˇ ehˇ gaˇ ngaˇ ya gaˬ-euˬ ma. 2 Ngaˇ haw gʼeh ngeh, mahˬ mahˬ pyuˇ tiˬ mawˇ mawˇ-euˬ ma. Mahˬ dziˬ luꞈ-eu gʼaˬ kaˆ tiˬ kahˇ baꞈ luꞈ-awˇ, aˬ yawꞈ-ahˇ shuiˇ uˬ kʼoˆ biꞈ nehˬ-awˇ, gʼaˬ leˇ-euˬ tsawˇ haˬ loꞈ-ehˇ guiˇ deuˆ gʼaˬ-eu gʼaˇ duˬ mahˬ dziˬ-awˇ doˆ-iˇ-euˬ meh. 3 Kʼoeˇ naˇ, Yawˇzaˬ kʼoeˇ mawˇ jmˬ diˬ taˬ-euˬ nyiˬ hmˬ tiˬ hmˬ-ahˇ ngawˬ paˆ-euˬ meh. Kʼoeˇ ngeh, dehꞈ luꞈ-eu jeˬ zaˬ nyiˬ mawˇ tiˬ mawˇ, “Laˇ-awˬ” lehˇ ehˇ gaˇ ngaˇ ya gaˬ-euˬ ma. 4 Neˇ tseuˆ ni gʼeh-eu mahˬ tiˬ mawˇ paˇ doˆ laˇ-euˬ meh. Tsawˇ haˬ zaˬ tiˬ gʼaˬ tiˇ gʼaˬ bi sehꞈ-eu gʼaˇ duˬ mahˬ kʼoeˇ mawˇ dziˬ-eu gʼaˬ-ahˇ guiˇ bi mˇ-eu baoˬ biꞈ nehˬ-euˬ meh. Huiˬ dui dui-eu mi cehˇ tiˬ kahˇ aˬ yawꞈ-ahˇ biꞈ nehˬ-euˬ meh. 5 Kʼoeˇ naˇ, Yawˇzaˬ kʼoeˇ mawˇ jmˬ diˬ taˬ-euˬ smˇ hmˬ tiˬ hmˬ ngawˬ paˆ-euˬ meh. Kʼoeˇ ngeh, dehꞈ luꞈ-eu jeˬ zaˬ oeˬ mawˇ tiˬ mawˇ “Laˇ-awˬ” lehˇ ehˇ gaˇ ngaˇ ya gaˬ-euˬ ma. Mahˬ dziˬ-eu gʼaˬ-euˬ aˬ laꞈ-ahˇ paˆ yawˬ tuˆ tehˬ taˬ-euˬ meh. 6 Dehꞈ luꞈ-eu jeˬ zaˬ oeˬ mawˇ jawˇ gaˇ neh doˆ le-euˬ teˇ saˇ-ahˇ duˇ-awˇ, heu loꞈ-ehˇ ehˇ-eu dawˬ-ahˇ ngaˇ ya gaˬ-euˬ ma. “Cehˇ tiˬ pehˬ-euˬ tiˬ nah gʼaˬ gaˇ poeˬ tsaˬ-awˇ, lawˬ loeˇ smˇ pehˬ-euˬ tiˬ nah gʼaˬ gaˇ poeˬ tsaˬ-eu meh. Ehˇ kʼawꞈ, saˬ loˬ aˇ bawˇ hawˇ-eu aˬ gaꞈ gaꞈ yaˇ-ahˇ taˬ laˆ cawˆ.” 7 Kʼoeˇ naˇ, Yawˇzaˬ kʼoeˇ mawˇ jmˬ diˬ taˬ-euˬ oeˬ hmˬ tiˬ hmˬ-ahˇ ngawˬ paˆ-euˬ meh. Kʼoeˇ ngeh, dehꞈ luꞈ-eu jeˬ zaˬ oeˬ mawˇ tiˬ mawˇ “Laˇ-awˬ” lehˇ ehˇ gaˇ ngaˇ ya gaˬ-euˬ ma. 8 Ngaˇ haw gʼeh ngeh, pyuˇ pya ni gʼeh-eu mahˬ tiˬ mawˇ mawˇ-euˬ ma. Mahˬ dziˬ luꞈ-eu gʼaˬ-aˬ, shiˇ-eu jeˬ lehˇ myahˇ-awˇ, aˬ yawꞈ-euˬ mehˬ nah tehˬ ni shiˇ-eu miˇ kʼahˬ caw teh luꞈ-eu meh. Guiˇ deuˆ-eu jeˬ, mehꞈ-eu shuꞈ-eu jeˬ, naˇ-eu gawˇ-eu jeˬ , jeˬ zaˬ yaw haiˬ jeˬ, heu loꞈ-ehˇ gʼeh-eu deuˬ-ahˇ gʼoe-awˇ aˬ cawˬ-ahˇ sehꞈ-eu gʼaˇ duˬ, miˇ tsaˬ heu oeˬ bymˇ tiˬ bymˇ kʼoeˇ taˆ uˆ lahˇ-eu baoˬ aˬ yawꞈ nyaꞈ-ahˇ biꞈ taˬ-euˬ meh. 9 Kʼoeˇ naˇ, Yawˇzaˬ kʼoeˇ mawˇ jmˬ diˬ taˬ-euˬ ngaˬ hmˬ tiˬ hmˬ-ahˇ ngawˬ paˆ-euˬ meh. Kʼoeˇ ngeh, Miˬyehˇ-euˬ dawˬ kawˬ mehˬ-awˇ saˇ jaˇ ziꞈ-eu laꞈ kʼoeˇ saˇ kiˇ kamˬ-euˬ miˇ neh bi sehꞈ-euˬ tsawˇ haˬ deuˬ-euˬ saꞈ laˇ kʼoeˇ deuˬ, lawˇ duˬ-euˬ uˬ moˆ jawˇ luꞈ gaˇ ngaˇ ya mawˇ-euˬ ma. 10 Aˬ yawꞈ maꞈ teˇ saˇ yaw kʼaˆ-ehˇ guˇ-awˇ, “Baoˬ huiˬ-eu Sahˬpaˬ Miˬyehˇ pyeuꞈ-eu muiˬ-eu shawˇ-eu tsaˬ-eu dawˇ-eu gʼaˬ-oˇ, nga maꞈ-ahˇ sehꞈ-euˬ miˇ tsaˬ kʼoeˇ taˆ jawˇ-eu tsawˇ haˬ kʼoeˇ deuˬ-ahˇ aˬ myah yaˇ kʼaˬ daˇ nehˬ-awˇ kʼehˬ-eu kʼaˆ-eu gʼeh te” lehˇ ehˇ-eu meh. 11 Kʼoeˇ ngeh, aˬ yawꞈ maꞈ yawˬ gʼaˬ na luꞈ-ahˇ pehˇ kʼahˬ pehˇ mahˇ yaw pyuˇ bi dm awˇ, aˬ yawꞈ maꞈ-ahˇ sehꞈ-euˬ loꞈ-ehˇ, aˬ yawꞈ maꞈ nehˬ-ehˇ tiˬ kawˆ loꞈ-ehˇ gaˇ mˇ-euˬ deuˬ tsawˇ haˬ aˇ gʼaˬ noeˬ taˬ-euˬ loꞈ-ehˇ bi sehꞈ byah ngeh keuˆ ni, tiˬ kʼehˬ gʼaˬ naˬ naˬ tawˬ-eu gʼaˇ duˬ ehˇ nehˬ-euˬ meh. 12 Kʼoeˇ naˇ, Yawˇzaˬ kʼoeˇ mawˇ jmˬ diˬ taˬ-euˬ shiꞈ hmˬ tiˬ hmˬ-ahˇ ngawˬ paˆ gaˇ ngaˇ mawˇ-euˬ ma. Kʼoeˇ ngeh, miˇ luˆ luˆ dui dui laˇ-awˇ ‘nahˇ ma myahˬ naˆ-euˬ saˬ paˇ loꞈ-ehˇ zahˇ-iˇ-awˇ, ba la shiˬ loꞈ-ehˇ neˇ laˇ-euˬ meh. 13 Aˬ guiˇ deuˬ kʼawꞈ, maˬ awꞈ laˇ dah-euˬ siˬ guˬ aˇ siˬ-ahˇ jaˬ lehˇ lehˇ ma neh bi baw juˆ ka-euˬ loꞈ-ehˇ miˇ tsa ga ka le-euˬ meh. 14 Mˬ-aˬ, sahˬ boꞈ paˇ yoˆ lehˬ yoˆ kʼoꞈ-eu loꞈ-ehˇ byoˆ-iˇ-awˇ, gawˬ jawˬ yawˬ jawˬ na luꞈ hawˇ-eu iˇ jaw lahˇ yawˬ lahˇ na luꞈ, jawˇ duˬ bi jiˆ paˇ jiˇ-euˬ meh. 15 Kʼoeˇ naˇ, miˇ kʼahˬ sahˬ paˬ deuˬ maˬ ehˇ, uˆ lahˇ-eu sahˬ paˬ sahˬ ma deuˬ maˬ ehˇ, guiˇ maꞈ kʼoeˇ taˆ uˆ lahˇ-eu yaw huiˬ yaw mahˇ deuˬ maˬ ehˇ, smˇ muiˬ muiˬ-awˇ baoˬ ahˇ-eu tsawˇ haˬ deuˬ maˬ ehˇ, nui deuˬ maˬ ehˇ, zaˬ kʼaˆ deuˬ hawˇ-eu zaˬ kʼaˆ maˬ ngeuˇ-eu deuˬ maˬ ehˇ, gawˬ jawˬ kʼoeˇ taˆ jaˆ-eu lo kʼahˬ lo guˇ doe ni cehˆ zaꞈ jiˇ-euˬ meh. 16 Gawˬ jawˬ hawˇ-eu lo guˇ deuˬ-ahˇ aˬ yawꞈ maꞈ guˇ guˇ-ehˇ ehˇ-eu, “Nga maꞈ kʼoeˇ taˆ byaˆ tehˬ le-awˇ, dzoeˬ dzaˬ nuiˇ mahˬ kʼoeˇ taˆ nuiˇ luꞈ-eu gʼaˬ-euˬ myaˆ nuiˆ hawˇ-eu, Yawˇzaˬ-euˬ nui ma pehˇ-eu jeˬ-ahˇ maˬ bi mawˇ ni dehˬ kaˬ nehˬ laꞈ-awˬ. 17 Guˆ dui dui laˇ paˬ-ehˇ gʼeh-eu aˬ yawꞈ nyaꞈ nui ma pehˇ-eu aˇ nah keuˆ le taˬ-euˬ gaˇ, aˬ suˇ gʼaˬ yawꞈ daˬ coeˇ paˬ nga.” |
Akha Bible Revision (Latin Script) © Thailand Bible Society, 2011.
Thailand Bible Society