Panmaeq 5 - Akha

Sahˬ boꞈ paˇ yoˆ hawˇ-eu Yawˇ zaˬ

¹ Dzoeˬ dzaˬ nuiˇ mahˬ kʼoeˇ taˆ nuiˇ luꞈ-eu gʼaˬ-euˬ aˇ maˇ laꞈ-ahˇ, sahˬ boꞈ paˇ yoˆ tiˬ yoˆ tuˆ tehˬ taˬ-euˬ gaˇ ngaˇ ya mawˇ-euˬ ma. Nyiˬ pyawˬ luꞈ sahˬ boꞈ boꞈ byah taˬ-awˇ, jmˬ shiꞈ tsahˇ diˬ taˬ-euˬ meh.

² Kʼoeˇ naˇ, gʼaˬ kʼaˆ dui dui-eu mˬ taˆ gʼaˬ kʼehˇ tiˬ gʼaˬ teˇ saˇ yaw kʼaˆ-ehˇ guˇ-awˇ, “Jmˬ diˬ taˬ-euˬ ngawˬ paˆ-awˇ, sahˬ boꞈ paˇ yoˆ heu yoˆ-ahˇ pah-eu aˬ suˇ gʼaˬ geuˇ ta” lehˇ ehˇ-eu meh.

³ Ehˇ kʼawꞈ, mˬ kʼoeˇ taˆ maˬ ehˇ, miˇ tsaˬ kʼoeˇ taˆ maˬ ehˇ, miˇ oˆ kʼahˬ-ahˇ maˬ ehˇ, sahˬ boꞈ paˇ yoˆ kʼoeˇ-ahˇ pah haw nya-eu tiˬ gʼaˬ-iˬ maˬ jawˇ-a.

⁴ Sahˬ boꞈ paˇ yoˆ kʼoeˇ-ahˇ pah haw geuˇ-eu tsawˇ haˬ tiˬ gʼaˬ-iˬ maˬ jawˇ-eu miˇ neh, ngaˇ ngoeˇ dui dui-euˬ ma.

⁵ Kʼoeˇ ngeh, aˬ yuiꞈ aˬ tsu kʼoeˇ deuˬ laꞈ kʼoeˇ tiˬ gʼaˬ, ngaˬ-ahˇ heu loꞈ-ehˇ ehˇ-eu meh. “Taˬ ngoeˇ. Haw-awˬ. Yuˇdaˆ tsawˇ jeuˬ-euˬ Aˇ laˬ jaˬ shiˇ pyeuꞈ-eu, Daˬbiˇ-euˬ Duˬ ciˇ kʼoeˇ gʼaˬ guiˇ deuˆ gʼaˬ-euˬ meh. Jmˬ shiꞈ tsahˇ diˬ taˬ-euˬ kʼoeˇ aˬ yawꞈ ngawˬ paˆ-awˇ, sahˬ boꞈ paˇ yoˆ pah nya meh.”

⁶ Kʼoeˇ naˇ, jeˬ zaˬ kʼoeˇ oeˬ mawˇ hawˇ-eu aˬ yuiꞈ aˬ tsu kʼoeˇ deuˬ tiˬ jawˬ jawˇ luꞈ-eu gʼahˇ ceh jaˆ-eu dzoeˬ dzaˬ nuiˇ mahˬ kʼoeˇ taˆ, Yawˇzaˬ yawꞈ luꞈ gaˇ ya mawˇ-euˬ ma. Yawˇzaˬ kʼoeˇ-aˬ, bi sehꞈ-euˬ gaˇ duˇ-eu meh. Uˬ coeˇ shiꞈ coeˇ tsoꞈ-awˇ, myaˆ nuiˆ shiꞈ nuiˆ tsoꞈ-eu meh. Kʼoeˇ-aˬ, miˇ tsaˬ doe ni pyehˬ taˬ-euˬ Miˬyehˇ-euˬ yaw sahˇ shiꞈ sahˇ pyeuꞈ-eu meh.

⁷ Dzoeˬ dzaˬ nuiˇ mahˬ kʼoeˇ taˆ nuiˇ luꞈ-eu gʼaˬ-euˬ aˇ maˇ laꞈ-ahˇ tuˆ tehˬ taˬ-euˬ sahˬ boꞈ paˇ yoˆ kʼoeˇ yoˆ-ahˇ, Yawˇzaˬ kʼoeˇ mawˇ yuˇ laˬ leˇ-euˬ meh.

⁸ Kʼoeˇ loꞈ-ehˇ yuˇ laˬ leˇ ngeh, dehꞈ luꞈ-eu jeˬ zaˬ kʼoeˇ oeˬ mawˇ hawˇ-eu aˬ yuiꞈ aˬ tsu kʼoeˇ nyiˬ tseˇ oeˬ gʼaˬ, Yawˇzaˬ-euˬ mehˬ shi awˆ byaˆ-euˬ meh. Aˬ yawꞈ maꞈ yawˬ gʼaˬ na luꞈ, deuˇ-mˬ tiˬ siˬ hawˇ-eu tsiˇ yaw saw jeˬ tiˬ byah ni dahˬ-eu shuiˇ naˬ bo deuˬ ahˇ-eu meh.

⁹ Aˬ yawꞈ maꞈ caˇ dawˬ yaw shuiꞈ heu loꞈ-ehˇ caˇ-eu meh. “Sehꞈ-eu jeˬ-ahˇ nawˇ ya daˬ-awˇ, gʼawˇ mawˇ lawˇ dah nehˬ-eu laꞈ kʼoeˇ, miˇ tsaˬ tsawˇ jeuˬ tsawˇ ca dawˬ tawˆ, Miˬyehˇ jawˇ gaˇ gʼoꞈ keuˆ laˇ ni, nawˇ sheuˬ kʼoꞈ ha nehˬ-euˬ miˇ neh, sahˬ boꞈ paˇ yoˆ-ahˇ nawˇ yuˇ-awˇ, jmˬ diˬ taˬ-euˬ ngawˬ paˆ nya ni, nawˇ mˇ geuˇ-eu gʼaˬ pyeuꞈ-eu meh.

¹⁰ Yawꞈ maꞈ Miˬyehˇ-euˬ gaˇ mˇ-eu, piˇ ma miˇkʼahˬ pyeuꞈ laˇ nya ni, nawˬ neh jahˇ nehˬ gʼaˬ-euˬ loꞈ-ehˇ, yawꞈ maꞈ miˇ tsaˬ heu-euˬ kʼoeˇ taˆ, uˆ lahˇ-eu deuˬ ya geuꞈ tehꞈ-a.”

¹¹ Ngaˇ paˇ haw gʼeh leꞈ ngeh, mˬ taˆ gʼaˬ kʼehˇ aˇ seh aˇ lamˬ-euˬ teˇ saˇ ya gaˬ-euˬ ma. Dzoeˬ dzaˬ nuiˇ mahˬ, dehꞈ luꞈ-eu jeˬ zaˬ kʼoeˇ oeˬ mawˇ hawˇ-eu, aˬ yuiꞈ aˬ tsu kʼoeˇ nyiˬ tseˇ oeˬ gʼaˬ-euˬ tiˬ jawˬ, aˬ yawꞈ maꞈ yawꞈ luꞈ-eu meh.

¹² Aˬ yawꞈ maꞈ teˇ saˇ yaw kʼaˆ-ehˇ guˇ-awˇ heu loꞈ-ehˇ caˇ-eu meh. “Sehꞈ gaˇ ya daˬ-euˬ Yawˇzaˬ-aˬ, baoˬ hawˇ-eu pyuˇ shuiˇ myawˬ gahˬ, zaˬ siˬ tsawˇ gahˇ hawˇ-eu gʼaˬ, taˬ huiˬ taˬ mahˇ nehˬ-eu jeˬ, yaw shehꞈkʼahˬsehˇ huiˬ-eu jeˬ, ja ceuˬ nehˬ-eu jeˬ, heu deuˬ-ahˇ za geuˇ-eu meh.

¹³ Kʼoeˇ naˇ, mˬ kʼoeˇ taˆ, miˇ tsaˬ kʼoeˇ taˆ hawˇ-eu, miˇ oˆ kʼahˬ hawˇ-eu iˬ ma laˆ shaˆ-ahˇ kʼaˇ dehꞈ kʼaˇ jawˇ-eu jeˬ pyeuꞈ-eu, boeˬ boeˬ luˆ luˆ laꞈ kʼoeˇ kʼaˇ dehꞈ kʼaˇ jawˇ-eu deuˬ dawˬ tawˆ luꞈ-euˬ teˇ saˇ ngaˇ ya gaˬ-euˬ ma. Aˬ yawꞈ maꞈ heu loꞈ-ehˇ caˇ luꞈ-eu meh. “Nuiˇ mahˬ-ahˇ nuiˇ-eu gʼaˬ hawˇ-eu Yawˇ zaˬ-ahˇ, yaw shehꞈ kʼahˬsehˇ hawˇ-eu baoˬ, mˬ mˬ maˬ byaˆ zaˇ zi jaˆ luꞈ-uˇ”

¹⁴ Kʼoeˇ ngeh, dehꞈ luꞈ-eu jeˬ zaˬ kʼoeˇ oeˬ mawˇ “Aˬ miˬ” lehˇ ehˇ kʼoꞈ nehˬ-euˬ meh. Kʼoeˇ naˇ, aˬ yuiꞈ aˬ tsu kʼoeˇ deuˬ awˆ byaˆ-awˇ uˬ duˬ tahˬ-euˬ meh.