Panmaeq 3 - Akha

Saˬdiˇ Ka li zaˬ aˇ muˇ-ahˇ biꞈ-euˬ dawˬ

¹ “Saˬdiˇ Ka li zaˬ aˇ muˇ-euˬ mˬ taˆ gʼaˬ kʼehˇ-ahˇ heu loꞈ-ehˇ boꞈ nehˬ-awˬ. “Heu-aˬ, Miˬyehˇ-euˬ Yaw sahˇ shiꞈ sahˇ jawˇ-awˇ, aˬ guiˇ shiꞈ siˬ jaˆ-eu gʼaˬ-euˬ dawˬ meh. Nawˇ aˬ jeˬ mˇ luꞈ-eu gaˇ kawˆ ngaˇ siˬ nya ma. Nawˇ-aˬ, shiˇ-euˬ kʼawꞈ, dehꞈ luꞈ-eu meh lehˇ aˬ cawˬ sawˇ taˬ-euˬ meh.

² Kʼoeˇ miˇ neh, noeˬ laˇ-awˬ. Nawˬ-euˬ laꞈ kʼoeˇ kʼaˇ dzeˇ luꞈ-eu yaw muiˬ jeˬ maˬ bi shiˇ tsehˆ ni gʼaˬ shaˇ-awˬ. Aˬ jeˬ miˇ neh ehˇ naˇ, nawˬ neh mˇ-euˬ shaˇ-euˬ jeˬ-aˬ, ngaˬ-euˬ Miˬyehˇ mehˬ shi maˬ byah maˬ loꞈ-a siˬ lehˇ ngaˇ haw mawˇ-euˬ ma.

³ Nawˬ-ahˇ mehˬ nehˬ tsoˆ nehˬ-euˬ jeˬ hawˇ-eu nawˬ neh ya gaˬ taˬ-euˬ jeˬ-ahˇ noeˬ keuˆ-awˬ. Kʼoeˇ-ahˇ naˇ haˬ geuꞈ-awˇ, iˬ baˇ-ahˇ byehˇ dzeh-awˬ. Nawˇ maˬ noeˬ laˇ naˇ, smˇ kʼoeˬ oe-eu loꞈ-ehˇ nawˇ jawˇ gaˇ ngaˇ oe-awˇ, ngaˇ oe-eu aˇ yamˬ nawˇ maˬ ya siˬ-aˇ.

⁴ Ehˇ kʼawꞈ, Saˬdiˇ meuˬ-ahˇ jawˇ-eu naw maꞈ heu myaˆ gʼaˬ-aˬ, mehˬ tsoeˬ maˬ jawꞈ-iˇ-aˬ siˬ. Naw maꞈ ngaˬ nehˬ-ehˇ cah-awˇ, mehˬ tsoeˬ yaw pyuˇ ya dm tehꞈ-a. Aˬ jeˬ miˇ neh ehˇ naˇ, naw maꞈ kʼoeˇ loꞈ-ehˇ mˇ geuˇ-eu tsawˇ haˬ pyeuꞈ-eu meh.

⁵ Gʼaˬ leˇ-euˬ tsawˇ ha deuˬ-aˬ, kʼoeˇ loꞈ-ehˇ mehˬ tsoeˬ yaw pyuˇ ya dm-awˇ, saꞈ laˇ dehꞈ-eu sahˬ boꞈ laꞈ kʼoeˇ, aˬ yawꞈ maꞈ-euˬ tsawˇ myahˇ ngaˇ maˬ siˆ byoˆ. Ngaˬ Da hawˇ-eu aˬ yawꞈ-euˬ mˬ taˆ gʼaˬ kʼehˇ deuˬ-euˬ mehˬ shi, aˬ yawꞈ maꞈ ngaˬ-euˬ tsawˇ haˬ ma lehˇ ngaˇ ehˇ ma.

⁶ “Nawˇ naˬ bawˇ tsoꞈ-eu ngeuˇ naˇ, Yaw sahˇ Miˬyehˇ neh Ka li zaˬ aˇ muˇ deuˬ-ahˇ ehˇ nehˬ-euˬ dawˬ-ahˇ naˇ haˬ-awˬ.

Piˇlaˬdeˬpiˇ Ka li zaˬ aˇ muˇ-ahˇ biꞈ-euˬ dawˬ

⁷ “Piˇlaˬdeˬpiˇ Ka li zaˬ aˇ muˇ-euˬ mˬ taˆ gʼaˬ kʼehˇ-ahˇ heu loꞈ-ehˇ boꞈ nehˬ-awˬ. “Heu-aˬ, muiˬ-eu shawˇ-eu tsaˬ-eu dawˇ-eu gʼaˬ pyeuꞈ-awˇ, Daˬbiˇ-euˬ mahˬ tawꞈ kahˬ tuˆ tehˬ taˬ-awˇ, aˬ yawꞈ laˇ gʼoˆ pah ngeh tsawˇ haˬ tiˬ gʼaˬ-iˬ maˬ piˬ tehꞈ kʼoꞈ nya-eu uˬ taꞈ, aˬ yawꞈ laˇ gʼoˆ piˬ tehˬ ngeh tsawˇ haˬ tiˬ gʼaˬ-iˬ maˬ pah nya-eu gʼaˬ-euˬ dawˬ meh.

⁸ Nawˇ mˇ luꞈ-eu jeˬ ngaˇ siˬ nya ma. Nawˇ baoˬ ui cuiˆ ahˇ-eu ngaˇ siˬ nya ma. Ngaˬ neh mehˬ-euˬ tsoˆ-euˬ dawˬ-ahˇ nawˇ caw teh-awˇ, ngaˬ-ahˇ nawˇ saˇ jaˇ ziꞈ-eu meh. Tsawˇ haˬ tiˬ gʼaˬ-iˬ maˬ piˬ tehˬ nya-eu laˇ gʼoˆ tiˬ gʼoˆ nawˬ-euˬ mehˬ shi ngaˇ pah taˬ-euˬ ma.

⁹ Naˇ haˬ-awˬ. Yuˇdaˆ tsawˇ haˬ maˬ ngeuˇ gaˇ yawˬ haˇ yawˬ ha ngeuˇ ma lehˇ ehˇ-eu nehꞈ Saˬdaˬ-ahˇ taꞈ-eu aˇ muˇ kʼoeˇ muˇ-ahˇ, nawˬ-euˬ aˬ kuiˇ dawˬ peh uˬ duˬ bi shaˇ tahˬ laˇ ma. Ngaˇ nawˬ-ahˇ gaˬ-eu gaˇ kawˆ aˬ yawꞈ maꞈ dawˬ tawˆ luꞈ ya siˬ tehꞈ-a.

¹⁰ Aˬ jeˬ miˇ neh ehˇ naˇ, ngaˬ neh biꞈ-euˬ dawˬ-ahˇ naw maꞈ naˇ haˬ geuꞈ-awˇ daˬ dzeuˇ oˇ dzeuˇ-euˬ miˇ neh, miˇ tsaˬ zaˬ dawˬ tawˆ luꞈ-ahˇ lawˬ haw-eu gʼaˇ duˬ, miˇ tsaˬ heu kʼoeˇ taˆ shaˬ-eu zahˬ-eu jeˬ bi keuˆ le-eu aˇ yamˬ laꞈ kʼoeˇ, naw maꞈ-ahˇ bi buˬ bi law-iˇ ma.

¹¹ Ngaˇ yaw kawˇ-ehˇ oe ma. Naw maꞈ-euˬ gʼaˬ leˇ-eu laꞈ sawˬ-ahˇ tsawˇ haˬ tiˬ gʼaˬ-iˬ maˬ bi lu doˆ geuꞈ-eu gʼaˇ duˬ, naw maꞈ jaˆ luꞈ-eu jeˬ-ahˇ yaw muiˬ paˬ-ehˇ jeˬ hmˬ taˬ-awˬ.

¹² Gʼaˬ leˇ-eu tsawˇ haˬ-ahˇ ngaˬ-euˬ Miˬyehˇ-euˬ uˬ duˬ tahˬ nymˇ laꞈ kʼoeˇ kʼawˇ zeuˇ bi geuꞈ-awˇ, aˬ myah luꞈ kʼoeˇ gaˇ ya jawˇ tehꞈ-a. Ngaˬ-euˬ Miˬyehˇ-euˬ tsawˇ myahˇ hawˇ-eu, ngaˬ-euˬ Miˬyehˇ jawˇ-eu mˬ-ahˇ neh zaꞈ le-euˬ Yeˬluˇsaˬlehˬ yaw shuiꞈ pyeuꞈ-eu ngaˬ-euˬ Miˬyehˇ-euˬ meuˬ-euˬ tsawˇ myahˇ, aˬ yawꞈ kʼoeˇ taˆ ngaˇ boꞈ myahˬ nehˬ ma. Ngaˬ-euˬ tsawˇ myahˇ yaw shuiꞈ kʼawꞈ, aˬ yawꞈ kʼoeˇ taˆ boꞈ myahˬ nehˬ ma.

¹³ “Nawˇ naˬ bawˇ tsoꞈ-eu ngeuˇ naˇ, Yaw sahˇ Miˬyehˇ neh Ka li zaˬ aˇ muˇ deuˬ-ahˇ ehˇ nehˬ-euˬ dawˬ-ahˇ naˇ haˬ-awˬ.

Lawˬdiˬciˆ Ka li zaˬ aˇ muˇ-ahˇ biꞈ-euˬ dawˬ

¹⁴ “Lawˬdiˬciˆ Ka li zaˬ aˇ muˇ-euˬ mˬ taˆ gʼaˬ kʼehˇ-ahˇ heu loꞈ-ehˇ boꞈ nehˬ-awˬ. “Heu-aˬ, saˇ jaˇ ziꞈ-eu laꞈ kʼoeˇ dawˇ coe ni saˇ kiˇ kamˬ-eu gʼaˬ pyeuꞈ-awˇ, Miˬyehˇ neh kʼaˇ beh taˬ-eu jeˬ dawˬ tawˆ luꞈ kʼoeˇ taˆ uˆ lahˇ-eu, Aˬmiˬ lehˇ kuˇ-eu gʼaˬ-euˬ dawˬ meh.

¹⁵ Nawˬ neh mˇ-euˬ jeˬ ngaˇ siˬ nya ma. Nawˇ-aˬ, yaw tsehꞈ kʼawꞈ maˬ ngeuˇ, yaw lahˇ kʼawꞈ maˬ ngeuˇ lehˇ jaˆ luꞈ meh. Yaw tsehꞈ naˇ yaw tsehꞈ, yaw lahˇ naˇ yaw lahˇ lehˇ bi duˬ laˇ-awˬ.

¹⁶ Nawˇ-aˬ, yaw tsehꞈ maˬ tsehꞈ, yaw lahˇ maˬ lahˇ-ehˇ, yaw lmˇ lmˇ-ehˇ tehꞈ-ehˇ gʼeh-eu miˇ neh, ngaˬ-euˬ kʼaˬ meh laꞈ kʼoeˇ neh nawˬ-ahˇ meh dzeh ma.

¹⁷ ‘Ngaˇ smˇ muiˬ smˇ baw pyeuꞈ-awˇ, kʼaˇ loˬ-eu jeˬ dawˬ tawˆ luꞈ jaˆ jiˇ ma lehˇ nawˇ ehˇ-eu meh. Ehˇ kʼawꞈ, nawˇ shaˬ zahˬ aˇ naˆ ni ya mˇ paˬ-ehˇ gʼeh-awˇ, aˇ naˆ ni gʼawˬ shaˬ gaˬ laˇ paˬ-ehˇ gʼeh-eu gaˇ kawˆ yawˬ haˇ yawˬ ha maˬ siˬ nya-a. Nawˇ-aˬ, iˇ shaˬ shaˬ dui dui-awˇ, neˇ myawˆ ni gʼeh-eu uˬ taꞈ, myaˆ behꞈ behꞈ-eu meh.

¹⁸ Kʼoeˇ miˇ neh, nawˇ smˇ muiˬ bi muiˬ laˇ-eu gʼaˇ duˬ, ngaˇ jawˇ gaˇ maˇ jawˆ ni gʼeh-eu shuiˇ zeuˇ laˇ-awˬ lehˇ nui noeˬ nui duˇ biꞈ-eu ma. Nawˇ dm-eu gʼaˇ duˬ mehˬ tsoeˬ yaw pyuˇ kʼawꞈ zeuˇ-awˇ, shaꞈ dawˇ dui dui paˬ-ehˇ neˇ myawˆ ni gʼeh-eu nawˬ-euˬ gʼawˇ mawˇ-ahˇ dm kaˬ-awˬ. Nawˬ-euˬ myaˆ nuiˆ mawˇ nya laˇ ni, myaˆ nuiˆ-ahˇ dawˆ-eu tsiˇ zeuˇ-awˬ.

¹⁹ Ngaˇ gaˬ-eu tsawˇ haˬ deuˬ-ahˇ, ngaˇ dehˬ dehˬ-ehˇ zuiˆ-eu ma. Nui ma-ahˇ noeˬ-awˇ, iˬ baˇ noeˬ poˆ-awˬ.

²⁰ Naˇ haˬ-awˬ, ngaˇ laˇ gʼoˆ-ahˇ yawꞈ-awˇ kʼoˆ luꞈ ma. Ngaˬ-euˬ teˇ saˇ gaˬ-awˇ laˇ gʼoˆ kʼaˇ pah nehˬ laꞈ-eu gʼaˬ-euˬ nymˇ-ahˇ ngaˇ uˇ-iˇ-awˇ, aˬ yawꞈ nehˬ-ehˇ dzaˬ taꞈ dawˇ taꞈ ma. Aˬ yawꞈ kʼawꞈ, ngaˬ nehˬ-ehˇ dzaˬ taꞈ dawˇ taꞈ tehꞈ-a.

²¹ Ngaˇ gʼaˬ leˇ-euˬ miˇ neh, ngaˬ Da-euˬ dzoeˬ dzaˬ nuiˇ mahˬ kʼoeˇ taˆ ngaˬ Da-euˬ gaˇ dzeˇ nuiˇ luꞈ-eu loꞈ-ehˇ, gʼaˬ leˇ-euˬ tsawˇ haˬ deuˬ-ahˇ, ngaˬ-euˬ dzoeˬ dzaˬ nuiˇ mahˬ kʼoeˇ taˆ ngaˬ-euˬ gaˇ dzeˇ bi nuiˇ ma.

²² “Nawˇ naˬ bawˇ tsoꞈ-eu ngeuˇ naˇ, Yaw sahˇ Miˬyehˇ neh Ka li zaˬ aˇ muˇ deuˬ-ahˇ ehˇ nehˬ-euˬ dawˬ-ahˇ naˇ haˬ-awˬ.