Panmaeq 21 - Akha

Mˬ yaw shuiꞈ miˇ yaw shuiꞈ

¹ Kʼoeˇ naˇ, mˬ yaw shuiꞈ hawˇ-eu miˇ yaw shuiꞈ-ahˇ ngaˇ ya mawˇ-euˬ ma. Yaw beh jaˆ-euˬ mˬ hawˇ-eu miˇ byoˆ-iˇ-awˇ, iˬ ma laˆ shaˆ maˬ paˇ jaˆ ni pyeuꞈ-iˇ-euˬ meh.

² Kʼoeˇ ngeh, Muiˬ-eu shawˇ-eu Meuˬ pyeuꞈ-eu Yeˬluˇsaˬlehˬ meuˬ-aˬ, smˇ miˇ iˇ-eu lehˇ gʼeh-eu zaˬ miˬ zaˬ tiˬ gʼaˬ yawˬ ha-euˬ kʼaˬ dzeˇ zaˬ jawˇ gaˇ iˇ-eu lehˇ dm gʼaˬ dm lmˇ tiˬ kuꞈ dm-awˇ lehˬ hmˬ taˬ-euˬ loꞈ-ehˇ, mˬ-ahˇ Miˬyehˇ jawˇ gaˇ neh zaꞈ ka le-euˬ meh.

³ Kʼaˆ dui dui-eu teˇ saˇ tiˬ saˇ dzoeˬ dzaˬ nuiˇ mahˬ-ahˇ neh heu loꞈ-ehˇ ehˇ doˆ leꞈ gaˇ ngaˇ ya gaˬ-euˬ ma. “Nymˬ-mˇ, Miˬyehˇ-euˬ nymˇ tsawˇ haˬ zaˬ jawˇ gaˇ jaˆ le-euˬ meh. Aˬ yawꞈ maꞈ nehˬ-ehˇ aˬ yawꞈ jawˇ-awˇ, aˬ yawꞈ maꞈ aˬ yawꞈ-euˬ tsawˇ haˬ pyeuꞈ laˇ tehꞈ-a. Aˬ yawꞈ-euˬ mawˇ do aˬ yawꞈ maꞈ nehˬ-ehˇ jawˇ tehꞈ-a.

⁴ Aˬ yawꞈ maꞈ-euˬ myaˆ biˇ dawˬ tawˆ luꞈ-ahˇ aˬ yawꞈ siˆ shawˇ nehˬ tehꞈ-a. Shiˇ-eu jeˬ maˬ paˇ jaˆ-ehˇ, noeˬ shaˬ noeˬ zahˬ-eu jeˬ, ngoeˇ-eu jeˬ hawˇ-eu, naˇ-eu gawˇ-eu jeˬ maˬ paˇ jaˆ meh. Yaw oeˇ kʼoeˇ deuˬ dawˬ tawˆ luꞈ byoˆ jiˇ-euˬ meh.”

⁵ Kʼoeˇ naˇ, dzoeˬ dzaˬ nuiˇ mahˬ kʼoeˇ taˆ nuiˇ luꞈ-eu kʼoeˇ gʼaˬ ehˇ-eu, “Nymˬ-mˇ poˆ jawˇ-aˬ, yawˬ jeˬ na luꞈ ngaˬ neh yaw shuiꞈ jahˇ paˇ jiˇ-euˬ ma.” Aˬ yawꞈ ngaˬ-ahˇ paˇ ehˇ-eu, “Heu loꞈ-ehˇ boꞈ ahˇ taˬ-awˬ. Aˬ jeˬ miˇ neh ehˇ naˇ, dawˬ heu deuˬ tsaˬ dui dui-awˇ jah paˬ-ehˇ gʼeh dui dui-eu meh.”

⁶ Aˬ yawꞈ paˇ ehˇ-eu, “Jiˇ-euˬ ma. Ngaˇ-aˬ, aˇ dahˬ beh-eu hawˇ-eu aˇ saˬ saˬ-eu gʼaˬ ma. Dahˬ beh-eu jeˬ hawˇ-eu aˇ saˬ saˬ-eu jeˬ ma. Iˇ cuꞈ kʼaˇ mehꞈ-eu tsawˇ haˬ-ahˇ, dehꞈ-eu saꞈ laˇ lawˇ gawˆ-euˬ iˇ cuꞈ yawꞈ ngehꞈ-ehˇ bi dawˇ ma.

⁷ Gʼaˬ leˇ-euˬ tsawˇ haˬ aˬ geu gʼaˬ maˬ kaˬ, jeˬ biˇ heu oꞈ tehꞈ-a. Ngaˇ aˬ yawꞈ-euˬ Miˬyehˇ pyeuꞈ-awˇ, aˬ yawꞈ ngaˬ-euˬ aˬ li ya pyeuꞈ-eu jeˬ biˇ oꞈ tehꞈ-a.

⁸ Ehˇ kʼawꞈ, guˆ-eu nui ma ahˇ-eu tsawˇ haˬ, saˇ jaˇ puiˬ-eu tsawˇ haˬ, yaw jawꞈ jeˬ mˇ-eu tsawˇ haˬ, tsawˇ haˬ sehꞈ-eu tsawˇ haˬ, maˬ tsaˬ maˬ dawˇ-eu laꞈ kʼoeˇ kʼaˬ miˬ sheu-eu tsawˇ haˬ, mah loˬ ja maw zmˬ-eu tsawˇ haˬ, tahˬ pahˬ aˬ ma mawˇ kawˇ-ahˇ uˬ duˬ tahˬ-eu tsawˇ haˬ, jaˬ myawꞈ mehˇ shuiˇ shuiˇ-eu tsawˇ haˬ, heu loꞈ-ehˇ gʼeh-eu deuˬ-ahˇ oꞈ-eu jawˇ duˬ-aˬ, nyiˬ poˆ tiˬ poˆ shiˇ-eu jeˬ pyeuꞈ-eu, miˬ dzaˬ hawˇ-eu miˬ dzaˇ dzaˇ shuiˇ doꞈ luꞈ-eu lah kʼoeˇ lah meh.

Yeˬluˇsaˬlehˬ yaw shuiꞈ

⁹ Mˬ taˆ gʼaˬ kʼehˇ kʼoeˇ shiꞈ gʼaˬ laꞈ kʼoeˇ, aˇ saˬ saˬ-eu kʼehˬ-eu kʼaˆ-eu jeˬ tiˬ byah ni ahˇ-eu naˬ bo shiꞈ bo yuˇ luꞈ-eu gʼaˬ ngaˇ jawˇ gaˇ oe-awˇ ehˇ-eu, “Laˇ-awˬ. Yawˇzaˬ-euˬ zaˬ miˬ pyeuꞈ-eu miˬ shuiꞈ kʼoeˇ gʼaˬ ngaˇ nawˬ-ahˇ mehˬ nehˬ nyaˇ.”

¹⁰ Yaw sahˇ Miˬyehˇ ngaˬ-ahˇ uˆ lahˇ le-awˇ, goˇ dui dui-eu gawˬ jawˬ uˬ du sheuˬ daˆ nehˬ laꞈ-euˬ meh. Muiˬ-eu shawˇ-eu Meuˬ meuˬ ma pyeuꞈ-eu Yeˬluˇsaˬlehˬ kʼoeˇ, mˬ-ahˇ Miˬyehˇ jawˇ gaˇ neh zaꞈ ka le luꞈ gaˇ aˬ yawꞈ ngaˬ-ahˇ mehˬ nehˬ laꞈ-euˬ meh.

¹¹ Meuˬ kʼoeˇ-aˬ, Miˬyehˇ-euˬ yaw shehꞈ kʼahˬ sehˇ ahˇ-awˇ, yaw shehꞈ gʼawˬ mya jeˬ ahˇ-eu kʼaˬ lo sehˇ loꞈ-ehˇ yaw shehꞈ bya-awˇ, shawˇ jehˆ ni doˆ coˆ-ehˇ haw mawˇ nya-eu meh.

¹² Huiˬ dui goˇ dui dui-eu meuˬ meuˬ lahˇ gawˬ taˬ-awˇ, lahˇ kʼehˬ tseˇ nyiꞈ kʼehˬ jaˆ-awˇ, mˬ taˆ gʼaˬ kʼehˇ tseˇ nyiꞈ gʼaˬ loꞈ luꞈ-eu meh. Lahˇ kʼehˬ kʼoeˇ deuˬ kʼoeˇ taˆ, Iˇsaˬleˬlaˆ tsawˇ jeuˬ tseˇ nyiꞈ jeuˬ-euˬ tsawˇ myahˇ boꞈ taˬ-euˬ meh.

¹³ Tiˬ pyawˬ-ahˇ lahˇ kʼehˬ smˇ kʼehˬ dahˇ-eu meh. Nahˇ ma doˆ kʼehˬ paw pyawˬ-ahˇ smˇ kʼehˬ, laꞈ oˆ pyawˬ-ahˇ smˇ kʼehˬ, laꞈ taˆ pyawˬ-ahˇ smˇ kʼehˬ, nahˇ ma ga kʼehˬ pyawˬ-ahˇ smˇ kʼehˬ dahˇ-eu meh.

¹⁴ Lahˇ kʼoeˇ lahˇ-aˬ, kʼaˬ lo lo ma tseˇ nyiꞈ siˬ kʼoeˇ taˆ gawˬ taˬ-euˬ meh. Kʼaˬ lo kʼoeˇ deuˬ kʼoeˇ taˆ, Yawˇzaˬ-euˬ gʼaˬ kʼehˇ tseˇ nyiꞈ gʼaˬ-euˬ tsawˇ myahˇ boꞈ taˬ-euˬ meh.

¹⁵ Ngaˬ-ahˇ dawˬ ngehˬ cawˬ-euˬ mˬ taˆ gʼaˬ kʼehˇ kʼoeˇ gʼaˬ-aˬ, meuˬ-ahˇ maˬ ehˇ, lahˇ kʼehˬ deuˬ-ahˇ maˬ ehˇ, meuˬ meuˬ lahˇ-ahˇ maˬ ehˇ, dza haw-eu shuiˇ daˇ dza ahˇ-eu meh.

¹⁶ Meuˬ kʼoeˇ-aˬ, oeˬ coeˇ oeˬ bawˬ pyeuꞈ-awˇ, yaw jeˇ paw hawˇ-eu yaw mahˇ paw tiˬ kawˆ meh. Mˬ taˆ gʼaˬ kʼehˇ kʼoeˇ gʼaˬ aˬ yawꞈ-euˬ daˇ dza neh meuˬ kʼoeˇ meuˬ-ahˇ dza haw-euˬ meh. Yaw mahˇ paw tiˬ heˇ ngaˬ yaˇ laˇ byah-awˇ, yaw jeˇ paw hawˇ-eu yaw goˇ paw kʼawꞈ, kʼoeˇ naˆ ni byah-eu meh.

¹⁷ Mˬ taˆ gʼaˬ kʼehˇ kʼoeˇ gʼaˬ meuˬ meuˬ lahˇ-ahˇ paˇ dza haw-euˬ meh. Aˬ yawꞈ-euˬ aˇ lmˇ-ahˇ tsaˬ ni, tiˬ yaˇ oeˬ tseˇ oeˬ caˆ goˇ-eu meh.

¹⁸ Meuˬ meuˬ lahˇ kʼoeˇ-aˬ, yaw shehꞈ gʼawˬ mya jeˬ ahˇ-eu kʼaˬ lo sehˇ neh gawˬ taˬ-awˇ, meuˬ aˬ yawꞈ-ahˇ-aˬ, pyawˬ haw loꞈ-ehˇ shawˇ jehˆ ni gʼeh-eu shuiˇ neh gawˬ taˬ-euˬ meh.

¹⁹ Meuˬ lahˇ dawˬ dah gawˬ taˬ-euˬ kʼaˬ lo kʼoeˇ deuˬ-aˬ, aˇ poeˬ kʼaˆ-eu kʼaˬ lo sehˇ gʼawˬ mya jeˬ neh laˆ saˆ taˬ -euˬ meh. Yaw beh siˬ-ahˇ yaw shehꞈ gʼawˬ mya jeˬ ahˇ-eu kʼaˬ lo sehˇ, nyiˬ siˬ tiˬ siˬ-ahˇ nyoeˇ leuˬ leuˬ-eu kʼaˬ lo sehˇ, smˇ siˬ tiˬ siˬ-ahˇ pyuˇ deuˬ ni gʼeh-eu kʼaˬ lo sehˇ, oeˬ siˬ tiˬ siˬ-ahˇ nyoeˇ naˆ naˆ-eu kʼaˬ lo sehˇ,

²⁰ ngaˬ siˬ tiˬ siˬ-ahˇ yaw byaꞈ byaꞈ-eu kʼaˬ lo sehˇ, koꞈ siˬ tiˬ siˬ-ahˇ neˇ tseuˆ ni gʼeh-eu kʼaˬ lo sehˇ, shiꞈ siˬ tiˬ siˬ-ahˇ neˇ shuiˇ shuiˇ-eu kʼaˬ lo sehˇ, yehꞈ siˬ tiˬ siˬ-ahˇ nyoeˇ shuiˇ shuiˇ-eu kʼaˬ lo sehˇ, gʼoeˬ siˬ tiˬ siˬ-ahˇ shuiˇ nyehˆ ni gʼeh-eu kʼaˬ lo sehˇ, tseˇ siˬ tiˬ siˬ-ahˇ shuiˇ nyoeˇ nyoeˇ-eu kʼaˬ lo sehˇ, tseˇ tiꞈ siˬ tiˬ siˬ-ahˇ neˇ leuˬ leuˬ-eu kʼaˬ lo sehˇ, tseˇ nyiꞈ siˬ tiˬ siˬ-ahˇ neˇ naˆ naˆ-eu kʼaˬ lo sehˇ, heu deuˬ neh laˆ saˆ taˬ-euˬ meh.

²¹ Lahˇ kʼehˬ tseˇ nyiꞈ kʼehˬ-aˬ, aˇ caˇ caˇ kʼawꞈ sehˇ tseˇ nyiꞈ siˬ pyeuꞈ-eu meh. Lahˇ kʼehˬ aˬ yawꞈ kʼehˬ yawꞈ-ahˇ, aˇ caˇ caˇ kʼawꞈ sehˇ tiˬ siˬ neh tehꞈ-ehˇ jahˇ jiˇ taˬ-euˬ meh. Meuˬ gʼahˇ ceh dahˇ-eu gaˇ jawˬ dawˬ tawˆ luꞈ, pyawˬ haw loꞈ-ehˇ shawˇ jehˆ ni gʼeh-eu shuiˇ pyeuꞈ-eu meh.

²² Meuˬ kʼoeˇ meuˬ laꞈ kʼoeˇ, uˬ duˬ tahˬ nymˇ nymˇ ma jaˆ gaˇ ngaˇ maˬ ya mawˇ-aˬ. Aˬ jeˬ miˇ neh ehˇ naˇ, Baoˬ huiˬ-eu Sahˬpaˬ Miˬyehˇ hawˇ-eu Yawˇzaˬ-aˬ, meuˬ kʼoeˇ meuˬ-euˬ uˬ duˬ tahˬ nymˇ nymˇ ma pyeuꞈ-eu meh.

²³ Meuˬ kʼoeˇ meuˬ-aˬ, nahˇ ma hawˇ-eu ba la-euˬ yaw shehꞈ maˬ loˬ-a. Aˬ jeˬ miˇ neh ehˇ naˇ, Miˬyehˇ-euˬ yaw shehꞈ kʼahˬ sehˇ kʼoeˇ gaˇ bya-awˇ, Yawˇzaˬ-aˬ, meuˬ kʼoeˇ meuˬ-euˬ tsiˇ kʼmˬ pyeuꞈ-eu meh.

²⁴ Miˇ tsaˬ zaˬ deuˬ kʼoeˇ-euˬ yaw shehꞈ-ahˇ gʼoe-awˇ cah tehꞈ-a. Miˇ kʼahˬ sahˬ paˬ deuˬ-aˬ, meuˬ kʼoeˇ meuˬ-ahˇ aˬ yawꞈ maꞈ-euˬ pyuˇ shuiˇ myawˬ gahˬ sha ahˇ tehꞈ-a.

²⁵ Meuˬ-euˬ lahˇ kʼehˬ kʼoeˇ deuˬ maˬ piˬ tehˬ ni nah ga-ehˇ pah taˬ tehꞈ-a. Aˬ jeˬ miˇ neh ehˇ naˇ, kʼoeˇ gaˇ uˬ ciꞈ ciꞈ-iˇ-eu maˬ baw-a.

²⁶ Miˇ kʼahˬ tsawˇ jeuˬ-euˬ yaw shehꞈ kʼahˬ sehˇ hawˇ-eu pyuˇ shuiˇ myawˬ gahˬ deuˬ, meuˬ kʼoeˇ meuˬ-ahˇ yuˇ ahˇ gʼeh tehꞈ-a.

²⁷ Ehˇ kʼawꞈ, maˬ muiˬ maˬ shawˇ-eu jeˬ tiˬ jeˬ-iˬ meuˬ kʼoeˇ meuˬ laꞈ kʼoeˇ maˬ ya hehˇ ahˇ gʼeh-a. Shaꞈ dawˇ-eu jeˬ mˇ-eu tsawˇ haˬ hawˇ-eu jaˬ myawꞈ myawꞈ-eu tsawˇ haˬ deuˬ kʼawꞈ, maˬ ya uˇ leˇ-a. Yawˇzaˬ-euˬ dehꞈ-eu saꞈ laˇ sahˬ boꞈ laꞈ kʼoeˇ tsawˇ myahˇ ahˇ-eu tsawˇ haˬ deuˬ tehꞈ-ehˇ kʼoeˇ gaˇ ya uˇ leˇ-eu meh.