Panmaeq 20 - Akha

Tiˬ heˇ kʼoꞈ aˇ yamˬ

¹ Kʼoeˇ naˇ, mˬ taˆ gʼaˬ kʼehˇ tiˬ gʼaˬ mˬ-ahˇ neh zaꞈ ka le gaˇ ngaˇ ya mawˇ-euˬ ma. Aˬ yawꞈ-euˬ aˬ laꞈ-ahˇ, yaw li maˬ baw-eu duˬ kʼahˬ-euˬ mahˬ tawꞈ kahˬ hawˇ-eu shmˇ caˆ caˆ ma yuˇ luꞈ-eu meh.

² Aˇ hu-euˬ aˇ lawˇ kʼoeˇ mawˇ pyeuꞈ-eu byaˆ yahˬ kʼoeˇ mawˇ-ahˇ aˬ yawꞈ nyehꞈ-awˇ, tiˬ heˇ kʼoꞈ byah ni shmˇ caˆ neh paꞈ tawꞈ taˬ-euˬ meh. Aˇ lawˇ kʼoeˇ-aˬ, Nehꞈ sahˬ paˬ hawˇ-eu nehꞈ Saˬdaˬ lehˇ kʼawꞈ ehˇ nya-eu meh.

³ Tiˬ heˇ kʼoꞈ aˇ yamˬ laꞈ kʼoeˇ miˇ kʼahˬ tsawˇ jeuˬ dawˬ tawˆ luꞈ-ahˇ aˬ yawꞈ mehˇ shuiˇ maˬ bi shuiˇ nya ni, mˬ taˆ gʼaˬ kʼehˇ kʼoeˇ gʼaˬ aˬ yawꞈ-ahˇ yaw li maˬ baw-eu duˬ kʼahˬ-ahˇ baꞈ ahˇ-awˇ, mahˬ tawꞈ tawꞈ tehˬ-awˇ jmˬ diˬ gʼoeˬ taˬ-euˬ meh. Kʼoeˇ dzeuˇ naˇ, aˬ yawꞈ-ahˇ tiˬ kʼehˬ tiˬ yamˬ pyehˬ nehˬ tehꞈ-a.

⁴ Kʼoeˇ naˇ, dzoeˬ dzaˬ nuiˇ mahˬ tiˬ deuˬ-ahˇ ngaˇ ya mawˇ-euˬ ma. Kʼoeˇ gaˇ nuiˇ luꞈ-eu tsawˇ haˬ deuˬ-ahˇ yaˇ kʼaˬ daˇ-eu baoˬ biꞈ taˬ-euˬ meh. Yeˬsuˇ neh pah mehˬ-euˬ yaw tsaˬ yaw dawˇ gaˇ kawˆ hawˇ-eu Miˬyehˇ dawˬ kawˬ gaˇ kawˆ mehˬ-euˬ baˬ da neh bi sehꞈ-euˬ tsawˇ haˬ deuˬ-euˬ saꞈ laˇ deuˬ-ahˇ kʼawꞈ ya mawˇ-euˬ ma. Aˬ yawꞈ maꞈ-aˬ, jeˬ zaˬ yaw haiˬ kʼoeˇ mawˇ hawˇ-eu aˬ yawꞈ-euˬ tahˬ pahˬ aˬ ma mawˇ kawˇ-ahˇ uˬ duˬ maˬ tahˬ-ehˇ, aˬ yawꞈ maꞈ-euˬ naˇ kʼawˇ hawˇ-eu aˬ laꞈ-ahˇ aˬ yawꞈ-euˬ jmˬ maˬ diˬ taˬ-aˬ. Aˬ yawꞈ maꞈ gʼoꞈ dehꞈ laˇ-awˇ, Ka li nehˬ-ehˇ sahˬ paˬ geuꞈ-awˇ tiˬ heˇ kʼoꞈ uˆ lahˇ-euˬ meh.

⁵ (Dzeˇ-eu tsawˇ haˬ deuˬ-aˬ, tiˬ heˇ kʼoꞈ aˇ yamˬ kʼoeˇ maˬ dzeuˇ-iˇ kʼoeˇ keuˆ ni maˬ gʼoꞈ dehꞈ laˇ-a.) Heu-aˬ, shiˇ-euˬ tsawˇ haˬ deuˬ gʼoꞈ dehꞈ beh beh laˇ-eu poˆ meh.

⁶ Gʼoꞈ dehꞈ beh beh laˇ-eu heu poˆ laꞈ kʼoeˇ ahˇ-eu tsawˇ haˬ deuˬ-aˬ, guiˬ lahˬ huiˬ dui dui-awˇ, laˬ kʼaˬ cehˇ dui dui-eu meh. Nyiˬ poˆ tiˬ poˆ shiˇ-eu jeˬ-euˬ baoˬ aˬ yawꞈ maꞈ-ahˇ maˬ gʼaˬ leˇ-a. Aˬ yawꞈ maꞈ-aˬ, Miˬyehˇ hawˇ-eu Ka li-euˬ piˇ ma ya geuꞈ-awˇ, aˬ yawꞈ nehˬ-ehˇ tiˬ heˇ kʼoꞈ ya uˆ lahˇ tehꞈ-a.

Nehꞈ Saˬdaˬ-ahˇ deuˆ gʼaˬ-euˬ

⁷ Tiˬ heˇ kʼoꞈ aˇ yamˬ dzeuˇ ngeh, nehꞈ Saˬdaˬ-ahˇ paꞈ taˬ-euˬ pyehˬ nehˬ tehꞈ-a.

⁸ Aˬ yawꞈ doˆ-iˇ-awˇ, miˇ ma oeˬ coeˇ oeˬ pyawˬ-ahˇ jawˇ-eu Gawˇgaˆ hawˇ-eu Maˬgawˇgaˆ tsawˇ jeuˬ deuˬ-ahˇ jaˬ myawꞈ mehˇ shuiˇ shuiˇ tehꞈ-a. Nehꞈ Saˬdaˬ-aˬ, iˬ ma laˆ shaˆ lawˇ deh-ahˇ jaˆ-eu kʼaˇ shuiꞈ loꞈ-ehˇ myaˬ-eu aˬ yawꞈ maꞈ-ahˇ guiˇ deuˆ-eu gʼaˇ duˬ sheuˬ uiˬ laꞈ tehꞈ-a.

⁹ Aˬ yawꞈ maꞈ miˇ tsaˬ kʼoeˇ taˆ jawˇ byah jiˇ-awˇ, Miˬyehˇ-euˬ tsawˇ haˬ deuˬ-euˬ sehˬ gʼawˆ hawˇ-eu Miˬyehˇ gaˬ-eu meuˬ kʼoeˇ meuˬ-ahˇ jawˬ lahˇ jiˇ-euˬ meh. Ehˇ kʼawꞈ, mˬ-ahˇ neh miˬ dzaˬ ga ka le-awˇ, aˬ yawꞈ maꞈ-ahˇ laˆ luˬ laˆ seˇ-euˬ meh.

¹⁰ Kʼoeˇ naˇ, aˬ yawꞈ maꞈ-ahˇ jaˬ myawꞈ mehˇ shuiˇ shuiˇ-euˬ Nehꞈ sahˬ paˬ-aˬ, jeˬ zaˬ yaw haiˬ kʼoeˇ mawˇ hawˇ-eu maˬ ngeuˇ-eu Miˬyehˇ gʼaˇ duˬ ngehˬ dah-eu gʼaˬ-ahˇ baꞈ ahˇ nehˬ-euˬ lah pyeuꞈ-eu, miˬ dzaˬ hawˇ-eu miˬ dzaˇ dzaˇ shuiˇ lah kʼoeˇ lah-ahˇ bi baꞈ ahˇ tehꞈ-a. Aˬ yawꞈ maꞈ-aˬ, mˬ maˬ maˬ byaˆ zaˇ ziˇ uˬ ciꞈ nah gʼahˇ maˬ ehˇ ya shaˬ ya zahˬ dui dui tehꞈ-a.

Aˇ saˬ saˬ-eu yaˇ kʼaˬ daˇ-eu

¹¹ Kʼoeˇ naˇ, pyuˇ deuˬ ni gʼeh-eu huiˬ dui dui-eu dzoeˬ dzaˬ nuiˇ mahˬ hawˇ-eu kʼoeˇ gaˇ nuiˇ luꞈ-eu gʼaˬ-ahˇ ngaˇ ya mawˇ-euˬ ma. Mˬ hawˇ-eu miˇ tsaˬ aˬ yawꞈ-euˬ mehˬ shi cehˆ byoˆ-awˇ, tiˬ jawˇ-iˬ maˬ paˇ ya mawˇ ni byoˆ-iˇ-euˬ meh.

¹² Kʼoeˇ naˇ, shiˇ-euˬ tsawˇ haˬ deuˬ huiˬ zaˬ nyiˇ zaˬ dawˬ tawˆ luꞈ, dzoeˬ dzaˬ nuiˇ mahˬ kʼoeˇ-euˬ mehˬ shi yawꞈ luꞈ gaˇ ngaˇ ya mawˇ-euˬ ma. Kʼoeˇ ngeh, sahˬ boꞈ pah-euˬ meh. Kʼoeˇ naˇ, dehꞈ-eu saꞈ laˇ sahˬ boꞈ pah-euˬ meh. Shiˇ-euˬ tsawˇ haˬ deuˬ-aˬ, sahˬ boꞈ kʼoeˇ deuˬ laꞈ kʼoeˇ kʼaˇ boꞈ ahˇ taˬ-euˬ loꞈ-ehˇ, yawˬ ha neh kʼaˇ mˇ yaꞈ-euˬ gaˇ geuˇ ni yaˇ kʼaˬ bi daˇ-euˬ meh.

¹³ Kʼoeˇ naˇ, iˬ ma laˆ shaˆ-aˬ, aˬ yawꞈ laꞈ kʼoeˇ shiˇ taˬ-euˬ tsawˇ haˬ deuˬ Miˬyehˇ-ahˇ a nehˬ-euˬ meh. Shiˇ-eu jeˬ maˬ ehˇ, shiˇ-eu miˇ kʼahˬ maˬ ehˇ, aˬ yawꞈ maꞈ neh kʼaˇ nyehꞈ tehˬ taˬ-euˬ shiˇ-euˬ tsawˇ haˬ deuˬ a nehˬ-euˬ meh. Kʼoeˇ naˇ, tsawˇ haˬ dawˬ tawˆ luꞈ yawˬ ha neh kʼaˇ mˇ dzeuˇ yaꞈ-euˬ loꞈ-ehˇ yaˇ kʼaˬ bi daˇ-euˬ meh.

¹⁴ Shiˇ-eu jeˬ hawˇ-eu shiˇ-eu miˇ kʼahˬ kʼoeˇ nyiˬ jeˬ-ahˇ-aˬ, miˬ dzaˬ lah-ahˇ biˬ puꞈ nehˬ-euˬ meh. (Miˬ dzaˬ lah kʼoeˇ lah-aˬ, nyiˬ poˆ tiˬ poˆ shiˇ-eu jeˬ pyeuꞈ-eu meh.)

¹⁵ Dehꞈ-eu saꞈ laˇ sahˬ boꞈ laꞈ kʼoeˇ tsawˇ myahˇ maˬ kʼaˇ ahˇ-eu tsawˇ haˬ deuˬ-aˬ, miˬ dzaˬ lah-ahˇ bi baꞈ puꞈ jiˇ-euˬ meh.