Panmaeq 17 - Akha

Tsawˇ myahˇ doˆ-eu Meh maˬ laˇ

¹ Kʼoeˇ naˇ, mˬ taˆ gʼaˬ kʼehˇ kʼoeˇ shiꞈ gʼaˬ laꞈ kʼoeˇ, naˬ bo shiꞈ bo ahˇ-eu gʼaˬ ngaˇ jawˇ gaˇ oe-awˇ heu loꞈ-ehˇ ehˇ-eu meh. “Oe-awˬ, lawˇ baˬ baˬ ma gʼawˬ mya gawˆ dawˬ peh jaˆ-eu meuˬ meuˬ ma pyeuꞈ-eu tsawˇ myahˇ doˆ-eu meh maˬ laˇ kʼoeˇ gʼaˬ kʼehˬ-eu kʼaˆ-eu jeˬ-ahˇ aˬ joˆ-ehˇ ya daˬ gaˇ ngaˇ nawˬ-ahˇ sheuˬ mehˬ-iˇ nyaˇ.

² Miˇ tsaˬ kʼoeˇ taˆ jawˇ-eu sahˬ paˬ deuˬ aˬ yawꞈ nehˬ-ehˇ joe-awˇ, miˇ tsaˬ zaˬ deuˬ aˬ gaꞈ dzaˇ uiˇ dawˇ yehꞈ-euˬ loꞈ-ehˇ aˬ yawꞈ nehˬ-ehˇ kʼaˬ miˬ sheu-eu jeˬ-ahˇ yehꞈ leˇ taˬ-euˬ meh.

³ Yaw sahˇ Miˬyehˇ ngaˬ-ahˇ uˆ lahˇ le-awˇ, mˬ taˆ gʼaˬ kʼehˇ kʼoeˇ gʼaˬ ngaˬ-ahˇ bawˇ tsahˬ-ahˇ sheuˬ gʼeh-euˬ meh. Kʼoeˇ gaˇ, neˇ tseuˆ ni gʼeh-eu jeˬ zaˬ yaw haiˬ tiˬ mawˇ-ahˇ dziˬ luꞈ-eu zaˬ miˬ zaˬ tiˬ gʼaˬ-ahˇ ngaˇ mawˇ-euˬ ma. Jeˬ zaˬ kʼoeˇ mawˇ-aˬ, gʼawˇ mawˇ mawˇ lah-ehˇ Miˬyehˇ-ahˇ yehˬ bawˬ sehˇ lu-ehˇ ehˇ-eu tsawˇ myahˇ deuˬ boꞈ taˬ-euˬ meh. Uˬ duˬ shiꞈ siˬ tsoꞈ-awˇ, uˬ coeˇ tseˇ coeˇ tsoꞈ-eu meh.

⁴ Zaˬ miˬ zaˬ kʼoeˇ gʼaˬ-aˬ, neˇ naˆ naˆ-eu mehˬ tsoeˬ hawˇ-eu neˇ tseuˆ ni gʼeh-eu mehˬ tsoeˬ dm-awˇ, shuiˇ myawˬ guˇ deuˬ, aˇ poeˬ kʼaˆ-eu kʼaˬ lo sehˇ deuˬ hawˇ-eu, aˇ caˇ caˇ kʼawꞈ sehˇ deuˬ tiˬ byah ni geuꞈ luꞈ-eu meh. Aˬ cawˬ nehˬ-ehˇ joe-euˬ jeˬ pyeuꞈ-eu jawꞈ dui dui-eu jeˬ hawˇ-eu nui daˆ daˆ laˇ paˬ-ehˇ gʼeh-eu jeˬ tiˬ byah ni ahˇ-eu shuiˇ kʼmˬ maˬ tiˬ kʼmˬ aˬ yawꞈ yuˇ luꞈ-eu meh.

⁵ Zaꞈ taˬ-euˬ dawˬ tsuiꞈ ahˇ-eu tsawˇ myahˇ tiˬ myahˇ aˬ yawꞈ-euˬ naˇ kʼawˇ-ahˇ heu loꞈ-ehˇ boꞈ taˬ-euˬ meh. “Meh maˬ laˇ deuˬ hawˇ-eu, miˇ tsaˬ kʼoeˇ taˆ nui daˆ daˆ laˇ paˬ-ehˇ gʼeh-eu jeˬ dawˬ tawˆ luꞈ-euˬ aˬ ma yaw dzahˇ Baˬbuˬloˬ meuˬ meuˬ ma” lehˇ boꞈ taˬ-euˬ meh.

⁶ Zaˬ miˬ zaˬ kʼoeˇ gʼaˬ-aˬ, Miˬyehˇ-euˬ tsawˇ haˬ deuˬ-euˬ shiˬ hawˇ-eu, Yeˬsuˇ-ahˇ saˇ jaˇ ziꞈ-eu miˇ neh bi sehꞈ-euˬ tsawˇ haˬ deuˬ-euˬ shiˬ dawˇ yehꞈ taˬ-euˬ gaˇ ya mawˇ-euˬ ma. Zaˬ miˬ zaˬ kʼoeˇ gʼaˬ-ahˇ ya mawˇ ngeh, ngaˇ zahˬ leˇ-euˬ ma.

⁷ Mˬ taˆ gʼaˬ kʼehˇ kʼoeˇ gʼaˬ ngaˬ-ahˇ ehˇ-eu, “Aˬ jeˬ miˇ neh nawˇ zahˬ leˇ te. Zaˬ miˬ zaˬ kʼoeˇ gʼaˬ hawˇ-eu, uˬ duˬ shiꞈ siˬ tsoꞈ-awˇ uˬ coeˇ tseˇ coeˇ tsoꞈ-eu jeˬ zaˬ yaw haiˬ kʼoeˇ mawˇ-euˬ gaˇ kawˆ, zaꞈ taˬ-euˬ dawˬ tsuiꞈ ngaˇ nawˬ-ahˇ ehˇ nehˬ nyaˇ.

⁸ Nawˇ mawˇ-euˬ jeˬ zaˬ kʼoeˇ mawˇ-aˬ, aˇ hu dehꞈ-euˬ kʼawꞈ, nymˬ-mˇ maˬ paˇ dehꞈ meh. Gʼawˬ myahˇ maˬ gʼeh-ehˇ yaw li maˬ baw-eu duˬ kʼahˬ-ahˇ neh doˆ laˇ-awˇ, luˬ-iˇ seˇ-iˇ-eu jeˬ laꞈ kʼoeˇ ya uˇ-iˇ tehꞈ-a. Mˬ hawˇ-eu miˇ maˬ beh mi naˆ-ehˇ saꞈ laˇ dehꞈ-eu sahˬ boꞈ laꞈ kʼoeˇ tsawˇ myahˇ maˬ bi boꞈ ahˇ taˬ-euˬ miˇ tsaˬ kʼoeˇ taˆ jawˇ luꞈ-eu tsawˇ haˬ deuˬ-aˬ, jeˬ zaˬ yaw haiˬ kʼoeˇ mawˇ-ahˇ ya mawˇ ngeh zahˬ dui dui leˇ tehꞈ-a. Aˬ jeˬ miˇ neh ehˇ naˇ, jeˬ zaˬ yaw haiˬ kʼoeˇ mawˇ dzeuˇ laˇ ngeh yaw dehꞈ dehꞈ-euˬ kʼawꞈ, nymˬ-mˇ maˬ paˇ dehꞈ meh. Ehˇ kʼawꞈ, tiˬ poˆ paˇ doˆ laˇ tehꞈ-a.

⁹ “Heu-aˬ, zaˬ siˬ tsawˇ gahˇ zmˬ-awˇ bi shaˇ sawˇ-eu gʼaˇ duˬ ehˇ-eu dawˬ ma. Uˬ duˬ kʼoeˇ shiꞈ siˬ-aˬ, zaˬ miˬ zaˬ kʼoeˇ gʼaˬ nuiˇ luꞈ-eu gawˬ duˇ shiꞈ duˇ pyeuꞈ-eu meh. Sahˬ paˬ shiꞈ gʼaˬ-ahˇ ehˇ mawꞈ-eu jeˬ kʼawꞈ pyeuꞈ-eu meh.

¹⁰ Ngaˬ gʼaˬ ga-iˇ-awˇ, tiˬ gʼaˬ uˆ lahˇ luꞈ-a siˬ. Tiˬ gʼaˬ-aˬ, maˬ doˆ le-aˬ siˬ. Aˬ yawꞈ doˆ le ngeh, tiˬ kʼehˬ tiˬ yamˬ tehꞈ-ehˇ ya uˆ lahˇ tehꞈ-a.

¹¹ Aˇ hu dehꞈ-awˇ nymˬ-mˇ maˬ paˇ dehꞈ-euˬ jeˬ zaˬ yaw haiˬ kʼoeˇ mawˇ kʼawꞈ, sahˬ paˬ kʼoeˇ shiꞈ gʼaˬ laꞈ kʼoeˇ ahˇ-eu sahˬ paˬ yehꞈ gʼaˬ tiˬ gʼaˬ pyeuꞈ-awˇ, luˬ-iˇ seˇ-iˇ-eu jeˬ laꞈ kʼoeˇ ya uˇ-iˇ tehꞈ-a.

¹² “Nawˬ neh mawˇ-euˬ uˬ coeˇ tseˇ coeˇ kʼoeˇ-aˬ, nymˬ-mˇ maˬ uˆ lahˇ le dah-euˬ sahˬ paˬ deuˬ pyeuꞈ-eu meh. Ehˇ kʼawꞈ, aˬ yawꞈ maꞈ-ahˇ jeˬ zaˬ yaw haiˬ kʼoeˇ mawˇ nehˬ-ehˇ tiˬ kawˆ loꞈ-ehˇ sahˬ paˬ geuꞈ-awˇ, tiˬ naˬ liˬ byah ni bi uˆ lahˇ-eu a kawˬ-aˬ biꞈ tehꞈ-a.

¹³ Sahˬ paˬ heu tseˇ gʼaˬ nui noeˬ tiˬ gaˇ taꞈ-awˇ, aˬ yawꞈ maꞈ-euˬ baoˬ hawˇ-eu uˆ lahˇ-eu aˇ yaˬ, jeˬ zaˬ yaw haiˬ kʼoeˇ mawˇ-ahˇ a nehˬ tehꞈ-a.

¹⁴ Aˬ yawꞈ maꞈ Yawˇzaˬ-ahˇ guiˇ deuˆ tehꞈ-a. Ehˇ kʼawꞈ, Yawˇzaˬ-aˬ, aˬ yawꞈ neh tseˇ doˆ-awˇ kuˇ-euˬ, saˇ jaˇ ziꞈ-eu laꞈ kʼoeˇ aˬ yawꞈ-euˬ mehˬ nah caw teh-eu tsawˇ haˬ deuˬ nehˬ-ehˇ tiˬ paw pyawˬ-awˇ, aˬ yawꞈ maꞈ-ahˇ deuˆ gʼaˬ tehꞈ-a. Aˬ jeˬ miˇ neh ehˇ naˇ, aˬ yawꞈ-aˬ, sahˬ paˬ kʼoeˇ taˆ Sahˬpaˬ pyeuꞈ-eu meh.”

¹⁵ Mˬ taˆ gʼaˬ kʼehˇ kʼoeˇ gʼaˬ ngaˬ-ahˇ heu loꞈ-ehˇ paˇ ehˇ-eu meh. “Nawˬ neh ya mawˇ-euˬ meh maˬ laˇ kʼoeˇ gʼaˬ nuiˇ luꞈ-eu iˇ cuꞈ kʼoeˇ deuˬ-aˬ, miˇ tsaˬ tsawˇ jeuˬ tsawˇ ca deuˬ pyeuꞈ-eu meh.

¹⁶ Nawˬ neh ya mawˇ-euˬ uˬ coeˇ kʼoeˇ tseˇ coeˇ hawˇ-eu jeˬ zaˬ yaw haiˬ kʼoeˇ mawˇ meh maˬ laˇ kʼoeˇ gʼaˬ-ahˇ muiˇ-awˇ, aˬ yawꞈ kʼaˇ jaˆ-eu jeˬ dawˬ tawˆ luꞈ yuˇ geuꞈ jiˇ-awˇ, neˇ myawˆ ni byehˇ dzeh yaꞈ tehꞈ-a. Aˬ yawꞈ maꞈ aˬ yawˬ-euˬ shaˬ jiˇ dzaˬ-awˇ, aˬ yawꞈ-ahˇ miˬ dzaˬ keuˬ dzeh tehꞈ-a.

¹⁷ Aˬ jeˬ miˇ neh ehˇ naˇ, Miˬyehˇ neh ehˇ taˬ-euˬ dawˬ byah laˇ ngeh keuˆ ni, aˬ yawꞈ maꞈ kuiˇ ciˬ laꞈ ciˬ gm-awˇ, aˬ yawꞈ maꞈ-euˬ baoˬ jeˬ zaˬ yaw haiˬ kʼoeˇ mawˇ-ahˇ a nehˬ-eu laꞈ kʼoeˇ, Miˬyehˇ-euˬ nui noeˬ mˇ-eu nui ma aˬ yawꞈ maꞈ-ahˇ Miˬyehˇ dawˆ ahˇ nehˬ taˬ-euˬ meh.

¹⁸ “Nawˬ neh ya mawˇ-euˬ zaˬ miˬ zaˬ kʼoeˇ gʼaˬ-aˬ, miˇ tsaˬ kʼoeˇ taˆ jawˇ-eu sahˬ paˬ deuˬ kʼoeˇ taˆ uˆ lahˇ-eu huiˬ dui dui-eu meuˬ kʼoeˇ meuˬ pyeuꞈ-eu meh.”