Ngoeˇ dawˬ 4 - Akha

Yeˬluˇsaˬlehˬ meuˬ cawˆ-iˇ gʼaˬ-euˬ

¹ Yaw shehꞈ guiˇ nyiˬ ni bya-euˬ shuiˇ, yaw shehꞈ byoˆ-iˇ jiˇ shaw-euˬ meh. Muiˬ-eu shawˇ-eu kʼaˬ lo tsaˬ byaˆ, gaˇ ma doe ni ga luꞈ-eu meh.

² Ziˇoˬ-euˬ aˬ li zaˬ guˬ deuˬ, shuiˇ loꞈ-ehˇ poeˬ-euˬ lawˬ-euˬ kʼawꞈ, shaˬ jehˆ tehˆ-euˬ miˇ tsaˬ oeˬ lahˬ, poeˬ sawˇ lawˬ maˬ baw gaˇ duˇ meh.

³ Haiˬ-eu kʼaˬ yehˇ tiˬ mawˇ keuˆ ni, zaˬ-ahˇ aˬ coeˇ bi dawˇ huiˬ meh. Ehˇ kʼawꞈ ngaˬ-euˬ tsawˇ haˬ deuˬ-aˬ, law taw aˇ jiˇ jiˇ ma loꞈ-ehˇ, zaˬ-ahˇ kʼehˬ nehˬ kʼaˆ nehˬ-eu meh.

⁴ Iˇ cuꞈ mehꞈ-awˇ kuˬ byahˬ gui-eu, mehˬ laˇ kʼoeˇ taˆ paw myahˬ leˇ-awˇ, hawˬ mehꞈ mehꞈ-eu kaˬ muˇ shaˇ kʼawꞈ, zaˬ-ahˇ haw cawˬ-eu maˬ jawˇ-a.

⁵ Dzaˇ kuiˇ dzaˇ myehˇ dzaˬ-euˬ tsawˇ haˬ, gaˇ ma-ahˇ mehꞈ-eu ga luꞈ meh. Muiˬ-eu paˇ neˇ dm-euˬ tsawˇ haˬ, kʼaˬ lehˇ jehˆ bymˇ-ahˇ lah luꞈ meh.

⁶ Myaˆ nuiˆ kʼoˆ tehˆ tiˬ tehˆ laꞈ kʼoeˇ, Sawˇdoˬ meuˬ-ahˇ laˆ cawˆ nehˬ ngeh, caw ba miˇ le-eu maˬ dah-a. Ehˇ kʼawꞈ ngaˬ-euˬ tsawˇ haˬ deuˬ-aˬ, kʼoeˇ naˆ maˬ tseˇ ya daˬ-euˬ meh.

⁷ Nga maꞈ-euˬ sahˬ paˬ sahˬ ma deuˬ, ngehˇ km maˬ tseˇ shawˇ dui dui-awˇ, mawˇ neˇ aˬ coeˇ maˬ tseˇ ba-awˇ, shaˬ jiˇ neˇ jiˆ poˬ ni gʼeh-awˇ, sehˇ naˆ maˬ tseˇ aˇ gʼehˇ muiˬ meh.

⁸ Ehˇ kʼawꞈ nymˬ-mˇ yawꞈ maꞈ myaˆ pyawˬ, kʼawˬ taˆ miˇ kʼoeˬ maˬ tseˇ naˆ-awˇ, gaˇ ma-ahˇ shiˇ taˬ-awˇ ga-eu, tiˬ gʼaˬ-iˬ maˬ haw siˬ nya ni. Baˆ kʼoˆ shaˬ yoeˬ-ahˇ myahˬ leˇ-awˇ, daˇ kawˬ loꞈ-ehˇ gʼahˇ leˇ-euˬ meh.

⁹ Guiˇ deuˆ gaˇ shiˇ-euˬ deuˬ maˬ tseˇ, mehꞈ-awˇ shiˇ-euˬ deuˬ doeˇ dzehˬ meh. Dzaˬ-eu tiˬ jeˬ-iˬ maˬ jaˆ-ehˇ, liˬ-iˇ koˆ-iˇ-awˇ shiˇ-euˬ meh.

¹⁰ Ngaˬ-euˬ tsawˇ haˬ shaˬ zahˬ naꞈ-eu, ngaˬ-ahˇ uˇ gawˇ dui dui laˇ nya. Aˬ ma deuˬ yawˬ ha-euˬ zaˬ-ahˇ, puꞈ jaꞈ-awˇ dzaˬ gaˇ keuˆ ni meh.

¹¹ Sahˬpaˬ Miˬyehˇ nui ma pehˇ-eu, dawˬ tawˆ luꞈ puiˇ pyehˬ ka leꞈ-awˇ, nui pehˇ miˬ dzaˬ shehˆ daˆ leꞈ ngeh, Ziˇoˬ meuˬ-ahˇ puiˆ dzaˬ-euˬ kʼoeˇ, ciˇ tahˬ puiˆ byoˆ gaˇ keuˆ-euˬ meh.

¹² Miˇ kʼahˬ sahˬ paˬ dawˬ tawˆ hawˇ-eu, miˇ tsaˬ zaˬ yawˬ gʼaˬ yawˬ na luꞈ, Yeˬluˇsaˬlehˬ lahˇ kʼehˬ laꞈ kʼoeˇ, muiˇ-eu deuˬ uˇ laˇ nya meh lehˇ, tiˬ gʼaˬ-iˬ maˬ noeˬ doˆ coeˇ-a.

¹³ Kʼoeˇ gaˇ uˇ keuˆ leˇ nya-euˬ-aˬ, bawˇ lawˇ peh hawˇ-eu piˇ ma deuˬ, tsawˇ muiˬ deuˬ-ahˇ sehꞈ-eu laꞈ kʼoeˇ, iˬ baˇ mˇ-euˬ baˬ da neh meh.

¹⁴ Meuˬ-euˬ lehˆ kawˆ gaˇ ma doe ni, myaˆ behꞈ loꞈ-ehˇ yawꞈ maꞈ cah gaˇ, yawꞈ maꞈ-ahˇ shiˬ lehꞈ-eu miˇ neh, tiˬ gʼaˬ-iˬ maˬ toeˬ ciˆ peuˬ-a.

¹⁵ “Maˬ shawˇ-eu deuˬ heu gaˇ taˬ laˇ. Maˬ tahˬ ciˆ laˇ ni cehˆ-awˬ” lehˇ, aˬ cawˬ neh bi teh dzeh-euˬ meh. Aˬ cawˬ miˇ kʼahˬ doe ni iˇ kʼawꞈ, tiˬ gʼaˬ-iˬ maˬ ha geuꞈ nehˬ-a.

¹⁶ Sahˬpaˬ Miˬyehˇ aˬ yawꞈ maꞈ-ahˇ, myaˆ haw maˬ cawˬ nahˇ-eu miˇ neh, miˇ kʼahˬ-ahˇ teh byaˆ nehˬ-euˬ meh. Piˇ ma deuˬ-ahˇ maˬ taˬ huiˬ-a. Aˬ yuiꞈ deuˬ-ahˇ maˬ taˬ mahˇ-a.

¹⁷ Myaˆ nuiˆ haw doˆ-eu keuˆ laˇ kʼawꞈ, caw ba le-eu gʼaˬ maˬ jawˇ-a. Kawˬ lahˇ loꞈ kʼehꞈ-eu keuˆ laˇ kʼawꞈ, ngehˬ gʼeh le-eu gʼaˬ maˬ jawˇ-a.

¹⁸ Muiˇ-eu deuˬ neh bi haw tsoˆ-awˇ, kmˇ cehˇ laꞈ nyiˇ maˬ iˇ peuˬ nya. Nga maꞈ-euˬ aˇ nah jiˇ le-awˇ, aˇ saˬ saˬ-eu keuˆ le miˇ-a.

¹⁹ Nga maꞈ-euˬ mehˬ nah teh-eu deuˬ, mˬ taˆ kʼaˬ dzeˇ maˬ tseˇ kawˇ-awˇ, gawˬ jawˬ kʼoeˇ taˆ teh ka leꞈ-awˇ, bawˇ tsahˬ-ahˇ jawˇ-awˇ loꞈ luꞈ meh.

²⁰ Muiˇ-eu deuˬ guiˇ deuˆ uˇ laꞈ gaˇ, nga maꞈ-ahˇ haw piˇ-eu gʼaˇ duˬ, Sahˬpaˬ Miˬyehˇ neh tseˇ doˆ-euˬ, nga maꞈ-euˬ saꞈ gʼawˇ kahˬ pyeuꞈ-eu, nga maꞈ tsawˇ jeuˬ-euˬ sahˬ paˬ-ahˇ, aˬ yawꞈ maꞈ neh nyehꞈ mi-euˬ meh.

²¹ Eˬdoˬ miˇ kʼahˬ zaˬ deuˬ hawˇ-eu, Uˇzaˆ miˇ kʼahˬ tsawˇ haˬ deuˬ-oˇ, naw maꞈ uiˇ nya ngeh uiˇ tawˬ-awˬ. Naw maꞈ gʼeh shaˬ zahˬ ya mˇ-awˇ, neˇ myawˆ ni ya shaꞈ dawˇ-eu jeˬ, gʼawˬ myahˇ maˬ gʼeh-ehˇ keuˆ le meh.

²² Ziˇoˬ meuˬ-oˇ, nawˬ-ahˇ kʼehˬ-eu, gʼawˬ myahˇ ni maˬ paˇ ya daˬ meh. Aˬ cawˬ miˇ kʼahˬ laꞈ kʼoeˇ, aˬ dui, gʼawˬ myahˇ ni maˬ paˇ ya shaˬ meh. Ehˇ kʼawꞈ Eˬdoˬ meuˬ-oˇ nawˇ-aˬ, nawˬ-euˬ iˬ baˇ bi pah dzeh-awˇ, Sahˬpaˬ Miˬyehˇ neh bi kʼehˬ meh.