Ngoeˇ dawˬ 3 - Akha

Kʼehˬ-eu kʼaˆ-eu, noeˬ poˆ-eu, noeˬ tmˬ kʼaˇ za-eu

¹ Miˬyehˇ nui ma pehˇ-eu daˇ cuiˇ bi diˬ naˇ haw-euˬ gʼaˬ ngaˇ ma.

² Yaw shehꞈ maˬ jaˆ, zahˇ tsui gʼeh gaˇ, aˬ yawꞈ ngaˬ-ahˇ teh ahˇ-euˬ meh.

³ Aˬ yawꞈ aˬ laꞈ ngaˬ-ahˇ diˬ-eu, tiˬ nah nah ga maˬ naˬ leˇ-a.

⁴ Ngaˬ-euˬ shaˬ jiˇ ngawˬ paˆ dzeh-awˇ, shaˬ yoeˬ ngawˬ kʼehꞈ nehˬ laꞈ-euˬ meh.

⁵ Nui ma shaˬ zahˬ naꞈ-eu jeˬ neh, aˬ yawꞈ ngaˬ-ahˇ taw lahˇ-euˬ meh.

⁶ Aˇ hu ba neh shiˇ-euˬ loꞈ-ehˇ, yaw zahˇ-ahˇ bi jawˇ laꞈ-euˬ meh.

⁷ Ngaˇ maˬ bi cehˆ dzeuˇ-eu gʼaˇ duˬ, aˬ yawꞈ kaˇ pyawˇ taw lahˇ taˬ-awˇ, shmˇ caˆ paꞈ tawꞈ nehˬ laꞈ-euˬ meh.

⁸ Caw ba nehˬ laꞈ lehˇ ngaˇ shaˇ kʼawꞈ, shaˇ dawˬ piˬ tehˬ nehˬ laꞈ-euˬ meh.

⁹ Ngaˇ iˇ luꞈ-eu gaˇ ma mehˬ hu, kʼaˬ lo tsaˬ byaˆ gawˬ tsoeˬ taˬ-awˇ, gaˇ dawˇ laˆ gʼahˬ nehˬ laꞈ-euˬ meh.

¹⁰ Kʼaˬ hmˇ loꞈ-ehˇ ngaˬ-ahˇ loꞈ-awˇ, aˇ laˬ jaˬ shiˇ loꞈ-ehˇ shahˇ-awˇ,

¹¹ gaˇ ma gaˇ dzeˇ teh ahˇ gʼeh-awˇ, cehˬ pyaˬ cehˬ shaˇ jiˇ nehˬ laꞈ-awˇ, ciˬ cuˇ ni byehˇ dzeh laꞈ-euˬ meh.

¹² Aˬ yawꞈ-euˬ kaˆ ngoꞈ daˆ taˬ-awˇ, ngaˬ-ahˇ ciˬ tsehꞈ taˬ gʼeh-euˬ meh.

¹³ Aˬ yawꞈ kaˆ myaˬ pyehˬ gʼeh leꞈ-awˇ, nui ma-ahˇ beuˆ tsoˆ laꞈ-euˬ meh.

¹⁴ Ngaˇ aˬ cawˬ-euˬ uiˇ duˬ pyeuꞈ-awˇ, aˬ cawˬ ngaˬ-ahˇ caˇ niˇ gʼa meh.

¹⁵ Jaˆ gaˆ yaw kʼaˬ bi dzaˬ laꞈ-awˇ, pyaˬ kuiˇ bi dawˇ nehˬ laꞈ-euˬ meh.

¹⁶ Kʼaˬ lo neh seuˬ jeˬ juˆ jiˇ-awˇ, kʼaˬ lehˇ-ahˇ nawˬ pahˬ laꞈ-euˬ meh.

¹⁷ Nui saˇ oꞈ-awˇ jawˇ saˇ doˆ-eu, maˬ paˇ noeˬ mawˇ keuˆ coeˇ miˇ-a.

¹⁸ Gʼawˬ myahˇ maˬ paˇ dehꞈ coeˇ miˇ-a. Sahˬpaˬ Miˬyehˇ-ahˇ noeˬ tmˬ-eu, tiˬ pawꞈ-iˬ maˬ paˇ ahˇ miˇ-a.

¹⁹ Ngaˬ neh mˇ-euˬ shaˬ zahˬ hawˇ-eu, nymˇ jiˇ maˬ baw ni shaˬ-euˬ kʼoeˇ, kʼaˬ-eu doꞈ-ahˇ duˇ law miˇ-a.

²⁰ Gaˇ kawˆ kʼoeˇ maˬ ngehˇ leˇ coeˇ-ehˇ, nui ma gʼaˬ baˬ dui dui miˇ-a.

²¹ Ehˇ kʼawꞈ tiˬ jeˬ noeˬ mawˇ laˇ-awˇ, noeˬ tmˬ kʼaˇ paˇ za laˇ miˇ-a.

²² Sahˬpaˬ Miˬyehˇ gʼoeˇ-eu gaˬ-eu, tiˬ jawˇ-iˬ maˬ tsehˆ leˇ nya-ehˇ, aˬ yawꞈ-euˬ gʼawˬ shaˬ gaˬ-eu jeˬ, tiˬ jawˇ-iˬ maˬ tsiˇ leˇ nya-ehˇ,

²³ yawˬ shawˬ na luꞈ shuiꞈ teˇ poˬ ni, saˇ jaˇ huiˬ-eu ziꞈ dah ni meh.

²⁴ Ngaˬ neh za taˬ-euˬ pyuˇ pahˬ-aˬ, Sahˬpaˬ Miˬyehˇ pyeuꞈ-eu miˇ neh, aˬ yawꞈ-ahˇ ngaˇ noeˬ tmˬ luꞈ ma.

²⁵ Aˬ dui-euˬ Sahˬpaˬ Miˬyehˇ-aˬ, yawꞈ-ahˇ noeˬ tmˬ-eu deuˬ hawˇ-eu, yawꞈ-ahˇ poˆ-eu deuˬ-euˬ gʼaˇ duˬ, yaw muiˬ jeˬ biꞈ nehˬ-eu gʼaˬ meh.

²⁶ Sahˬpaˬ Miˬyehˇ ka kʼoꞈ le gaˇ, ciˬ cuˇ ni oˇ-awˇ dawˬ-eu-aˬ, aˬ dui gʼaˇ duˬ muiˬ dzehˬ-eu meh.

²⁷ Nyiˇ ngeh oˇ dzaw daˬ dzaw-euˬ-aˬ, tsawˇ haˬ zaˬ gʼaˇ duˬ muiˬ-eu meh.

²⁸ Sahˬpaˬ Miˬyehˇ ciˬ pi-euˬ jeˬ, ciˬ cuˇ ni daˬ-eu muiˬ dzehˬ meh.

²⁹ Myaˆ pyawˬ miˇ tsa tahˬ pahˬ taˬ-awˬ. Noeˬ tmˬ kʼaˇ tiˬ gaˇ jaˆ luꞈ meh.

³⁰ Naˬ tehˆ tehˆ-awˇ kʼehˬ nehˬ laꞈ kʼawꞈ, dawˬ gʼoꞈ maˬ doˆ ni ciˬ daˬ-awˬ.

³¹ Sahˬpaˬ Miˬyehˇ tsawˇ haˬ zaˬ-ahˇ, byehˇ tsehˆ tsehˆ-awˇ maˬ bi shaˬ-a.

³² Tsawˇ haˬ zaˬ-ahˇ bi noeˬ shaˬ kʼawꞈ, aˬ yawꞈ gaˬ-eu gʼaˬ kʼaˆ luꞈ meh.

³³ Tsawˇ haˬ zaˬ bi noeˬ shaˬ-eu lehˇ, daˇ miˬ-ehˇ aˬ yawꞈ maˬ jahˇ-a.

³⁴ Tsawˇ haˬ zaˬ-ahˇ nyehꞈ-awˇ paꞈ-awˇ, aˬ kuiˇ neh nawˬ tehˬ-eu tiˬ jeˬ,

³⁵ tsawˇ haˬ yawˬ gʼaˬ na-ahˇ oꞈ-eu, aˬ yawꞈ biꞈ-euˬ yaw tsaˬ yaw dawˇ, maˬ biꞈ ni zuiˆ gʼaˬ-eu tiˬ jeˬ,

³⁶ saˇ naˇ-ahˇ yaˇ kʼaˬ daˇ nehˬ ngeh, maˬ ngeuˇ gaˇ keuˆ jahˇ-eu tiˬ jeˬ, Sahˬpaˬ Miˬyehˇ maˬ haw nahˇ-a.

³⁷ Sahˬpaˬ Miˬyehˇ maˬ bi pyeuꞈ gaˇ, aˬ suˇ gʼaˬ neh dawˬ biꞈ nehˬ-awˇ, mˇ pyeuꞈ shaˇ pyeuꞈ nya-eu jawˇ ta.

³⁸ Muiˬ muiˬ doeˇ doeˇ kʼaˇ pyeuꞈ laˇ-euˬ, yawꞈ-euˬ dawˬ-ahˇ doˆ le-euˬ meh.

³⁹ Iˬ baˇ baˬ da kʼehˬ nehˬ laꞈ gaˇ, aˬ dui aˬ jeˬ ja-eu loˬ ta.

⁴⁰ Aˬ dui gaˇ ma saˇ shawˇ duˬ-awˇ, aˬ dui Sahˬpaˬ Miˬyehˇ jawˇ gaˇ, ciˬ pyawˇ-awˇ gʼoꞈ kʼoꞈ leˇ kaˇ-euˇ.

⁴¹ Mˬ taˆ yaw goˇ-euˬ Miˬyehˇ-ahˇ, aˬ dui nui ma pah mehˬ nehˬ-awˇ, heu loꞈ-ehˇ guiˬ lahˬ shaˇ kaˇ-euˇ.

⁴² “Nga maꞈ lehˬ-awˇ nawˬ-ahˇ puiˬ-euˬ, nawˇ iˬ baˇ maˬ pyehˬ nehˬ laꞈ-a.

⁴³ “Nui ma pehˇ-eu jeˬ tsahˇ lahˇ-awˇ, nga maꞈ-ahˇ gʼawˬ shaˬ maˬ gaˬ ni, teh teh-ehˇ sehꞈ nehˬ laꞈ-euˬ meh.

⁴⁴ Nga maꞈ shaˇ dawˬ maˬ gaˬ leˇ ni, nawˇ mˬ dmˇ tsahˇ lahˇ taˬ-euˬ meh.

⁴⁵ Tsawˇ jeuˬ dawˬ tawˆ luꞈ nga maꞈ-ahˇ, byehˇ dzeh ni nawˇ jahˇ laꞈ-euˬ meh.

⁴⁶ “Muiˇ-eu tsawˇ haˬ deuˬ dawˬ tawˆ luꞈ, nga maꞈ-ahˇ naˬ gʼa luꞈ-eu meh.

⁴⁷ Shaˬ zahˬ guˆ gaˆ-ahˇ daˬ luꞈ-awˇ, yaw cawˆ laꞈ kʼoeˇ jawˇ luꞈ-eu ma.

⁴⁸ Ngaˬ-euˬ tsawˇ haˬ shiˇ jiˇ-euˬ gaˇ, myaˆ biˇ lawˇ gawˆ yoeˇ le miˇ-a.

^49-50 Mˬ taˆ jawˇ-eu Sahˬpaˬ Miˬyehˇ, haw ka leꞈ-awˇ maˬ mawˇ kʼoeˇ keuˆ, ngaˬ-euˬ myaˆ biˇ lawˇ gawˆ yoeˇ-eu, maˬ paˇ tsiˇ leˇ nya-eu miˇ-a.

⁵¹ Meuˬ laꞈ kʼoeˇ-euˬ zaˬ miˬ zaˬ deuˬ, ya daˬ-euˬ gaˇ ngaˇ haw mawˇ ngeh, nui ma laꞈ kʼoeˇ gawˇ dui dui nya.

⁵² “Nui jaˆ mˇ taˬ-euˬ maˬ jaˆ gaˇ, aˇ jiˇ lahˇ ju kʼmˇ-eu loꞈ-ehˇ, muiˇ-eu deuˬ ngaˬ-ahˇ kʼmˇ-eu meh.

⁵³ Duˬ kʼahˬ-ahˇ dzeh ahˇ nehˬ laꞈ-awˇ, kʼaˬ lo ngawˬ tehˬ nehˬ laꞈ-euˬ meh.

⁵⁴ Uˬ duˬ iˇ cuꞈ dahˬ pymˬ laꞈ-awˇ, ya shiˇ miˇ-a lehˇ noeˬ-euˬ ma.

⁵⁵ “Duˬ kʼahˬ naꞈ-eu dawˬ dah jawˇ-awˇ, Sahˬpaˬ Miˬyehˇ-ahˇ kuˇ-euˬ ma.

⁵⁶ Caw ba nehˬ laꞈ lehˇ ngaˇ shaˇ gaˇ, nawˬ-euˬ naˬ bawˇ ciˬ kʼmˇ-euˬ meh.

⁵⁷ Ngaˇ kuˇ gaˇ gaˬ ngeh nawˇ oe-awˇ, taˬ guˆ lehˇ ehˇ nehˬ laꞈ-euˬ meh.

⁵⁸ “Sahˬpaˬ Miˬyehˇ nawˇ oe keuˆ-awˇ, ngaˬ-ahˇ ka kʼoꞈ nehˬ le-euˬ meh.

⁵⁹ Ngaˬ-ahˇ jahˇ coeˬ nehˬ laꞈ-euˬ gaˇ, Sahˬpaˬ Miˬyehˇ nawˇ mawˇ-euˬ meh. Ngaˬ-euˬ gʼaˇ duˬ yaˇ kʼaˬ daˇ-awˬ.

⁶⁰ Muiˇ-eu deuˬ neh ngaˬ-ahˇ bye-awˇ, yaw doeˇ jahˇ-euˬ nawˇ siˬ jiˇ meh.

⁶¹ “Yawꞈ maꞈ ngaˬ-ahˇ yaw doeˇ ngehˬ-euˬ, Sahˬpaˬ Miˬyehˇ nawˇ gaˬ jiˇ-awˇ, yawꞈ maꞈ bahˬ toˆ nawˇ siˬ jiˇ meh.

⁶² Uˬ taꞈ nah lah ngaˬ-euˬ gaˇ kawˆ, yawꞈ maꞈ bawˬ kʼoeˬ biˇ kʼoeˬ luꞈ meh.

⁶³ Uˬ bya bya-awˇ uˬ ciꞈ ciꞈ ni, yawꞈ maꞈ ngaˬ-ahˇ naˬ gʼa luꞈ meh.

⁶⁴ “Yawꞈ maꞈ yaw doeˇ jahˇ-euˬ miˇ neh, Sahˬpaˬ Miˬyehˇ nawˇ kʼehˬ nehˬ-awˬ.

⁶⁵ Yawꞈ maꞈ-ahˇ nawˇ yaˬ kʼehˇ yaˬ-awˇ, noeˬ shaˬ-eu jeˬ bi tahˬ puˬ-awˬ.

⁶⁶ Nui ma pehˇ-eu laꞈ kʼoeˇ teh-awˇ, mˬ heu siˬ-euˬ uˬ moˆ yawꞈ maꞈ, tiˬ gʼaˬ-iˬ maˬ bi dzeuˇ-iˇ ni, Sahˬpaˬ Miˬyehˇ nawˇ jahˇ nehˬ-awˬ.