Ngoeˇ dawˬ 2 - Akha

Yeˬluˇsaˬlehˬ meuˬ-ahˇ Sahˬpaˬ Miˬyehˇ kʼehˬ-euˬ

¹ “Sahˬpaˬ Miˬyehˇ nui ma pehˇ-awˇ, zahˇ tsui ni gʼeh-eu mˬ dmˇ neh, Ziˇoˬ meuˬ-ahˇ dehˬ kaˬ-euˬ meh. Iˇsaˬleˬlaˆ yaw shehꞈ kʼahˬ sehˇ, mˬ yaw goˇ-ahˇ bi jaˆ-euˬ kʼoeˇ, miˇ tsaˬ-ahˇ biˬ dzeh nehˬ-euˬ meh. Aˬ yawꞈ nui ma pehˇ-eu kʼoeˇ nah, Uˬ duˬ tahˬ nymˇ nymˇ ma-ahˇ kʼawꞈ, byehˇ dzeh nehˬ peuˬ gaˇ keuˆ ni meh.

² Yuˇdaˆ miˇ kʼahˬ pu dawˬ tawˆ luꞈ, gʼawˬ shaˬ tiˬ pawꞈ-iˬ maˬ gaˬ ni, Sahˬpaˬ Miˬyehˇ laˆ cawˆ-euˬ meh. Miˇ kʼahˬ kʼoeˇ-ahˇ loꞈ piˇ luꞈ-eu, ziꞈ dah ni gʼeh-eu taˆ deuˬ-ahˇ, aˬ yawꞈ laˆ byaˆ nehˬ jiˇ-euˬ meh. Miˇ kʼahˬ hawˇ-eu sahˬ paˬ deuˬ-ahˇ, miˇ tsa tuˆ ni gʼeu ka nehˬ-awˇ, daˬ ga-awˇ bi shaꞈ dawˇ-euˬ meh.

³ Aˬ yawꞈ nui ma pehˇ dui dui-awˇ, Iˇsaˬleˬlaˆ-euˬ gʼaˬ gʼaˬ siˬ, tuˆ paˆ dzeh-awˇ bi shaˬ-euˬ meh. Muiˇ-eu deuˬ-ahˇ ciˬ daˬ luꞈ ngeh, caw ba luꞈ-eu aˇ maˇ laꞈ-ahˇ, cawˬ kʼoꞈ nehˬ-awˇ bi shaˬ-euˬ meh. Miˬ dzaˬ puiˆ byoˆ jiˇ-euˬ loꞈ-ehˇ, kʼaˇ jaˆ-eu jeˬ dawˬ tawˆ luꞈ-ahˇ, aˬ yawꞈ laˆ cawˆ nehˬ jiˇ-euˬ meh.

⁴ Muiˇ-eu deuˬ neh jahˇ-euˬ loꞈ-ehˇ, nga maꞈ-ahˇ kaˆ ngoꞈ daˆ taˬ-awˇ, nga maꞈ nui kʼahˇ shiˇ-eu deuˬ-ahˇ, aˬ yawꞈ neh sehꞈ dzeh jiˇ-euˬ meh. Yeˬluˇsaˬlehˬ meuˬ heu laꞈ kʼoeˇ, aˬ yawꞈ-euˬ nui ma pehˇ-eu jeˬ, miˬ dzaˬ loꞈ-ehˇ luˬ laˇ-euˬ meh.

⁵ Muiˇ-eu tsawˇ haˬ tiˬ gʼaˬ loꞈ-ehˇ, Iˇsaˬleˬlaˆ-euˬ miˇ kʼahˬ-ahˇ, Sahˬpaˬ Miˬyehˇ laˆ cawˆ-euˬ meh. Sahˬ paˬ jawˇ-eu hawˇ nymˇ hawˇ-eu, ziꞈ dah ni gʼeh-eu taˆ deuˬ-ahˇ, aˬ yawꞈ laˆ cawˆ jiˇ nehˬ-euˬ meh. Yuˇdaˆ tsawˇ haˬ tsawˇ ngoeˇ ngoeˇ-eu, maˬ naˬ nya ni jahˇ nehˬ-euˬ meh.

⁶ Kmˇ cehˇ ngawˬ pyaˆ dzeh-eu loꞈ-ehˇ, yawꞈ-euˬ Uˬ duˬ tahˬ nymˇ nymˇ ma, yawꞈ ngawˬ pyaˆ-awˇ laˆ cawˆ-euˬ meh. Yawꞈ neh bawˬ-iˬ bi gʼeh-euˬ jawˇ duˬ, yawꞈ laˆ luˬ laˆ seˇ nehˬ-euˬ meh. Bawˬ-iˬ deuˬ hawˇ-eu jawˇ nah tawˬ-eu, yawꞈ neh laˆ byoˆ jiˇ nehˬ-euˬ meh. Sahˬ paˬ maˬ ehˇ, piˇ ma maˬ ehˇ, yawꞈ-euˬ nui pehˇ zaw leˇ-euˬ meh.

⁷ Aˬ yawꞈ-ahˇ lawˇ-euˬ lawˇ duˬ-ahˇ, Sahˬpaˬ Miˬyehˇ byehˇ dzeh nehˬ-awˇ, yawꞈ-euˬ hawˇ nymˇ lahˇ gawˬ taˬ-euˬ, bi laˆ cawˆ byoˆ jiˇ-eu gʼaˇ duˬ, muiˇ-eu deuˬ-ahˇ a nehˬ-euˬ meh. Uˬ duˬ tahˬ-eu zahˇ sahˇ kʼoꞈ bawˬ-iˬ, gʼeh ngeh guˇ-euˬ teˇ saˇ loꞈ-ehˇ, Uˬ duˬ tahˬ nymˇ nymˇ ma laꞈ kʼoeˇ, yawꞈ maꞈ gʼaˬ leˇ-euˬ guˇ-eu meh.

⁸ Ziˇoˬ meuˬ lahˇ coˬ pyaˆ dzeh ni, Sahˬpaˬ Miˬyehˇ noeˬ tsehˆ-euˬ meh. Dawˬ tawˆ luꞈ coˬ pyaˆ dzeh jiˇ ni, yawꞈ neh laꞈ dza mˇ gʼaˬ-euˬ meh. Meuˬ lahˇ hawˇ-eu loꞈ-eu nymˇ goˇ, dawˬ tawˆ luꞈ cawˆ-iˇ jiˇ-euˬ meh.

⁹ Lahˇ kʼehˬ laˇ gʼoˆ miˇ tsa pahˬ-awˇ, gʼoˆ bahˬ dawˬ tawˆ kʼehꞈ jiˇ-euˬ meh. Sahˬ paˬ sahˬ ma deuˬ dawˬ tawˆ luꞈ, aˬ cawˬ neh nyehꞈ byoˆ jiˇ-euˬ meh. Zahˇ dawˬ kʼoꞈ dawˬ maˬ paˇ baw-ehˇ, Miˬyehˇ dawˬ ngehˬ dah-eu deuˬ kʼawꞈ, Sahˬpaˬ Miˬyehˇ maˬ pah mehˬ-ehˇ, Miˬyehˇ-euˬ dawˬ maˬ ngehˬ nya-a.

¹⁰ Ziˇoˬ meuˬ-euˬ tsawˇ mawˬ tsawˇ kʼaˆ, uˬ duˬ kʼaˬ lehˇ jehˆ daˆ taˬ-awˇ, guˬ daˇ pehˇ zeuˇ mehˬ tsoeˬ dm-awˇ, miˇ tsa ciˬ cuˇ ni dzuˇ-eu meh. Ziˇoˬ-euˬ aˬ buˇ miˬ daꞈ deuˬ, miˇ tsa uˬ duˬ tahˬ moꞈ-eu meh.

¹¹ Ngaˬ-euˬ myaˆ nuiˆ maˬ ngoeˇ coeˇ-ehˇ, ngaˬ-euˬ saꞈ laˇ maˬ shaˬ coeˇ nya. Ngaˬ-euˬ tsawˇ haˬ shiˇ jiˇ-euˬ gaˇ, nui ma tsawˬ paˆ shaw-euˬ miˇ-a. Zaˬ nahˬ hawˇ-eu zaˬ yaw nyiˇ deuˬ, meuˬ-euˬ gʼahˇ ceh gaˇ ma doe ni, maˬ shiˇ tsehˆ-ehˇ ga luꞈ-eu meh.

¹² Guiˇ bi deuˆ tahˬ-euˬ deuˬ loꞈ-ehˇ, meuˬ-euˬ gʼahˇ ceh gaˇ ma doe ni, myaꞈ leˇ taˬ-awˇ ga luꞈ-eu meh. “Hawˬ bi dzaˬ nehˬ laꞈ-awˬ leˇ” lehˇ, aˬ ma-ahˇ shaˇ-eu zaˬ kʼoeˇ deuˬ, aˬ ma deuˬ-euˬ bawˇ kʼahˇ laꞈ kʼoeˇ, saꞈ gʼawˇ tsehˆ-eu shaˬ luꞈ-eu meh.

¹³ Oˇ, Yeˬluˇsaˬlehˬ meuˬ-oˇ, nawˬ-ahˇ aˬ joˆ-ehˇ ehˇ paˬ nga. Aˬ jeˬ-ahˇ shaˇ cehˆ mehˬ paˬ nga. Aˬ joˆ-ehˇ muˇ taˬ nehˬ paˬ nga. Oˇ, Yeˬluˇsaˬlehˬ meuˬ-oˇ, nawˬ-euˬ yaw cawˆ, laˆ shaˆ naꞈ-eu, aˬ suˇ gʼaˬ laˆ muiˬ kʼoꞈ nya nmˇ.

¹⁴ Miˬyehˇ gʼaˇ duˬ ngehˬ dah-eu deuˬ, nawˬ-ahˇ jaˬ myawꞈ myawꞈ nehˬ-euˬ meh. Nawˬ-ahˇ aˬ cawˬ maˬ bi nyehꞈ ni, nawˬ-euˬ yaw lehˬ iˬ baˇ deuˬ-ahˇ, aˬ yawꞈ maꞈ maˬ pah doˆ nehˬ-a. Aˬ yawꞈ maꞈ ngehˬ-euˬ tmˇ-euˬ jeˬ, nawˬ-ahˇ gaˇ ma sheuˬ bahˬ-euˬ meh.

¹⁵ Iˇ tsehˆ laˇ tsehˆ-eu tsawˇ haˬ deuˬ, nawˬ-ahˇ mawˇ ngeh laꞈ kʼawˆ tehˆ meh. Yeˬluˇsaˬlehˬ meuˬ-ahˇ haw-awˇ, uˬ duˬ juiꞈ juiꞈ-ehˇ uiˇ-eu meh. “Aˇ gʼehˇ muiˬ dui byah dui dui-eu, miˇ kʼahˬ dawˬ tawˆ laˬ kʼaˬ cehˇ duˬ, meuˬ muiˬ ehˇ-eu heu meuˬ meh loˇ.

¹⁶ Nawˬ-ahˇ kʼaˇ muiˇ-eu deuˬ dawˬ tawˆ, nawˬ-ahˇ bye-awˇ naˬ gʼa luꞈ meh. Aˬ yawꞈ maꞈ seuˬ tsehꞈ tehˬ taˬ-awˇ, nawˬ-ahˇ lmˬ lmˬ-ehˇ ehˇ luꞈ-eu, “Aˬ yawꞈ-ahˇ laˆ cawˆ gʼaˬ-euˬ ma. Aˇ nah heu nah bi yehꞈ laˇ ni, nga maꞈ dawˬ luꞈ-eu dza laˇ-euˬ, nymˬ-mˇ myaˆ ya mawˇ duˬ miˇ-a.”

¹⁷ Sahˬpaˬ Miˬyehˇ noeˬ taˬ-euˬ jeˬ, aˬ yawꞈ jahˇ ma lehˇ ehˇ-euˬ jeˬ, nymˬ-mˇ bi keuˆ le gʼaˬ-euˬ meh. Aˇ hu neh ehˇ taˬ-euˬ loꞈ-ehˇ, gʼawˬ shaˬ gaˬ-eu jeˬ maˬ ahˇ ni, yaw cawˆ jeˬ bi keuˆ le-euˬ meh. Muiˇ-eu deuˬ neh bi gʼaˬ leˇ-awˇ, nawˇ cawˆ-iˇ-awˇ ya shaˬ luꞈ gaˇ, haw-awˇ laˬ kʼaˬ bi cehˇ-euˬ meh.

¹⁸ Sahˬpaˬ Miˬyehˇ-ahˇ gaˬ leˇ ni, Ziˇoˬ meuˬ-oˇ guˇ dui dui-awˬ. Uˬ ciꞈ maˬ ehˇ, nah gʼahˇ maˬ ehˇ, myaˆ biˇ lawˇ gawˆ bi yoeˇ ka-awˬ. Gʼaˬ naˬ taˬ naˬ, myaˆ nuiˆ taˬ miˆ.

¹⁹ Uˬ ciꞈ miˇ lah ni toˇ toˇ-ehˇ, Sahˬpaˬ Miˬyehˇ-ahˇ guˇ gaˬ-awˬ. Meuˬ-euˬ gʼahˇ ceh gaˇ ma doe ni, mehꞈ-eu shuꞈ-eu shiˇ leˇ luꞈ-eu, nawˬ-euˬ aˬ buˇ aˬ li deuˬ-ahˇ, Sahˬpaˬ Miˬyehˇ gʼawˬ shaˬ gaˬ ni, nawˬ-euˬ nui ma tahˬ kʼaˇ nehˬ-awˬ.

²⁰ Sahˬpaˬ Miˬyehˇ-oˇ haw leꞈ sheˇ. Nawˬ neh kʼehˬ-euˬ tsawˇ haˬ deuˬ-ahˇ, haw gʼeh leꞈ-awˇ shaˇ noeˬ haw sheˇ. Yawˬ ha gaˬ-eu zaˬ-euˬ shaˬ jiˇ, aˬ ma deuˬ dzaˬ kʼmˬ tehꞈ-a loˇ. Piˇ ma hawˇ-eu bawˇ lawˇ peh deuˬ, Sahˬpaˬ Miˬyehˇ-euˬ nymˇ laꞈ kʼoeˇ, bi sehꞈ ahˇ taˬ-euˬ tsaˬ meh loˇ.

²¹ Tsawˇ mawˬ zaˬ guˬ tiˬ gaˇ shiˇ-awˇ, meuˬ-euˬ gʼahˇ ceh gaˇ ma doe ni, kʼaˬ lehˇ tsahˬ-ahˇ ga luꞈ-eu meh. Aˬ li zaˬ guˬ aˬ buˇ zaˬ guˬ, mi cehˇ neh bi sehꞈ dzeh-euˬ meh. Nawˬ-euˬ nui ma pehˇ laˇ ngeh nah, gʼawˬ shaˬ gaˬ-eu jeˬ maˬ ahˇ ni, aˬ yawꞈ maꞈ-ahˇ sehꞈ dzeh-euˬ meh.

²² Bawˬ-iˬ gʼeh gaˇ kuˇ uiˬ-euˬ loꞈ-ehˇ, shaˬ zahˬ guˆ gaˆ ngaˬ-euˬ tiˬ jawˬ, nawˬ neh teh uiˬ jiˇ leꞈ-euˬ meh. Sahˬpaˬ Miˬyehˇ nui pehˇ aˇ nah, cehˆ dzeuˇ nya-eu gʼaˬ maˬ jawˇ-a. Ngaˇ gaˬ-awˇ bo saˆ huiˬ taˬ-euˬ, ngaˬ-euˬ aˬ buˇ aˬ li deuˬ-ahˇ, muiˇ-eu deuˬ neh sehꞈ jiˇ-euˬ meh.