Ngoeˇ dawˬ 1 - Akha

Yeˬluˇsaˬlehˬ meuˬ shaˬ zahˬ mˇ-eu

¹ Tsawˇ haˬ tiˬ teuˇ jawˇ-euˬ meuˬ kʼoeˇ, nymˬ-mˇ ciˬ cuˇ ni jaˆ-eu meh. Miˇ kʼahˬ tsawˇ jeuˬ tiˬ tahˇ tiˬ yaˇ, yaw zeu baw dui dui-euˬ meuˬ kʼoeˇ, miˬ coeˬ coeˬ-iˇ gaˇ duˇ-eu meh. Meuˬ kʼaˇ jaˆ-eu dawˬ tawˆ mehˬ shi, sahˬ paˬ zaˬ miˬ-ahˇ duˇ-euˬ meuˬ, aˬ cawˬ zaˬ kʼaˆ pyeuꞈ-iˇ-euˬ meh.

² Uˬ ciꞈ miˇ lah-ehˇ ngoeˇ bya-awˇ, baˬ ba myaˆ biˇ lawˇ gawˆ yoeˇ kʼawꞈ, aˬ yawꞈ-ahˇ gaˬ-euˬ tsawˇ haˬ deuˬ, haw cawˬ le-eu gʼaˬ maˬ jawˇ-a. Cawˬ deuˬ yawꞈ-ahˇ saˇ jaˇ puiˬ-awˇ, muiˇ-eu tsawˇ haˬ pyeuꞈ jiˇ-euˬ meh.

³ Aˬ cawˬ kʼehˬ-eu kʼaˆ-eu uˬ moˆ, Yuˇdaˆ tsawˇ haˬ bi nyehꞈ byoˆ-awˇ, aˬ cawˬ miˇ kʼahˬ doe ni jawˇ-awˇ, gʼaˬ naˬ naˬ dah kʼaˇ maˬ za-ehˇ, muiˇ-eu deuˬ neh loꞈ jawˬ taˬ-euˬ, cehˆ dzeuˇ-eu gaˇ ma maˬ dahˇ-a.

⁴ Zahˇ sahˇ kʼoꞈ bawˬ-iˬ gʼeh yamˬ tsaˬ kʼawꞈ, tiˬ gʼaˬ-iˬ maˬ laˇ-eu miˇ neh, Ziˇoˬ gaˇ ma ngoeˇ luꞈ-eu meh. Yawꞈ-euˬ lahˇ kʼehˬ ciˬ cuˇ jaˆ-awˇ, piˇ ma deuˬ noeˬ shaˬ-eu toˇ-awˇ, dawˬ caˇ zaˬ miˬ nui noeˬ shaˬ-awˇ, shaˬ zahˬ naꞈ dui dui luꞈ-eu meh.

⁵ Iˬ baˇ mˇ dui dui-euˬ miˇ neh, Sahˬpaˬ Miˬyehˇ yawꞈ-ahˇ kʼehˬ-awˇ, muiˇ-eu deuˬ gʼaˬ bi kʼaˆ laˇ-awˇ, yawꞈ-euˬ kʼoeˇ taˆ bi dzoeˬ-euˬ meh. Yawꞈ-euˬ aˬ buˇ aˬ li deuˬ-ahˇ, muiˇ-eu deuˬ nyehꞈ byoˆ gʼeh-euˬ meh.

⁶ Yeˬluˇsaˬlehˬ yaw shehꞈ kʼahˬ sehˇ, yawꞈ-ahˇ byehˇ-awˇ cehˆ jiˇ-euˬ meh. Yawꞈ-euˬ sahˬ paˬ sahˬ ma kʼoeˇ deuˬ, dzaˇ mehꞈ laˇ-euˬ kʼaˬ tsehˆ loꞈ-ehˇ, shaˬ teh teh-eu deuˬ-euˬ mehˬ shi, maˬ cehˆ dzeuˇ nya gaˇ duˇ-eu meh.

⁷ Yeˬluˇsaˬlehˬ shaˬ zahˬ mˇ ngeh, aˇ hu pyeuꞈ dzeuˇ jaˆ dzeuˇ yaꞈ-euˬ, poeˬ dui lawˬ dui dui-euˬ kʼoeˇ-ahˇ, nui ma laꞈ kʼoeˇ noeˬ mawˇ-eu meh. Muiˇ-eu laꞈ-ahˇ yawꞈ ahˇ leˇ ngeh, ka kʼoꞈ nehˬ-eu gʼaˬ maˬ jawˇ-a. Aˬ yawꞈ coˬ-iˇ cawˆ-iˇ luꞈ gaˇ, muiˇ-eu deuˬ haw-awˇ uiˇ-eu meh.

⁸ Yeˬluˇsaˬlehˬ iˬ baˇ mˇ-eu, aˇ dzehˬ dzeuˇ-awˇ jawꞈ dui dui meh. Yawꞈ-ahˇ taˬ huiˬ taˬ mahˇ-euˬ deuˬ, yawꞈ-ahˇ neˇ myawˆ ni haw mawˇ-awˇ, yawꞈ-ahˇ haw bye dui dui-euˬ meh. Yawˬ haˇ yawˬ ha paˇ noeˬ shaˬ-awˇ, myaˆ pyawˬ dehˬ kaˬ-awˇ toˇ-eu meh.

⁹ Pi di yaw jawꞈ mawˇ jiˇ laˇ-awˇ, yawˬ ha-euˬ daˬ maˬ shaˇ noeˬ-a. Coˬ dzeh-iˇ-euˬ naˇ dui dui-awˇ, haw cawˬ nehˬ-eu gʼaˬ maˬ jawˇ-a. “Sahˬpaˬ Miˬyehˇ ngaˬ-ahˇ haw sheˇ. Muiˇ-eu deuˬ ngaˬ-ahˇ gʼaˬ leˇ-awˇ, ngaˇ ya daˬ luꞈ gaˇ haw le sheˇ.”

¹⁰ Yawꞈ-euˬ pyuˇ shuiˇ myawˬ gahˬ kʼoeˇ taˆ, muiˇ-eu deuˬ aˬ laꞈ cawˬ leꞈ-awˇ, lawˇ ciꞈ zaˬ maˬ ya le-a lehˇ, Sahˬpaˬ Miˬyehˇ daˇ tsehˆ taˬ-euˬ, muiˬ-eu shawˇ-eu jawˇ duˬ laꞈ kʼoeˇ, aˬ cawˬ tsawˇ jeuˬ deuˬ le uˇ gaˇ, aˬ yawꞈ myaˆ nuiˆ ya mawˇ-euˬ meh.

¹¹ Yawꞈ-euˬ tsawˇ haˬ deuˬ mahˇ mahˇ-ehˇ, kʼaˬ meh-ahˇ dzaˬ-eu poˆ luꞈ meh. Aˬ yawꞈ maꞈ maˬ ya shiˇ tsehˆ ni, pyuˇ shuiˇ neh hawˬ paˇ dzaˬ-eu meh. “Ngaˬ-euˬ shaˬ zahˬ naꞈ dui dui gaˇ, Sahˬpaˬ Miˬyehˇ haw nehˬ laꞈ sheˇ.

¹² “Kʼaˇ iˇ kʼaˇ laˇ tsehˆ-eu deuˬ-oˇ, naw maꞈ ngaˬ-ahˇ maˬ taꞈ te loˇ. Sahˬpaˬ Miˬyehˇ nui ma pehˇ-awˇ, ngaˬ-euˬ kʼoeˇ taˆ bi keuˆ le-euˬ, ngaˇ mˇ luꞈ-eu shaˬ zahˬ naˆ ni, shaˬ haw mˇ haw-euˬ jawˇ meh loˇ. Naw maꞈ haw le-awˇ shaˇ noeˬ sheˇ.

¹³ “Mˬ-ahˇ neh miˬ dzaˬ pyehˬ leꞈ-awˇ, shaˬ yoeˬ-ahˇ bi puiˆ keuˆ leꞈ-awˇ, aˬ kuiˇ-ahˇ lahˇ ju kʼmˇ paꞈ-awˇ, sehˇ pyaˆ-ehˇ bi coˬ-iˇ laꞈ-awˇ, naˇ dui dui-awˇ myaꞈ leˇ-euˬ gaˇ, nah lah-ehˇ byehˇ dzeh laꞈ-euˬ meh.

¹⁴ “Ngaˬ neh mˇ-euˬ iˬ baˇ dawˬ tawˆ, aˬ yawꞈ ngaˬ-ahˇ ciˬ pi leꞈ-awˇ, kawˬ lahˇ-ahˇ paꞈ gʼeu nehˬ laꞈ-euˬ, maˬ daˬ coeˇ ni shiˇ leˇ miˇ-a. Sahˬpaˬ Miˬyehˇ ngaˬ-ahˇ kʼehˬ-awˇ, ngaˇ maˬ ciˬ daˬ coeˇ ni kʼaˆ-eu, muiˇ-eu deuˬ-euˬ aˬ laꞈ laꞈ kʼoeˇ, ngaˬ-ahˇ ciˬ ahˇ nehˬ laꞈ-euˬ meh.

¹⁵ “Gʼaˬ kʼaˆ-eu ngaˬ-euˬ yehˇ deuˬ-ahˇ, Sahˬpaˬ Miˬyehˇ naˬ gʼa haw-awˇ, guiˇ maꞈ tiˬ maꞈ pyehˬ gʼeh leꞈ-awˇ, zaˬ guˬ deuˬ-ahˇ bi sehꞈ-euˬ meh. Aˬ gaꞈ dzaˇ uiˇ nawˬ-eu loꞈ-ehˇ, Yuˇdaˆ miˇ kʼahˬ-euˬ miˬ daꞈ-ahˇ, Sahˬpaˬ Miˬyehˇ kʼehˬ nehˬ-euˬ meh.

¹⁶ “Kʼoeˇ miˇ neh ngaˇ tsawˇ ngoeˇ ngoeˇ-awˇ, myaˆ biˇ yoeˇ kʼaˇ doˆ le miˇ-a. Haw cawˬ le-eu gʼaˬ maˬ jawˇ-ehˇ, gʼaˬ biꞈ nehˬ laꞈ-eu maˬ jawˇ-a. Muiˇ-eu deuˬ ngaˬ-ahˇ deuˆ gʼaˬ-awˇ, zaˬ deuˬ myawˬ gahˬ smˬ jiˇ-euˬ meh.”

¹⁷ Ziˇoˬ aˬ laꞈ cawˬ miˇ leꞈ gaˇ, caw ba nehˬ-eu gʼaˬ maˬ jawˇ-a. Yaˬkoˆ dawˬ peh kʼaˇ jawˇ-eu deuˬ, dawˬ tawˆ luꞈ Yaˬkoˆ-ahˇ muiˇ ni, Sahˬpaˬ Miˬyehˇ dawˬ biꞈ-euˬ meh. Yawꞈ maꞈ mehˬ shi Yeˬluˇsaˬlehˬ, maˬ shawˇ-eu jeˬ pyeuꞈ gaˇ duˇ meh.

¹⁸ “Sahˬpaˬ Miˬyehˇ tsaˬ meh dawˇ meh. Yawꞈ-euˬ dawˬ-ahˇ ngaˇ puiˬ-euˬ ma. Tsawˇ haˬ dawˬ tawˆ luꞈ naˇ haˬ sheˇ. Ngaˇ daˬ luꞈ-eu jeˬ-ahˇ haw sheˇ. Ngaˬ li ngaˬ buˇ zaˬ guˬ dawˬ tawˆ, aˬ cawˬ neh nyehꞈ gʼeh jiˇ-euˬ meh.

¹⁹ “Nui ma gm-euˬ deuˬ-ahˇ kuˇ kʼawꞈ, ngaˬ-ahˇ byehˇ dzeh nehˬ laꞈ-euˬ meh. Piˇ ma deuˬ hawˇ-eu aˬ yuiꞈ deuˬ, yawˬ ha maˬ shiˇ tiˬ pyaˬ jeuˬ-awˇ, dzaˬ-eu dawˇ-eu jeˬ poˆ poˆ-ehˇ, meuˬ-euˬ laꞈ kʼoeˇ shiˇ jiˇ-euˬ meh.

²⁰ “Ngaˬ-euˬ nui ma shaˬ zahˬ naꞈ-awˇ, ngaˬ-euˬ saꞈ laˇ shaˬ zahˬ mˇ gaˇ, Sahˬpaˬ Miˬyehˇ nawˇ haw le sheˇ. Ngaˬ-euˬ iˬ baˇ-ahˇ shaˇ noeˬ-eu, nui ma tsawˬ paˆ-iˇ-euˬ miˇ-a. Lehˆ kawˆ doe ni tsawˇ haˬ sehꞈ-awˇ, iˇ kahˇ laꞈ kʼoeˇ kʼawꞈ shiˇ luꞈ meh.

²¹ “Ngaˇ mahˇ luꞈ gaˇ naˇ haˬ le sheˇ. Haw cawˬ nehˬ le-eu maˬ jawˇ-a. Nawˬ neh ngaˬ-ahˇ bi shaˬ-euˬ gaˇ, muiˇ-eu deuˬ laˬ kʼaˬ cehˇ luꞈ meh. Nawˬ neh saˇ jaˇ dzaˬ-euˬ aˇ nah, yaw kawˇ ma-ehˇ bi keuˆ le-awˇ, Nymˬ-mˇ ngaˇ ya daˬ-eu loꞈ-ehˇ, muiˇ-eu deuˬ-ahˇ paˇ bi daˬ-awˬ.

²² “Aˬ yawꞈ maꞈ-euˬ yaw lehˬ dawˬ tawˆ, nawˬ-euˬ mehˬ shi bi keuˆ le-awˇ, ngaˬ neh mˇ-euˬ iˬ baˇ baˬ da, nawˬ neh ngaˬ-ahˇ kʼehˬ-euˬ loꞈ-ehˇ, aˬ yawꞈ maꞈ-ahˇ kʼawꞈ kʼehˬ nehˬ-awˬ. Shaˬ zahˬ naꞈ-awˇ mahˇ luꞈ-eu heu, nui ma shiˇ tsehˆ shaw-iˬ miˇ-a.”